3 Juan 1 - Biblia Dc en Mixe de Quetzaltepec

¹ Ja mëjja'ay Juan. Tkajpxpo'kxy ja nmëku'uk'ajtëm Gayo, mëti'ipë mëtëy tsojkp ja'apën.

² Jëëky mëku'uk, n'amëtoopyës ja Dios ets ja oyajtën mëk'ajtën mmo'ojëtëty, xypaatëty xy'ixëty tii myajmëyäjtypyën ets oy mëk myajpaatëty.

³ Akujk jotkujkës të näjyawëty ko ja nmëku'uk'ajtëm të xynyimintës ets të xytyukmëmëtya'aktës ko mijts oy tsuj ja Dios ja tyiyajtën xypyatuunë.

⁴ Nitiijës të nkatukjotkujk'aty ijxtëm ya'atën, koos të nijawë ko ja n'u'unk n'ëna'kës jyuuky'atë mëët ja tëyajtën.

⁵ Jëëky myëku'uk, oy ko xymyëtuny ja Dios mëtëy ma ja mmëku'uk'ajtëmën, ets ma ja mëti'ipë tso'ontëpën wiinktsow.

⁶ Tëë tnimëtya'aktë ko mijts oy tsuj mja'ay'äty. Jëtu'un xyjyaaktunëty ja mëyajtën, jaaktukputëkë winë tii yajmëyajtëpën ets oy tyu'uye'eytyëty, jëtu'un ijxtëm ja Dios tukxoontä'äkyën.

⁷ Jä'ä ko Dios yë jyä'ä myëjëtijtëtëp, yë'ëjëty ka'ap ja putëjkën të t'ëxajëtë oy pën të jyaputëkëja'anëtë ma ja ja'ayëtyën mëti'ipë ja Dios ka'ap tnijawëtën.

⁸ Paatykyëjxm ëëtsajtëm xypyattëm ets nyajja'ajtakmëty, jä'ä ko tu'ukyë nmëtu'unëm ja Dios.

Ma ka'ap oy tii tuntën ja Diotrefes ets ja Demetrio

⁹ Tëës ja noky n'ëktuknikäxtë ja mëpëjkpëtëjkëty ma miits mye'eymyuktën, je'eyëp ko ja Diotrefes ka'ap të tkupëky ijxtëmës nja'ëna'anyën, jä'ä ko yë'ë je'eyë y'ënä'äma'any.

¹⁰ Paaty koos ënety ëjts nnëjkxy ntukmatsäämpyës wi'ixës xynyimëtyä'äkyën ets ka'ap yi'iyëty, näjyëtu'un ko ka'ap tkupëky ets tyajjajta'akëty ja nmëku'uk'ajtëmë ets nän y'akajpxtujkpy ko ja nmëku'uk'ajtëm jëtu'un tuntë ets tyim'ëxwojpy tyim'ixkejxyp ma ye'eymyuktën.

¹¹ Mëku'uk, këtii yë'ë xypyatunëty ja ëxëëk ijxpëjkën, patun mijts ja oypyë. Pën ja oypyë tyuunpy, yë'ë Dios jä'ä'ajtëp; pën ja ëxëëkpë tyuunpy, ka'ap ja Dios nyijawëty.

¹² Oy tsuj ja Demetrio yajnimëtyä'äky ko mëtëy ja oypyë tuny. Näyjyëtu'un ëëtsëty nän oyës nnimëtya'aktë, ets mijts mnija'ap ko mëtëyës nkajpxtë.

Ja näjyëkajpxën

¹³ Mayës ja winma'any nmëët'aty mëti'ipë miits njatuk'ëwaanëjantëpën; je'eyëp ko ka'apës noky'am n'ëkmëtya'akanë.

¹⁴ Kë'ëm jam nninëjkxa'antë ets nkajpxmëty nmëtyakmëty wiinxë jëjpxë.

¹⁵ Dios mkënu'kxëtëp ets akujk jotkujk myajpaatëty. Mtuknikäjxëtëp ja kajpxpo'kxën ja nmëku'uk'ajtëmë mëti'ipë yaa tsënaaytyëpën. Tun yë mëyajtën, kajpxpo'kx nitu'ukjaty mëti'ipë jam yajmëku'uk'ajtpën.