2 Samuel 14 - Biblia Dc en Mixe de Quetzaltepec

Ma ja Joab tyajja'tyën ja Absalón

¹ Joab ojts tnijawë, ko yë yajkutujkpë David mëk ënety tpa'ëyoy yë Absalón,

² paaty ojts tnikäxë tu'uk yë to'oxytyëjk kuwinma'anypë ets këpetypë, jam Tekoa kyukajpnëty. Ets t'ënëmaay: Yë'ë yam mpëjktsowäämpy ets mnäpyëjkta'akëtëty tä jeexyë mëk ja monyëtukyë xymyënaxy xyajnaxyën, yë'ë mtuktëkëp yë tukwit ets këtii yë on mnätyukjaaxëtëty këtiipë mpa'akxuukëty, jä'ä ko jëtu'un mëpaat mkëxë'ëky tä jeexyë ja monyëtukyë mtuktëjkëyënën mëët ko ja o'kën tëko'oyën të y'ity.

³ Tääts mnëjkxëty jam ënä'ämpë wyintum ets jëtu'un ja ayuk xynyiwinpitëty tä yam naskajpxëja'anyën. E ko ja Joab tuk'ëwa'anëtyääy wi'ix ja to'oxytyëjk y'ëna'anëtyën,

⁴ ënät ojts ja to'oxytyëjk jyänty nyijkxy ma ja ënä'ämpën, ko jam jyä'äjty tääts wyintäky nyaaxkooy ets ojts tkajpxpo'kxy ja yajkutujkpë, tyajnikëxë'ëky jëtu'un ja näwyinkutsë'ëkë, tä t'ënëmaay: Ënä'ämpë yajkutujkpë, yë'ë yam n'amëtoopy mpëjktsoopy etsës mijts xypyutëkëty.

⁵ ¿Tii jotmayxyë mëët'ajtyp? jëtu'un ja yajkutujkpë yajtëëwë. Tääts y'ëtsooy ja to'oxytyëjk: Wintsën, ëjts ëyo'on jotmayës të npaaty, tëëjës yë niye'etyëjk y'ooky,

⁶ e jamtsës nimäjtsk yë nmaank, ënät ojts ja tsip tyajpëtë'ëktë, e jä'ä ko ka'ap ënety jam pën awijtswa'kxëtëp tu'uk ojts tyaj'o'knë ja myëku'uk, jam ënety yajpaatë kamjotm.

⁷ E tyamts ënätnë aak xymyëtsip'ajtnëpës ja njëëky nmëku'uknë, yë'ë tyäty tsyojktëp etsës nkë'ëyakëty ja nmaankës mëti'ipë ojts ja myëku'uk tyaj'ookyën, e tääpë nmaankës yi'iyë tu'uk njaak'u'unk'ajtypyës, ko yë'ë y'ookëty tim këjxp tim najxp ënety ja ntiktsës n'aatsës ets ka'ap pën y'ëkwë'ëmnëty pën ja näykyumayë yamo'ojëpën ets pën yajjuuky'it yajtsuxk'itëp ja niye'etyëjkës ja xyëëw.

⁸ Ënet ja ënä'ämpë t'ëtsooy ja to'oxytyëjk: Oy mnëjkxëty ma mtëjkën, tyamës yë ënä'ämën mpëjkta'akëty ets akujk jotkujk m'itëty.

⁹ Tä ja to'oxytyëjk y'ëtsoowë: Mijts Wintsën mëti'ipës nkutujkpë'ajtypyën, ya'atë ja poky ëjts nkëpättëp mëëtës ja n'u'unk n'ëna'k, ka'ap myijtsëty mëj'ënä'ämpë ets ka'ap yë'ëjëty yë mkutujktakn.

¹⁰ Ets ja ënä'ämpë y'ëtsooy: Pën nëkoo m'ëtsu'ux mëkajpxëp, yaa xynyikajpxëty ets ka'ap pën nëkoo m'ënaxëtëty.

¹¹ E ja to'oxytyëjk ni'ikyë y'ënaan'ëtë'ëtsy: Tyamës yë Wintsën yë xyëëw nkajpxpatë ets mijts nmënu'kxtä'äky ma yaa m'ëne'emyën myajkutukyën ets xymyëpëjktsowëty yë Wintsën ets jyä'äkyukëty ja nmëku'uktëjkës, këtiipë ja ëxëëk winma'any tpaatëty tyaj'ookantëpëty ja wiinkpë ja nmaankës, mëti'ipë je'eyë tu'uk jaakwë'ëmpën. Tä ja ënä'ämpë tnikajpxëy: Tyam yajxon n'ënëëmë mëët ja Wintsën ja xyëëw ko yë mmaank nitii kyajata'anyë jëtu'un tä jeexyë kyuwaay nitu'uk kyaka'ayën.

