Amós 6 - Biblia Dc en Mixe de Quetzaltepec

Ma ja Israel kajpn kyutëkoyën

¹ Janty mon janty tuk ja'ay yajpaatë mëti'ipë jotkujk'ajtëpën jam Sión. Janty mon janty tuk ja'ay yajpaatë mëti'ipë ka'ap tiijotmay tmëët'atën jam Samaria, ja kopktëjkëty mëj'äämpyë y'itën ma ja naax kajpnën, ma Israel ja'ayëty poj'am nyëjkxtën ko tiijotmay tpaatë.

² Nëjkx ixtë yë Calné kajpn; ko jam mtsoontëty tääts mnëjkxtëty ma ja mëjpë ja Hamat kajpnën, jam mjënajkë'ëktëty ets mjëjpta'aktëty ma Gad kajpnën, ma filistejë ja'ayëty tsyëënëtën. ¿Ti ni'ik jëtää miitsëty mëj'äämpy m'itë ets ka'ap yë'ëjëty jyëtu'un'atë? ¿Ni'ik mëj'äämpy jëtää miits yë mkajpnëty këtiinëm yë'ëjëty yë kyajpnëtyë?

³ Miitsëty ka'ap xytsyoktë ets xynyijawëtëty wi'ix ëxëëk myinyën ja xëëw po'o, je'eyëp ko nijawëtë ko miits kë'ëm yë ëyo'on të xyaxtsowtë.

⁴ Jotkujk jam mma'atë mpo'kxtë ma maapäjnëtyën mëti'ipë oytyunyën mëët yë elefantë tëts pajk ets mnäy'ënëënta'akëtë; je'eyë xyaj'ooktë yë kupixyny ets tsajpkaa ets mkaytyë mtsu'utstë;

⁵ ets ënät nitsuu nipoj mxu'uxtë mwoptë; m'ëna'antë ko jëtu'un ja David ijty xyu'uxy wyopy, kë'ëm xytsyätstë ja mxuxnëty ets ja mwojpnëty;

⁶ mëjatyëty yë m'a'ukën xy'ixtë mëti'ipë mtuk'ukëtyëpën, aakjä'ä mnätyukja'axëtëp ja oyëtypë ja tsooy xyuukyën, ka'ap xymyëmay xymyëtajtë oy wi'ix yë naax kajpn jyatëty.

⁷ Mijts nëjkx jëyëjp mnëjkxtë tsumy matsy wiink naax wiink kajpn, jää nëjkx kyixy nyäxy ko je'eyë të mxëëwtuntë.

⁸ Yë Wintsën, Dios mëti'ipë maaytyääyëpën winë tëë kë'ëm ja xyëëw tukkajpxpety ets të y'ënä'äny: Ëxëëkës n'ixy yë Jacob yë nyaax kyajpn ko je'eyë nyämyëjaw nyäjyääntyjyawëty; ëxëëkës n'ijxë yë y'akujktëjk kyutujkëntëjk; yë myëtsip yam ntukë'ëtëkëjäämpyës yë naax kajpn mëët tëkokyë mëti'ipë myëët'ajtypyën.

⁹ Pën yajpatp ja ja'ay nimajk ma tu'uk yë jëën tëjkën, nimajk nëjkx y'o'kta'atë.

¹⁰ Nëkooyë nëjkx ja'ay tsyë'kënëtë jya'awënëtë, ko tu'uk yë ja'ay jap tyëkëty tëkoty ets ja myëku'uk tjuuta'anëty mëti'ipë ënety jap të y'ookyën, ënät nëjkx t'ënëëmë wiinkpë myëku'uk mëti'ipë ënety jap tëkoty yajpatpën: ¿Jap wiinkpë të xypyäätyë? Ka'ap, jëtu'un nëjkx y'ëtsoy. Ets nëjkx y'ënä'äny ja mëët tu'ukpë: Amonyë it, ko ajotkumonë Wintsën yë xyëëw xykyajpxpatëty.

¹¹ Jä'ä ko ja Dios kyäxäämpy ja nätyiytyunë ma ja jëën tëjkën mëjatyëtypë ets mutskjatyëtypë ets nëjkx jyajta'ay axit ako'owë.

¹² ¿Wä'än jëtää yë kwaay tsaakëjxy ye'eytyëtyë? ¿Wä'än jëtää yë tsajpkaa nyajyu'umëty nëëjotyë? Miitsëty, të xyaj'awinpitë ja oypyë ja nipaye'eyën tä xëwätën ets ta'amëm të jya'awëkyëtä'äky ma tëkatsy winë të xypyaye'eytyën.

¹³ Nëkoopë nyanatëkë'aty ko mxoonta'aktë ets m'ëna'antë: Mëët ko ja jot mëjaaw të n'ijxëmë paaty ja ënä'ämën kuttujkën të mpatëmë.

¹⁴ E mëmay mëtajtë yajxon, miitsëty Israel ja'ayëty; yë Wintsën, Dios mëti'ipë maaytyääyëpën winë, jëtu'un y'ënä'äny: Nkäxäämpyës tu'uk yë naax kajpn mëti'ipë nëjkx ëxëëk mtunëtën ets nëjkx mëktuunk mtuktunëtë, jampaat anëkëxmtsow ets ëpa'tkë'ëmtsow.