Apocalipsis 1 - Biblia Dc en Mixe de Quetzaltepec

¹ Ya'atë ja Dios ojts tuknijawë ja Jesukristë, ets tuk'ëwaanëty ja tyuunpëtëjk mëti'ipë tunan jatanëpën tsojk. E tëë ja Jesukristë ja y'anklës tuknikexy ja Juan ets yë'ë winë tnikajpxta'ajëty,

² ets të tnikäjpxy tëkokyë mëti'ipë të t'ixyën, ets ko yë'ë wa'ats nyija'ap ja Dios ja y'aaw y'ayuk mëti'ipë ja Jesukristë nyimëtyakën.

³ Akujk jotkujk ja ja'ay yajpaatë mëti'ipë kyajpxtëpën ets pyatuuntëpën ja aaw ayuk mëti'ipë yap jaaypyety miinpën ma ya'atë nokyën, jä'ä ko wiinkoonp ja xëëw jëmëjt.

Ko ja Juan tnijayë ja mëpëjkpëtëjk niwëxtujk pëkpyë

⁴ Yë Juan, nnijayë ja niwëxtujkpë ja kajpn ma yajpaatën ja mëpëjkpëtëjk mëti'ipë ye'eymyujktëpën jam Asia y'itjotm. Ëxajëtë ja kënu'kxën ets ja jotkujk'ajtën mëti'ipë yäjkpyën ja tëëyëmpë yajpaatyën ets mëti'ipë tää'ataanpën, näjyëtu'un ja wëxtujkpë ja Dios ja jya'awën myëk'ajtën mëti'ipë ijtëpën ma ja kyutujktaknën,

⁵ ets näjyëtu'un ja Wintsën Jesukristë, mëti'ipë ja Dios ja y'aaw y'ayuk kyajpxnajxypyën ijxtëm t'ijxy tmëtooyën, mëti'ipë jëwyiin të jyuukpyikyën oy të y'ëk'ooky, mëti'ipë y'ënä'ämtääpyën ja yajkutujkpë yaa naaxwiiny ets mëti'ipë të xytsyojkëmën ets të xyajpokywyatsëmën mëët ja nye'pyny,

⁶ mëti'ipë të tyajnaaxkëtä'äkyën ja kyutujkën mëët ëëtsajtëm ets teety të xyaj'awinpijtëm ma ja tyuunkën ja Dios Teety. Wä'än yë mëj'ajt oyajtën yë'ë tjä'ä'aty ets ja kuttujkën xëmëkyëjxmëpë. Jëtu'un y'itëty.

⁷ Nijawëtë. Ko yë Kristë jam myina'any yootsjotm. Ni'ëmukë ja ja'ay t'ixa'antë, yë'ëpaat mëti'ipë ojts tyajkruutspätën. Jë'ëjan ya'axantëp ja naaxwiinyëtë ja'ayëty ko ënety t'ixtë. Tëy jëtu'un, jëtu'un y'itëty.

⁸ Ëjts tso'ontakp ets ëjts jëjpkëjxp jëtu'un ja Wintsën Mëti'ipë Maaytyääyëpën Winë y'ënä'äny, mëti'ipë tyam ijtpën, mëti'ipë tëëyëp ijtën ets mëti'ipë itaanpën.

Ko Juan t'ixy ja Kristë

⁹ Ëjts Juan, miits yë mmëku'ukëty, ets koos tu'ukyë nyajpaaty mëët yë Jesús, xypaat'ajtpës mëët miitsëty ja Dios ja kyutujkën, ma n'ëyo'onpatëmën ets ma akujky jotkujk n'ijtëmën ets tu'ukyë jotmëk nyajpatmëty. Jä'äkyëjxm koos ja Dios ja y'aaw y'ayuk të nimëtyakë mëti'ipë ja Jesús ojts nimëtyä'äkyën, jamës ënety nyajpaaty Patmos, ma tu'kkëëyi'ikpyën ja naax jam mejyjyotm.

¹⁰ Wintsën ënety ja xyëëw ko ja Kënu'kxymyëkajtën ojts xynyikëtä'äkyës ets janty mëk nmëtooyës ja ayuk njëxkë'ëmës ijxtëm tu'uk yë pujxnxuxn y'ënä'änyën,

¹¹ mëti'ipës xynyëmaayën: Kuja'a nokyjoty tiijaty m'ijxypyën ets tuknikäx ja mëpëjkpëtëjk mëti'ipë yajpatëpën ma ja niwëxtujkpë ja kajpnën jam Asia y'itjotm: jam Éfeso, Esmirna, Pérgamo, Tiatira, Sardis, Filadelfia ets Laodicea.

¹² Ko jëtu'un nmëtooyës, tääjës n'ijxwinpijty ets n'ixa'anyës pën xymyëkajpxpës; ënät n'ijxpatyës wëxtujk ja jëëntooypyäjn aak pu'ts pujxn.

¹³ Jamts itkujkm n'ijxyës tyänë ijxtëm ja naaxwiinyëtë ja'ay ja y'u'unkën. Tyeky ix'ampaat ja wyit tyiiykyëtä'äky ets tkatsywyëën'aty tu'uk ja pu'ts pujxn wëën.

¹⁴ Janty poop ja wyääy, ijxtëm yë pixynyën ëkë ijxtëm yë tsajp'o'pykyën ets ja wyiin ijxtëm ja jëënyä'änkën.

¹⁵ Janty ajajp atsëmaamp ja tyeky, ijxtëm ja jempyë pujxnën ets jëtu'un kyäjpxy ijxtëm ja mëjnëë y'iitsy kyomyën.

¹⁶ Wëxtujk ja matsa'a tmajts'ity ma y'a'oykyë'ëjën. Y'aawjoty jap yaj'ixy pyëtsimy ijxtëm tu'uk ja tëypyujxnën mëti'ipë mäjtsk atu'um mye'eyëtyën ets ja wyiin jyëjp jëtu'un yaj'ixy ijxtëm ja xëëw mëk y'änyën.

¹⁷ Koos jëtu'un n'ijxy ënätës n'o'ktsoky ets nkëtaayës ma ënety jam tyänën. Ënet ja y'a'oykyë'ë mëët xymyäjtyës ets xynyëmaayës: Këtii mtsë'ëkë. Ëjts winë nyajtso'ontakës ets ëjts näjyëtu'un nyajjëjpkëxäämpyës.

¹⁸ Ëjts jëtu'un mëti'ipë juukyajtpën. Tëës n'ëk'o'kpë ets tëëjës jatëkok njuukpyiky. Xëmëkyëjxmës tyam njuuky'ajnë. Ëjts nmëët'ajtypës ja o'kën kuttujkën ja nyi'ëwatsn.

¹⁹ Kuja'a mëti'ipë të xy'ixyën ets mëti'ipë tyam tuunëp jajtëpën ets mëti'ipë tunan jatanëpën ok.

²⁰ Ja wëxtujkpë ja matsa'a mëti'ipë të xy'ixyën n'a'oykyë'ëjotyës ets ja wëxtujkpë cera tooytyakn aak pu'ts pujxnpë, yë'ë nyikäjpxyp: Ja wëxtujkpë matsa'a, yë'ë ja niwëxtujkpë ja ayukkajpxwa'kxpë mëti'ipë ijtëpën ma ja mëpëjkpëtëjk ye'eymyuktën; ets ja wëxtujkpë cera ato'oyën, yë'ë ja wëxtujkpë ja kajpn ma ye'eymyuktën ja mëpëjkpëtëjkëty.