2 Reyes 7 - Biblia Dc en Mixe de Quetzaltepec

¹ Tä ja Elisejë y'ëtsooy: Mëtoow'it yajxon, wi'ix ja Wintsën y'ënä'änyën. Jëtu'un y'ënä'äny: Jëpom ko ya'atpë'atëty, jam ma Samaria kajpn yajnitëkën, jä'ä wëxtujk tsimpë ja tsajpmok tsyoowpaata'any tu'uk je'eyë nyipoop pujxn meeny; e yë majkmokx tsimpë yë cebadë jä'ä tsyoowpaata'any tu'uk je'eyë nyipoop pujxn meeny.

² Ja yajkutujkpë ja tyuunpë, je'eyë ojts y'ëtsoy: Oyxyëp jeexyë jëtu'un yë nëë tuu jam jyatim nyämyëtso'onëpë tsajpjotm, mëti'ipë ja Wintsën yajniku'ëwatsypyën, tääpë xynyikäjpxyën ka'ap ninu'un tyunëtëty jyatëtëty. E ja Elisejë ënät y'ëtsooy: Kë'ëm jëpom xy'ixëty, mja'ixëp mëët yë mwiin je'eyëp ko ka'ap nitii xyjyë'kxëty.

³ E japts tëja'p ma ja naax kajpn yajnitëkën jap nimajktaxk yajpaatë yë pa'amja'ayëty, pu'uts pa'am pëjkëtëtëp mëti'ipë ka'ap tii nyitsooyën, nyäy'ënanëtë: Ëëtsajtëm ¿tiitën yaa ntu'unëmë, je'eyë yowë nëkoo ja o'kën ntimy ëwxijtënë?

⁴ Ko njatëjkëmëty jap kajpnjoty o'kën je'eyë nitëjkëmëp jä'ä ko yuu jap jëtijtp; e ko yääyë npo'kxmëty, nän o'kmëp je'eyëm. Nikë ja'amtë jam ma sirië ja'ayëty tsiptuunpëtëjkëty yajpaatën; ko xynyimä'kxmëty tääts njuuky'ajtmëty; e pën kajts, ëtsajtëm je'eyëm n'ooka'anëmë.

⁵ Ënet ojts tuknipëjktaakëtë koots, tëë ënety tsyu'ujënyë ko ojts tsyoontë jam nyëjkxtë ma yajpaatën ja tsiptuunpëtëjkëty, sirië ja'ayëty, këwent'ajtëp jam; ko jam jyajtë nimaa pën kyaka'ty.

⁶ E tsyaats ojts tyunyë jyätyë, yë Wintsën ënety kë'ëm të tyajma'aty ja myëto'owën ja sirië ja'ayëty ets jëtu'un tmëtoowtë tä jeexyë maypyujxn wintëkäämpë myinyën mëti'ipë ja'ay tyuktsiptuuntëpën ets tä may kwaayën; ëpëky tmëtoowtë mayjyä'äy myiny tekyye'epy mëti'ipë tsiptunantëpën; yë sirië ja'ayëty jëtu'un ojts y'ëna'antë ko tëëtëm ja Israel yajkutujkpë tpëjktsoy yë Hit ja'ayëty ets yajkutujkpë mëti'ipë jap tuunpën Egiptë, yajtuknipëktë ets tnipëtë'ëktëty ja sirië ja'ay ma y'ixjëtit pyajëtitëtën.

⁷ Paaty ojts ënätyë kyäkta'atë je'eyë kyootsëy, jëtu'unyë tnipëyë'ktutaaytyë ja wyitëjkëty ma ënety të y'ijta'aktën; ja jyëyujkëty, kyëwaayëty, kyëruktsëty jëtu'unyë tniye'eytyutaaytyë ets yi'iyë ja jyuukyajtën tjaakmëkäktë.

⁸ Ko jam ja pa'amja'ay, mëti'ipë pu'utspëjkëtëpën jyajtë ma jam ja sirië ja'ay ja y'ijtaknëtyën, ënät jap kyu'ijxëtyë ma ja ijtaknën ets tyëjkëtyë kääpyë ukpë; tä tpëjkmujktaaytyë ja pu'ts pujxn, poop pujxn ets wit tujkxy ets tëkokyë winë mëti'ipë ënety ja sirië ja'ayëty të tnikäkta'atën ets tyu'tstaaytyë. Ko y'ëkpëtsëëmtë ma tu'uk ja ijtaknën tääts ojts nyëjkxkojnëtëpë ma wiinkpën ijtaknën, jap winë tpatë ets ojts tyu'tsta'atë.

