Abdías 1 - Biblia Dc en Mixe de Quetzaltepec

Ma ja Edom o'ktëy jyata'anyën

¹ Mëti'ipë ja Dios ojts tuknijawën ja Abdías käjpxynyajxpë. Tëës yë aaw ayuk tmëtowtë, yë Wintsën yë y'aaw y'ayuk; mëti'ipë ja naax kajpn të tukjëtijtëtyä'äyën ets të y'ënä'äny: Ja'amtë, ja'am ntsiptu'unëmë mëët ja Edom. Jëtu'un yë Dios mëti'ipë Wintsën'ajtpën tnimëtyä'äky yë Edom.

² Mutsk kajpn yam mpëjkta'aka'any ma wiinkëtypë naax kajpnën ets ka'ap nëjkx pën mtsokyë.

³ Tëë mwin'ëënyë ja mmëj'ajt mkëjxm'ajtën. Mijts jam muum mjuuky'äty tsaatunkëjxm ëkë muum tsaajutjoty, paaty të mmay të mtajy ko ka'ap jam nipën mkutijnaxëtëty.

⁴ E oy jënu'un mjatsajpätëty tä witsnën ets oy jeexyë mpä'än xyjyapëjktakpë ma mëtsa'ajën, nëjkxëp jam nyajkënaxy.

⁵ Ko yë mä'tspë jeexyë koots y'ëkmintë ets mjayajmäätsa'anëty, ka'ap mtimmyä'tsta'ajëtëty; ko jeexyë y'ëkmintë mëti'ipë tsatymtyëëm tyujkmujktëpën, yajwë'ëmtëp muum yë tsatymtyëëm. E tëkatsy të jyäty të kyëpety mëët ja mëtsip, ko të mniminyë tëë myajkutëkooytyä'äyë

⁶ Mijts Esaú y'u'unk y'ok, tëë myajmä'tsta'ay, tëë yajmä'tsta'ay tëkokyë ja mwit mmeeny.

⁷ Tu'kë'ëyë mëti'ipë ënety mëët të mnäpyiky mnämyätsyën tëë mwin'ëënyë; tëë myaj'ëxwopy ma mnaax mkajpnën. Yë'ëpaat yë ja'ayëty mëti'ipë ënety mëët të mnämyäyën tëë mmëtsiptsoonyë ets ja ja'ayëty mëti'ipë ënety mëët oy mnämyäyën tëë ja jyot wyima'any tyajtëkajtsta'atë ma mijtsën ets të tpëjkta'aktë ja m'o'ktakn yu'utsypë. Yë Edom kajtëm yë wyijyëty.

⁸ Jëtu'un yë Wintsën y'ënä'äny: Ko xëëw jëmëjt tpaatëty ma ënety ntëytyunyënës yë Edom, nyajkutëkoyäämpyës yë y'ijxpëkyjyä'äytyëjk ets njëpëkäämpyës yë wyijyjyä'äyëty mëti'ipë jam yajpatëpën ma Esaú y'itjotmën.

⁹ Yë tsiptuunpëtëjkëty, Temán ja'ayëty, nëjkxëp tsyëtyuuypyëktë mëët yë mëktsë'ëkë ets jam kopkjotm ma Esaú y'itjotmën ka'ap nëjkx jam pën wyi'imy juuky.

Ja Edom ja tyëko'oyën

¹⁰ Wintsëtyu'un jëjptsëtyu'un nëjkx mwë'ëmy ets xëmëkyëjxm nëjkx mkutëkoy ko ëxëëk të xytyuny ets të xyaj'ooky ja mëkä'äx Jacob.

¹¹ Ko ja mëtsip tmä'tstaay ja naax kajpn, ko ja tsiptuunpëtëjkëty wiinktsowpë tsyoontën tkë'tstaaytyë ja Jerusalén ja y'akaj, mijts jëkäm mnäpyëjktakë. Ko t'ijxpëtsëëmtë jënu'unjaty tyuka'ajëtën mëti'ipë ënety të tmäätstën ets ojts tmënëjkxtë ja wit meeny, mijts jëtu'un mnäpyëjktakë tä yë'ëjëtyën.

