Apocalipsis 19 - Biblia Dc en Mixe de Quetzaltepec

¹ Ko jëtu'un y'ëkjajty, ënätës nmëtooy ko mayjyä'äy kyajpxtë tsajpjotm ets mëk y'ëna'antë: Tukxoontä'äky mëjjawë yë Dios yë xyëëw nyaxëty, ja nitsokën, ja mëj'ajtën jaanty'ajtën ets ja mëk'ajtën Dios yë jyä'ä'ajtääpy,

² jä'ä ko mëtëy ets tëyajtën yë'ë tyiytyuny ets pyaye'ey. Tëë t'ëyo'onmo'oy ja mëj ku'into'oxy mëti'ipë ja naaxwiinyëtë ja'ay të tyajma'atyën mëët ja y'ëxëëktu'unën, tëë ja Dios tëytyuny ets tpaye'ey ko të yaj'o'kxëty ja tyuunpëtëjk.

³ Tääts jatëkok y'ënaankojnëpë: Tukxoontä'äky mëjjawë yë Dios yë xyëëw nyaxëty. Nijëna'a yë kajpn kyatooy'ëtukëty, xëmë jam jok yaj'ixëty.

⁴ Tääts ja i'px taxkpë ja mëjja'aytyëjk ets ja nimajktaxkpë juuky'ajtpë nyäkyoxtënaaytyakëtë naaxkëjxy ets ja Dios tmëjja'aw tjaantyja'awëtë, mëti'ipë u'unyääpyën ma kutujktaknën ets y'ënantë: Tukxoontä'äky mëjjawë yë Dios yë xyëëw nyaxëty.

⁵ Ënet yajmëtooy ja ayuk ma ja kutujktaknën: Miitsëty, mëti'ipë myëtuuntëpën ets wyintsë'këtëpën ja Dios, mëjpë mutskpë, mëjjaw jaantyjyawëtë yë nTios'ajtëmë.

Ko yajnixëëwtunëty mëti'ipë yajtijpën Kupixyny U'unk.

⁶ Tääts nmëtooyës ijxtëm ja mayjyä'äy kyajpxtën, ijxtëm ja mëjnëë y'iitsy kyomyën ets ijxtëm ja ënääwën y'ënä'änyën: Tukxoontä'äky mëjjawë yë Dios yë xyëëw nyaxëty, jä'äkyëjxm ko yajkutujktsoony, ja Wintsën Mëti'ipë Maaytyääyëpën Winë.

⁷ Nxoontakëmë, n'ijtëmë nxo'onëmë ets nmëjja'aw njaantyjya'awëmë, jä'ä ko tëë ja xëëw tpaaty ma ja Dios U'unk mëët ja jyä'äy nyäpyaata'anyën, ets mëët pyëka'any y'uuka'any, tëë ja jyä'äy nyäy'ixkukëtë.

⁸ Dios tëë tyajkutuky ets ja jyä'äy nyäxyoxëtëty mëët ja oywyit poopë mëti'ipë ajajp atë'kxpën. Ja oypyë poop wit, yë'ë jëtu'un yajtijp mëti'ipë tyuuntëpën ja Dios ja nyaax kyajpn.

⁹ Tääts ja tsajpjotmëtë kukäjpxy xynyëmaayës: Këxja'a: Akujk jotkujk mëti'ipë të yajwowtën ma yajnixëëwtunyën ja Kupixyny U'unk. Ets jyaak'ënany: Ya'atë jëtu'un tëy'ajtën'ajtp mëti'ipë Dios kyäjpxypën.

¹⁰ Täätsës nnäkyoxtënaaytyakë tsajpjotmëtë kukäjpxy wyintum ets nwintsë'ëkëja'anyës e yë'ë je'eyës xynyëmaay: Këtii jëtu'un m'ëtë'ëtsy. Tiosës näjyëtu'un xytyuunpë'ajtp, ijxtëm mijtsën ets ijxtëm ja mmëku'uktëjkën mëti'ipë pyanëjkxtëpën ja aaw ayuk mëtëypyë, mëti'ipë ja Jesús kyajpxwa'kxën. Winjawë wintsë'ëkë ja Dios y'itëty. Ets jyaak'ënany: Ya'atë tëyajtën, yë'ë ja Dios ja kyäjpxynyajxpëtëjk winma'anymyooyë.

