2 Samuel 6 - Biblia Dc en Mixe de Quetzaltepec

Ma ja David tjakëëytyëkatsanyën ja Wintsën ja kyaaxë

¹ Ënet ja David ojts tyajmujkta'ay tëkokyë ja tsyiptuunpëtëjk aak win'ixy tyajmujky, jampë ma ja Israel kajpnën ets jä'ä nyiwinë'ajtë, i'px majk mil,

² ënät tsyo'ontë jam Baalá ma ja Judá tnitänën mëët tëkokyë jënu'un ënety nyiwinë'atën; ja kaaxë myëtsoonantëp mëti'ipë ja Wintsën jyä'ä'ajtypyën, ma yaj'ëwtatyën ja xyëëw kënu'kxypyë; ja Wintsën mëti'ipë maaytyääyëpën winë; mëti'ipë ja kyutujktakn myëët'ajtypyën itkujky ma ja tsajpjotmëtë kukäjpxy yajpaatën mëti'ipë yajtijtëpën querupines.

^3-4 Ënet ja kaaxë jam tkëxpëjktë ma tu'uk yë kepy wintëkäämpën jemypyë ets jam tmëtso'ontë ma ja Aminadab ja tyëjkën jam kopkkëjxm. Yë Uza ets Ahio, yë Aminadab yë y'u'unk y'ëna'k jä'ä tyu'uwinye'eytyëp ja kepy wintëkäämpë ma ja Wintsën ja kyaaxë nyijkxyën, ja Ahio jä'ä jëyëjp nëjkxp.

⁵ E ja David ets tëkokyë ja Israel ja'ayëty äjtstëp xoontaktëp nyëjkxtë amëjaaw Wintsën wintum, jam ix'am mëët ja xuxpë wojpë.

⁶ Ko jam jyajtë ma tu'uk ja it txëëwatyën Era de Nacón, jam ojts ja tsajpkaa jawäänë tkamëkëtay ja Dios ja kyaaxë ets ja Uza poj'am tmajtsy.

⁷ E ja Wintsën wiink ojts t'ixy, paaty tukjoot'anpëjky ja Uza mëët ko ënety të tmajtswë'ëmpë ja kaaxë ets jämyë y'o'këtäky winkon ma ja kaaxën.

⁸ Yë David ka'ap jëtu'un t'oyja'awëy ko ja Wintsën ënätyë tyaj'o'ky ja Uza, paatykyëjxm jampë ja it ojts txëëwmo'oy Peres-uzá, tyampaat jëtu'un yajtijy.

⁹ Ko jëtu'un tyuunë jyajtë David ojts ja tsë'ëkë tyuktëkëty jä'ä xëëw, mëët ja Wintsën, paaty mëk'äämpy ojts y'ënä'äny: Ëjts tyamës yajxon nnikäjpxy, ko ya'atë kaaxë ka'apës maa nmënëjkxa'any.

¹⁰ E jä'ä ko ja David ka'ap ojts t'ëk'a'ijxënë tmënëjkxëty ja Wintsën ja kyaaxë ma ja kyajpnën, ënät ojts tjaakni'ënä'ämë ets jam tkukëyëtëty ma ja Obed-edom ja tyëjkën, tu'uk yë Gad ja'ay.

¹¹ Ja Wintsën ja kyaaxë jä'ä ojts jam pyo'oxy tëkëëk po'o ma ja Obed-edom ja tyëjkën, jëtu'un tä pyoxyën ja kaaxë jam ma ja Obed-edom ja tyëjkën jëtu'un ojts ja Wintsën ja kyënu'kxën jam tyajkëtä'äky.

Ma ja David tyajnëjkxyën ja Wintsën ja kyaaxë jam Jerusalén

¹² Ko ja David yajtukmëmëtyäky wi'ix ënety ja Obed-edom mëj këjää jam ja näkyënu'kxë tpaatyën ma jyëën tyëjkën ets ma yë'ëjën, ënät ojts nyijkxy akujk jotkujk ets jam tmëtsoona'any ja kaaxë ets tyajnëjkxa'any jam Jerusalén.

