Amós 2 - Biblia Dc en Mixe de Quetzaltepec

¹ Jëtu'un yë Wintsën y'ënä'äny: Yë Moab ja'ayëty mëj këjää yë nëë poky të tuuntëkoytyë ets ka'apës jëtu'unyë nyajninaxa'any; jä'ä ko yë'ëjëty ojts tnino'këtë yë wyääy pyajk yë Edom yajkutujkpë, kuyjyaamën tyaj'awinpijtaaytyë.

² Paatykyëjxmës nno'oka'any yë Moab yë y'itjot ets tääpë jëën yë'ë nyo'okäämpy yë kutujkëntëjk mëti'ipë jamën Queriot; ets Moab ja'ayëty nëjkxëp y'ooktë tsipjotm, ma ënety yajtukxu'uxyën ja tsajpkaawaj.

³ Njëpëkäämpyës yë yajkutujkpë ma nyaax kyajpnën; etsës nyaj'ooka'any mëët tu'kë'ëyë tyuunpëtëtëjk wyintsëntëjk. Yë Wintsën jëtu'un ënaanp.

⁴ Jëtu'un yë Wintsën y'ënä'äny: Yë Judá ja'ayëty mëj këjää yë nëë poky të tuuntëkoytyë ets ka'apës jëtu'unyë nyajninaxa'any; jä'ä ko yë'ëjëty ojts t'ijxtijtë ja Wintsën ja y'ijxpëjkën ets ka'ap tpatuuntë ja n'ënä'ämënës ntëyajtënës, yë'ë ojts ni'ikyë t'ëwtatë yë wiink tios mëti'ipë y'ëwtajtën yë tyeety y'apety.

⁵ Paatykyëjxmës nyajnitooytya'aja'any yë Judá kajpn ets tääpë jëën yë'ë nyo'okäämpy yë kutujkëntëjk mëti'ipë jamën Jerusalén.

Ma Jerusalén yajpaye'eyën yë nyëë pyoky

⁶ Jëtu'un yë Wintsën y'ënä'äny: Yë Israel ja'ayëty mëj këjää yë nëë poky të tuuntëkoytyë ets ka'apës jëtu'unyë nyajninaxa'any; jä'ä ko yë'ëjëty nyito'ktëp yë ja'ay ka'apë tii tuuntëkoyën ets mäjtsktä'änkën je'eyë kë'ëk yajtukwin'ëëntë këtiipë tnipaye'eytyëty ja oyoopë ja'ay.

⁷ Tyiytyuuntëp ets ka'ap tmëj'ixtë yë ëyoopëja'aytyëjk, ko jya''amëtoyë ja ëyoopëja'ay ets jeexyë tpaye'ey, ka'ap tpaye'ey. Yë u'unkteety ets myaank tu'ukyë ja to'oxytyëjk tukmujknëtë ets tmëët tsëënëtë, tyajnipäxëtëkëtë jëtu'un ja nxëëwës.

⁸ Yë'ë nätyukxojxëtëp ja wit tujkxy mëti'ipë ja ëyoopëja'ay të tpëjkën; jëtu'un kyäytyë y'uuktë ma tnixëëwtuntën yë awinax; yë'ë tyukjuuytyëp yë tsatym nyëë yë wit meeny mëti'ipë ja'ay atsip pyëjkëtyëpën ets jap y'uuktë jyë'kxtë ma tsyajptëjkën yë wiink tios.

⁹ Ëjts, ojtsës yë Amor ja'ayëty nyajkutëkoy ets miits mnaxtëty; oy ënety jëtu'un jyakëjxm'atë tä yë ajë kepyën ets tä yë piitskepyën kepyën.

¹⁰ E miitsëty jap Egiptë nju'të ets ntu'uwinwoowtë jam të'ëts'itjotm wëxtyikxy jyëmëjt ets nmo'oja'antë ja naax mëti'ipë ënety yë'ëjëty jyä'ä'ajtëpën.

¹¹ E ka'ap tjëkyepy pën y'ëna'anëty ko ka'ap tyiyëty ko ojts jam njuutyës ma miitsëtyën yë ja'ay mëti'ipë ojts mpëjktä'äkyënës käjpxynyajxpë ets nazareo ja'ay. Yë Wintsën jëtu'un ënaanp.

¹² Miitsëty ojts xy'atsip'atë ja nazareo ja'ay ets y'uukëty myu'ukëtëty ets xy'akajpxtujktë ets këtiipë yë käjpxynyajxpë tnimëtya'akëty ja n'ayukës.

¹³ E oy ko jyëtu'unëty, ëjts nyaj'anokëjäämpyës yë naaxwiinyëtë ma mtekpya'tkëtyën, jëtu'un tä y'anokën yë kepy wintëkäämpë mëti'ipë ujtsën mëët yë tsajpmok.

¹⁴ Oy jënu'un mjakä'äktëty poj'am myajnajtspaatëtëty; mëti'ipë jotmëk janäyjya'awëyëpën jëtu'unyë myëjaawkëxa'any, oy yë'ëjëty ja'ay mëti'ipë jotmëkën ka'ap tsyo'oka'any.

¹⁵ Yë ti'pxpë ka'ap nëjkx myëtä'äky ets ka'ap yë'ëkyëjxmëty tsyo'oka'any, yë'ëpaat mëti'ipë japëyë'kpën mëk ets mëti'ipë ja käkpën kwaaykyijxy.

¹⁶ Jä'ä xëëw ja tsiptuunpë ja'ay mëti'ipë jotmukën pojën ja tyi'pxn ets ja kyu'umën tnajtsjëpipëja'any ets kyä'äka'any. Yë Wintsën jëtu'un ënaanp.