2 Samuel 13 - Biblia Dc en Mixe de Quetzaltepec

Ma ja Amnón tkawintsë'ëkën ja Tamar

¹ Yë Absalón, yë myaank yë David, tam ijty tu'uk yë y'uty to'oxytyëjkpë janty'oy y'ixëty, jä'ä xyëëwajtyp Tamar. E jamts ënety näjyëtu'un wiinkpë yë David myaank jä'ä xyëëwajtyp Amnón, ojts mëk tsojkën'aty yë Tamar,

² ojts tyimpa'amniminë ko nëkooyë tsojkën'ajtnë ja Tamar; yë Amnón nyija'ap ënety ko yë Tamar ka'ap nitu'uk yë ye'etyëjk tmëët'atynyëm, paaty ka'ap tjëkyepy nëkoo wi'ix t'ënëëmëty ja Tamar.

³ E jamts ënety yë Amnón tu'uk yë myëku'uk, ëxëëkwin'ätspë, jä'ä xyëëwajtyp Jonadab, yë'ë yë myaank yë Simea, David yë myëkä'äx.

⁴ Tu'kxëëw ojts yë Jonadab tyajtëy yë Amnón, t'ënëmaay: ¿Tiitën mjajtëp? ¿Ni'ikyë mpakixnë? ¿Këtiitën xytyuk'ëwaanëja'anyësë? Tä ja Amnón y'ëtsoowë: Jä'ä ko wiinkëmës ntsojkën'ajnë yë Tamar, yë n'utyës Absalón yë y'uty.

⁵ Ënet ja Jonadab ojts kyajpxwijyë: Tëkë jap mtëkoty ets mnäpyëjkta'akëtëty mpëjkëp yowë. E ko yë mteety mniminëtëty, ënëëmë wä'än tkexy yë m'uty Tamar ets yë'ë myajkayëtëty, jäpyë tëkoty tyaj'o'oyëkyojëty mëti'ipë mjë'kxëpën ets kë'ëm xy'ixëty.

⁶ Amnón ënätyë jap tyëjkëy tyëkoty ets nyäpyëjktakë jam myaapäjnkëjxm, pëjkëp yowë. E ko ja tyeety ojts nyinëjkxyë, tää t'ënëmaay: Tun yë mëyajtën wä'än yë n'utyës Tamar tminy ets wäänë tyaj'oyëty yë nkääkyës n'uukyës ets yë'ë kë'ëm y'apëkëp.

⁷ Ënet ja David ojts tjanty kyexy ja Tamar, t'ënëmaay: Tamar jëtu'un yë m'ay Amnón y'ënä'äny, ko nëjkx jap xyajkay ma jap pya'amko'knën.

⁸ Tä ja Tamar ojts jyänty nyijkxy ma ja y'äy Amnón japën, mapäjnkëjxy tpaty. Ënet ja tsajpmokjëtsy tyaj'o'oyëy ets ja tsajpkääky ojts tyajkojy ets tyajkëëy;

⁹ tä ja tsajpkääky texyjoty tpëjktäky ets ja y'äy Amnón tmooy, ja Amnón ka'ap kyäyäny, ënätyë ojts tkäjxpëtsëëmta'ay ja ja'ayëty.

¹⁰ Ko ja ja'ayëty pyëtsëëmtaaytyë, ënät ja Amnón t'ënëmaay ja Tamar: Mëmin yap maas yë n'ijtaknën tääpë jë'kxy të xyaj'oyën etsës mijts kë'ëm xymyo'ojëty. Tamar ojts tjantymyënëjkxy ja kääky uuky jap ma ja Amnón y'ijtaknën,

¹¹ e ko ja Tamar ojts ja y'äy tjatuk'apëkëja'any ja kyääky, je'eyë ojts kyë'ë amëjaaw myajtsta'tsxëty ets y'ënëmaayë: Min Tamar, tsojk nämyëët'ajtëmë.

¹² Ënet y'ëtsoowë ja to'oxytyëjk: Ka'ap y'oy'atëty, këtii xy'ëwa'atsy ets mijts nëkoo xyajnipäxë tëkëtyës, tä mjamay mjatajyën ka'ap jëtu'un y'oy'atëty ma Israel ja'ayëtyën. Këtii xytyuuntëkoy mëti'ipë ka'ap kyutukyëtyën.

