2 Samuel 10 - Biblia Dc en Mixe de Quetzaltepec

Ma ja David tsyiptuunyën mëët ja siriëja'ay ets Amón ja'ay ets ka'ap tyajmëtäky

¹ Ko ja xëëw jëmëjt nyäjxy, tää ojts ja Nahas y'o'knë, mëti'ipë ënety jam ënä'ämpën ma ja Amón ja'ayëtyën, yë kutëjkëyë ja myaank mëti'ipë xyëëwajtypyën Hanún.

² Ënet ja David ojts myäy tyäjy, ko näjyëtu'un t'oyjyawëja'any ja Hanún tä ja tyeety ojts y'oyjyawëtyën; paaty ja David tkejxy ja tyuunpëtëjk ets nëjkx tnijë'ë tniya'axtë ja Hanún ja tyeety ko ënety të y'ooky; e jääts ko ja David ja tyuunpëtëjk jam jyajtë ma ja Amón ja'ayëty ja kyajpnëtyën,

³ ja mëjja'aytyëjkëty jampë kyukajpn'atën ënätyë ojts myuktë ets t'ënëmaaytyë ja Hanún: Wintsën, ¿mijts mjëjp'ijxypyën ko tääpë ja'ayëty të jya'tën mëti'ipë yë David të tkexyën, oywyinma'any myëmiintëp ets ko tmëkjawëtë ko ja mteety të y'ooky të tyëkoyë? Yë'ëjëty paaty të yajkäxtë ets min y'ixtë tyuntë ets ënät ok tyajkutëkoya'antë ja kajpn.

⁴ Ënet ojts ja Hanún tni'ënä'ämë ets ja David ja tyuunpëtëjk yajmatstëty ets tjäjpëtëty ja y'awaay kujkwä'kxy je'eyë, ëpëky näjyëtu'un ja wyit ojts tkë'tsëtë, jampaat tkë'tskëtakëtë ma ja y'ixpajkëtyën. Tä ojts t'ëxmatstë ets nyëjkxtëty.

⁵ Ko ja David tnija'awëy, ënät ojts tkexy ja jyä'äy ets nëjkx ja myëku'uk jam tjëjpye'eytsyowtë, jä'ä ko ijxtëm ënety myintën kopkpëky ko mëk tsyëtyuntë, tä ojts t'ënëëmëtë ets jam wyë'ëmtëty Jericó, koonëm ja y'awaay yoonta'aktëty ets jya'tëtynyëm.

⁶ Tä ja Amón ja'ayëty ojts tja'akyukëtë ko myëtsiptso'ontëp ja David, paatykyëjxm ojts t'ixta'atë ni''i'px mil ja tsiptuunpë aakyë'ë sirië ja'ay jampë kyukajpn'atën Bet-rehob ets Sobá, ëpëky ojts ja yajkutujkpë Maacá tkäjxpë ja tsyiptuunpëtëjk nitu'kmil ets nimajkmäjtsk mil ja Is-tob ja tsyiptuunpë.

⁷ E ja David ënätyë tnija'awëy, paaty ojts tkexy ja Joab mëët nimay ja tsiptuunpë.

⁸ Ja Amón ja'ayëty ojts nyänyipëjktaakëtë ets tsyiptuna'antë jam ma ja kajpn yajnitëkën, e ja tsiptuunpëtëjkëty mëti'ipë jam kukajpnajtëpën Sobá ets Bet-rehob ets näjyëtu'un ja tsyiptuunpëty ja ënä'ämpëtëjkëty mëti'ipë xyëëwajtëpën Is-tob ets Maacá, jam nyäpyëjktakëtë jëkäm.

⁹ Ko ja Joab t'ijxy ko wintuuytsyow ets jëxkë'ptsow ënety yajtu'u ëtuka'any, ënät twin'ijxy ja tsiptuunpëtëjk jotmëkëtypë ets tsip'ixëtypë jampë yajpaatën ma ja Israel ja'ayëtyën ets ojts nyänyipëjktaakëtë ets tsyiptuna'antë.

