2 Timoteo 4 - Biblia Dc en Mixe de Quetzaltepec

¹ Jam Dios wintum ets Jesukristë wintum, mëti'ipë minaanpën ijxtëm tu'uk ja yajkutujkpën ets tpaye'eyä'äny ja juukpyë ets ookyëp, tyam ntuk'ëne'emy

² ets xykyajpxpwa'kxëty ja Dios ja y'aaw y'ayuk ets xytyuk'ëwaanëty ja ja'ay oyjyëna'ajëty. Tukja'akyukë, tukwinkukajpxë, jotmëkwinkajpxë, Yaj'ijxpëk mëët tu'kë'ëyë ja mä'kxtujkën.

³ Jä'ä ko pyatäämpy ja xëëw po'o ko ja ja'ay ka'ap tmëmëta'aka'antëty ja oypyë ijxpëjkën, kyë'ëm tsojkën yajtuna'antëp ets t'ixta'aja'antë kanaakjëjp ja yaj'ixpëjkpëtëjk ets tyuk'ijxpëkëtëty mëti'ipë yë'ë tsyojktëpën.

⁴ Ka'ap tmëtoow'ita'antëty ja mëtëypyë, yë'ë nëjkx tmëjpëjkta'aktë ja apmëtyä'äky.

⁵ E mijts, niwijy nikejy mja'ay'atëty, mëtanë ja ëyo'on, kajpxwa'kx xëmë yë aaw ayuk oypyë, patun oy yë mtuunk.

⁶ Ëjts, yoxyës n'ijnë, tëë timpyääty maajës n'ooka'anyën.

⁷ Tëës nmëmëtä'äky ja tsip, tëëjës nja'ty maajës ënety nja'ta'anyën, ka'apës të n'ëxmatsy ja mëpëjkën.

⁸ Ets tyam, ja oyajtënës xy'owëxijtp mëti'ipës xypyatpën, mëti'ipë ja Wintsën, mëtëypyë pyaye'eyën xymyo'ojaanpës jä'ä xëëw. Ets ka'ap y'ëjtsëty je'eyë nätyu'uk, näjyëtu'un yajmo'oja'antë ni'ëmukë mëti'ipë tsyojktëpën ets myinëty mëët ja mëj'ajt oyajtën.

Ko ja Pablo tuk'ëne'emy ja Timoteo wi'ix tyunëtyën

⁹ Tun yë mëyajtën, nimiinkës tsojk.

¹⁰ Ja Demas, tëëjës ja xynyikäknë, mëti'ipë yi'iyë tsyojkën'ajtypyën yaapë naaxwiinyën, tëë ja tsyo'onë ets të nyëjkxnë jam Tesalónica. Yë Crescente jam të nyijkx Galacia y'itjotm, e yë Tito të nyijkx jam Dalmacia y'itjotm.

¹¹ Lucas yam nätyu'uk të jyaak wë'ëmy. Ixta'a ja Marcos ets mëët mminëty, jä'ä ko xytyukputëjkëpës yë'ë ja Wintsën ja tyuunk.

¹² Ja Tiquico, Éfeso të nkexyës.

¹³ Ko mminëty, jamës ja nimu'ux xymyëmiinëty mëti'ipës ojts nyajwë'ëmën jam Troas ma Carpo tyëjkën, näjyëtu'un ja noky apëtityëtypë, tim kopkpëky xyajminëty ja po'o ak apëtitypë.

¹⁴ Ja Alejandro, pujxnka'tspë, ëxëëkës të xytyuny të xynyëëmës. Dios tukëpätëtëp wi'ix të y'ëti'itsyën.

¹⁵ Mnäkyëwent'atëtëp näjyëtu'un ma yë'ëjën, jä'ä ko tëë tmëtsippëky ja aaw ayuk mëti'ipës të nkajpxwä'kxtën.

¹⁶ Koos ënety nänyikajpxtu'utyë ma ja kutuunkëtyën, ka'ap ojts pën xypyutëkës, ni'ëmukë xy'ëxmajtstaaytyës. Jääpëk yë Dios ka'ap tja'amyetsy.

¹⁷ E Ojtsës ja Wintsën Jesús xypyutëkë ets xymyooyës ja mëjaaw ets ja oy'aaw oy ayuk nkajpxwa'kxëtyës ets tmëtowtëty ja ja'ay mëti'ipë ka'ap jyutiis'atën. Jëtu'unës ja Dios xyaj'ëwa'atspëtseemy jam tsimptum o'këntum,

¹⁸ ets xyaj'ëwaatsëpëtsëmaanpnëmës maajaty ja ku'oypyën ets xyajnëjkxa'anyës jam tsajpjotm ma yë'ë yajkutukyën. Yë'ë jyä'ä'ajtyp ja mëj'ajtën jaanty'ajtën xëmëkyëjxm. Tëy jëtu'un.

Ko ja Pablo nyäjyëkäjpxyë

¹⁹ Kajpxpo'kxtëkës ja Priscila ets ja Aquila, näjyëtu'un ja Onesíforo myëku'uktëjk.

²⁰ Jam ja Erasto të wyi'im Corinto, e ja Trófimo yë'ëjës të nyajwë'ëmy jam Mileto, jä'ä ko të pya'ampety.

²¹ Tsojk mminëty naamka'anëm pyotmtëkë. Mkajpxpo'kxëtëp ja Eubulo, Pudente, Lino, Claudia ets ni'ëmukë ja nmëku'uk'ajtëmë.

²² Wä'än ja Wintsën Jesukristë tyajpaaty mëët mijts, Dios mkënu'kxëtëp ni'ëmukë.