2 Samuel 5 - Biblia Dc en Mixe de Quetzaltepec

Ja David mëti'ipë tu'uwinwoowën jam ma ja Israel kajpnën ets ma ja Judá kajpnën

¹ Kom ok ojts ja Israel ja'ay nyëjkxta'atë jam Hebrón ets myëtya'aka'antë mëët ja David ets t'ënëmaaytyë: Ëëts'ajtëm tu'ukyë ja jot ne'pyny ntukmujkëmë,

² e tä të y'ityën, oyën ja Saúl ënety jä'ä jya'ënä'ämpë, mijtsyëm ijty mtu'uwinye'eypy ja naax kajpn ko muum tsyippaaty. Tëë kë'ëm ja Wintsën y'ënä'äny ko mijts jëtu'un mwinye'epy ja Israel kajpn ets xy'ënä'ämëty.

³ Jëtu'un'äämpy ja mëjja'aytyëjkëty mëti'ipë jam yajpatëpën ma ja Israel kajpnën ojts nyëjkxta'atë jam Hebrón ma ja David yajpaatyën ets yë'ë tuuny tu'uk ja käjpxytyu'unën mëët yë'ëjëty, tpëjktaktë ijxpë mëtoowpë ja Wintsën. Tä ojts tkënu'kxtë ja David ets yë'ë wyë'ëmëty yajkutujkpë ma ja Israel kajpnën.

⁴ David jä'ä ënety yë jyëmëjt i'px majk ko tyëjkëy tu'uwinwoowpë ets jä'ä ojts tyuny wëxtyikxy jyëmëjt:

⁵ jam Hebrón ma ja Judá ja jyä'äyëtyën, jä'ä ojts y'ëne'emy wëxtujk jëmëjt ja kujkm, e jam Jerusalén ma ja Israel ja'ayëtyën jä'ä ojts y'ëne'emy i'px majktëkëëk jëmëjt.

Ma ja David tnitëkën ja itjot mëti'ipë ta'tspëkyën

⁶ Ënet ja David ojts jam tsyo'onë mëët ja jyä'äy ets nyëjkxnëtë Jerusalén ets tsyiptuna'antë mëët ja Jebús ja'ayëty, mëti'ipë ënety jam tsënaaytyëpën. Yë Jebús ja'ayëty jä'ä ojts y'ëna'antë ko yë David tsip ets jam tyëkëty ma ja kajpnën, paaty t'ënëmaaaytyë: Mijts ka'ap mayëtëty ets yaa mtëkëty, yë wiintsëntëjkëty ets teky mya'attëjkëty yë'ë nëjkx ëxëëk mtunyë.

⁷ David ka'ap tii mëj tja'awëy, ojts ja kajpn tnitëkë mëti'ipë ënety yajtijpën Sión, mëti'ipë tyam ja David kyajpn'ajtypyën.

⁸ Tëë ënety yë David y'ënä'äny ko tnitëkëja'antë ja Jebús ja'ayëty, jamtsow nëjkx nyaxtë ma ja nëëtu'ujën ets tyaj'o'kta'atëty tëkokyë ja wiintstëjk ets ja tekymya'atëjk mëti'ipë ëxëëk y'ijxypyën. Jamts ja ayuk tsyoony mëti'ipë ënaanpën: Yë wiintstëjk ets tekymya'atëjk ka'ap jam tyëkëtëty ma ja tsajptëjkën.

⁹ Ko ya'atë kajpn ojts tnitëkëtë ets yë'ë myëtaktë, jam ojts yë David tsyënaaytyaknpëjknë ets tyajxëëwpejty, David yë kyajpn, ya'atë kajpn ojts yajxon tnapotstë, jap ja potsy tyimtso'ontäky naax'ëjxy ets tyimja'ajty jam ma ja kutujkëntëjkën.

Ma ja Hiram tkexyën ja jyä'äy ets nëjkx ja David tku'ixëtë

¹⁰ Ja David ja kyutujkën ni'ikyë ojts myëjë kyëjääjë ets ja Wintsën mëti'ipë maaytyääyëpën winë ojts ja putëjkën myo'oyë oy tyimmaajëty.

¹¹ Paatykyëjxm yë Hiram, jampë y'ëne'emyën Tirë tyuknikäjxë jyä'äy, yë Hiram ojts näjyëtu'un tkexy yë jyä'äy mëti'ipë jyajtëpën yë tsäjtsk pujxk ets pojtsk ets ojts tmënëjkxtë oyëtypë aay kepy ets ja David ojts yajkojy ja kyutujkëntëjk.