¹⁰ E ja nimaypyë jä'ä ojts tuknipëky ja y'uty Abisai ets yë'ë tu'uwinye'eyëty ets jëtu'un tjëjpkuwa'akëtëty ja Amón ja'ayëty,

¹¹ ets t'ënëmaay: Pën yë sirië ja'ayëty ka'ap xyajmëta'aka'anyës, mijts ënätyë xynyiminëtyës ets xypyutëkëtyës; e pën ëjts n'ijxyp ko yë Edom ja'ayëty ka'ap myajmëta'aka'anyë ëjts mijts ninëjkxëp ets mputëkëty.

¹² Këtii mtimtsyë'ëkëty, amëk jotmëk tim it, tsojk nkuwa'anëm yë nnaax'ajt nkajpn'ajtëm ets tsojk nitsiptu'unëmë yë Wintsën yë nyaax kyajpn. Wä'än yë Wintsën t'ix wi'ix të tuknipëjktaakë.

¹³ Tä ja Joab ojts tnitsoony ja sirië ja'ayëty, ko ja sirië ja'ayëty t'ijxtë ko tam ja Joab nyiminëtë pojën ojts kyäkta'atë.

¹⁴ Ko ja Amón ja'ayëty t'ijxtë ko tëë ja Siria ja'ayëty kyäkta'atë, ënät näjyëtu'un poj'am tkukäktë ja Abisai ets jap kajpnjoty kyukäkëtyë. Tä ja Joab ojts jëtu'un tsyiptuunta'ay mëët ja Amón ja'ayëty ets ojts nyëjkxnë jam Jerusalén.

¹⁵ Ko ja sirië ja'ayëty t'ijxtë ko ka'ap ja Israel ja'ayëty të yajmëta'akëtë, ënät ojts jatëkok tyu'ukmuktë.

¹⁶ Jam Hadad-ézer yajnikäjxëtyë ja sirië ja'ayëty, jam ma ja mëjnëë jyënäkyën mëti'ipë yajtijpën Éufrates; tääts jam tsyo'ontë ets jyajtë jam Helam; ma yë'ëjëtyën yë'ë winye'eyëtë yë Sobac, mëti'ipë nyiwintsën'ajtypyën ja tsyiptuunpë ja Hadad-ézer.

¹⁷ E yë David ënätyë ojts tnijawë ets poj'am twoowmujky tëkokyë ja Israel ja'ayëty, mëti'ipë tsip'ixyëtyën ets ojts tsyoontë, nyinajxtë ja Jordán mëjnëë ets jyajtë jam Helam. Jamts ojts mëët ja sirië ja'ayëty nyänyiwa'akëtë ets yajxon tsyiptuuntë,

¹⁸ ja sirië ja'ayëty ka'ap jatëkok myëtaktë; paaty ojts je'eyë tyimkäknëtë, jä'ä ko ja David ja tsyiptuunpëtëjk tëë ënety ja sirië ja'ayëty nayaj'o'knëtë niwëxtyikxy mil aakyë'ë ja tsiptuunpë mëti'ipë kwaaykyijxy ënyääytyëpën, ëpëky niwëxtujk mëko'px mëti'ipë myëtsiptuuntëpën ja pujxnwintëkäämpë; ojts näjyëtu'un ja David tyaj'ooky ja Sobac, mëti'ipë nyiwintsën'ajtypyën ja tsiptuunpëtëjk mëti'ipë sirië ja'ayëtyën.

¹⁹ Ko jëtu'un t'ijxtë ja wiinkëtypë ja kajpn mëti'ipë ënety mëët oy të nyäyaj'itëtën ja Hadad-ézer ko ja David ka'ap ni pën tyajmëtä'äky, tääts ojts mëët ja nay'ëëw'oy näkyajpx'oyë timtyuntë ja Israel ja'ayëty ets ojts jä'ä ja David tyuunpë'ajtënëtë. Je'eyë jëtu'un ojts ja Siria ja'ayëty y'ënanëtë mëët ja tsë'ëkë ko ka'ap ja Amón ja'ayëty nijëna'a t'ëkputëkëjanëtë.