2 Samuel 20 - Biblia Dc en Mixe de Quetzaltepec

Ma yë Sebá kë'ëmwinma'any ja kutujktakn tniwa'anyën

¹ Ojts jam tu'uk yë ja'ay jyuuky'äty mëti'ipë ëxëëk ja jyot wyinma'anyën, ma Benjamín yë jyä'äyën; jä'ä xyëëwajtyp Sebá, yë'ë y'u'unk yë Bicri jam ënety näjyëtu'un yajpatpë Guilgal. Ënet ojts tëkok ja mayjyä'äy t'ëxëëk winkajpxë ets t'ënëmaay: Ëëtsajtëm, ka'ap nimaa ntuk'oy'ajtëm ko yë David yë'ë yaa y'ëne'emy ëkë yajkutuky, mëti'ipë yë Jesé myaank'ajtypyën, paaty yam miitsëty n'ënëëmëtë: Nikë nëjkxta'atë ma mjëën mtëjkëtyën.

² Ënet tëkokyë ja Israel ja'ayëty t'ëxmajtstaaytyë ja David ets ojts yë'ë tpanëjkxtë ja Sebá, yë myaank yë Bicri. E yë ja'ayëty mëti'ipë Judá jyä'äy'äjtypyën ka'ap ojts t'ëxmatstë ja yajkutujkpë, timpyatso'ontë jam ma ja Jordán mëjnëëjën ets tyimja'ajtë jam Jerusalén.

³ Ko ja David ojts jam jya'ajnë ma ja kutujktaknën, jam Jerusalén, ojts tsuumta'ay ja to'oxytyëjk mëti'ipë ënety jëtu'unyë je'eyë myëëttsënääpyën ets tyajku'ëtujky jap ma tu'uk yë tëjkën, yajxon ijx'ity këwent'aty; jap ojts jëtu'un jyaak juuky'atë ya'atë to'oxytyëjkëty, je'eyëp ko ka'ap ojts t'ëkmëët'ajnë. Jëtu'un ojts ya'atë to'oxytyëjkëty jap jyaak'itë ku'ooky tyo'oxyën, koonëm y'o'ktë.

⁴ Tä ojts tëkok t'ënëëmë yë Amasá: Nëjkx winwoowmujkta'a yë Judá ja'ayëty ets ja tëkëëk xëëw yaa xyajmiinta'ajëty.

⁵ Ënet ja Amasá ojts tjanty winwoowmujkta'ay ja Judá ja'ayëty, je'eyëp ko kanaak xëëw ojts t'aye'eytyääynyë.

⁶ Tä ja David t'ënëmaay ja Abisai: Yë Sebá wä'än ënät ni'ik ja jotmay xytyuk'ijxmëty këtiinëm jyëtu'unëty yë Absalón. Paaty yam mijts ntuknipëky xytyu'uwinwowëty yë ntsiptuunpëtëjkës ets wiinkuwa'akë tääpë Sebá, këtiipë muum ja kajpn mëti'ipë ta'tspëkyën t'ëkjä'äpëjknëty ets xy'ëkukäkënëty.

⁷ Ënet ja Queret ets peleteos ja'ayëty, mëti'ipë yë Joab tyu'uwinye'epyën ma tsyiptuntën tsyo'ontë jam ma ja yajkutujkpën mëët nitëkokyë yë tsyiptuunpëtëjkëty, yë'ë tu'uwinwoowëtëp yë Abisai ets nëjkx ja Sebá mëët tsyiptuna'antë.

⁸ Ko jam jyajtë ma tu'uk ja tsaatunën jam Gabaón, jam yë Joab nyipëtsëëmë yë Amasá. Yë Joab yë'ë ënety myënëjkxyp yë wyit mëti'ipë myëtsiptuunpyën ets ja yenypyujxn tam tmoxwëën'aty ka'ap yaj'ixy, je'eyëp ko ëpa'tkë'ëytsyow, je'eyë wäänjaty tniwintä'äky tääts poj'am tjuuty.

⁹ Yë Joab yë'ë mëët yë y'a'oykyë'ë tmajtsë ja Amasá y'atsëjts ets tsu'kxa'any, tääts tyajtëëy: ¿Wi'ix jyäty kyëpety mëkä'äx?

¹⁰ Amasá ka'ap niwi'ixtsow t'ijxy wi'ix ojts ja Joab ja yenypyujxn t'ëkëty jyuuty, ajotkumonë ojts yë Joab t'ëkëty tyukmoxmëtijë yë yenypyujxn ja Amasá, tääts ja tyiinty y'ixjëtäjtpëtsëëmy. Jëtu'un ja Amasá y'o'ky poj'am, ka'ap ja Joab mäjtsk'ok nyixajë'kë. Ko jëtu'un y'o'këtäky, tääts ja Joab mëët yë y'uty Abisai jatëkok tsyo'ontë ets tpanëjkxtë ja Sebá, yë myaank yë Bicri.

¹¹ Ënet tu'uk yë Joab yë tsyiptuunpë jam wya'ak'o'oyëy ma ja Amasá ënety të kyëtäyën ets y'ënäny: Pën yë Joab myëjwa'kpejtypyën ets David, wä'än tpajämy yë Joab.

¹² E yë Amasá tam ënety kyatsojk ookynyëm jam tu'ukujkm, yajxon yë ne'pny të pya'tpëyë'këtyääyënë ma jap yäjtsjëtityën; e ko ja tsiptuunpë t'ijxy ko aakjam ja'ay wya'ak'a'awënëtë, ënät jam tjëwijtsy ets ojts tnipe'eny mëët tu'uk yë wit, tuk'awijtstuty jëtu'un ja tu'u.