¹² E ja to'oxytyëjk ni'ikyë ja y'ënaan'ëtë'ëtsy: Wintsën, këtii wi'ix xy'ëkjawëty, oy je'eyë ja tu'k aaw njaakajpxa'anyës. Kajpx, jëtu'un y'ënëmaayë ja ënä'ämpë.

¹³ Ënet ja to'oxytyëjk yajtëëwë: ¿E wi'ix ko yë yajkutujkpë jëtu'un ja Dios ja nyaax kyajpn tuunpë? Jëtu'un ijxtëm të m'ëtsoyën, mijts mpokykya'ap ko ka'ap xyajwinpity ja maank mëti'ipë ke'ekyjyëtijtpën.

¹⁴ Yë'ë tëyajtën yë'ë ko kopkpëky ko jëna'a n'o'kmëty; ëtsajtëm jëtu'un'ajtëm tä nëëjën ko nyajtstämë ka'ap tjëkyepy n'ëkyajpëtë'kënëty. Yë'ë tëy yë Wintsën ni pën yë jyuukyajtën tkapëjkë, ni'ikyë tsoky tjawë ets ja'ay jyuuky'atëty ets ja mëti'ipë ke'ekyjyëtijtpën yajwinpijtyp jatëkok ma jyëën tyëjkën.

¹⁵ E yë'ëts ënät mwinjawëp mijts Wintsën, ko ëjts yaa të nmiinpë ets yaa mijts nmëëtkäjpxy nmëëtmëtyä'äky, yë'ëkëjxm koos yë ja'ay nëkoo xyajjotkëxy. Paatyës yaa të nminy kooxyëp ja ënä'ämpë tnatunëty mëti'ipës npëjktsoopyën.

¹⁶ Pën xypyutëjkëpës yë ënä'ämpë yajkutujkpë, ëjts etsës yë n'u'unk ka'apës wi'ix njat nkëpätëty ets ni pënës wi'ix xykyatuntëty yaa naaxwiiny naaxkëjxy.

¹⁷ Ëjts Wintsën, akujk jotkujkës nwë'ëmy mëët koos të xyjyotmëk wiinkajpxë, mijts Wintsën tyamës n'ixy ko wa'ats xynyijawë mëti'ipë oy ka'oyën, jëtu'un tä jeexyë tu'uk Dios kukexyën. Yë Wintsën mkënu'kxëtëp.

¹⁸ Ënet ja ënä'ämpë t'ëtsooy ja to'oxytyëjk: Mëyajtën yam mpëjktsoopy ets nitii xykyakuyu'utsëty mëti'ipë yam nyajtëwäämpyën. Kajpx Wintsën, jëtu'un y'ëtsooy ja to'oxytyëjk.

¹⁹ Ënet ja yajkutujkpë yajtëëwë: ¿Yë Joab, yë'ë jëtu'un të m'ënë'ëmxëty etsës yaa xynyiminëty këtiijë? Ets ja to'oxytyëjk y'ëtsooy: Tyamës yajxon nikäjpxy Wintsën, ko tëy ijxtëm m'ëna'anyën. Tëy ko yë Joab mëti'ipë mijts myajtsiptuunpë wintsën'ajtypyën yë'ëjës të xyjyänty kyexy ets yë'ëjës näjyëtu'un të xynyajtskajpxë ijxtëm yam mijts të n'ënëëmën.

²⁰ E paatyën jëtu'un të wyinma'anypyääty ets ka'ap ni'ikyë ja amay jotmay jyää'atëty, mijts yajkutujkpë mëët ja mwijyajtën, wa'ats winë xynyijawë tiijaty tuunëpën jajtëpën naaxjoty kajpnjoty ijxtëm tu'uk yë Wintsën yë kyukexyën.

²¹ Mëët ko ënety jëtu'un ja to'oxytyëjk të y'ënä'äny, ënät ja David t'ënëmaay ja Joab: Ëk'ix ya'atë winma'any tëëjës yam nyaj'oyë. Nëjkx ets xyajwinpitëty yë Absalón.

