2 Samuel 19 - Biblia Dc en Mixe de Quetzaltepec

^1-2 Ko ja ja'ay tnija'awëtyë ko ja yajkutujkpë wiinkëm ja y'u'unk Absalón tpa'ëyoownë ets tnijëëy tniyäxnë, ënät ojts ja Joab tuk'ëwaanëtë. E jëtu'un'äämpy ja mëti'ipë ënety tyijtëpën jeexyë ja yajkutujkpë tukxoontä'äky mëët ko të myëta'aktë, monyëtukyë ojts y'awinpity.

³ Yë'ëpaat ja tsiptuunpëtëjkëty mëti'ipë ënety ojts të tsyiptuntën, ayu'utsy ame'tsyë jyaaktëjkëtyë kajpnjotm: Mëët ja tsëtyu'un oy wi'ix jyaak ja'ajtë jam kajpntum jëtu'un tä jeexyë muum ja myëtsip ka'ap të yajmëta'akëtën.

⁴ E ja yajkutujkpë tyam ja ni'ikyë nyäwyinmäx nyäwyimpo'tëpë mëët ko ja myaank tjantynyiyä'äxy ets mëk jyänty'ënä'äny: Absalón, u'unk maay; Absalón, u'unk maay, u'unk maay.

⁵ Ënet ja Joab ojts tninëjkxy ja yajkutujkpë jam ma ja kutujkëntëjkën ets t'ënëmaay: Wintsën, mijts ni'ikyë yë mtuunpëtëjk tsëtyu'unmëët të xyajwë'ëmy, mëti'ipë të tnitsiptuntën ets mijts mtso'okëty ets tsyo'oktëty ja m'u'unk m'ëna'k ets ja m'u'unk mto'oxytyëjk.

⁶ Tyam ënät yajja'akyukë ko yë yajkutujkpë ka'ap tyajtsoowpaaty wi'ix ja tsyiptuunpë wintsën ets ja myëkutuunk myëmay myëtajyën, yë'ë y'oyjya'ap mëti'ipë mëtsip'ajtëpën ets myëtsip'ajtyp yë'ë mëti'ipë oyjya'awëyëpën; tyamës nja'akyukë ko yë yajkutujkpë yë'ëtëm të tjatsoky jeexyë yë Absalón jyuuky'äty oy jeexyë ëëtsëty të n'o'kta'atë.

⁷ Yë'ë yam mpëjktsowäämpy mijts yajkutujkpë ets mpëtsëmëty tëja'p, xymyëkajpxëty ja mtsiptuunpëtëjk ets xyajjotkujk'atëty, jä'ä ko pën këtii jëtu'un xytyuny ëjts yajxonës yam ntimnyikäjpxy mëët yë Wintsën yë xyëëw, ya'atë tsu'um nitu'uk yë ja'ay mka'oyjyawëja'anyë. Ko jëtu'un jyatëty kyëpätëty jaakni'ik jotmay ënety këtiinëm ja mëti'ipë të xypyääty të xy'ixyën tyimpa'tkë'p'ajty ets tyampaat.

⁸ Ënet ja yajkutujkpë ojts pyëti'iky ets ojts nyijkxy jam ma ja kajpn yajnitëkën. E ko ja mayjyä'äy yajtuk'ëwa'anëtyë ko tam ja yajkutujkpë y'ëwxity jam kajpnpë'am, ënät ojts jam nyäwya'k jam myiinta'atë. E ja Israel ja'ayëty tëë ënety kyäkta'atë ets të nyëjkxta'atë ma tyëjkëtyën.

Ma ja David jatëkok wyimpijtyën jam Jerusalén

⁹ Kajpn apëtsëmy aakyë'ë ja'ay nyikajpx nyimëtyaktëp ets y'ëna'antë: Yë yajkutujkpë David, yë'ë ojts xyaj'ëwaatsë pëtsë'ëmëmë ma ënety ëxëëk yë filistejë ja'ayëty xy'atsë'k xy'aja'awëmën, e mëët ko yë Absalón nëkoo yajjotkëjxpë tääts kwanë ja nyaax kyajpn të t'ëxmatsy.

