2 Reyes 9 - Biblia Dc en Mixe de Quetzaltepec

Ma ja Jehú yajkënu'kxyën ets yë'ë yajkutukëty jam Israel

¹ Ja käjpxynyajxpë Elisejë, ojts tmëkäjpxy tu'uk ja myëku'uk mëti'ipë jam yajpatëpën ma të ye'eymyuktën ets t'ënëmaay: Näjyëjp'ixët ets mtsoonëty. Tyaa ya'atë on kon ets mnëjkxëty jam Galaad ma Ramot y'itjotmën;

² ko jam mja'tëty, tääts xy'ixta'ajëty yë Jehú, yë myaank yë Josafat ets yë'ë y'ok'u'unk yë Nimsi. Jap mtëkëty tëkoty ma jap yajpaatyën, ëpëky xywoownëjkxëty, wiinktëjk;

³ ënät xytyukkutämëty ya'atë on ets xy'ënëëmëty: Jëtu'un yë Wintsën y'ënä'äny: Tyam mijts nkënu'kxy ets myajkutukëty ma ja Israel kajpnën. Ënätyë jap mpëtsëmëty ma ja tëjkën ets mkä'äkëty, këtii nimaa mwa'ak'oyëty.

⁴ Ja yujkyeeky ëna'k käjpxynyajxpë jam ojts nyijkxy Ramot, ma ja Galaad y'itjotmën,

⁵ ko jam jyä'äjty, yë'ë tyukye'eypyäjt yë tsiptuunpë wintsën, tääts y'ënäny: Aaw ayukës nmëmiinpy, yë'ëjës ntukmëtowäämpy mëti'ipë nyiwintsën'ajtypyën yë tsiptuunpëtëjk. ¿Pën jëtu'un mëtëy, jä'ä ko nikanaak yam ëëtsëty? Jëtu'un ja Jehú y'ëtsooy. Mijts, mijts jëtu'un, jëtu'un ja Wintsën ja myëtuunpë ojts y'ëtsoyë.

⁶ Ënet ja Jehú ënätyë wyä'ätsë'ky ets japtsow ëpëky tyëjkëtyë. Ënet ja Wintsën ja myëtuunpë ojts tyukutäämë'ëkyë ja on ets y'ënëmaayë: Ja Wintsën, mëti'ipë y'ëwtajtëpën ja Israel ja'ayëty, jëtu'un y'ënä'äny: Tyam mijts nkënu'kxy ets m'ënä'äm myajkutukëty maas yë nkajpnën, yë Israel kajpn.

⁷ Mijts nëjkx xyajkutëkoy ja Ahab ja yu'unk y'ëna'k, mëti'ipë mwintsën'ajtypyën, jëtu'unts xynyitsiptunëty ja jyot nye'pny ja ntuunpëtëjkës mëti'ipë ja Jezabel të tyaj'ooky të tyajtëkoyën nanëkookyëjxm.

⁸ Tëkokyë ja Ahab ja jyiiky myëku'uk nëjkxëp kyëjxta'atë; ja ye'etyëjktëjk mëti'ipë jää jaakjuuky'ajtëpën ma Israel kajpnën wa'atsës nyajkutëkooytya'aja'any.

⁹ Jëtu'un yë Ahab yë yu'unk y'ëna'k ntunanë tä ja Jeroboam ojts ja y'u'unk y'ëna'k ntuunënës, yë Nabat yë myaank ets tä ja Baasá ja yu'unk y'ëna'k, yë myaank yë Ahías.

¹⁰ E yë Jezabel, ko nëjkx y'ooky uk nëjkx yë nyini'kx tsyu'tsxëty wyëjtsxëty ma ja Jezreel y'itjotmën ets ni pën nëjkx jyot nyini'kx kyanitajxëty. Ko jëtu'un ja Wintsën ja myëtuunpë kyajpxtaay tä pyëyë'kpëtsëëmy ets kyeky.

