Apocalipsis 16 - Biblia Dc en Mixe de Quetzaltepec

Ja wëxtujkpë ja a'ukën

¹ Ets nmëtooyës ja ayuk mëk ma ja Dios ja tyëjkën ets yaj'ënëëmëtë ja niwëxtujkpë ja tsajpjotmëtë kukäjpxy: Nëjkxtë naaxwiiny ets xyajtukwa'atstëty yë a'ukën mëti'ipë myëët'ajtypyën yë ëyo'on mëët ja Dios ja tsyip y'äkë.

² Ënet mëtu'uk ja tsajpjotmëtë kukäjpxy tyajtukwatsy ja y'a'ukën naaxwiiny ets ni'ëmukë ja ja'ay pyataayëtë ja ëxëëk pu'uts mëti'ipë ja mëj jëyujk ja nyi''ijxpät myëët'ajtëpën ets mëti'ipë wyintsë'këtëp ja awinax.

³ Tääts ja mëmäjtskpë ja tsajpjotmëtë kukäjpxy tyajtukwatsy ja y'a'ukën mejyjoty ets ja mejy y'awinpijty ijxtëm yë ja'ay nye'pnyën mëti'ipë ja'ay të yaj'ookyën. Jëtu'unts y'o'ktaaytyë mëti'ipë mejyjoty juuky'ajtëpën.

⁴ Tääts ja mëtëkëëkpë ja tsajpjotmëtë kukäjpxy tyajtukwatsy ja tyexy mëjnëëjoty ets maajëty ja nëëkopkën ets näjyëtu'un jya'ajtaay ne'pynyën.

⁵ Ënet nmëtooyës ko y'ënä'äny ja tsajpjotmëtë kukäjpxy mëti'ipë kyëwent'ajtypyën ja nëë: Dios, mijts m'ijtp ets mijts m'itaanp, mëtëy winë xynyipaye'ey. Jëtu'un mijts të mtëytyuny ets të mpaye'ey ijxtëm pyaat'atyën.

⁶ Jä'ä ko tëë tyajtsun tyajtaxtë ja mmëpëjkpëtëjk ets ja mkäjpxynyajxpëtëjk; paaty mijts ja nëë të xyajwinpity ne'pynyën ets yë'ë t'uuktëty, jëtu'un ijxtëm pyaat'atëtën.

⁷ Näjyëtu'unës nmëtooy ja ayuk ma ja wintsë'këntyaknën ko y'ënä'äny: Tëy jëtu'un, Wintsën Mëti'ipë Maaytyääyëpën Winë, mëtëy mijts mtëytyuny ets mpaye'ey, ijxtëm pyaat'atyën.

⁸ Ets ja mëmajktaxkpë ja tsajpjotmëtë kukäjpxy tyajtukwatsy ja tyexy xëëwkëjxm ets ja xëëw ja mëk'ajtën yajmooy ets tyajxëëw'an o'kta'ajëty ja ja'ay.

⁹ Jëtu'un ja ja'ay y'o'ktaaytyë mëët ja xëëw'an, je'eyëp ko oy jyajëtu'unënäty ka'ap ninu'un ja wyinma'any tyaj'o'oyëtë; ka'ap ja Dios tja'amyäjtstë mëti'ipë yäjkpyën ja ëyo'on, wäänëni'ik tjaaktimpyokytyuuntë.

¹⁰ Ënet ja mëmëkoxkpë ja tsajpjotmëtë kukäjpxy tyajtukwatsy ja y'a'ukën ma ja mëj jëyujk kutujktaknën ets kyootsëtyääy mapaat ja jyä'äy t'ëne'emyën, jëtu'unts ja ja'ay je'eyë yä'än t'atsu'tsmuktë mëët ja pëjkën ato'onën;

¹¹ ka'ap t'ëxmajtstë ja pyokytyu'unënëty, wäänëni'ik tmëtëkooy'ëtëtstë ja Dios, mëti'ipë tsajpjotmën, jä'äkyëjxm ko ja ëyo'on jëtu'un t'ixtë.

¹² Tääts ja mëtëtujkpë ja tsajpjotmëtë kukäjpxy tyajtukwatsy ja y'a'ukën ma ja Efrates mëjnëëjën ets ja nëë tyitsy ets nyaxtëty ja yajkutujkpë mëti'ipë xëëwpëtsëmy tso'ontëpën.

¹³ Ënätës n'ijxy nitëkëëk ja ku'oypyë, ijxtëm yë nootsyën, pyëtsëëmtë mëj tsa'any y'aawjoty, mëj jëyujk y'aawjoty ets jap y'aawjoty ma ja mëti'ipë ja Dios käjpxynyajxpë nätyijëpën je'eyëp ko ka'ap myëtëy'atë.

¹⁴ Ja ku'oypyë mëj ijxpäjtën yaj'ijxëp ets ni'ëmukë ja yajkutujkpë tyajnämyujkta'aja'anyë mëti'ipë yaa naaxwiinyëtën ets tsyiptuntëty mëët ja Dios Mëti'ipë Maaytyääyëpën Winë.

¹⁵ Jëtu'un ja Dios y'ënä'äny: Ixtë, jëtu'unës nminy ajotkumonë ijxtëm yë mä'tspën. Jotkujk yë ja'ay yajpaaty mëti'ipë juuky yajpatpën ets tam wyit tmëëtëty, këtiipë yajtukja'tëty niwa'ats ëxwa'ats ets tsyëtyunëty.

¹⁶ E ja yajkutujkpëtëjk ojts ja myuktë ma tu'uk ja it txëëwatyën hebreo ayuk'äämpy Armagedón.

¹⁷ Tääts ja mëwëxtujkpë ja tsajpjotmëtë kukäjpxy tyajtukwatsy ja y'a'ukën po'ojotm ets yajmëtooy ja ayuk mëk mëti'ipë tso'onpën ma Dios ja tyëjkën, ma ja kutujktaknën ets y'ënä'äny: Tëë tyunyë jyätyë.

¹⁸ Ënet myiiny ja ënääw wëtsuk ets mëk ujx myiiny mëti'ipë ka'anëm nijëna'a yaj'ixy yajnijawënëm jënu'un ja naaxwiinyëtë ja'ay jyuuky'atën.

¹⁹ Ënet ja mëj kajpn tëkëëkpëky nyäwya'kxë ets ja jëën tëjk kyëtaawtaay maajëty ja kajpnën naaxwiiny ets ja Dios tja'amyejtsy ja mëj kajpn Babilonyë ko tuk'uuka'any ja tsatsym nyëë, jä'ä jëtu'un tyijpy ko tmo'oja'any ja ëyo'on mëët ja tsip äkë.

²⁰ Jëtu'unts wyintëkooytyë tu'kë'ëyë ja naax mëti'ipë mejy akujky yajpatëpën ets näjyëtu'un ja tun kopk wyintëkooytyääy.

²¹ Ets ja tëtsn tuu ojts kyä'äy tsajpwinm, janty mëjjëty ma ja ja'ayëtyën, wëxtyikxy kilë naxy jye'emtyëty tu'ukpë ja tëstn ets wäänëni'ik ja ja'ay tmëtëkooytyë ja Dios, oy ja ëyo'on jya'ity ko ja tëtsn tuu kyä'äy.