¹² Ka'ap jeexyë ojts xytyukxoontä'äky yë m'uty ko o'ktëy jyäjty kyëpejty ets ka'ap jeexyë ojts xytyukxoontä'äky yë Judá ja'ayëty ko xit ko'ow jyajtë ets ka'ap jeexyë ojts xynyëxi'iky xytyukxi'iky ma ënety jë'ë ya'ax yajpaatën.

¹³ Ka'ap jeexyë mtëjkëy maas yë nnaax nkajpnën ma ënety y'ëyoyën ets ka'ap jeexyë ojts xytyukxoontä'äky ma ënety ja ëyo'on jotmay tmëët'atën, ka'ap jeexyë ojts xypyëjkë wyit myeeny ma ënety mon tuk yajpaatën.

¹⁴ Ka'ap jeexyë ojts jam mwa'ak'oyë ma tu'u ye'eymyukyën ets xyaj'o'ky xyajtëkooy ja mëti'ipë käktëpën ets ka'ap jeexyë ojts xykyë'ëyäky ma ënety mon tuk yajpaatën.

¹⁵ Jëtu'un tä xytyuunyën ja wiinkëtypë, näjyëtu'un myajtuna'any: Koonëm xy'ëxajëty mëti'ipë mnitëjkëyëpën.

Ma ja Israel ja'ay yajmëjpëjkta'aktën

¹⁶ Nëkooyë tya'am'ajnë ja uuky mëti'ipë japën a'ukënjoty, mëti'ipë m'uktën maas ja nkënu'kxykyopkën, jëtu'un tya'am'ata'any ja uuky mëti'ipë y'uukantëpën mëto'kx mëto'kxnë ja naax kajpn ets kyutëkooytya'aja'antë.

¹⁷ E yë Sión kopk kënu'kxy y'ita'any ma ja'ay kyäktso'oka'antën. Ja Jacob ja y'u'unk y'ok nëjkxëp ja nyaax kyajpn jatëkok tpaatë,

¹⁸ yë Jacob yë y'u'unk y'ok ets José yë y'u'unk y'ok jëtu'un yë'ëjëty tä witën, mëti'ipë poj'am jëënmatsanëtpën. Nitu'uk yë Esaú y'u'unk y'ok kyatso'oka'any. Ëjts Wintsën, ëjts ënaanp.

^19-20 Yë Israel ja'ayëty mëti'ipë jam yajpatëpën Négueb, yë'ë nyiwa'akantëp yë Esaú jyä'äy nyaaxjot. Yë Israel ja'ayëty mëti'ipë joyjoty yajpatëpën yë'ë nyiwa'akantëp yë filistejë ja'ayëty nyaaxjotëty ets Efraín ets Samaria nyaaxjotëty. Yë Benjamín ja'ayëty yë'ë nëjkx tjä'ä'atë yë Galaad itjot. Ya'atë mayjyä'äyëty mëti'ipë ënety të y'itën tsumy matsy wiink naax wiink kajpn, yë'ë nëjkx tjä'ä'atë Canaán ja'ay nyaaxjotëty jampaat y'ëwtity Sarepta; e yë Jerusalén ja'ayëty mëti'ipë jam tsumy matsy ijtëpën Safarat yë'ë nëjkx tjä'ä'atë ja naax kajpn mëti'ipë Négueb ja'ayëty nyitënaaytyëpën.

²¹ Ko ënety të myëta'aktë tääts nëjkx jam pyätë ma Sión kopkën ets jam tni'ënä'ämëtëty mëti'ipë tsënaaytyëpën ma Esaú y'itjotmën, kopkjotypë ets Wintsën yë'ë nëjkx yajkutuky.