2 Samuel 22 - Biblia Dc en Mixe de Quetzaltepec

Ma ja David tkuuy'iyën ko ënäty të myëtä'äky

¹ Ya'atë ojts yë David t'ëy, ko ja Wintsën yajmëtakë, ma y'ixjëtijt pyajëtijtën ja Saúl, näjyëtu'un ja wiinkëtypë ja myëtsiptëjk.

² Tä y'ënäny: Mijts Wintsën, mijtsës xykyuwaanp xynyixajp, mijts ntsoktakn'ajtyp, mëti'ipës xyaj'ëwaatsëpëtsëëmpën,

³ yë nTiosës, ja jëtu'unpë tä mëjtsaajën mëti'ipës xypyëjk'ijtp xymyajts'ijtpën, mëti'ipës xy'akëëytyujkpën; ja mëk'ajtën mëti'ipës xyajtsokpën ets ja ntsoktaknës, mëti'ipës xyaj'ëwaatsëpëtsëëmpën. Tëës xyajtso'oky ma ja tsip mëk tyunyën.

⁴ Mijts Wintsën mpatëp ets myajwin'ëw myajwinya'axëty, ko mijts ënätyë nmëkäjpxy täätsës të xyajtso'oky maas ja nmëtsiptëjkën.

⁵ Jä'ä ko yë o'kën jëtu'unës të xyjyaniminy tä yë nëë nyijä'tspetyën; jëna'ajëty të näjyawëtyës tsë'këpës yowë ko myiny jëtu'un tä mëk pojën ja yaja'ay o'kpë.

⁶ Ja o'kën jëtu'unës të xymyätsy tä pën myënäänta'atsyën; tëëjës muum njapaaty yë o'ktakn yu'utsypë.

⁷ E jam maas ënety jëtu'un nmony ntukyën, tëëjës nmëkäjpxy yë nWintsënës, tëë n'amëtoyës yë putëjkën pupäjtën ma yë'ëjën, mëti'ipës nWintsën'ajtypyën, e yë'ë tëë tjantymyëtoy jap ma tsajptëjkën; jä'ä ko yë nyaxënës njojkënës jampaat të jyä'ty tyatsk ëkë'ëm.

⁸ Ënet ojts yë naaxwiinyëtë mëk jyänty yu'kxy: Yë tun kopk jëtu'un y'ëk'ëtëtstaknë, yë'ëpaat ojts tsajp yu'kxpëjknë, Wintsën ojts yë tsyip y'äkë tyajnaxy.

⁹ Jok jap pëtsëëm ma jyëjpën, ma y'aawën jëën mëti'ipë yaj'o'kp yajtëkoopyën; e ko ojts kyäjpxy jëënpajkën jap pyëtsiimy.

¹⁰ Ënet jam tsajpkëjxm nyäy'awijtstutë, ets kyëtäky yaa naaxwiiny naaxkëjxy. Ets jap ma tyekpya'tkën tëë yaj'ixy ja yoots nëma'a mëjëtypë këjääjëtypë jyänty pyëtsimy.

¹¹ Ënet tukwä'tspejty tu'uk yë jëyujk käkn mëëtpë ets myëkääkë'kë, të yajnëjkxënë pojjoty.

¹² Mëti'ipë të nyätyukyu'utsyën, ets mëti'ipë të tëjk'atyën, yë'ë të tyajtuny yë kootsajtën ets ja yoots nëma'a mëti'ipë ja nëë tsyëëmjëtijtypyën.

¹³ Tu'uk yë ijxën të pyëtsimy mëti'ipë të'kxpën jajpën jam ma yë'ëjën ets të tyëkë tëtsntuupë, aakjëtu'un ja tëtsn kyëxë'ëky tä jëënpajkën.

¹⁴ Yë Wintsën Ni'ik Këjxmëpë, ojts tyajmëtoyë y'aaw yo'kn jam tsajpjotm.

¹⁵ Tëë tnajtsmatsë yë tyi'pxn, mëët yë anääw wëtsuk etsës yë nmëtsip të nyajkäkta'ay xii yaa.

¹⁶ Ja japë y'ityën këknëëjoty tëë tnikëëytyu'uty tnipëjktu'uty ets ma ja naaxwiinyëtë y'ityën tyam yaj'ixy'ajtnëp jä'änë; mëët ja Wintsën ja y'aaw y'ayuk atsë'ëk ajawëpë ets mëët ja mëk poj mëti'ipë të tkukäjxnaxyën.