¹³ ¿Ëjts maas njaak mënëjkxëty ja ntsëtyu'un koos ënety mijts të xy'atsip'aty? Ets mijts jä'ä nëjkx myajtijy tsuu ets winma'anytyuk. Tyam npëjktsoy ets mëtya'akëty mëët yë yajkutujkpë; nija'apës ko yë'ë ka'ap wi'ix y'ëna'anëty, y'a'ixëp etsës mijts xyjyä'ä'atëty.

¹⁴ Amnón ka'ap ninu'un jyä'äkyujkëy, e jä'ä ko yë'ë kumëjaaw ënety ni'ik, paaty ni'ikyë tmajtsta'tsy ja Tamar ets t'atsip'ajty myëëtko'knëtëty.

¹⁵ E ko ënety tëë t'ëk'atsipt'aty, wäänëni'ik ojts t'ëxëëk'ijxnë këtiinëm jëtu'un të tsoky. Tääts t'ënëmaay: Pëtë'ëk ets mnëjkxëty.

¹⁶ Ënet ja Tamar y'ëtsoowë: Ka'ap, y'oy'atëty mëku'uk mëkä'äx, koos ënät mijts atsip xykyäjxpëtsëëmnë, ni'ikyë mnätyëkoyä'änyë këtiinëm jyëtu'unëty koos mijts të xy'atsip'aty. Amnón ka'ap ninu'un kyäjpxyjyä'äykyujkëy;

¹⁷ ni'ikyë ojts tmëkäjpxy ja tyuunpë ets t'ënëmaay: Yajpëtsëm ya'atë to'oxytyëjk ets yajxon xyaj'ëtukëty yë tëjk.

¹⁸ Tä ja tyuunpë tyajpëtsëëmy atsip ja Tamar ets tyaj'ëtujky ta'tspëky ja tëjk. Ja Tamar jä'ä ënety pyëjktäkpy ja wit nijän oypyë ets tsowpë, mëti'ipë yajtuuntëpën ja ënä'ämpëtëjk ja nyëëxëty nätyu'uk'ëna'kpë,

¹⁹ ojts nyätyukupëjkta'ayë kuyjaam, kyë'tstaay ja wyit mëti'ipë ënety jam pyëjktäkpyën, je'eyë nyäkyumajtskëtakë ets ojts nyijkxy jëëpyë yaxpë tu'ktu'u.

²⁰ Ënet ja y'äy Absalón yajtëëwë: ¿Yë'ëjën yë m'ay Amnón jëtu'un të mtunyë? Pën jëtu'un, amonyë m'itëty këtii tii xynyimëtya'akëty, jä'ä ko m'ay yë'ë. Këtii nëkoo xytyimmëmay xytyimmëtajëty. Tamar ko t'ijxy tëë yaj'ëxmajtsnë atu'uk, ënät ojts jam wyë'ëmnë ma ja y'äy Absalón ja tyëjkën.

²¹ Ko yë yajkutujkpë David, tnija'awëy mëti'ipë ënety të tyuny të jyätyën, ëxëëk ojts jyoot'anpëky; je'eyëp ko ka'ap ojts tuk'ojy ja Amnón, jä'ä ko ënety yë'ë kyä'äxkopkëty mëk ënety tsoky tjawë.

²² Yë Absalón ka'ap wi'ix t'ënëmaay yë Amnón, oy ënety tja'ëxëëk'ixy mëët ko jëtu'un ja Tamar ja wyintsë'kën të tyajtëkooyë.

Ma ja Absalón tyaj'ookyën ja Amnón

²³ Kommäjtsk jëmëjt, jam ënety yë Absalón yë jyä'äy tyuntë Baal-azor, yë'ë yë tsyajppax jam nyika'ptutëp ets pixyny tyajënaktë, jam wyi'imy winkon ma Efraín yë y'itjotmën. Ënet ojts yë Absalón tu'uk yë ka'ayën ukën tnipëjktaakë ma twoowtaayën tëkokyë ja yajkutujkpë, David ja y'u'unk y'ëna'k.

²⁴ Ojts näjyëtu'un tninëjkxy ja yajkutujkpë David ets t'ënëmaay: Tatë tyaajës nminy, mijts yam nwowäämpy ets jeexyë jam nyajpatëmë maas jam ja ntuunpë tyuntën, ma tnikääptën ja tsajppax, jamës tu'uk yë ka'ayën ukën nipëjktaakë e ntsojkpyës ets jam minëty.

²⁵ E ja yajkutujkpë tyaa y'ëtsooy: Ka'ap u'unk maay, ka'ap tjëkyepy ëëts ni'ëmukë ntimy nyëjkxta'atëty, jä'ä ko may oy nëjkx myajmeenytyuny. Ja Absalón mëktä'äky ja tyeety tja'ënëmaay, e yë tyeety tkupëjky, je'eyë ojts kyënu'kxyë.

