Amós 8 - Biblia Dc en Mixe de Quetzaltepec

Ja tu'kkatsypë ja ujts tsa'am

¹ Ya'atës ojts yë Dios, mëti'ipë Wintsën'ajtpën xytyuk'ixyës: Tu'kkatsy ojts n'ixyës yë ujts tsa'am,

² etsës xyajtëëy: ¿Tii m'ijxyp, Amós? Etsës n'ëtsooy. Yë'ëjës n'ijxyp tu'kkatsy yë ujts tsa'am. Etsës xy'ënëmaay: Yë Israel ja'ayëty tëë tsyaamnëtë; paaty yë'ëjëty ka'apës n'ëkpoky myä'kxanë.

³ Jä'ä xëëw jëëpyë yaxpë nëjkx y'awinpijta'atë ja ety xoontä'äky. May ja ja'ay y'ooka'antë ets may nëjkx Amón api'its nyaaxtëkëtë jam kajpnpë'am. Yë Wintsën jëtu'un ënaanp.

Winkoomp ja nyixëëw ma ja Israel ja nyëë pyoky yajpaye'eyä'änyën

⁴ Mëtoow'itë ya'atë aaw ayuk, miitsëty mëti'ipë myaj'ëyoowtëpën ets mtëytyuuntëpën yë ëyoopëja'aytyëjk ets o'ktëy xytyuntë xy'ënëëmëtë ja'ay mëti'ipë yu'unk naxym ja'ay'ajtëpën ma naax kajpnën;

⁵ miitsëty mëti'ipë ënantëpën: Tim je'eyë xëëw nyaxëty ma yajnixëëwtunyën yë po'o ko pyi'k'aty, tääts nto'kmëty yë tsajpmok. Tim je'eyë xëëw nyaxëty ma yajmëjjawën yë po'kxënxëëw tääts nto'kmëty yë aaypyajk ujtspajk mëti'ipë nmëët'ajtëmën ets ka'ap kä'pxy nkijpxmëty ets tsow nto'kmëty.

⁶ Yajxon o'ktëy n'ëktu'unmëty yë ëyoopëja'aytyëjk ets kë'ëm xynyimi'inmëty ets nyätyookëtëty ma ëëtsajtëmën ets tuunpë nwa'anmëty ets ka'ap nmëju'uymyëty, je'eyë mëk njanty yajtu'unmëty ets jëtu'un tkëpätëty ja nyu'kxyëty, oy ënety tu'ktä'änkën je'eyë ja kë'ëk të tnu'kxy. Yë'ëpaat nëjkx ntukmëto'këmë ja tsajpmok ak.

⁷ Dios, tëë tnikäjpxy mëëtkyëjxm ko ja Jacob ja mëj'ajt oyajtën tmëëtëtyën: Ka'apës nijëna'a nja'atyëkoyä'äny mëti'ipë të tuntën.

⁸ Paaty yë naaxwiinyëtë mëk yu'kxa'any, paaty yë ja'ay jyë'ëja'an ya'axa'antë ma ja naax kajpnën. Ets naaxwiinyëtë y'ëtëtsta'aka'any jëtu'un tä yë Nilë nëë jyä'tsminy jyä'tsxëpyën.

⁹ Ets Wintsën të y'ënä'äny: Jä'ä xëëw kujkyxyëëwës nëjkx nyajkootsë ets je'eyë ënety yajxon xëëw të jyajtä'äky koos nyaj'awinpita'any yë naaxwiinyëtë koots.

¹⁰ Ma ënety ja xëëw tyunyën jää nëjkx ja'ay tyëkëtë yaxpë mëët ko ënety t'ixtë may ja ja'ay y'o'knëtë, ja mëti'ipë ënety ëëwtëpën nän nëjkxëp tyëjkënëtë yaxpë mëët ko ënety may ja o'kpë; nëjkxëp ja wit xytyuktëkëtë monpë tukpë ets nëjkxëp ja mkuwaay xynyëkääptë mëët ko ënety ja ëyo'on jotmay të y'ity. Jëtu'un nëjkx mya'axtë tä ja'ay yä'äxyën mëti'ipë ja y'u'unk të y'ookyën tu'kpajkpë t'u'unk'atyën ets jëtu'un nëjkx jyëjpkukëxë mëët ja monyëtukyë.

¹¹ Jëtu'un yë Wintsën y'ënä'äny: Miimp wiinkoonp ja xëëw jëmëjt, maas nkäxa'anyën ja yuu xëëw naaxwiiny naaxkëjxy; ka'ap yë'ëkyëjxmëty ko tyëkoy'ata'any yë kääky uuky ëkë ko nëëtëëtsë y'ita'any, yë'ëkyëjxm ko jyatsokëp ja'ay ja Wintsën ja y'aaw y'ayuk ets jyamëtoow'ita'anëp.

¹² Nëjkxëp tja'ixta'atë xiitsow yaatsow ets tjapaata'antëty ja Wintsën ja y'aaw y'ayuk; jyaninaxtëp kanaak ja juukymyejy, jampaat tnitsoontëty xëëwpëtsëmtsyow ets tpaja'tëty xëëwkëtä'äkytsyow, ka'ap maa tpata'antë.

¹³ Mëkëtypë to'oxy ëna'k ets yä'äy ëna'k nëjkx jëtu'unyë muum yuukëtaw tyëëtsë këtawtë.

¹⁴ Mëti'ipë ënety të t'ëwtatën Samariëpë awinax, mëti'ipë ënantëpën: Juuky yë tios, juuky yë Dan, juuky yë Beerseba, nëjkxëp yuukëtaawta'atë ets ka'ap nëjkx y'ëkpëtë'knëtë.