2 Samuel 7 - Biblia Dc en Mixe de Quetzaltepec

Ma ja Wintsën tnikäjpxyën ko ja David tkënu'kxa'any

¹ Ko ja David ënety tëë ja kyutujktakn tpatnë ets ka'ap nëkooyë ma ja jëën tsip t'ëkmëët'ajnë mëët ja myëtsiptëjk mëti'ipë jam yajpatëpën winkon,

² ënät t'ënëmaay ja Natán, mëti'ipë y'akäjpxypën ja Wintsën ja y'aaw y'ayuk: Ijxtëm xy'ixyën, ëjts janty oyës ja njëën ntëjk mëti'ipës ntuktsëna'ayëpën, tu'uk ja kutujkëntëjk mëti'ipë mëët y'oytyunyëtyën ja oytsyaa oy kepy. E tyamts ja Wintsën ja kyaaxë jap ja y'ijtpë muum ma tëjkën je'eyëpë naxo'omyën ëkë natëypyë mëët ja wit.

³ Ets ja Natán y'ëtsooy: Mijts mnija'ap tii mtunäämpy, ka'ap wyi'ixëty, tëë xynyijawë ko yë Wintsën yë'ë mputëkëjanëp oy tii xytyimtuknipëjktaakëty.

⁴ E jä'ä tsu'um ojts ja Dios tmëkäjpxy ja Natán kuma'ayjoty ets t'ënëmaay:

⁵ Nëjkx jam ma David yajpaatyën ets xy'ënëëmëty koos jëtu'un n'ëna'any: Mijts David, ka'ap mijts mpaatyë ets xykyojëty tu'uk ja tëjk maas ëjts n'itëty ntsëënëtyën.

⁶ Ëjts tëëjës n'ijxwë'ëmy koos yë'ë ntuktsëna'ayëp wit tëjk, jëtu'unyëmës yë'ë ntuktsëënë, tyimtso'ontäky ko jap Egiptë nju'tyës yë Israel ja'ayëty.

⁷ Tyimnaxy ja xëëw jëmëjt ëjts ka'apës tu'ukën pën yajkutujkpë, ëkë tu'uwinye'epyë yë jëën tëjk të n'amëtoy ets tu'uk ja ntsajptëjkës xykyojëty mëti'ipë mëët ja oyëtypë tsaa ets kepy y'oytyunyëtyën.

⁸ E paaty ënëëmë yë ntuunpës David, ko ëjts, mëti'ipë Wintsën'ajtpën, mëti'ipë maaytyääyëpën winë, n'ënëëmës: Ëjts mijts të njuuty jam kemyjotm maa ënety xëmë xykyëwent'atyën yë mkupixyny, mtsajppax ets yë'ë xëmë mpajëtijtyp; tëë mpëjktä'äky ets m'itëty wintsën ets kopk maas nnaax nkajpnën, Israel kajpn;

⁹ tyam xëmë ënät njämyëët'aty oy maa mtimnyijkxy; tëëjës yë mmëtsip nyajkutëkooytyä'äy mëti'ipë ënety ëxëëk m'ixëpën ets mëj'äämpy të nyajnaxy tä yë ja'ayëtyën mëti'ipë mëj'äämpyëtyën yaa naaxwiiny naaxkëjxy.

¹⁰ Tëë näjyëtu'un tu'uk yë it naaxwiinyëtë nipëjktaakës maas yë naax nkajpn tsyëënëtëty jyuuky'atëty; mëti'ipë yë'ë kë'ëm tyimjä'ä'atëpën, ma ka'ap pën y'ëtsipëtëtyën ets ma ka'ap yë ëxëëkja'aytyëjk yajjtokëxëtyën jëtu'un tä të pya'tkë'p'atyën.

¹¹ Koos mpëjktäky ja ja'ay mëti'ipë nyitsiptuntëpën ja naax kajpn. Ëjts nëjkxëpës mijts ëwaatsëtum xëmë nyaj'ity ma ja mëtsiptëjkëtyën. Ets tyam näjyëtu'un ntuknijawë ko nmo'ojäämpy ja m'u'unk m'ok,

¹² e ko ënety tëë m'ënu'kxënyë ets ja m'o'kën wyinkoonë, ëjtsës kë'ëm nyajkutukäämpy ets tu'uk ja m'u'unk maay wyë'ëmëty ma ja mkutujktaknën, yë'ëtsës nëjkx xëmë nyaj'ëne'emy.

¹³ Yë'ë ja ntsajptëjkës kyojëp ets xëmës ja kyutujktakn nyaj'ita'any.

¹⁴ Ëjtsës nëjkx xytyeety'äty ets yë'ë nmaank'atyës. E ko ënety tyuuntëkoy, nëjkxëpës ntukumëtoy ijxtëm tu'uk yë u'unkteetyën yë y'u'unk tukumëtoyën ko kyamëtä'äky,

¹⁵ je'eyëp ko ka'apës npëjkëja'any ja nkënu'kxënës jëtu'un tä ja Saúl ojts npëjkënës ets mijts nmooy.