¹⁰ E ja Absalón mëti'ipë ojts njatuknipëjkëmën ets jeexyë yë'ë yajkutuky, tëë ja y'o'knë jam tsipjotm. ¿E tyam tii n'ëwxijtëmë ko ka'ap nyajwinpijtëmë jatëkok ja David?

¹¹ Ya'atë käjpxy mëtyä'äky mëti'ipë ënety tu'kkajpn yajmëtoopën ojts jampaat yajnijawë ma David ja kyutujktaknën. Ënet ja David tkäjpxynyikejxy ja teety Sadoc ets Abiatar, t'ënëmaay: Mëtya'aktë miitsëty mëët yë mëjja'aytyëjkëty mëti'ipë Jadá ja'ayëtyën ets yajtëwtë tiitën ko tyajpo'oxtë etsës jatëkok nwinpitëty maas yë nkutujktaknën.

¹² Ënëëmëtë ko ka'ap y'oyëty ko yë'ëjëty oknëm y'ëna'antëty etsës nwinpitëty maas yë nnaax nkajpnën, njëëky nmëku'ukës yë'ëjëty, wä'än tmëmay tmëtajtë.

¹³ Ojts näjyëtu'un tni'ënä'ämë ko t'ënëëmëtëty ja Amasá: Mijts njëëky'äjtyp nmëku'uk'ajtyp yë'ë, paaty yam n'ënëëmë ko mijts jëtu'un ënät ja Joab mkutëjkënëp, ma xywyintänëtyën ja tsiptuunpëtëjk. E pën ëjts ka'apës npatuny ja n'aaw n'ayuk yë Wintsën yë'ëjës nëjkx xytyiytyuny.

¹⁴ Jëtu'un ojts tyajjotuky ja Judá ja'ay ets tu'ukyë y'ënaantaaytyë ets ja David wyimpitëty mëët tëkokyë ja tyuunpëtëjk.

¹⁵ Tä ja yajkutujkpë jam tsyo'ony, mëët tëkokyë ja jyä'äy ets jam jyajtë ma ja Jordán mëjnëëjën. E ja Judá ja'ayëty jam ojts nyëjkxtë Guilgal ets ja David tputëkëja'antë ma jam tuknaxa'anyën ja mëjnëë.

¹⁶ Näyjyëtu'un ja Simí, ja myaank ja Guerá, yë Benjamín yë jyä'äy, jampë tsyëënën Bahurim, ojts pojën tsyoony mëët ja tyuunpëtëjk, tu'ukyë mëët tpatso'ontë ja Judá ja'ayëty ets tjëjpye'eyë'ëka'antë ja David.

¹⁷ Jä'ä ja ja'ay ënety pyanëjkxyë nitu'kmil, yë Benjamín ja'ayëty. Ëpëky näjyëtu'un yë Sibá, ja mëti'ipë jam mëtuunpën ma ja Saúl ja jyä'äyën, tam ja y'ëna'këty nimajkmokx ets ni''i'px ja tyuunpë, yë'ë jam jëyëjp ja'ajtë ma ja Jordán mëjnëëjën, ok ja yajkutujkpë

¹⁸ ets tuknajxy ja mëjnëë, tputëkëja'any ja yajkutujkpë ja y'u'unk y'ëna'k ets ja y'u'unk tyo'oxytyëjk ma ja mëjnëë jam tuknaxa'antën; jëtu'unts tmë'oypyëka'any ja yajkutujkpë. Tam ënety ja yajkutujkpë tyimnëëtëjkënë, ko ja Simí twinkuwa'këy,

¹⁹ ets t'ënëmaay: Wintsën, tyam mijts n'amëtoy npëjktsoy ets këtii xyjyä'äymyätsëty ets xymyëjpëjkta'akëty oy ojts nmëtëkoy, ma ojts ëxaty n'ënëëmën ko jam Jerusalén mkäkpëtsëëmy. Këtii xyjyä'äymyätsëty ja npokyës,

²⁰ ix tyamës kë'ëm näjyawëty ko ojts nmëtëkoy, ijxtëm tyam xy'ixyën ëjts nikë jyëwiin jëyëjpës të ntsoony ma ja José y'u'unk y'okën jampë tsyëënëtën anëkëxmtsow ets mijts yaa njëjppaatë'ëky, mijts mëj ënä'ämpë.

