Amós 7 - Biblia Dc en Mixe de Quetzaltepec

Ma yaj'a'ijxnaxyën mëkoxknaxy ja ëyo'on

¹ Ya'atës ojts yë Wintsën xytyuk'ixy: Yë'ë ënety pyätyp ja nipën kojën ma ja pëjktä'äky ok y'ityën, ko pyëtë'kta'ay ja yajkutujkpë ja pyëjktä'äky. Ënätës të n'ixy yë Wintsën tyajkojy may yë mu'u.

² E ko ja mu'u ënety tam tjë'kxta'ajanë ja ujts, ënätës të n'ëna'any: Wintsën, pokymyä'kxtëkës. Ëëtsëty, yë Jacob yë kyajpn, tsip etsës nmëmëta'aktëty ya'atë ëyo'on, jä'ä ko mutsk kajpn ëëtsëty.

³ Ënet ja Wintsën të t'akajpxtuky ja ëyo'on mëti'ipë ënety të tuknipëjktaakën ets të y'ënä'äny: Ka'ap tyunanënëpë ya'atë ëyo'on.

Ma yaj'a'ijxnaxyën yë jëën

⁴ Ënätës yë Wintsën të xytyuk'ixy: Ko tu'uk yë ëyo'on të tkexy, mëti'ipë jëtu'un këxë'kpën tä jëënën, tëë tyajtë'ëtsy ja komnëë ets nëkooyë ja tun kopk të tyajwintooytyutaaynyë.

⁵ Ënätës të n'ëna'any: Owxit Wintsën, tun yë mëyajtën. Ëëtsëty, yë Jacob yë kyajpn, tsip etsës nmëmëta'aktëty ya'atë ëyo'on, jä'ä ko mutsk kajpn ëëtsëty.

⁶ Ënet ja Wintsën të t'akajpxtuky ja ëyo'on mëti'ipë ënety të tjatuknipëjktaakën ets të y'ënä'äny: Ka'ap tyunanënëpë ya'atë ëyo'on.

Ma yajkijpxyën ja potsy pën tu'knax kyujkëty

⁷ Ojtsës näjyëtu'un yë Wintsën xytyuk'ixy wiinkpë a'ijxnajxën. Jam tyänë ma tu'uk yë potsyën ets jam kyë'ëkëjxm yë'ë jam myëët'ajtyp yë kijpxn mëti'ipë ja'ay tyukijpxypyën yë potsy pën kijpxy pya'tëkë.

⁸ Etsës të xyajtëy: ¿Tii m'ijxyp Amós? Yë'ëjës n'ijxyp mëti'ipë potsy yajtukkijpxpën. Jëtu'unës të n'ëtsoy. Ënätës të xy'ënëëmë: Jëtu'un tä xy'ixyën yajkijpxy yë potsy jëtu'unës näjyëtu'un nkijpxa'any yë jyuukyajtën yë Israel ja'ayëty, mëti'ipës nkajpn'ajtypyën. Ëjts ka'apës yam ja tëkok n'ëkpoky'myä'kxanë.

⁹ Kutëkooytya'ajantëp yë tsajptëjk mëti'ipë jam yajpatëpën ma Isaac yë y'itjotmën ets tsajptëjk mëti'ipë jam yajpatëpën ma Israel yë kyajpnën, xit ko'ow jyajta'aja'antë. Ets nyaj'itäämpyës yë jëën tsip ma Jeroboam yë y'u'unk y'okën.

¹⁰ Yë teety Amasías, mëti'ipë jam teety'ajtpën Betel, ojts tëkok tkäjpxynyikexy yë Israel yajkutujkpë ets t'ënëmaay: Tää yë Amós jyëtity ma Israel kajpnën, yë'ë nyipëtë'ëkäämpy yë yajkutujkpë. Yë naax kajpn ka'ap t'ëktsojknë ets ni'ikyë kyajpx'ëtë'ëtsëty.

¹¹ Jëtu'un ja'ay t'ënëmaay: Yë Jeroboam kupuxy y'ooka'any ets tëkokyë yë Israel kajpn tsumy matsy nyëjkxta'aja'antë wiink naax wiink kajpn.

¹² Ënet ja Amasías ojts t'ënëëmë yë Amós: Jëwa'ak yaa mijts käjpxynyajxpë. Pën mtsojkpy ets mjuuky'atëty ma nkäjpxynyajxpë'atyën, jam nëjkx Judá;

¹³ je'eyëp ko këtii tii xy'ëkkajpxnajxnëty Betel, jä'ä ko mëjtsajptëjk yë yaa ijtp mëti'ipë jyä'ä'ajtypyën yë yajkutujkpë.

¹⁴ E ja Amós tyaa y'ëtsooy: Ëjts ka'apës nkäjpxynyajxpëty ets ka'apës käjpxynyajxpë'ajtk të ni''ijxpëkë. Ëjts yë'ëjës nijuuky'äjtyp koos yë kupixyny nkëwent'aty ets yë'ë një'kxyp yë tsatsymtsya'am mëti'ipë kë'ëm mujxpën në'ëjoty tu'ujoty,

¹⁵ e yë Wintsën yë'ëjës të xytyuk'ëxmatsy yë kupixyny këwent'ajtk, etsës të xy'ënëëmë: Nëjkx yë naax nkajpnës, yë Israel kajpn tukmëmëtya'ak yë n'aaw n'ayukës.

¹⁶ Paaty n'ënëëmë ets xymyëtoow'itëty ja Wintsën ja y'aaw y'ayuk. Mijts jëtu'un m'ëna'any: Këtii nëkoo Dios yë y'aaw y'ayuk xynyimëtyakë ma Israel kajpnën ets këtii nëkoo wiinkjaty xynyimëtya'akëty yë Isaac yë y'u'unk y'ok.

¹⁷ E yë Wintsën yë'ë ënaanp: Yë mto'oxytyëjk kajpnjoty nëjkx jyot nyini'kx tooky tyäky ets m'u'unk m'ëna'k ye'etyëjkpë to'oxytyëjk nëjkxëp kupuxy y'ooktë; yë mnaax mkam nëjkxëp yaj'ijxwa'kxtë ma ja'ayëtyën mëti'ipë wiink tios y'ëwtajtëpën ets Israel ja'ayëty tsum matsy nëjkx yajmënëjkxta'atë wiink naax wiink kajpn.