2 Samuel 21 - Biblia Dc en Mixe de Quetzaltepec

Ma ja Gabaón ja'ayëty tyaj'ookwinpitën ja myëtsip

¹ Ma ja David ënety y'ëne'emyën, ojts jam yë yuu xëëw y'ity tëkëëk jëmëjt. Ënet yë David ojts yë Wintsën tuk'ëwaanë ets y'ëtsoowë: Yë yuu xëëwpaaty yë jyää'aty, jä'ä ko yë Saúl ojts nanëkoo may tyaj'ooky yë Gabaón ja'ayëty.

² Ënet ja David tyaxtsooy ja Gabaón ja'ayëty ets mëët myëtyäky. Yë Gabaón ja'ayëty ka'ap y'israel ja'ay'atë, yë'ë Amor y'u'unk y'ok mëti'ipë ojts wyë'ëmtën juuky; ojts mëët yë käjpxytyu'unën tuntë yë Israel ja'ayëty. E ko yë Saúl tyëjkëy yajkutujkpë, mëët ko ënety yi'iyë tsyojkpy yë Israel ja'ayëty ets jam y'itëty, paaty tjayaj'o'kta'ajany ja Gabaón ja'ayëty.

³ Ënet ja David yajtëëwëtë: ¿Tii m'amëtoowtëp etsës ntunëty? ¿Tii winma'any mëpaat mpaatës ets y'oyëtëty ja mjot mwinma'anyëty ma të myajmëtëkoytyën? ¿Tääts yë nnaax nkajpnës xykyënu'kxtëty?

⁴ Tä ja Gabaón ja'ayëty y'ëtsoowtë: Ëëtsëty ka'apës wyitëty myeenyëty jam xykyamo'otë yë Saúl ëkë y'u'unk tyo'oxytyëjk ets nän ka'apës yë'ëjëty ntsoktë ets pën y'ookëty tyëkoyëty ma Israel kajpnën. Tääts ja David y'ënëmaayëtë: Paaty tuk'ëwa'anëtyëkës, tiitën mtsojktëp etsës ntuntëty.

⁵ Ets y'ëtsoowtë: Ja ja'ay mëti'ipë ojts tjatuknipëjktaakën ets jeexyë ëëtsëty nkutëkooytya'atës ets jeexyë këtii nëkoo n'ëkwintsëna'ayënëtës ja itjot mëti'ipë yë Israel ja'ayëty nyitënaaytyëpën,

⁶ yë'ëjës ntsojktëp etsës niwëxtujk yë jyä'äy xytyukkë'ëtëkëtëty, etsës jam ntëyë'ëktëty Wintsën wyintum jam Guibeá ma ja Saúl tnitänën, ja Saúl mëti'ipë yë Wintsën kë'ëm wyin'ijxën. Ja yajkutujkpë ojts tkupëky ja mëti'ipë yajtukmëmëtyakën,

⁷ oy ojts tjapa'ëyoy ja Mefi-bóset, Jonatán ja myaank, Saúl yë y'u'unk, mëët ko tjaja'aymyejtsy wi'ix ënety mëët ja Jonatán ja käjpxytyu'unën të tunyën.

⁸ E ojts tmatsy nimäjtsk ja Rizpa ja y'ëna'k, ja nyëëx ja Aiá, mëti'ipë ënety mëët të tsyëënën ja Saúl, ja y'ëna'k jä'ä xyëëwajtëp Armoni ets Mefi-bóset ets nimëkoxk ja y'ëna'k ja Merab, yë nyëëx yë Saúl, mëti'ipë mëët t'u'unk'ajtyën yë Adriel, yë myaank yë Barzilai jampë kyukajpnëtyën Meholá,

⁹ tääts tkë'ëmooy ja Gabaón ja'ayëty ets jam tyo'ktëëytyë ma tu'uk ja kopkën Wintsën wyintuuy. Jëtu'un ojts niwëxtujk y'ooktë ma ënety kujk ja tsajpmok myëjayën.

¹⁰ Ënet ja Rizpa o'ktëy nyäxyojxë, ja Aiá nyëëx; yë'ë pyëjktak yë tukwit mëti'ipë tëë ëxëëk jyajtaaynyën mëët ja monyëtukyë mëti'ipë ënety myënajxyp yajnajxypyën, jamts tsaakëjxm nyäjyëpijptakë. Jam jëtu'un ja xëëw jëmëjt tyajnajxy tyimtso'ontäky ma ja pëjktä'äky cebadë ënety myëjaawë'ëkyën koonëm ja ja'ay tpëjkmujktaay tuunmujktaaytyë ja pyëjktä'äkyëty ets pyotmtëjkëy, ka'ap tuktsu'ty ja lut majkwejkxy ja o'kpë.