²² Ënet ja Joab ojts wyintä'äky nyaaxkoy, tyajnikëxë'ëky jëtu'un ja näywyinkutsë'kën ets ojts tkënu'kxy ja ënä'ämpë, t'ënëmaay: Tyamës ënät n'ixy, ko mijts Wintsën xy'oyjya'apës paaty të xyjyä'äkyukë ja winma'any mëti'ipës ënety ëjts nwinma'any'äjtypyën ets tëë myajtuknijawë ets xytyunëty.

²³ Ënätyë ja Joab tnitso'ony ja Absalón, jam ënety yajpaaty Guesur ets tyajmina'any jam Jerusalén.

²⁴ Je'eyëp ko ja yajkutujkpë jä'ä ojts t'ënëëmë ja Joab ets nitëyë ja Absalón jam tyajnëjkxëty ma tyëjkën, ko këtii jam yë'ë wyintum tyajminëty; paaty ja Absalón nitëyë ojts nyijkxy ma ja tyëjkën ets ka'ap t'ijxy ja yajkutujkpë.

²⁵ Ma tëkokyë yë Israel kajpn tnitänën, ka'ap ënety maa ja'ay jëtu'unpë y'oyëty tsyujëty tä yë Absalonkën ets jëtu'unpë akäjpxy y'ityën tä yë'ëjën ka'ap nitii ma'at yaj'ixy, tsyo'ontä'äky ma tyekyën ets jyëjpkëxy ma kyëpajkën.

²⁶ Ko ijty yajkeepy winjëmëjtëty, jä'ä ja wyääy jye'emtyëty mäjtsk kilë.

²⁷ Absalón tam ijty tëkëëk yë myaank ets tu'uk yë nyëëx mëti'ipë xyëëwajtypyën Tamar, janty'oy janty tsuj ijty y'ixëty.

²⁸ Mäjtsk jëmëjt ojts yë Absalón jam y'ity Jerusalén ets ka'ap ja tyeety yajkutujkpë t'ijxy

²⁹ paaty ojts tëkok ja Joab jä'ä t'ënëëmë ets nëjkx t'ixy ja ënä'ämpë ets kyukäjpxy'atëty; Joab ka'ap nyëjkxany. Mëmäjtsk ok ojts yë Absalón tjä'ënëmaaykyojnëpë yë Joab ets jeexyë nëjkx kyukäjpxy'äty jap ma ja yajkutujkpën, Joab ka'ap tkupëjky.

³⁰ Ënet ojts ja Absalón ja tyuunpëtëjk t'ënëëmë: Ëk'ixtë, yë Joab yë'ëjës mëët tu'ukyë nätyu'kmëkam'atyë, e jam ma kyamën tam tyam yajxon tyajyoontä'äky yë tsajpmok, nëjkxtë ets xyjyëën'ixkonëtëty wä'än tnitooytyä'äy. Ja Absalón ja tyuunpëtëjk ojts jyänty nyëjkxtë ets tjëën ixko'onëtyë ja tsajpmok kam, wa'ats tyajtooytyääytyë,

³¹ ënät ojts ënätyë tninëjkxy ja Absalón ets tyajtëëy: ¿Wi'ix ko yë mtuunpëtëjk jam ojts të tyajtooytya'atë yë ntsajpmokamës?

³² Tä ja Absalón y'ëtsooy: Mja'amyejtsypë ko tëë njanikäxë ets jeexyë yaa të miny, tääts jeexyë ojts të xy'ixy yë yajkutujkpë mëët ëjtskyëjxm, ma jeexyë të xy'ënëëmë ko nëkoopës të nminy yaa nikë oyës jeexyë jam të ntimwyi'imy Guesur. Ëjts yë'ëjës yë yajkutujkpë nja'ixäämpy, pën ëjts pokymyëëtës wä'änës xyaj'ooky.

³³ Ënet ja Joab ojts tninëjkxy ja yajkutujkpë ets tukmëmëtyaktaay tä ënety ja Absalón të y'ënä'änyën ets ojts ja yajkutujkpë tnikäxë ja Absalón ets jam nyëjkxëty, ko jam jyä'äjty tääts wyintäky nyaaxkooy, tyajnikëxë'ëky jëtu'un ja näwyinkutsë'ëkë, ja yajkutujkpë ojts ja oy tsuj y'ëxajëty ets ojts myätsyë myënenyë ja tyeety.