¹⁷ Tiosës të xywyijtsë'ëky të xykyiiyi'iky, jamës të xynyikuxajnaxy këjxm, etsës të xyjyuuty jap komnëëjoty mëët yë kyë'ë.

¹⁸ Tëës xykyuwa'any xynyixajy jam maas ja nmëtsipën ëwa'anjatypë mëti'ipës ënety xy'ëxëëk'ijxpën, ma ja mëti'ipë jotmëkëtyën, këtiinëm ëjts.

¹⁹ Jää ojts yajxon xyjyanipëtë'ëktës maas ënety ëxëëk njaty nkëpetyën, je'eyëp ko yë Wintsën yë'ëjës mëk të xypyutëkë:

²⁰ tëëjës ëwaatsëtum xyajwë'ëmy etsës të xyajtso'oky mëëtkyëjxm koos xytsyoky xyjyawë.

²¹ Yë Wintsën yë'ëjës të xykyumay ets ya'atë kuma'ayën xypyatpës jëtu'un ënety mëët ko oyës winë të ntuny,

²² jä'ä ko yi'iyës tu'ukyë të ntimkyuuy'ixy ja Wintsën ja nyë'ë'aaw tyu'u'aaw; paatyës tyam n'ëna'any ko nijëna'ajës yë Wintsën nka'ixtija'any.

²³ Yapës yë ntimmyëëtëty yë tyiyajtën ets kyutujkën ets y'ënä'ämën tyiyajtën ka'apës nijëna'a të njëjpmëkajpxëyë.

²⁴ Ëjts oyës näjyawëty të nyäyaj'ityë ma yë'ëjën; ets ëxëëkpë ja tu'unën kajpxën ka'apës nëkoo të ntuktëk të ntukwa'akë.

²⁵ Yë Wintsën yë'ëjës të xykyumay, mëët yë'ëkyëjxm koos oy winë të ntuny të nkäjpxy ma yë'ëjën.

²⁶ Mijts Wintsën, oy winë xytyuny ma ja'ayën mëti'ipë oy winë tyuuntëpën, ets tëyajtën winë xytyuny ma ja'ayën mëti'ipë tëyajtën winë tyuuntëpën,

²⁷ mëtëy winë xykyäjpxy ma ja'ayën mëti'ipë mëtëy winë kyajpxtëpën, ets m'ëwa'antakp ma ja'ayën mëti'ipë winë ëxëëk tyuunpy kyäjpxypën.

²⁸ Myajnitsokpy yë ja'ay mëti'ipë yu'unk naxym ja'ay'ajtpën, e ja mëti'ipë mëj këjxm näjya'awëyëpën ni'ikyë xyaj'ëyoowtëkë.

²⁹ Mijts Wintsën, xymyoopyës yë të'kxën jajën; mijts Wintsën, mëti'ipës nWintsën'ajtypyën xykyutë'kxpës, koos muum nkupi'its nkukootsë.

³⁰ Mëët ko mijts xypyutëk xypyupetyës, jyëkyejpy nwinkuwa'akëtyës ja nmëtsipës, akujk jotkujk ntimnyinaxëtyës ja mëjatyëtypë ja potsy mëti'ipë jyakuwäämpyën ja nmëtsipës ja nyaax kyajpn.

³¹ Yë Dios yë nyë'ë tyu'u mëtëy yë'ë, ja mëti'ipë të twinwanën jyëkyejpy ja n'a'ijx njëjkp'ijxmëty; Dios kyuwäämpy nyixäjpy yë mëti'ipë tu'ukyë tuk'ijxpäjtëpën.

³² ¿Jää jëtää muum nän jëtu'unpë y'ëktios'atyën, tä yë Wintsënën? ¿Jää jëtää jëtu'unpë muum wiinkpë tios mëti'ipë mëpaat jëtu'un xy'ëkkuwa'anëmë?

³³ Yë Wintsën yë'ëjës ntsoktakn'ajtyp mëti'ipë maaytyääyëpën winë, mëti'ipës xypyutëjkëpën etsës oy nja'ay'atëty,

³⁴ mëti'ipës yë nkë'ë nteky yajyu'unkëpën, jëtu'un tä jëtyu'ujën, mëti'ipës akujk jotkujk muum xytyimyajkuwa'këpën oyës muum këjxm mpätëty,

³⁵ mëti'ipës xytyukni''ijxëpën wi'ixës ntsiptunëtyën, mëti'ipës xymyoopyën yë mëjaaw mëk'ajtën etsës yë mpujxn nti'pxn amëjaaw nyajye'eyëty.