¹⁶ Yë mtëjk ets mkutujkën mëj'äämpy nëjkx xëmë y'ity, jä'ä ko ëjtsës ntimmyajts'itäämpy ets näjyëtu'un yë mkutujktakn xëmë y'ijtëwëty kojy mä'kxy.

¹⁷ Yë Natán ojts winë ja David tukmëmëtyakta'ay tää ënety të tmëtoyën ets të twin'ixyën.

¹⁸ Ënet ja yajkutujkpë David tyëjkëy jap tëkoty ets myëtya'aka'any mëët ja Wintsën ets t'ënëmaay: Wintsën, ¿jënu'unëmës jëtää ëjts tii n'ëktimtsyowëty ets näjyëtu'un ja n'u'unk n'ëna'kës, etsës mijts Yaapaat të xyajja'ty?

¹⁹ Wäänë jëtäätën xy'ixy, ko yë'ëpaat xynyikajpxnë wi'ix myiny wyinkonyën ja n'ënä'ämënës nkutujkënës, wi'ix ja n'u'unk n'okës nëjkx y'ënä'ämtën yajkutuktën. Jëtu'un ijxtëm mijts winë xytyunyën, ka pën mkamëpaatëtëty Wintsën.

²⁰ ¿Wi'ix mijts njaak'ënëëmëty? Mijts wa'ats xy'ixy xynyijawë ja njot nwinma'anyës.

²¹ Tëkokyë mëti'ipë të xytyuny të xykyäjpxyën, jëtu'un të tyuny të jyätyë tä mijts kë'ëm të xytyuknipëjktaakën ets të xy'akäjpxyën täätsës ëjts n'ixëty nijawëty;

²² paatyës njanty y'ënä'äny, ko mijts Wintsën mëj këjää winë xytyuny xykyäjpxy, ka'ap maa wiinkpë jëtu'unpë tä mijtsën; ka'ap maa jëtu'unpë Wintsën tä mijts mWintsën'atyën, mëti'ipës kë'ëm të n'ixtën ets të nnijawëtën.

²³ E yë'ë ënät ja Israel kajpn, mëti'ipë mijts mkajpn'ajtypyën, ni pën kyamëpaatëtëty tä yë'ëjën. Tä yë'ëjën, tu'ukyë jëtu'unpë yajpaaty yaa naaxwiiny naaxkëjxy. Mijts Wintsën, mijts ojts xyaj'ëwaatsëpëtsëmy ets mijts xyjyä'ä'atëty; tëë mëj'äämpy xyajnaxy mëët ko winë të xytyuny ma yë'ëjën mëjwiin këjää, jä'ä ko mijts ojts xyajkutëkooytyä'äy ja naax kajpn mëti'ipë ënety atsijpëpën ko tsyo'ony jap Egiptë mëët tukë'ëyë ja tiosëty mëti'ipë y'ëwtajtëpën,

²⁴ tëë mijts kë'ëm xytyimnikäjpxy ko yë Israel kajpn yë'ë xykyajpn'ata'any xëmëkyëjxm ets ko mijts Wintsën, m'ëwtata'anyë.

²⁵ E paaty yam n'ënëëmë, ko xytyunëty yë mëyajtën xëmë y'atëwëty ja oypyë mëti'ipë të xynyikäjpxyën, ko xyaj'ita'any ja nkutujkënës ma ëjtsën ets maas ja n'u'unk n'ëna'kën.

²⁶ Jëtu'un'äämpy ja mxëëw xëmë mëj'äämpy nyaxëty ets ja käjpxy y'ëna'anëty: yë Wintsën mëti'ipë maaytyääyëpën winë, yë'ë y'ëwtajtëp yë Israel ja'ayëty. Ets wä'än yë mtuunpë David xëmë mëk t'ity yë y'ënä'ämtakn, mëët mijts mputëjk mpupäjtën.

²⁷ Mijts Wintsën mëti'ipë maaytyääyëpën winë, oy koos të xytyuknijawë ko ëjts ja nkutujkën xëmë xyaj'itanë; e paaty ëjts, oyës xy'ëktuunpë'aty, n'amëtowa'any mpëjktsowa'anyës.

²⁸ Ko mijts Wintsën, mëti'ipë Tios'ajtpën ets mëti'ipë ja y'aaw y'ayuk mëtëyën ets maas të xytyukwinwanën ja oyajtën;

²⁹ npëjktsoyës ets xykyënu'kxëty ja nkutujkënës, wä'än xëmë t'ity ijx'ity këwent'aty mëët mijts. Wintsën, jëtu'un mijts kë'ëm të xynyikäjpxy ets mëët ja mkënu'kxën ja nkutujkënës kënu'kxy nëjkx xëmë yajpaaty.