²¹ Ënet ja Abisai, ja Sarvia ja myaank ënätyë y'ënäny: ¿Këtii jëtäätën nyitëkëty y'ookëty yë Simeijë, mëët ko të tpoky ja yajkutujkpë mëti'ipë ja Wintsën kë'ëm wyin'ijxënë?

²² E ja David tyaa y'ëtsooy: Ya'atë ka'ap miitsëty mpaatëtë, miitsëty Sarvia y'u'unk y'ëna'k. ¿Wi'ix ko xyjyëjpkukajpxëtës? Ëjts wa'atsës nijawë ko ëjts yajkutujkpë'ajtp ma Israel kajpnën, tyam ni pën mëpaat kya'ooky.

²³ Tä ja Simí t'ënëmaay: ka'ap m'ooka'any.

²⁴ Ojts näjyëtu'un jyëjpaatë'ëkyë ja Mefi-bóset, yë Saúl yë myaank, maju'unëm yë David jam tsyo'onyën kajpntum ets jatëkok jyä'äjty. Yë Mefi-bóset ka'ap ënety të kyë'ëpujy të tyekpyujy, nän ka'ap ënety të nyäy'awaayjepyë, ni wyit ënety të tkapujy.

²⁵ E ko jam jyä'äjty Jerusalén ets ja yajkutujkpë tjëjpaatëka'any, tä y'ënëmaay ja yajkutujkpë: Mefi-bóset, ¿wi'ix ko xykyapatso'onyës?

²⁶ Tä y'ëtsooy yë Mefi-bóset: Yë ntuunpës yë'ëjës ojts xywyin'ëëny, Wintsën. Ëjts jä'ä koos ntekymya'atëty paatyës ojts njatuk'ëne'emy ets jeexyë tu'uk ja jëyujk tniwëëny ets npatsoona'any, Wintsën.

²⁷ Yë'ë ojts xywyin'ëënyës, ma mijtsën mëj'ënä'ämpë. E mijts mëj'ënä'ämpë mëti'ipë jëtu'un tä tu'uk yë Wintsënën, yë'ë tun mëti'ipë m'ijxypyën ko myëtëyëty,

²⁸ ëjts mëëtës yë nteety n'ap ets n'u'unk n'ëna'k xynyitëjkëtyëpës ets n'ooktëtyës ma mijtsën mëj'ënä'ämpë, ëjts ni'ikyënëmës ojts xymyo'oy ja nka'ayënës n'ukënës ma mijts mkay m'uukyën. ¿Tyam tiijës njaaktimy'amëtowëp yë mëj'ënä'ämpë?

²⁹ Tä ja yajkutujkpë y'ëtsoowë: Ka'ap tii winma'any n'ëkpatnës, tëëjës nikäjpxy ets mijts mëët yë Sibá xyajwa'xtëty ja mnaax mkamëty.

³⁰ E ja Mefi-bóset tyaa y'ëtsooy: Wä'än yë'ë tmëwë'ëmta'ay yë naax kam. Yi'iyës ntukjotkujk'ajtyp ko yë yajkutujkpë tëë oy mëk jatëkok tyëjkja'të ma yajkutukyën.

³¹ E ja Barzilai, jampë tsyoonyën Galaad, tëë ënety jam jyëjptä'äky Roguelim ets tputëkëja'any ja yajkutujkpë ma jam nyëënaxa'anyën, jamts mëët nyäjyëkajpxa'anyë.

³² Mëjja'ay ënety oynyë, jä'ä jyëmëjt majkta'px. Mapaat ja yajkutujkpë y'ijtyën jam Mahanaim, yë'ë ojts winë tmooytyä'äy mëti'ipë nyi''ijtën, jä'ä ko yë'ë kumeenyjyä'äy ënety oy.

³³ Paaty ja yajkutujkpë t'ënëmaay ja Barzilai: Pajaamkës jam Jerusalén, jam mijts nkëwent'atëty.

