2 Samuel 11 - Biblia Dc en Mixe de Quetzaltepec

David mëët ja Betsabé

¹ Jëtu'un ojts tëkok tyunyë jyätyë xëkopkjoty, ma ënety yë ënä'ämpëtëjkëty tsyoontë jya'tën ets muum nyëjkxtë tsiptuunpë; paaty ja David tkejxy ja Joab mëët ja tsyiptuunpëtëjk jampë yajpaatën Israel. Ma ojts tsyiptuntën ojts tyajkutëkoytyë ja Amón ja'ayëty ets näjyëtu'un tyajkutëkooytyë ja Rabá kajpn. E ja David ojts wyi'imy jam Jerusalén.

² Jä'ä xëëw, jënäkyxyëëw ënety ko ja David myä'äypyëti'ky ets jam pyejty këmoon tëjkëjxm, jamts nyäxy tyëkë ko t'ijxpaty jap ëpa'tkë'p tu'uk yë to'oxytyëjk tsyi'iy, janty tsujpë. Ya'atë to'oxytyëjk tëë ënety je'eyë tyukjënajkta'ayë ja myëjaaw.

³ Tä ja David tkejxy ja tyuunpë ets tyajtëwtëty pën tääpë ja to'oxytyëjk, tä t'ënëmaaytyë ja David ko Betsabé xyëëwajtyp, yë nyëëx yë Eliam ets yë'ë tyo'oxytyëjk yë Urías, Hit ja'ay.

⁴ Tä ja David ojts tnikäxë ets myinëty ja to'oxytyëjk ets tmëëtko'knaay, tä ojts jatëkok ja to'oxytyëjk wyimpity ma ja tyëjkën. Ya'atë to'oxytyëjk je'eyënëm ënety myëjaawpëkynyëm ma ja myëjaaw nyijënäkyën.

⁵ Ja to'oxytyëjk u'unk mëët ojts wyi'imy ets tuknija'awëy ja David.

⁶ Ënet ja David t'ënëmaay ja Joab ets tnikäxëty ja Urías mëti'ipë Hit ja'ayën wä'än tja'ty, Joab jëtu'un tjantytyuuny.

⁷ Ko ja Urías jam nyäwya'këxë'kë ma ja Davidjën, ënät y'ënëmaayë: ¿Wi'ix ja Joab jam, e wi'ix xy'ixy ja tsip?

⁸ Ok kyäjxë jam ma tyëjkën ets nëjkx myä'äy pyo'kxy. E ja Urías je'eyë tsyo'ony jam ma kutujktaknën ets ojts ja ënä'ämpë tyuknikexyë ja kääky tojkx jëtu'un tä tu'uk yë näynyamo'ojën;

⁹ e ja Urías ka'ap ojts nyijkxy ma tyëjkën, jämyë ojts wyi'imy ma ja tsiptuunpëtëjk jam tkëwent'atën ja kutujkëntëjk.

¹⁰ Ko yajtukmëmëtyäky ja David ko ka'ap ja Urías të nyijxy ma tyëjkën, ënät tyajtëëy ja Urías: ¿Tii ko të mkanëjkxy ma mtëjkën po'kxpë, m'ënu'kxëpts ënät ko të mye'ey?

¹¹ Ets ja Urías y'ëtsooy: Wi'ixës nëjkxëty akujk jotkujk po'kxpë maas yë ntëjkën, e tyam ja Wintsën ja kyaaxë ets ja tsiptuunpëtëjk, Israel ja'ayëty ets Judá ja'ayëty oy jam wi'ix nyänyixo'omëtë ma jam tsyippaatën; näjyëtu'un ja Joab ets tyuunpëtëjk mëti'ipë mëët të yajkäxtën jam muum winwa'atstum ets ënät ëjts akujk jotkujk ntëjkëpëty maas yë ntëkën kääpyë ukpë ets nma'ajëtyës mëët ja nto'oxytyëjk akujk jotkujk. Ëjts tyamës yajxon ntimnyikäjpxy mëët ko jyuuky'äty ja ënä'ämpë ka'apës mëpaat jëtu'unpë winma'any npaaty.

¹² Tä ja David ojts ni'ikyë y'ënë'ëmxëty: Jaakwë'ëm tyam, jopynyëm mnëjkxëty. Jëtu'un'äämpy ojts ja Urías jyaak wë'ëmy tu'kxëëw jam Jerusalén.

¹³ Ojts ja David jam twoy ma tyëjkën tääts mëët kyääy y'uky ets tyajmukë yajxon. Ko ojts kyootsënyë, tä ja Urías ojts nyëjkxnë ma jam ja tsiptuunpëtëjk tkëwent'atën ja kutujkëntëjk, kä'äpyëm ojts nyijkxy ma tyëjkën.

¹⁴ Komjëpom yë David ojts tnijayë yë Joab ets tukmëkäjxëy yë Urías.

