Amós 9 - Biblia Dc en Mixe de Quetzaltepec

Ka'ap tjëkyepy pën tkukä'äkëty ja Wintsën ja nyipaye'eyën

¹ Ënätës yë Wintsën të n'ixy jam winkon ma wintsë'këntyaknën, etsës të xy'ënëëmë: Wojpyu'kx të tëjk'ateeny koonëm kyëtawëty yë tëjk akaj; ets jam tyëjtakta'ajëty ma ja'ayëtyën. Mëti'ipë juuky wë'ëmtëpën ëjts nkupujxta'ajäämpy: Oy pën jyakä'äka'anëty ka'ap nëjkx tsyo'oky;

² oy jap muum naaxpa'tkë'p jyanäyu'utsëtëty, nëjkxëpës jap njuutë, oy pën jyatsajppätëty nëjkxëpës jam nyajjënäky.

³ Ko jam jyanäyu'utsëtëty këjxm ma Carmel kopkën, mpaja'tëpës jampaat; ko jap pën jyanäyu'utsëtëty nëëpa'tkë'p, nëjkxëpës jap ntuknikäxtë yë nëë jëyujk mëjpë ets tsyu'utsëtëty;

⁴ ko ënety të myënëjkxëtë yë myëtsip wiink naax wiink kajpn tsumy matsy, tëypyujxnës nëjkx jam nkexy ets yajkupujxta'atëty. Nëjkxëpës xëmë n'ijx'itë ets ëxëëk jyattëty kyëpätëty.

⁵ Yë Wintsën, Dios mëti'ipë maaytyääyëpën winë, ko tpaaty yë naaxwiinyëtë jëtu'unyë jyiiywya'kxta'ay ets tyëkëtë jëëpyë yaxpë mëti'ipë jam tsënaaytyëpën. Jëtu'un yë naaxwiinyëtë nyëje'etsy yujkje'etsy tä Nilë nëëjën.

⁶ Tëë yë Wintsën tpëjktä'äky yë tsyënaaytyakn jam tsajpkëjxm ets të t'oytyuny yë naaxwiinyëtë nyiwits nyijuux; myëkajpx yë nëë ma mejyën ets txijkxtë yë naaxwiinyëtë. Jä'ä txëëwaty Wintsën.

⁷ Jëtu'un yë Wintsën y'ënä'äny: Miitsëty Israel ja'ayëty ka'ap mtëkatsy'atë mëët yë Etiope ja'ayëty. Jëtu'un tä miitsëty jap nyajtso'ontën Egiptë ets yaa nyajmiintë, jëtu'unës yë filistejë ja'ayëty ojts nyajtsoontë Creta ets Arameë ja'ayëty jam Quir.

⁸ Yë Wintsën y'ijxyp ko yë'ë yaa y'ëne'emy yë nëë poky, paaty y'ënä'äny: Nyajkutëkoyäämpyës yë naaxwiinyëtë, je'eyëp ko yë Jacob yë y'u'unk y'ok ka'apës nyajkutëkooytya'aja'any. Ëjts Wintsën, ëjts ënaanp.

⁹ Ni'ënä'ämëjäämpyës yë Israel ja'ayëty ets yaj'anaxtëty tä yë tsajpmok yaj'anaxyën axijtënjoty ets nitu'uk kyaka'ay yë tsajpmok naaxkëjxy.

¹⁰ Ni'ëmukë yë pokyjä'äytyëjkëty kupuxy nëjkx y'o'kta'atë; ni'ëmukë mëti'ipë ënantëpën: Ëëtsajtëm ka'ap jëtu'un njajtmëty; ëëtsajtëm ka'ap nëjkx ëyo'on mpatëmë.

Ma ja Israel kajpn jatëkok ja jotkujk'ajtën tpaata'anyën

¹¹ Pyätyp ja xëëw jëmëjt ma ja David nkoj'oyëja'anyënës yë tyëjkxo'omy mëti'ipë ojts kyëtäyën. Nyaj'ëtujkta'ajäämpyës yë jut, nyajpëtë'kta'ajäämpyës yë potsy maajaty të jyutyën ets nkoj'o'oyëtya'aja'anyës mëti'ipëjaty të jyityën ets jëtu'un nyaj'awinpita'anyës tä ijty tëëyëpën ma ënety jyotkujk'atyën,

¹² ets Israel ja'ayëty tjä'ä'atëty jatëkok mëti'ipë jam Edom të jyaakwë'ëmyën ets ma wiinkëtypë naax kajpnën mëti'ipë yë Israel ja'ay ijty nyitënaaytyëpën. Jëtu'un yë Dios të kyäjpxy ets pyatunäämpy ja y'aaw y'ayuk.

¹³ Pyätyp ja xëëw jëmëjt ma ja kam yajnipëjktakëkyojnëty oy ënety ja pëjktä'äky kyapëtë'kta'aynyëm; pyätyp ja xëëw jëmëjt ma yajnipkojnëty ja kam oy ënety ka'anëm yajwintä'änta'aynyëm ja tsatsymtsya'am. Jam tunkëjxm xii yaa muum yë tsatym nyëë pyëyë'ka'any tä nëë pyëyi'ikyën.

¹⁴ Ënätës nyajmina'any ja nnaax nkajpnës mëti'ipë ënety të yajpaatyën tsumy matsy wiink naax wiink kajpn. Ets nëjkx tkoj'o'oyëtya'atë ja kajpn mëti'ipëjaty të jyityën ets jam jyuuky'atëty; nëjkxëp yë tsatym tniyu'ujëtë ets nëjkx t'uuktë yë tsatym nyëë; nëjkxëp tkojtë tpäntë yë y'ääy y'ujtsëty ets y'ääy kyepyëty mëti'ipë jyë'kxtëp pyëktëpën.

¹⁵ Jä'ä ko jam nëjkx nyajtsëënëja'antë kyë'ëm naaxjotmëty ets ka'ap nëjkx nijëna'a jam pën y'ëkyajtso'onënëtë ma ja naaxwiinyëtën mëti'ipës ënety të nmo'otën. Dios, mëti'ipë Wintsën'ajtpën yë'ë jëtu'un ënaanp.