Amós 3 - Biblia Dc en Mixe de Quetzaltepec

Ja käjpxynyajxpë ja tyuunk

¹ Israel ja'ayëty, mëtowtë wi'ix ja Wintsën t'ënëëmën ja kajpn mëti'ipë jap Egiptë yajpëtsëëmën:

² Mijtsyë tu'uk të nwin'ixy ma ja naax kajpn may yajpaatën naaxwiiny naaxkëjxy. Paatykyëjxmës mpaye'eyä'äny ja nëë poky ma miitsëtyën mëti'ipë të xytyuuntëkoytyën.

³ Pën nimäjtsk yë ja'ay tyu'uye'eytyë jä'äkyëjxm jyëtu'unëty jä'ä ko jëtu'un të tkäjpxy'atë;

⁴ ko yë kaa myu'uy nyiitsy yuukjoty paatykyëjxm jyëtu'unëty jä'ä ko tëë tmatsy ja jëyujk mëti'ipë tsyu'utsäämpyën; ko yë kaa u'unk y'ajëjy jap y'aankjoty paaty jyëtu'unëty jä'ä ko tëë tii tmatsy;

⁵ ko tu'uk yë joon kyuka'anaxy jam ënety muum të y'akääkë o'këntaknjoty yu'utsypë; ko yë o'ktakn pyujtë'ëk paaty jyëtu'unëty jä'ä ko tëë myätsy;

⁶ ko yajtukxu'uxy yë tsajpkaawaj, ënätyë ja'ay tsyë'ëkëtë; ko tii ëyo'on kyëtä'äky ma naax kajpnën Wintsënën të tnipëjktaakë.

⁷ Yë Wintsën ka'ap tii tuny ajotkumonë pën ka'ap jëyëjp të tuk'ëwaanë yë tyuunpë mëti'ipë käjpxynyajxpën.

⁸ ¿Pën jëtää katsë'ëkëp ko yë kaa myu'uy? ¿Pën kakajpxaanp ko yë Dios tni'ënä'ämë ets tu'uk yë ja'ay kyajpxëty?

Ma Samaria kajpn kyutëkoyä'änyën

⁹ Nimëtya'aktë ja aaw ayuk jam Asdod ets jam Egiptë ma kutujkëntëjkën: Mintë ma Samaria kopkën; min ixtë wi'ix y'ëtë'ëtstë y'ëna'antën ets wi'ix ja'ay y'ëyowtën tsipjoty.

¹⁰ Jëtu'un yë Wintsën y'ënä'äny: Yë'ëjëty ka'ap tnijawëtë wi'ix tii oy tuntëtyën; jap tyajnipätë ma kyutujkëntëjkëtyën mëti'ipë ja'ay pyëjkëtëpën atsip.

¹¹ Paaty yë Wintsën y'ënä'äny mëti'ipë Tios'ajtpën: Tu'uk ja mëtsip tyajnatuka'any ja naax kajpn, jyijtë'ëkäämpy ja potsy ma ja këwent'ajtpë y'itën ets tyajpëtsëëmta'aja'any tiijaty japën ma kutujkëntëjkën.

¹² Jëtu'un yë Wintsën y'ënä'äny: Jëtu'un tä tu'uk yë kupixyny këwent'ajtpë tuk'aju'tu'utyën yë kaa ko ënety të tmatsy yë kupixyny jam ma kyë'ëjën ëkë ma tyekyën ëkë ma tyatskën, jëtu'un yë Israel ja'ayëty kyä'äka'antë jam Samaria mëti'ipë jam tsënaaytyëpën; yi'iyë nëjkx tjaakmëkä'äktë myaapäjnety ets tu'ktëjyën yë y'ënyääypyäjn.

¹³ Yë Wintsën, yë Dios mëti'ipë maaytyääyëpën winë, jëtu'un y'ënä'äny: Mëtoow'itë ets xynyijawëtëty wi'ix yë Jacob yë nyaax kyajpn jyata'anyën,

¹⁴ jä'ä ko jä'ä xëëw ma ënety yë Israel ja'ay n'amëtowtënës yë tyu'unënëty kyajpxënëty ets nyëë pyokyëty, nëjkxëpës nyajkutëkooytyä'äy yë wyintsë'këntyakn jampë Betel yajpaatyën; yë wyintsë'këntyaknëty wa'ats nëjkx nyëka'ata'ay yë wyaj ets nëjkx naaxkëjxy kyëtakta'ay.

¹⁵ Nyajkutëkooyäämpyës yë jëën tëjk xëkopkjotypë ets potmjotypë tyunyën, nyajkukëxëjäämpyës yë jëën tëjk mëti'ipë mëët y'oytyunyëtyën yë elefantë jëjp pajk ets nyajtukjijtëtya'aja'anyës tëkokyë yë kutujkëntëjk. Yë Wintsën jëtu'un ënaanp.