2 Samuel 24 - Biblia Dc en Mixe de Quetzaltepec

Ma ja David tjaaypyäjta'ayën ninaak ja ja'ay nyimayëtyën

¹ Ënet ojts ja Wintsën jatëkok tukjoot'anpëky ja Israel ja'ay, ko ja David tëkatsy ja winma'any tpaty ets ni'ënä'ämëy tkëxjaaytya'atëty tëkokyë jënu'un ja ja'ay jam yajpaatën ma ja Israel ets ja Judá kajpnën.

² Tä ja yajkutujkpë t'ënëmaay ja Joab, mëti'ipë nyiwintsën'ajtypyën ja tsiptuunpëtëjk: Nëjkx tukjëtijtëtya'a ja Israel kajpn ets Judá kajpn, jam xypyatsoonëty Dan ets xyajja'tëty Beerseba, wa'ats xykyëxjaaytya'ajëty ninaak ja ja'ay jam yajpaatën, jëtu'unës nijawëty jënu'un nyiwinë'atën.

³ E ja Joab tyaa y'ëtsooy: Jääpëk yë Wintsën të tuny mëyajtën, mëti'ipë mijts m'ëwtajtypyën ets të tyajnimayë ja ja'ay mëko'px nipätën ets yë'ë yajkutukëp ets mijts janty jeky mjuuky'atëty tääts xy'ixëty; ¿je'eyëp ko tii ko xytsyojkpë ets tëkokyë ja ja'ay yajjaaypyätëty?

⁴ E ja yajkutujkpë ojts ja y'ënä'ämën tukkupëky ja Joab ets ja tsyiptuunpëtëjk, paaty ja Joab ojts jam tsyo'onëtë mëët ja tsiptuunpëtëjk ets tjaaymyuka'antë ja ja'ayëty.

⁵ Ojts ninaxtë ja Jordán mëjnëë ets tyajtso'ontaktë ja jaaymyujkën jam Aroer, ma tu'uk ja kajpnën mëti'ipë jam yajpatpën joyjotm, ma ja tu'u nyäxyën mëti'ipë nëjkxpën Gad ets Jazer.

⁶ Jam tsyo'ontë ets nyëjxtë Galaad ets Cadés, ma ja Hit ja'ay tsyëënëtën. Jam tsyo'ontë tääts ojts jya'të Dan, Dan nyajxë'ktë ets jam y'ëwtijtë Sidón.

⁷ Ko jam t'aye'eytyääytyë tääts ojts nyëjkxtë ma ja Tirë kajpnën ets tukjëtijtëtyääytyë ja Heve ja'ayëty ets ja Canaán ja'ayëty ja nyaax kyajpnjotmëty, tyimpëtsëëmtë jam ëpa'tkë'ëmtsow ma ja Judá nyaax kyajpnën ets jyajtë Beerseba.

⁸ Kom taxtujk po'o ets ja i'px xëëw ojts tyaj'apëtsëmtë, jyajtë jam Jerusalén.

⁹ Tä ja Joab tukë'ëtëjkëtyë ja David ja noky, ma ënety të tkëxjaaytya'atën ja ja'ayxyëëw; jä'ä nyiwinë'ajtë ni'ëmukë ja Israel ja'ayëty, tuktujk mëko'px mil mëti'ipë maayënëtëp tsyiptuntëty, mëkoxk mëko'px jam Judá.

¹⁰ Ok ojts ja David nyäjya'awëy'ityë ko kajtëm jëtu'un y'oy'äjty, ko tëëtëm ënety tyëkoy ko ja jaaymyujkën tni'ënä'ämëy, ënät ojts ja Wintsën tjamëmaaywyajtsnë, tja'ënëmaaynyë: Mëj këjääjës të ntuuntëkoy koos ja winma'any jëtu'un të npaaty. E tyamtsës npëjktsoy ma mijtsën Wintsën ets xymyä'kxëty ja npokyës, jëtu'unës të n'ëtsë'ëty tä tu'uk yë winma'anytyukën.

¹¹ Komjëpom ko ja David ojts myä'äypyëti'iky, ënät ja Wintsën t'ënëmaay ja Gad, mëti'ipë ja Wintsën winë tyuk'akäjpxypën, ko ja David tii tnijawëja'any:

¹² Nëjkx yë David ix ets xy'ënëëmëty, ko tëëkëëkpëkyës yam ja winma'any nmo'oy, wä'än twin'ixy mëti'ipë tsyojkën'ajtypyën etsës ntunëty.

¹³ Tä ja Gad ojts tjanty nyinëjkxy ja David ets tyajtëëy: Jëtu'un yë Wintsën y'ënä'äny; ¿mëti'ipë mijts mtsojkën'ajtyp: wëxtujk jëmëjt yë yuu xëëwë, ëkë tëkëëk po'o xykyukä'äkëty yë mëtsipë, ëkë tëkëëk xëëw y'itëty yë pa'am ëyo'on ma mnaax mkajpnënë? Mëmay mëtaj yajxon ets xynyikajpxëty ets ntuk'ëwaanëtyës mëti'ipës xykyäjxpën.