¹¹ E ko ja Jehú jatëkok wyimpijty, ma ënety jap yajpaatën ja tsiptuunpë wintsëntëjkëty, mëti'ipë ja yajkutujkpë myëtuuntëpën, tä yajtëëwëtë: ¿Wi'ix jyäty? ¿Tiijën ko tääpë ja'ay kyupoj të y'ojtspë? Miitsëty mnija'awëtyëp yë'ë, tëë kë'ëm xymyëtowtë wi'ix yë xo'onën ijtën tmëët'atyën, jëtu'un y'ëtsooy yë Jehú.

¹² Këtiijës xywyin'ëëntëty, tukmëmëtyaktëkës wi'ix të m'ënë'ëmxëty. Ënet ja Jehú y'ëtsoowëtë: Tyam ntuk'ëwaanëtëty wi'ixës të xy'ënëëmën: Jëtu'un yë Wintsën y'ënä'äny: Mijts yam nkënu'kxyp ets m'ënä'äm myajkutukëty ma Israel kajpnën.

¹³ Tä ënätyë nitu'ukjaty nyätyuknijääntutëtë ja nyijänëty ets tyä'ptë ma ja tëjk yajnipäjtë'ëkyën, jä'ä tyukniyä'pëtyë ja Jehú. Tääts ojts txuxmuktë ja mayjyä'äy ets mëk tukyax tukjojkëtyë: Yë Jehú yë'ë tyam yajkutujkp.

Ma ja Jehú tyaj'ookyën ja Joram, mëti'ipë jam yajkutujkpën ma ja Israel ja'ayëtyën.

¹⁴ Yë Jehú, mëti'ipë yë Josafat y'u'unk'ajtypyën, yë y'ok'u'unk yë Nimsi ojts tnikäjpxytyunë yë Joram. Ja Joram mëti'ipë ënety mëët ja Israel ja'ay të tkuwa'anyën ja Ramot mëti'ipë ja Galaad nyitënääpyën, ko ja Hazael yajnatujkëtë, mëti'ipë jam yajkutujkpën Sirië,

¹⁵ tëë ënety wyimpity Jezreel ets tysooypyäta'any, ma të yajtsëtyutyën ja Siria ja'ayëty ko mëët tsyiptuuntë ja Hazael. Tä ja Jehú t'ënëmaay ja jyä'äy, ko pën janty ënantëp ets yë'ë yajkutukëty, ni pën kyatsoonëty kajpnjoty, koonëm ja ja'ay yajtuk'ëwa'anëtya'atëty jam Jezreel mëët ko tëë wiinkpë ja yajkutujkpë tyëkë.

¹⁶ Ënet ojts tukpety ja pyujxnwintëkäämpë mëti'ipë myëtsiptuunpyën ets ojts nyijkxy jam Jezreel, yë Joram tsyëtyut ënety jam myëko'knääpy. Näyjyëtu'un yë Ocozías mëti'ipë yajkutujkpën jam Judá tëë ënety tninëjkxy yë Joram.

¹⁷ Ko jëtu'un t'ijxy ja ja'ay mëti'ipë jam këwent'ajtpën ma ja Jezreel kajpnën, ko tam ja Jehú myiny mëët ja jyä'äy, ënät mëk yujk'ënany: Tam xim yë ja'ay myintë. Ënet ja Joram ojts tni'ënä'ämë ets tkäxtëty yë ja'ay kwaaykyijxy ets tyajtëwtëty ja mëti'ipë jam miinpën pën oy myiny ëkë pën tsiptuunpë myiny.

¹⁸ Ënet ja tsiptuunpë ojts tu'uk tsyoony kwaaykyijxy ets jyä'äjty ma ja Jehú jam myinyën ets t'ënëmaay: Yë yajkutujkpë yë'ë nyijawëjäämpy pën mijts oypyë mëmiinpy, ëkë pën tsiptuunpë miny. Tä ja Jehú y'ëtsooy: Tyaapë ka'ap myijtsëty mpaatyë xynyijawëty. Nax jam jëxkë'ëm ets pamiinkës. Tääts ja tsiptuunpë mëti'ipë jam kajpntum këwent'ajtpën ojts tnikäjpxy ets y'ënäny: Ja nja'ay'ajtëmë tëë jam jyaja'ty, je'eyëp ko ka'ap yaj'ix wyimpity.