²⁶ Ënet ja Absalón y'ënäny: Pën mijts ka'ap mnëjkxa'any, ënëëmë yë n'ajtyës Amnón ets yë'ë jam yajpaatëty. ¿Wi'ix ko xytsyoky ets Amnón jam yajpaatëty? Jëtu'un ja yajkutujkpë yajtëëwë.

²⁷ Ja Absalón mëktä'äky ojts ja tyeety tjanty'ënëëmë, tääts tkupëjky ets ja myaank Amnón nyëjkxëty ma ja Absalón ja ka'ayën ukën jam të tnipëjktaakën. Absalón mëj ënety ja ka'ayën ukën të tnipëjktaakë jëtu'un tä yë ënä'ämpëtëjkëty kyäytyën y'uuktën,

²⁸ tëë ënety t'ënëëmë ja tyuunpëtëjk: M'ixtëp yajxon, ko ja Amnón myukpëkëtëty, koos nikajpxëty ets xyaj'ooktëty, tääts ënätyë xyaj'ooktëty. Këtii mtsë'ëkëtëty, ëjts yam jëtu'un ni'ënä'ämëp. Amëk jotmëk myajpaatëty.

²⁹ Ja tyuunpëtëjk ojts ja wyintsën tjanty myëmëtowtë, yaj'o'ktë ja Amnón. Ënet tëkokyë ja yajkutujkpë David ja y'ëna'ktëjk wyatsë'ktaaytyë ets kyäktë.

³⁰ Tam jëtää ja ënety tyu'uye'eytyënëm, ko ja David tnija'awëy, ko tëë ja Absalón tyaj'o'kta'ay ja yajkutujkpë David ja y'u'unk y'ëna'k, ko ka'ap tu'ukën të wyi'imy.

³¹ Ënet ja yajkutujkpë pyëti'ky ets jyotmaytyëjkëy, ojts tkëëtsy ja wyit ets ja naaxway nyätyukupëjkë ets naaxkëjxy ojts yetsy pyojy ets aakjëtu'un ja myëkutuunk y'ëtëtstaaytyë;

³² e ja Jonadab, ja Simea myaank, David yë myëkä'äx, jä'ä y'ënëmaay ja David: Yajkutujkpë, ijxkëm m'ënaanpë ko tëë ja m'ëna'k tyim'o'kta'ay. Tu'uk je'eyë të y'ooky, yë'ë Amnón, yë Absalón të tuknipëjktaakë, ënät ojts jëtu'unpë wyinma'any tpaaty jä'ä xëëw ma ja y'uty Tamar ojts yajtukxi'ikyën.

³³ Paaty mijts Wintsën, ka'ap m'ëna'anëty ko tëë ja ënä'ämpë ja y'ëna'k tyim o'kta'atë, je'eyë tu'uk të y'ooky, yi'iyë Amnón.

³⁴ Ja Absalón ojts ënätyë kye'eky, ja ja'ay mëti'ipë ënety jam këwent'ajtpën ma ja David ja kyutujktaknën jam jëkäm t'ijxpaty ja'ay myintë jëyujk këjxy, nikanaak, ma ja it txëëwatyën Horonaim, ma wyinjënäkyën. Ënet ënätyë tuk'ëwa'anëy ja yajkutujkpë David, ko ënety të t'ixy ja ja'ay jam jyënaktë tunkëjxm ma txëëwatyën Horonaim.

³⁵ Ets ja Jonadab t'ënëmaay ja ënä'ämpë: Jä'ä jam janty miintëp ja ënä'ämpë ja y'ëna'k, jëtu'un tääjës të nikäjpxyën.

³⁶ Tam ënety je'eyë ja Jonadab tyimkajpxta'ay, ko ja yajkutujkpë David ja y'ëna'k kyuwa'këtyë ets tyëjkëtyë jëëpyë yaxpë, näjyëtu'un ja David ets tëkokyë ja myëkutuunktëjk.

^37-38 Ja Absalón jam ojts nyaskääkë ma ja Talmai yajkutukyën, yë'ë myaank yë Amiud ma ja kajpn txëëwatyën Guesur, tëkëëk jëmëjt jam y'ijty. David xëmë winjëpom ojts tniyä'äxy ja myaank Amnón ko ënety të y'ooky,

³⁹ e ko ojts jatëkok jyotkujkë, ënät tja'amyejtsy ja myaank Absalón ets y'ënäny ko t'ixa'any.