³⁴ E ja Barzilai tyaa y'ëtsooy: Ëjts jawäänës njaakjuuky'ata'any, nëkoopës njaaknëjkxëty jam Jerusalén mëët yë yajkutujkpë,

³⁵ majkta'pxës yë njëmëjtnë; ka'apës nitii n'ëkxu'kxja'awënë mëti'ipës njajë'kxypyën ets mëti'ipës nja'ukpyën; nän ka'apës n'ëkmëtoownë pën wi'ix ja ëëpë jya'ëwtë. ¿Ëjts tiijës yë Wintsën n'ëktukmëtunëp?

³⁶ Ëjts yi'iyës nimiimpy ets mijts mëj'ënä'ämpë mputëkëja'any ma ja mëjnëë xytyuknaxa'anyën, mijts mëj'ënä'ämpë nëkoopës jëtu'un xyjyaak'ënëëmë ko npanëjkxëty jam Jerusalén.

³⁷ Ëjts yi'iyës yam mpëjktsowäämpy yë yajkutujkpë etsës xy'ëwatsëty yë ntu'u wä'änës n'ëknëjkxy maas yë nkajpnën, jamës n'ookëty ets jamës naaxtëkëty ma jam kyo'knëtën ja n'aptëjkës. E pën jëtu'unts mtimy'ënä'äny, tyam tyaapë n'u'unkës ntukpakexy mëti'ipë xyëëwajtypyën Quimham. Oy yë'ë mpanëjkxëtëty, mijts yë mnija'ap wi'ix jam xymyëët'aty.

³⁸ Tä ja yajkutujkpë y'ëtsooy: Wä'än yë Quimham xypyaminyës ets tyamës jëtu'un nmëët'atëty tä mijts xytsyokyën. Ets tëkokyë tiijës mijts xy'amëtoop, tyam nmo'ojëty.

³⁹ Tëkokyë ja ja'ayëty ojts ja Jordán mëjnëë tuknajxta'atë. E ko ja yajkutujkpë ojts tuknajxtaaynyë ja mëjnëë, ënät ojts mëët ja Barzilai nyäjyëkajpxënë. Jëtu'un'äämpy ja Barzilai ojts jam nyëjkxnë ma kyajpnën.

⁴⁰ Ja yajkutujkpë jam ojts nyijkxy Guilgal, tam ja Quimham pyanëjkxyë ets tëkokyë ja Judá ja'ay ets näjyëtu'un kujkwä'kxy ja Israel ja'ayëty.

⁴¹ Ënet ni'ëmukë ojts tninëjkxtë ja yajkutujkpë ets t'ënëmaaytyë: ¿Tii ko yë Judá jyä'äy, mëti'ipë ëëts nmëku'uk'ajtëpën yë'ë tyimjä'ä'atantëp ja yajkujkpë ets yë'ë timtyu'uwinwowa'antë ets tyajnëënaxa'antë ja yajkutujkpë mëët ja y'u'unk y'ëna'k ma ja Jordán nëëjën?

⁴² Ënet tëkokyë ja Judá ja'ay yujk'ëtsoowtë: Jä'ä ko yë yajkutujkpë ntimmyëku'uk ëëts yë'ëjëty. E miitsëty ka'ap tjëkyepy nëkooyë ntimjyootanpëktëty. ¿Käjxë yam tii yë yajkutujkpë mpëjkëtës ets ënät ëëts yë'ë një'kxtë mpëktë, ëkë tëëtëm ëëts yam tii n'ëkpaat n'ëk'ixtë?

⁴³ Tä ja Israel ja'ayëty y'ëtsoowtë: Ëëtsëty xypyatëp ni'ik etsës yë yajkutujkpë nmëtuntëty këtiinëm miitsëty ets ko mpatëkëja'anmëty ma tikts aats yajmëët'atyën, ëëts kä'äxkopk yë nteety'ajt n'ap'ajtëpës, miitsëty utymyës yë'ëjëty. E paaty ënät, ¿tii ko miitsëty ëxkexy ëxwa'any xyaj'itës? ¿Ëk ja'amyätstë tii këtii y'ëëts'atë ojts jëyëjp n'ëna'antë ets yajkutujkpë wyimpitëty jatëkok ma ja nyaax kyajpnënë? E ko jyëtu'un'ajnë, ja Judá ja jyä'äyëty ni'ik ojts yaj'ijxnëtë y'ëwa'antaknëtë ka'ap jyëtu'unëty ja Israel ja'ayëty.