¹⁹ Ënet ja yajkutujkpë ojts wiinkpë tkexy ja tyuunpë kwaaykyijxy ma jam ja Jehú myinyën, ko jam jyä'äjty, tä tyajtëëy: Yë yajkutujkpë yë'ë nyijawëjäämpy pën mijts oypyë mëmiinpy ëkë pën tsiptuunpë miny. Tä ja Jehú y'ëtsooy: Tyaapë ka'ap myijtsëty mpaatyë xynyijawëty. Nax jam jëxkë'ëm ets pamiinkës.

²⁰ Tä ja tsiptuunpë mëti'ipë jam këwent'ajtpën ojts jatëkok tnikäjpxy ets y'ënäny: Mëti'ipë tyam ok të nyijxyën tëë näjyëtu'un jam jyaja'ty, je'eyëp ko nän ka'ap wyimpity ets jëtu'un yaj'ixy mëti'ipë yë pujxnwintëkäämpë yajye'epyën yë'ë yowë Jehú, yë y'ok'u'unk yë Nimsi, jä'ä ko jëtu'un tyajye'ey yë kepy wintëkäämpë tä tu'uk yë ja'aykyupojën, jëtu'un ijxtëm jyä'äy'ätyën.

²¹ Ënet ja Joram ojts tuk'ëne'emy ja tyuunpëtëjk: Jamës yë npujxn wintëkäämpë xynyipëjktaakëtëty mëti'ipës nmëtsiptuunpyën. Ënet ojts ja pyujxnwintëkäämpë jyänty yajnipëjktaakë, tääts ja Joram, mëti'ipë jam yajkutujkpën Israel, mëët ja Ocozías tsyo'ony, aaktam yë pyujxn wintëkäämpëty ets nëjkx tjëjpkuwa'akëja'antë ja Jehú. Jam tpatë ma ja nyaaxjotmën ja Nabot, jampë kyukajpnëtyën Jezreel.

²² Ko ja Joram t'ijxy ja Jehú, tä t'ënëmaay: ¿Wi'ix Jehú oypyë myajmiinpyë, ëkë mtsiptunaanpë? Tä ja Jehú y'ëtsooy: ¿Wi'ix yjyää'atëty ja jotkujk'ajtën, pën mijts yë mtaak, Jezabel, je'eyëm tuun'ëtë'ëtsy ja ëxëëkpë, ma ja wiink tios t'ëwtatyën ets ma ja myëku'uk tpatoy tpanaxyën?

²³ Ënätyë ja Joram wyimpijty ets kyeky, tyam mëk tjanty'ënëëmë ja Ocozías: Tëë nyajnikäjpxytyu'unëmë, Ocozías.

²⁴ E yë Jehú ënätyë tu'uk tnajtsmajtsëy ja tyi'px ets pyatë ja Joram, jëxkë'ptsow ojts pyäätyë ets tim tuknajxë ja jyuukyjot, jëtu'un ja Joram jap y'o'ky pyujxnwintëkäämpëjoty.

²⁵ Ënet ja Jehú ojts ja tyuunpë t'ënëëmë mëti'ipë xyëëwajtypyën Bidcar: Juut yë nyini'kx jap pyujxnwintëkäämpëjoty ets nëjkx jam xytyu'ujëjpjëpipë ma Nabot yë nyaaxjotmën mëti'ipë Jezreel nyitënääpyën, jä'ä ko nja'amyejtsypës ko ënety ëëtsajtëm pujxnwintëkäämpë nyajye'eyëmë mëti'ipë Ahab jyä'ä'ajtypyën, yë Joram yë tyeety, ojts yë Wintsën tyuknikäjpxyë ko ënety jëtu'un jyata'any, ko y'ënäny:

²⁶ Jëtu'un tääjës ëxë'ëy n'ijxyën ja jyot nye'pny ja Nabot ets ja y'u'unk y'ëna'k, jëtu'un mijts nmo'oja'any ja mjä'ä mëti'ipë mpatëpën ma ya'atë naax kamën. Paaty nëjkx jap jëpijppëtsëm ets jam xynyajtsjëpipëty ma Nabot nyaaxjotmën jëtu'un tä ja Wintsën ojts t'akäjpxyën.

