Apocalipsis 15 - Biblia Dc en Mixe de Quetzaltepec

Wëxtujkpë tsajpjotmëtë kukäjpxy ets wëxtujk pëkpyë ëyo'on

¹ Ets n'ijxyës wiinkpë mëj ijxpäjtën atsë'ëk ajawëpë: niwëxtujk ja tsajpjotmëtë kukäjpxy mëti'ipë myëët'ajtëpën wëxtujkpëky ja ëyo'on, ets ko tyunëtëty jyatëtëty ja wëxtujk pëkpyë ëyo'on, ënät nyaxëty ja Dios ja y'äkë.

² Ets n'ijxyës näjyëtu'un ja mejy mëti'ipë këxë'kpën ijxnën ets jëënyä'änkën xëpiny. Jamts mejy ëkë'ëm tyänëtë ni'ëmukë mëti'ipë ka'ap të twintsë'ëkëtën ja mëj jëyujk ets ja awinax, ets mëti'ipë ja jëyujk xëëw mëtsyo'owën të tkakupëktën. Jam ja kyow tmëët'atë mëti'ipë ja Dios ënety të myo'ojëtën.

³ Ets t'ëwtë ja ëy mëti'ipë ja Moisés y'ëëwën ets näjyëtu'un ja nyi'ëy ja Kupixynyën U'unk. Jëtu'un y'ëwtë: Wintsën Mëti'ipë Maaytyääyëpën Winë, mëj këjää mijts winë të xytyuny, tëy ets mëtëy mijts ja mnë'ë mtu'u, mijts myajkutujkp ma ni'ëmukë ja naaxwiinyëtë ja'ayën.

⁴ ¿Pën jëtää mkatsë'ëkëtëp, Wintsën, pën jëtää mkamëjjawëtëp mkajaantyjyawëtëp? Mijts tu'uk mwa'ats. Mmëjja'aw mjantyjya'awëyëp ni'ëmukë yë naaxwiinyëtë ja'ay, jä'äkyëjxm ko mtëyajtën xyaj'ixyë.

⁵ Ko jëtu'un jyäjty, ok ojts n'ixyës ko ja Dios ja tyëjk y'ëwatsy tsajpjotm, ma pëjkë'ëky y'ityën ja Dios ja y'ënä'ämën këxja'aypyë.

⁶ Japts pyëtsëëmtë niwëxtujk ja tsajpjotmëtë kukäjpxy mëti'ipë myëmiintën wëxtujkpëky ja ëyo'on. Janty aak'oy ja wyitëty, aak wa'ats xyoxy'atë ets aak ajajtëp aak atsëmaamtëp wyitëty, aak pu'ts pujxn wëën kyätsywyëën'ajtëp.

⁷ Ënet tu'uk ja nimajktaxkpë ja juuky'ajtpë tmooy ja niwëxtujkpë ja tsajpjotmëtë kukäjpxy, këëktu'uk ja pu'ts pujxn a'ukën ujtsëty mëët ja ëyo'on mëti'ipë ja Dios yäjkpyën ets mëët ja tsyip y'äkë ja Dios, mëti'ipë xëmëkyëjxm juukyajtpën.

⁸ Ets y'ujtstaay ja Dios ja tyëjk mëët ja jok, jä'ä ja Dios ja myëj'ajtën jyääntyajtën ets ja kyutujkën; ni pën mëpaat jap kyatëkë, koonëm jyëjpkëxëty ja ëyo'on mëti'ipë ja wëxtujkpë tsajpjotmëtë kukäjpxy myëët'ajtëpën.