¹⁴ Ets ja David t'ëtsooy ja Gad: Ëjts Jotmayjyotyës tyam nyajpaaty, ni'ik oy ko yë Wintsën yë'ë xytyiytyu'unëtyës ets këtiinëm ko yë'ë nmëtsipës.

¹⁵ Ënet ja Wintsën ojts tnajtskäxë ja pa'am ëyo'on jä'ä jopy, ma ja Israel kajpnën, tyimtso'ontäky jam Dan ets tyimja'ajty jam Beerseba, jä'ä ja ja'ay niwinë y'o'ktë nitëkë'px majk.

¹⁶ E tam ënety ja Wintsën ja kyukäjpxy tyimja'tanë Jerusalén mëti'ipë yaja'ay o'kpën ets ja naax kajpn tyajkutëkoyä'äny, ko ojts ja Wintsën tnijootwinpity ja naax kajpn ets t'ënëmaay ja kyukäjpxy: Wä'än jääyë jëtu'un, këtii tii xy'ëktuunë. E ja Wintsën ja kyukäjpxy jam ënety mëtëy yajpaaty ma tu'uk ja ja'ay ja kyamjotmën, mëti'ipë xyëëwajtypyën Arauná, Jebús ja'ay, tsajpmok ënety jam yajpajk'ajtyp.

¹⁷ Ko ja David t'ijxy ja Wintsën ja kyukäjpxy mëti'ipë yajja'ay'o'kpën, ënät t'ënëmaay ja Wintsën: Ëjts jëtu'un ja poky nmëët'ajtyp, ëjts të ntëkoy ¿tyaapë ja'ayëty mëti'ipë tyam nëkoo të y'ooktën, tii poky të t'ëktuntë? tyam mijts nmënu'kxtä'äky ets yë'ë xyaj'ookëty yë n'u'unk n'ëna'kës, ëkë n'u'unk nto'oxytyëjkës.

Ma ja David tyaj'oyën tu'uk yë wintsë'këntyakn

¹⁸ Jä'ä xëëw yë Gad ojts tninëjkxy yë David ets t'ënëmaay tyajpëtë'ëkëty tu'uk yë wintsë'këntyakn jam ma ja Arauná ja nyaax kyamën, ma ënety ja tsajpmok tyajpajk'atyën ets jamts ja Wintsën ja wyintsë'kën tmo'ojëty.

¹⁹ Ënet ja David jëtu'un tjantyuuny tä ënety ja Gad të tyukmëkäxëtyën ja Wintsën.

²⁰ Arauná tam ënety y'ixy jyawë kyamjotm, ko tjëjpmë'ijxëy ja yajkutujkpë myintë mëët ja tyuunpëtëjk. Ënet poj'am tnitso'ony ets tjëjppaatë'ky, wyintäky nyaaxkooy tyajnikëxë'ëky jëtu'un ja näwyinkutsë'ëkë

²¹ tä ja Arauná tyajtëëy ja yajkutujkpë: ¿Tii ko yaa miny mijts Wintsën, ma yaa mtuunpë yajpaatyën? Tä ja David y'ëtsooy: Yë'ëjës njuyäämpy yë mnaax ma mtsajpmok xyajpajk'atyën etsës jää tu'uk nkoja'any yë wintsë'këntyakn maas ja Wintsën ja wyintsë'kën nmo'oja'anyën, wä'än tjëpëky ja pa'am ëyo'on ma naax kajpnën.

²² Ets ja Arauná y'ëtsooy: Mëj'ënä'ämpë, tää yë naax kam y'ity, yajtun mëti'ipë mtsojkën'ajtypën, jam xykyojëty ja potsy ma ja Wintsën ja wyintsë'kën xymyoja'anyën ja nino'okpyë, jyëkyejpy xyajtunëty tääpë kepy mëti'ipës yë tsajpmok ntukwinwojpyën ets jyä'äxy'atëty, tä näjyëtu'un yë tsajpkaa jyätyë oy xyaj'ookëty.

²³ Tëkokyë mëti'ipë jää yajpatpën mijts jä'ä'aty. Ojts ja Arauná näjyëtu'un y'ënä'äny: Jääpëk yë Wintsën tuny yë mëyajtën ets tkupëkëty mëti'ipë mtukwintsë'ëkëjäämpyën.

²⁴ E ja yajkutujkpë tyaa ja y'ëtsooy: Ëjts nkukajpxëpës yam tä m'ëna'anyën, je'eyëp ko nkujuyäämpyës yam mëti'ipëjatyës ënät nyajtunëpën, jä'ä ko ka'ap tjëkyepy ëjts winë ja Wintsën ntukwintsë'ëkëty mëti'ipës ka'ap xytsyoowpatën. Jëtu'un'äämpy ja David ojts tkujuy ja tampë ja naax kam ets ja tsajpkaa, jä'ä tkujuuy wëxtyikxy majk aakyë'ë poop pujxn meeny,

²⁵ jamts ojts tu'uk ja wintsë'këntyakn tjantyyajpëtë'ëky, ma ja Wintsën ja wyintsë'kën tmooyën ets mëët tuuny ja nay'ëëw'oy näykyajpx'oyë. Jëtu'un ja Wintsën ojts tpa'ëyoy ja naax kajpn ets tjëpëjky ja pa'am ëyo'on ma ja Israel kajpnën.