¹¹ Ko ja David tnija'awëy ko jëtu'un ënety ja Rizpa të y'ëti'itsy, ja Saúl ja tyuunpë mëti'ipë myëëtsënaayën,

¹² ënät ojts jam nyijkxy ets tyajpëtë'ky ja Saúl ja wyääy pyajk ets näjyëtu'un ja myaank Jonatán ja jyä'ä; yë'ë ënety jam kyëwent'ajtëp yë Japës ja'ayëty jampë tsyëënëtën Galaad. Yë Jabés ja'ayëty jam ojts yë Saúl ets Jonatán yë wyääy pyajkëty tmäätstë Bet-sán, ma tkutëëytyën yë filistejë ja'ayëty ko tyaj'o'ktë jam Guilboa.

¹³ Tä ja David ni'ënä'ämëy ets ja waay pajk tyajnëjkxtëty ets näjyëtu'un ja o'kpë mëti'ipë ënety jam kutëy të y'ooktën;

¹⁴ jam tyajnaaxtëjkëtyë yë Saúl ets Jonatán yë wyääy pyajk ma Quis jam kyo'knën, Saúl yë tyeety, jam Selá, ma Benjamín yë nyaax kyajpnjotmën. Jëtu'un tuuntë winë tä ënety ja yajkutujkpë të tni'ënä'ämën. Ko jëtu'un y'ëktuun y'ëkjajtë tä ja Wintsën tyajtuuy tyajpojy ma ja naax kajpnën.

Ma ja Abisai tniwaantu'utyën ja David

¹⁵ Ënet ja filistejë ja'ayëty jatëkok ja tsip tyajtso'ontaktë mëët ja Israel ja'ayëty. Tä ja David mëët tëkokyë ja tsyiptuunpëtëjkëty tnitso'ontë ets mëët tsyiptuna'antë. Jä'ä xëëw yë David yajxon ojts y'ënu'kxënyë,

¹⁶ jam tu'uk yë ja'ay mëti'ipë xyëëwajtypyën Isbi-benob, ja'aypyajkyeny ënety, yë'ë ojts yë David tjayaj'ooka'any ko t'ijxy tëë y'ënu'kxënyë; jä'ä kyu'umën jye'emtyëty i'px majk tsimën ets tam tu'uk yë yenypyujxn t'ëxwëën'aty jemypyë.

¹⁷ E ja Abisai Seruiá myaank, ënätyë tnimiiny ja David ets niwaantuty, koonëm ja Abisai tyaj'o'ky ja ja'aypyajkyeny filistejë ja'ay. Tääts ja David ja jyä'äy y'ënantë ko ka'ap mëpaat yë David y'ëknëjkxnë tsiptuunpë, këtiipë ja Israel ja kyutujkën y'atëkoyëty.

Ma ja tsip tyunyën mëët ja ja'aypyajkyeny

¹⁸ Ojts näjyëtu'un wiinkpë tsip jam y'ity Gob, mëët yë filistejë ja'ayëty, jä'ä xëëw, yë Sibecai, husatitë ja'ay, yë'ë y'u'unk y'ok yë ja'aypyajkyenyëty, ojts tyaj'ooky tu'uk yë ja'aypyajkyeny mëti'ipë xyëëwajtypyën Saf.

¹⁹ Ojts näjyëtu'un wiinkpë tsip tyuunkojënëpë nän jam Gob, mëët yë filistejë ja'ayëty; yë Elhanán, yë myaank yë Jair, jampë kyukajpnëtyën Belén, Israel ja'ay; ojts tu'uk yë ja'aypyajkyeny tyaj'ooky mëti'ipë xyëëwajtypyën Goliat jampë kyukajpnëty Gad; jä'ä ijty ja kyu'umën ëxëëk mëj tä tu'uk witpi'tjn ja nyipujxnën.

²⁰ Jam Gad, jam wiinkpë tsip y'ijty; jam ijty tu'uk yë filistejë ja'ay, ëxëëk këjxm tyänë, jä'ä yë kyë'ëwa'axy ets tyeky wa'axy wyinë'aty i'px majktaxk: Tëtujkjaty ja kyë'ëwa'axy ma tu'ukpë ja kyë'ëjën ets näjyëtu'un ja tyekywyä'äxy,

²¹ e yë'ë ojts ja Israel ja'ay tmëmayë ko mëët tsyiptuna'any; yë Jonatán, Israel ja'ay, yë'ë yaj'o'kë, yë myaank yë Simea, yë David yë myëkä'äx.

²² Ya'atë nimajktaxkpë ja'aypyajkyenyëty yë'ë yë Refa y'u'unk y'ok, jampë kyukajpn'atë Gad, je'eyë ko ka'ap ojts myëta'aktë mëët yë David ets tsyiptuunpë wintsënëty.