Ja mëti'ipë tyuk'u'unyääpyën ja poop kwaay

¹¹ Tääts n'ijxyës ko ja tsajp y'ëwatsy. Jamts kyëxë'ëky tu'uk ja poop kwaay ets mëti'ipë tuk'u'unyääyëpën jä'ä xyëëwajtyp, Mëtëypyë ets ja Oypyë winë tunyën, jä'ä ko tëytyuunp, paye'epy ets tsiptuump jä'ä ijxtëm pyaat'atyën.

¹² Janty ajajp ja wyiin yaj'ixy ijxtëm ja jëënyä'änkën ets may ja kyujän tmëëtëty ma kyëpajkën. Jamts tu'uk ja xëëw kyuja'ayëty, ka'ap pën t'ijxkäpy, yi'iyë kë'ëm nyija'ap.

¹³ Aak ne'pnymyëët ja wit mëti'ipë wyit'ajtypyën ets jä'ä xyëëwajtyp: Ja Dios ja y'aaw y'ayuk.

¹⁴ Ets ja tsiptuunpëtëjk tsajpjotmëpë pyaye'oyë, janty oyëty ja wyit yaj'ixtë, janty poopëty, janty wa'atsëty ets aak poop këwaaykyëjxm y'u'unyëtë.

¹⁵ Y'aawjoty jëtu'un jap pyëtsimy të tu'uk ja tëypyujxn mëti'ipë jëjpën, ets yë'ë mëët tyajtsëtyuta'any ja naaxwiinyëtë ja'ay. Ënet ja Dios jää y'ënä'äma'any mëët ja kuttujkën. Ets yë'ë kë'ëm wyintäänäämpy ja tsatsymtsya'am ets tsatym nyëë tyajpëtsëma'any ma ja Dios mëti'ipë maaytyääyëpën winë ja tsyip y'äkë.

¹⁶ Ma kyë'ëjën ets ma kyë'ëpoontyën jam tmëët'aty këxja'ay: Yajkutujkpë kopk ma ja yajkutujkpëtyën ets Wintsënkopk ma ja wintsënëtyën.

¹⁷ Ënet n'ijxyës tu'uk ja tsajpjotmëtë kukäjpxy tyänë xëëwkëjxm ets ayaxp ajojkp t'ënëmaay ni'ëmukë ja jëyujk mëti'ipë kääkëtijtëpën tsajpwinm: Mintë. Nämyujkta'ajëtë ma ja Dios ja mëj a'ux tyaka'anyën.

¹⁸ Mintë ets xytsyu'utstëty xyjyë'kxtëty ja yajkutujkpë, ja tsyiptuunpëtëjk, ja jotmëkja'aytyëjk; näjyëtu'un xytsyu'utstëty ja kwaay ets mëti'ipë tyuk'u'unyääytyëpën. Oy tyimtiijëty xytsyu'utstëty, wä'än tkamëtuunpëty, wä'än tyajja'aytyuunpëty, wä'än tmëj tmutskëty.

¹⁹ Tääts n'ijxyës ja mëj jëyujk ets ja naaxwiinyëtë yajkutujkpëtëjk mëët ja tsyiptuunpëtëjkëty, tëë nyämyujkta'ajëtë ets mëët tsyiptuna'antë ja ja'ay mëti'ipë ja poop kwaay tyuk'u'unyääpyën ets ja tsyiptuunpëtëjkëty.

²⁰ E yajmajts ja mëj jëyujk mëët ja käjpxynyajxpë win'ë'ëmpë, mëti'ipë ënety ja mëj jëyujk ja myëj'ajtën të tyaj'ijxën yë'ë wyintuuy, ijxtëm ja Dios ja jyä'äjën ets tukwin'ëëny mëti'ipë ënety të tkupëktën ja mëj jëyujk ja tsya'a ets të twintsë'ëkëtë ja awinax. Ënet ajuukyë nimäjtsk yajkujëpijpëtyë ma ja mejy tyoyën mëët ja azufre.

²¹ Ja wiinkpë, ojts y'o'kta'atë mëët ja tëypyujxn mëti'ipë jap y'aawjoty pëtsëëmpën mëti'ipë tyuk'u'unyääpyën ja poop kwaay ets ni'ëmukë tsyu'tstaayëtë ku'uxyë ja jëyujk mëti'ipë kääkëtijtëpën.