¹² Jëtu'un'äämpy ja David tja'akyujkëy, ko yë Wintsën ënety të tjanty yajkutuky ets yë'ë ja naax kajpn tu'uwinwowëty, paaty xëmë pyutëkëty ets ja kyutujkën myëjwiin kyëjääjëty ets yajpaye'eyëty oy ja naax kajpn ja y'amay jyotmay.

Wiinkpë ja David ja y'u'unk y'ëna'k

¹³ Ko yë David ojts jam tsyo'onë Hebrón ets nyëjkxnë jam Jerusalén, ojts wiinkpë tyo'oxytyëjk tjaakwoy mëti'ipë ojts tyajmëxu'unk'atyën ja y'u'unk ye'etyëjkpë ets to'oxytyëjkpë.

¹⁴ Ja y'u'unk y'ëna'këty mëti'ipë jam mëxu'unk'ajtën Jerusalén, jä'ä xyëëwajtë: Samua, Sobab, Natán, Salomón,

¹⁵ Ibhar, Elisúa, Néfeg, Jafiá,

¹⁶ Elisamá, Eliadá ets Elifélet.

Ma ja David ojts ka'ap tyajmëtä'äkyën ja filistejë ja'ayëty

¹⁷ Ko yë filistejë ja'ayëty tnija'awëtyë ko tëë yë David yajkënu'kxnë ets yë'ë Israel kajpn t'ënä'ämëty ënät ojts ënätyë tnitsoontë ets tyaj'ooka'antë, e ja David ojts ënätyë tnijawë paaty ojts jam poj'am nyijkxy ma ja itjot mëti'ipë këwent'aty ijtpën ma ja mëtsip ka'ap myäyëtëty tyëkëtyën.

¹⁸ Yë filistejë ja'ayëty, ojts tsyoontë ets jam nyäpyëjktakëtë ma tu'uk ja itjot txëëwatyën Refaim.

¹⁹ David pojën ojts ja Wintsën tuk'ëwaanë ets tyajtëëy: ¿Wi'ix oy'atëp ets mëët yë filistejë ja'ayëty ntsiptunëtyësë? Tä ja Wintsën y'ëtsoowë: Oy, tsiptun mëët, tyam mijts nyajmëta'akëty.

²⁰ Tä ja David jam jyä'äjty Baal-perasin, jam mëët yajxon tsyiptuuny ja filistejë ja'ayëty, ma ojts ka'ap tyajmëtä'äkyën. Paaty jam y'ënäny: Jëtu'un tä yë mëj nëëkom muum nyäxyën, jëtu'unës yë Wintsën yë nnë'ë ntu'u të xy'ëwatsë maas yë nmëtsiptëjkën, paatykyëjxm tampë ja it txëëwmooy Baal-perasim.

²¹ Ko yë filistejë ja'ayëty t'ijxtë ko ka'ap y'ëkmëta'akanëtë, tääts jëtu'unyë tnikääkjojktë ja y'apëjk y'atu'unën, ja nyaaxpotsyëty ets ja kyepy tyetsyëty mëti'ipë ijty y'ëwtajtëpën, e ja David yë'ë ojts tpëjkmujkta'ay.

²² Yë filistejë ja'ayëty kä'äpyëm tyimjotkujk'atë, ënät jatëkok ojts jam nyäpyëjktakojënëtëpë Refaim,

²³ David ojts jatëkok yë wyintsën tuk'ëwaanë, ja Wintsën ojts y'ëtsoowinpityë ets y'ënëmaayë: Këtii wintuuytsyow xynyiminëty, jëxkë'ptsow xynyi'ëwtitëty ets jää xynyipëtë'ëkëty ko ënety jam të mja'ty ma ja kepyjotyën mëti'ipë yajtijpën bálsamo.

²⁴ Ko xymyëtowëty yë ja'ay myiny ets aaykyëta'ak tyaj'ëna'any, jää mpëtë'ëkëty ets xytyukja'tëty yë filistejë ja'ayëty; ëjts nija'awënës ënety jëtu'un nyäjkpy ko jëyëjpës nnëjkxy ma mijtsën ets filistejë ja'ayëty ëxëëk jyatëty kyëpätëty.

²⁵ David ojts jëtu'un tuny tä ënety ja Wintsën të tyuk'ëne'emyën ets ka'ap ja filistejë ja'ayëty tyajmëtäky, tpatso'ony jam Gabaón ets tyimja'ajty jam Guézer.