¹³ Ko jam tjëwijtsy ja o'kpë, tääts ja ja'ay nyajxtaaytyë ets tëkokyë aakjä'ä myëjwa'kpäjtaaytyëp ja Joab mëti'ipë pyapooytyëpën ja Sebá.

¹⁴ Sebá ojts tuknajxta'ay ja Israel ja'ay ja kyajpnjot, tyimja'ajty jam Abel-bet-maacá; tëkokyë yë y'u'unk y'okëty yë Bicri, aakyë'ë myëjwa'kpäjtaaytyë ja Sebá ets tpatëjkëtyë jam mëj kajpnjotm.

¹⁵ Ko ja Joab ja jyä'äy jam jyajtë Abel-bet-maacá, tä ojts tu'uk yë najxpäjn jam tyaj'oyëtë ma ja potsykyopkën ets ja kajpn tnitëkëja'antë ets tjajitantë ja potsy.

¹⁶ Ajotkumonë ojts tu'uk ja to'oxytyëjk janty wijypyë këpetypë yujk'ëna'any mëti'ipë jap kukajpn'ajtpën: Mëtowtë, mëtowtë. Tuntë mëyajtën. Tun mëyajtën, ënëëmëtë yë Joab, wä'än yaa xynyiminyës yë'ëjës nmëkajpxäämpy.

¹⁷ Ko ja Joab ojts wyinkony, ënät ja to'oxytyëjk yajtëëwë: ¿Mijtsëtën mxëëwajtyp Joapjë? Ëjts jëtu'un nxëëwajtyp Joab, jëtu'un y'ëtsooy ja Joab. Tääts ja to'oxytyëjk y'ënäny: Mëtoow'it mëti'ipë yam ntuk'ënëëmëjäämpyën. Oy, tyamës nmëtoow'itëty, jëtu'un y'ënäny ja Joab.

¹⁸ Tä myëtyaktso'ony ja to'oxytyëjk: Tëëyëp jëtu'un ijty tyuny'äty, ko pën tii tnijawëja'any yi'iyë yajtëëwtëp yë Abel, tääts ijty winë yajnijawë.

¹⁹ Ëëts yë nkajpnëty, oy jotkujk yë mëët nyäyaj'ityë oymyëti'ipë kajpnëty, ka'ap ni pën mëët tsyiptuny ma Israel kajpn yajpaatyën ets ya'atë kajpn mëj'äämpy näjyëtu'un y'ity. Je'eyëp ko tyam jëtu'un yowë yaj'ixy ko mijts xyajkutëkoyä'äny. ¿Wi'ix ko jëtu'unpë winma'any xypyääty ets xyajkutëkoyaanpë mëti'ipë kë'ëm yë Wintsën të tyajnaaxkëtä'äkyën?

²⁰ Tä ja Joab y'ëtsooy: Ka'ap jyëtu'unëty, ëjts ka'apës yam n'ëna'any nyajkutëkoyä'äny, ëkë ënät xit ko'ow ntuna'anyës.

²¹ Ka'ap jyëtu'unëty, ëëtsëty yi'iyës n'ixtaaytyëp tu'uk yë ja'ay jam tsyoony ma Efraín yë nyaaxjotmën, jä'ä xyëëwajtyp Sebá, yë'ë nyipëtë'kpy yë yajkutujkpë David. Yi'iyës xymyo'ojëp etsës yam nëjkxtëty. Ka'ap tääpë wyi'ixëty, tyam ënät yääyë ma potsykyopkën yajkukä'tsnaxëty yë kyëpajk, jää xy'ëxajëty, jëtu'un y'ëtsooy ja to'oxytyëjk.

²² Ënet ojts ja to'oxytyëjk tukmëmëtyä'äky ja jyä'äy ya'atë ja aaw ayuk ets tukupëjky ja kyajpn, tääts tjanty yo'ktsujktutë ja Sebá ets tkuka'tsnajxtë ja kyëpajk jam potsykyëjxm, tä ja Joab jap ëpa'tkë'p t'ëxajëy. Ja Joab ënätyë ni'ënä'ämëy tukxu'uxtëty ja tsajpkaawaj, mëti'ipë myëtoowtën ja ja'ay ets nyëjkxta'atëty ma ja jyëën tyëjkëtyën ets ma ja nyaax kyajpnëtyën, e ja Joab jam ojts nyijkxy Jerusalén ets myëtya'aka'any mëët ja yajkutujkpë.

Mëti'ipë ja David tsyiptuunpë wintsën'ajtën

²³ Joab yë'ë ojts tmëwë'ëmy tëkokyë ja tsiptuunpëtëjk mëti'ipë jam yajpatëpën ma Israel kajpnën, e ja Benaías, yë Joiadá myaank yë'ë ojts twinkuwa'akë ja Queret ja'ayëty ets ja peleteos ja'ayëty ets tu'uwinye'eyëty ya'atë tsiptuunpëtëjkëty.

²⁴ Yë Adoram, yë'ë ojts yajtuknipëky ets yajja'aytyunëty ma ja atsipë ja tuunkën, yë'ë jääpyë ijt yë Josafat, yë myaank yë Ahilut.

²⁵ Yë Sevá yë'ë ijty kyujaaytyääpy winë, e yë Sadoc ets Abiatar yë'ë ojts tyeety'atë.

²⁶ Yë Irá, jampë tsyoonyën Jair, nän teety ojts y'ity ma ja David ja kyutujktaknën.