¹³ Je'eyë ënety të tmënajtswa'akëtë tëtujk teky, ko ja David jam tu'uk ja wintsë'kën tyäjky Wintsën wintum, ojts tu'uk tyaj'ooky yë tsajpkaa yä'äypyë ets tu'uk yë tsajppax.

¹⁴ David yë'ë nätyukxojxë tu'uk yë nijän, linë wit, amëjaaw jyänty y'ejtsy jyänty pyujty mëët yë xoontakën.

¹⁵ Yë'ë ets tëkokyë yë Israel ja'ayëty yaxp jojkp nyëjkxtë mëët ja xoontakën ets ja xuxpë wojpë näjyëtu'un, tmënëjkxtë ja Wintsën ja kyaaxë akujk jotkujk.

¹⁶ Ko jam jyä'äjty ja Wintsën ja kyaaxë ma ja David ja kyajpnën, ja David ja tyo'oxytyëjk mëti'ipë xyëëwajtypyën Mical, ënät ojts y'ijxwoony ma ja tyëjkën; ko t'ijxy ja David jyänty y'etsy jyänty pyuty jam Wintsën wyintum, yë Mical wiink ojts t'ixy.

¹⁷ Ja Wintsën ja kyaaxë jap ojts yajpëjktä'äky ma të yajnipëjktaakën, ma tu'uk ja wit tëjkën mëti'ipë ënety ja David të tuknikojën. Ënet ja David ojts tyäky ja wintsë'kën ma Wintsënën, tyajnitooy ja tsajpkaa kanaak, ma t'ëëwkëxy tkajpxkëxyën ja tsip äkë mëët ja Wintsën,

¹⁸ ko tyajwintu'upëjktaay ja wintsë'kën ënät ojts tkënu'kxy ja naax kajpn mëët ja Wintsën ja xyëëw mëti'ipë maaytyääyëpën winë,

¹⁹ ets tyajkaaytyääy tëkokyë ja Israel ja'ayëty mëti'ipë ënety jam yajpatëpën, këëktu'uk tmooytyë tsajpkääky, yë tsatym myä'ätsy ets këëktu'uk yë tsu'utsy. Ko kyääytyääy y'uktaaytyë tä ojts wyinpijtaynyëtë ma jyëën tyëjkëtyën.

²⁰ Yë David ojts nyëjkxnë ma tyëjkën ets tkënu'kxa'any ja jampë yajpaatën; e ja Mical, ja nyëëx ja Saúl, ënätyë ojts tnipëtsëmy ja David ets t'ënëmaay: Nëkoo tyam janty'oy y'ëkyaj'ijxnë ja Israel ja kyutujktakn; janty'oy të y'ëkwë'ëmnë, paaty mijts niwa'ats ëxwa'ats mtimy'äjtsnë, jëtu'un tä jeexyë oy na pën ja'ayën.

²¹ Tä ja David y'ëtsooy: Tëyajtën yë'ë; tëëjës njanty'etsy njantypyuty, je'eyëp ko Wintsën wyintumës të n'ety të mputy mëti'ipës të xywin'ixyën ijxtëm jeexyë ja mteetyën, ëkë pën mëku'ukën, etsës n'ënä'ämëty ja nyaax kyajpn, yë Israel kajpn. E paatykyëjxmës n'ety akujk jotkujk.

²² Ëjts ni'ikyënëmës yam ntuna'any mëti'ipë mijts mwiink'ijxypyën; je'eyëp ko oy mijts xykya'oyjyawëty, yë tääpë ja'ayëty mëti'ipë mijts të xynyikäjpxyën yë'ëjës xy'oyjya'awëtëp.

²³ Mical mëët ko jëtu'un y'ënäny, ojts tpoky'äty ka'ap ja u'unk maay tpaty t'ijxy.