¹⁵ Ja noky jëtu'un y'ënä'äny: Yë'ë pëjkta'ak yë Urías jëwyiin ets jam xynyaskäxëty ma ni'ik ja tsip myëkëtyën, jamts atu'uk xyajwë'ëmtëty ets mëtsip yaj'ookëtëty.

¹⁶ Paatykyëjxm, ko ja Joab ojts tyajnatuky ja kajpn mëti'ipë ënety nyitëkëjantëpën, jam ojts ja Urías tnajtskäxë ma tnijawën ni'ik ja tsip myëkëtyën,

¹⁷ e ko ja myëtsip nyipëtsëëmëtë ënät mëët yajxon tsyiptuuntë, ojts y'o'kojtë tu'uk mäjtsk ja David ja tsyiptuunpëtëjk ma ojts näjyëtu'un y'ookyën ja Urías.

¹⁸ Joab ojts tnijayë ja David ma tukmëmëtyäkyën wi'ix ënety ja tsip të tyunyën,

¹⁹ ets ojts tnajtskajpxë ja kunoky tii tyunëpën: Ko ënety të xytyuk'ëwa'anëtyäy ja ënä'ämpë tëkokyë wi'ix ja tsip të tyuny të jyätyën,

²⁰ wä'änxyëp wäänjaty jyoot'anpëky ets myajtëwëtëty: ¿Wi'ix ko nëkooyë të mtimwyinkoonëtë ma ja kajpnën? ¿Këtii xynyijawëtë ko tääpë ja'ayëty nëkooyë tii winë tka'atsë'ëktë jam potsykyëpajkm

²¹ jëtu'un ijxtëm ojts jam Tebés tëkok jyätyën, ko tu'uk ja to'oxytyëjk tka'atsë'ky ja paan u'unk ets ojts pyäätyë ja Abimélec, ja myaank ja Jerubaal? ¿E wi'ix ko miitsëty nëkooyë të mtimwyinkoonëtë? Tääts xy'ëtsowtëty: Tëë näjyëtu'un yë Urías y'ooky, mëti'ipë ja ënä'ämpë yajtsiptuunpë wintsën'ajtypyën.

²² Ënet ja kunoky ojts nyijkxy ets tukmëmëtyaktaay ja David jëtu'un ijxtëm ënety ja Joab të nyajtskajpxëtyën. Ja David ojts ja Joab tjantyukjoot'anpëky ets t'ënëmaay ja kukäjpxy: ¿Wi'ix ko nëkooyë të mtimwyinkoonëtë ma ja kajpnën? ¿Këtii xynyijawëtë ko tääpë ja'ayëty nëkooyë tii winë tka'atsë'ëktë jam potsykyëpajkm, jëtu'un ijxtëm ojts jam Tebés tëkok jyätyën, ma tu'uk ja to'oxytyëjk tka'atsë'kyën ja paan u'unk ets tukyaj'o'ky ja Abimélec, ja Jerubaal ja myaankë? ¿E wi'ix ko miitsëty nëkooyë të mtimwyinkoonëtë?

²³ Ënet ja kukäjpxy y'ëtsooy: Ja tsiptuunpëtëjkëty mëti'ipë ëëtsëty mëët të näpyaatëtën jam ëwaatsëtum nimay ënety ni'ikëty, e ëëtsëty tëëjës yajxon näkyuwa'anëtë etsës të nyajnaskääkëtë jam winkon ma ja kajpn yajnitëkën.

²⁴ E jamts potsykyëjxm, jam ja ja'ayëty të tyëkëtë ti'pxpë ets të pyaatëtë mëti'ipë ëëtsajtëm nja'ay'ajtëmën ets të y'ooktë, nän tëë y'ooky ja Urías ja Hit ja'ay.

²⁵ Ënet ja David t'ëtsooy ja kukäjpxy: Ënëëmë yë Joab ko këtii nëkooyë tmëmay tmëtajëty mëti'ipë të tyuny të jyätyën jä'ä ko jëtu'unën yë tsip tyunyë, jam xy'ënëëmëty ko wä'än ni'ikyë tjotmëktä'äky ets tnitëkëty yë kajpn amëk jotmëk, koonëm tyajkutëkoyëty.

²⁶ Ko ja Urías ja tyo'oxytyëjk tnija'awëy ko tëë y'ooky ja nyiye'etyëjk, ojts tnimony tnituky ets ojts kanaak xëëw y'ity ayuu.

²⁷ Ko jëtu'un ja monyëtukyë nyiwatsë, ënät ja David ojts twoownë jam ma ja tyëjkën ma ja kutujkëntëjkën ets mëët pyijky, ja to'oxytyëjk ojts tu'uk ja u'unk maay tyajminy tyaja'ty naaxwiiny. E ja Wintsën ka'ap oy t'ijxy ijxtëm ënety ja David të y'ëti'itsyën.