Ma ja Jehú tyaj'ookyën ja Ocozías

²⁷ Ko ja Ocozías jëtu'un t'ijxy, mëti'ipë jam yajkutujkpën Judá, tä näjyëtu'un kyeky jamtsow Bet-hagan. E ja Jehú ënätyë pyatso'onë ets ni'ënä'ämëy: Yaj'ooktë näjyëtu'un tääpë. Tääts tyaj'o'ktë jap pyujxnwintëkäämpëjoty jam ma Gur kopkën, winkon ma näjyëtu'un txëëwatyën ja itjot Ibleam, Ojts jyajaakke'eky jampaat ma txëëwatyën Meguido. Jam ojts y'o'knë.

²⁸ Ënet ja tyuunpë jam tmëtso'ontë ja o'kpë, jap pujxnwintëkäämpëjoty t'apëjkëtyë ets ojts tmënëjkxtë ma ja David ja kyajpnën, jam tyajnaaxtëjkëtyë.

²⁹ Yë Ocozías jä'ä ënety të yajkutujktsoony jam Judá, ma myëmajktu'uk jëmëjtpetyën ma ja Joram yajkutukyën, yë Ahab yë myaank.

Ma ja Jezabel y'ookyën.

³⁰ Ënet ja Jehú ojts jam nyijkxy Jezreel. Ko yë Jezabel tnija'awëy, ënät yajxon tkooy tpëjky ja wyiin jyëjp ets tyaj'o'oyëy yë wyääy; tääts jam kyu'ijxnaxy ma tyëjkwiinën.

³¹ E ko yë Jehú jam jyä'äjty ma ja kajpn yajnitëkën, tä ja Jezabel y'ënäny: ¿Wi'ix myajpaaty Zimri, mëti'ipë ja wyintsën kë'ëm të tyaj'ookyën?

³² Tä ja Jehú jam yujk'ijxy ma ja tëjkwiinën ets y'ënäny: ¿Pën yajpaataanp ma ëjtsën? Ënet nimäjtsk nitëkëëk ja yajkutujkpë ja myëkutuunk y'ijxpëtsëëmtë,

³³ mëti'ipë ja Jehú y'ënëmaayën: Jam tääpë to'oxytyëjk kutijnaxtë. Ënet tkutijnajxtë, ja nye'pny jampaat ojts kyëxtä'kxy ma ja potsyën ets ma ja kwaayën, mëti'ipë näjyëtu'un tyuktä'äntën ja Jezabel.

³⁴ Tä ja Jehú ojts nyijkxy kääpyë ukpë. Ok ja Jehú ojts tni'ënä'ämë: Nëjkx tääpë, to'oxytyëjk yë nyini'kx yajnaaxtëjkëtë, wi'ix njaaktimtyu'unmëty, yë'ë yajkutujkpë ijty nëëx'ajtëp.

³⁵ E ko ojts tjaninëjkxtë ets tyajnaaxtëkëja'antë, yi'iyë ojts tjaakpaatë yë kyëpajk, yë tyekpyajk ets kyë'ëkox.

³⁶ Ënet wyimpijtë jatëkok ets tuk'ëwaanëja'antë ja Jehú, tä ja Jehú ojts tnimëtyä'äky: Tëëyëp yë Wintsën ënety t'akajpxpë mëët yë tyuunpë mëti'ipë xyëëwajtypyën Elías, jampë kyukajpnëtyën Tisbé, ko yë Jezabel, yë'ë nëjkx yë jyot nyini'kx tsyu'tsxëty yë uk jam ma Jezreel nyaaxjot kyamjotmën,

³⁷ ets ko yë jyot nyini'kx jëtu'unyë nëjkx piny jety wyi'imy tä yë të'ënyën ma Jezreel nyaaxjotmën, koonëm jëtu'unyë piw nuuk jyajta'ajëty tä ka'ap pën t'ëk'ijxkajpnëtyën.