³⁶ Mijts xypyëjk'ijtp xymyajts'ijtpës ets mijts xyajnitsokpës, yë m'oyjot yë'ëjës të xyajwinpety.

³⁷ Janty këtii tsyipëty njawës yë nnë'ë ntu'ujës xyaj'o'oyëyë, yë nkë'ë ntekyës ka'apës maa njawë të jyëxëxy.

³⁸ Tëës yë nmëtsip npapo'oy mpaputy, tëëjës nyajkutëkoy, koonëmës të nyajkutëkooytyä'äy täänëmës të nwinpity.

³⁹ Atëj tuktëjës të ntuunta'ay, ni pën të tkä'ëkjëkyäjpnë pyëtë'ëkëty. O'ktëy të jyatë, aakjam të kya'ata'atë maas yë nteky'ëjxën.

⁴⁰ Tëës xymyo'oy yë mëjaaw jap tsipjoty; mijts të xy'a'ixë ets ja'ayëty mëti'ipë je'eyë käjpxy kyumëtoownajxtëpën ëjts xywyinkoxtänëtëty,

⁴¹ tëëjës yë nmëtsiptëjk xykyuke'eky. Jëtu'un'äämpy të tjëkyepy nyajkutëkoyëtyës mëti'ipës ënety xy'ëxëëk ijxtëpën.

⁴² Tëë oypyënëty yë putëjkën tja'amëtowtë, ka'ap pën të pyutëkëtë; ojts tjamëkajpxtë ja Wintsën, ka'ap putëjkën myooyëtë.

⁴³ Täätsës jëtu'un të nyajjajta'ay tä yë naaxway pyojë'ëkyën. Tëë n'atään ntuktäänës tä ja'ay mo'onts t'atään tuktäänën tu'ujoty.

⁴⁴ Mijtsës të xyajnitso'oky ma ja naax kajpnën ëxëëkpë, etsës të xypyëjktä'äky Wintsën, ma ja naax kajpn ja mëjatyëtypë, tëë xymyëtuntës ja ja'ay ka'apës ënety n'ixy'ätyën.

⁴⁵ Je'eyë tu'k'aawkäjpxyë të nkäjpxyës täätsës të xymyëmëtowtë, jëkämpaat muum yë ja'ay të tsyoontë mëti'ipës të xymyëjpëjkta'aktën.

⁴⁶ Ja ja'ayëty mëti'ipë jëkämëty tso'ontëpën jëtu'unyë të y'akumon të jyotkumonëtë, ko muum nyätyijyë të jyanäyu'utsëtë mëët ja tsëtyu'un të pyëtsëmtë.

⁴⁷ Juuky'ajtp yë nWintsënës. Kënu'kxy xëmë xyëëw y'itëty mëti'ipës xypyëjk'ijtp xymyajts'ijtpën. Wä'än mëj'äämpy tyajjawë yë Wintsën mëti'ipës të xyajnitso'okyën. Mëti'ipës xy'akëëytyujkp xy'axajtujkpën këtiipës nka'ajëty ëxëëktum

⁴⁸ Yë Wintsën yë'ëjës të xynyitsiptuny etsës ja naax kajpn të xytyukwinkuwowë.

⁴⁹ Yë'ëjës xyaj'ëwaatsëpëtsëëmp maas yë nmëtsiptëjkën, ma ja'ayëtyën mëti'ipë käjpxy kyumëtoownajxtëpën. Mijts Wintsën xyajtsokpës yë'ë, ma ja ja'ayëty ëxëëk winë tuntën tkajpxtën.

⁵⁰ E paaty jëtu'un ënät mijts tyam nkuuy'iy nkuuyä'äxy ma ja naax kajpnën ets nkuuy'iyës ja mxëëw.

⁵¹ Yajmëta'ak xëmë jam tsipjotm myajkutujkpë mëti'ipë kë'ëm mwin'ijxën; ets mëët'at xëmë mkë'ëjotm yë David yë y'u'unk y'ok mëët ja mtsojkën mja'awën.