Apocalipsis 10 - Biblia Dc en Mixe de Quetzaltepec

Ja tsajpjotmëtë kukäjpxy mëët ja noky apëtity

¹ Ënätës n'ijxy wiinkpë ja tsajpjotmëtë kukäjpxy, mëti'ipë maaytyääyëpën winë, ko tsajpjotm tsyo'ony yootsjotm. Tam i'ty tmëëtëty ma kyëpajkën ets ja wyiin jyëjp janty ajajp ijxtëm xëëw'anën ets tyeky ijxtëm yë jëënyä'änkën.

² Tam tu'uk tmëëtëty ja noky apëtijtwä'kxy ets ja y'a'oytyeky ojts tuknaswa'akë mejyjoty ets y'anajnytyeky naaxwiiny.

³ Ets y'ënaantäky mëk ijxtëm ja mëj kaa yä'äxyën ets ko të yä'äxy, tëë tyukpëmimë wëxtujk ok ijxtëm yë ënääwën.

⁴ Tamës ënety ntimkëjxja'ajanë wi'ix ja ënääw y'ëna'antën koos nmëtooy tu'uk ja ayuk tsajpjotm ets xynyëmaayës: Këtii xykyëxja'ay wi'ix të y'ëna'antën yë ënääw, yu'utsy mëët'at,

⁵ ets xyajjë'ky a'oytsow ja tsajpjotmëtë kukäjpxy mëti'ipë ënety tu'uk ja tyeky të tkukapën mejyjoty ets tu'uk ja tyeky naaxwiinkëjxy,

⁶ ets ja Dios ojts tyajkäjpxy, mëti'ipë xëmëkyëjxm juukyajtpën ets mëti'ipë yajkojën ja naax, ja tsajp, ja mejy ets winëjaty ets y'ënäny: Tëë ja xëëw jëmëjt tpaaty.

⁷ Ko ënety ja mëwëxtujkpë ja tsajpjotmëtë kukäjpxy ja pujxnxuxn tukxu'uxy, jëtu'un nëjkx y'atëy mëti'ipë ja Dios ënety yu'utsy yaj'ijtypyën, mëti'ipë ja kyäjpxynyajxpëtëjk ojts tëëyëp tnikäjpxy tnimëtyaktën.

⁸ Tääts ja ayuk ojts xymyëkajpxkojnëpës mëti'ipë ënety të n'ëkmëtoopën tsajpjotm ets xynyëmaayës: Nëjkx xy'ëxajë ya'atë noky apëtijtwä'kxypyë mëti'ipë yë tsajpjotmëtë kukäjpxy jam kyë'ëkony'ajtypyën, mëti'ipë tënääpyën mejy wiinkëjxm ets naax wiinkëjxm.

⁹ Ets ja tsajpjotmëtë kukäjpxy ojts nninëjkxyës, tääts ja noky apëtijtwä'kxypyë n'amëtooyës ets xymyo'ojëtyës, yë'ë jëtu'un xy'ëtsooyës: Tyaa ets jë'kx. Pa'ak ënät xyjyawëty m'aawjoty, ijxtëm cera pa'akën, je'eyëp ko jap mjootjoty ta'am jap y'awimipita'any.

¹⁰ Ënet n'ëxajëyës ja noky apëtity mëti'ipë ja tsajpjotmëtë kukäjpxy kyoon'ijtypyën ets ojts nkujë'ënaxyës. Pa'ak jap n'aawjotyës nj'a'awëyës ijxtëm yë cera pa'akën, je'eyëp ko ojts një'kxkëtä'äkyës, ta'am jap njootjotyës y'awinpijty.

¹¹ Ënet xynyëmaaytyës: Kopkpëky ko xykyajpxwa'kxëty ja Dios ja y'aaw y'ayuk, ma ja ja'ayëtyën mëti'ipë yajpatëpën naaxwiinyëtë apëtsëmy, ma mëti'ipë kyajpxtëpën kanaakpëky ja aaw ayuk ets maajaty ja ënä'ämpë kutujkpën.