⁹ E tyaa nyäy'ënanëtë: Ka'ap yowë myëtëyëty tä yam winë ntu'unëmën. Tyam yë'ë ja paatë'ajtëp jeexyë ja oypyë ja nija'awën nyajtu'u ye'eyëmë; e ëëtsajtëm ni'ikyë yowë n'amo'onëmë. Ko n'ëna'anmëty jopynyëm nikajpxmëty, tsojk mpoky'ajtmëty. Nikë tsojk ntimyjya'amëm ma jam yë kutujkëntëjkën ets ja nija'awën nyajkmëty.

¹⁰ Ënet tsyo'ontë ets ojts nyëjkxtë jam kajpnjotm, ko jam jyajtë tä ojts tmëkajpxtë ja tuunpëtëjk mëti'ipë ja kajpn kyëwent'ajtëpën ets t'ënëmaaytyë: Tëës jam n'otstë ma ja Siria ja'ayëty nyäkëwent'atëtën, ni pën jam të nkapaatës; nimaa pën kyakäjpxy kyamëtyä'äky. Yi'iyë të n'ixtës ja wyitëjkëty ma të y'itën ets ja këwaayëty kruktsëty jëtu'un tä tmëmiintën.

¹¹ Ënet ja këwent'ajtpë mëti'ipë ja tëjkëtyakn y'ijx'ijtëpën, tuk'ëwa'anëtyë ja kutuunktëjkëty japë këmoontëkoty yajpaatën.

¹² Tääts ja yajkutujkpë myä'äypyëti'ky, tëë ënety yajxon kyootsënyë ets tyëjkëy mëtyakpë, t'ënëmaay ja tsyiptuunpëtëjk: Tyam ntukmëmëtya'aktëty wi'ix yë sirië ja'ay yë winma'any të tpaatën ets xynyitëkëja'anëmë: Yë'ë wa'ats tnijawëtë ko ëëtsajtëm ka'ap tyam nmëët'ajtëm tii një'kxmëp mpëjkmëp, paaty jam të tsyoontë ets ëxëëk xytyuna'anëmë; je'eyë ko ka'ap nëkooyë muum jëkäm të nyëjkxtë, jämyë të nyäyu'utsëtë kamjotm ujtsjotm ets myäytyë tyajtë ko ënät ëëtsajtëm nëjkxmëty ets jam ntëjkëmëty ma yajpaatën tääts xymyajtsmëty ajuukyë, oyts ënät tyëkëja'antëty kajpntum.

¹³ E tu'uk jam yujk'ënany ja tsiptuunpë: Wä'än nimajktaxk, nimëkoxk je'eyë ja'ay tyajkexy kwaaykyijxy ets nyëjkxtëty, tam yowë nimëkoxk yë kwaay kutsumy tyänë ets nëjkx t'ixtë jam. Pën yë'ëjëty o'ktëp tëkooytyëp, ka'ap jëtu'un timpyaatëty tä jeexyë nimay ja'ay y'ooktën.

¹⁴ Ënet ojts yë'ë tuknëjkxtë mäjtsk yë pujxnwintëkäämpë ets nëjkx t'ixtë tuntë ja it ma ënety ja sirië ja'ayëty nyäkyëwent'atëtën.

¹⁵ Wa'ats ojts tyajnëëye'ey tyajtekye'eytyë ja sirië ja'ayëty jampaat tpaja'ajtë ma ja Jordán mëjnëë jyënäkyën ets t'ijxtë ko kujy jëpipy ja wit jyänty y'ity mëti'ipë ja sirië ja'ayëty të tnikä'äktën. Tä ja ja'ayëty ojts jatëkok wyimpijnëtë mëti'ipë ënety ojts të kyexye'eytyën ets tnimëtyaktë wi'ix winë të t'ixtën.

¹⁶ Ënätyë ja ja'ayëty tsyo'ontaaytyë ets nyëjkxtaaytyë jam ma ja sirië ja'ayëty të y'ijta'aktën. Ets y'atëëy tä ënety ja Wintsën të tnikäjpxyën, ja tsajpmokway jä'ä ojts tsyowpaaty, ja wëxtujk tsimpë tu'kpajk je'eyë ja nyipoop pujxn meeny; e ja mëti'ipë tyijtëpën cebadë, jä'ä ojts nyätyookyë majkmokx tsim ets nän tu'kpajk je'eyë ja nyipoop pujxn meeny.

¹⁷ Ja yajkutujkpë yë'ë ojts tuknipëky ja tyuunpë mëti'ipë xëmë këwent'ajtëpën ets ja tëjk'aaw tkëwent'atëty, jä'ä ko ja mayjyä'äy nëkooyë ojts myujknëtë jä'ä xëëw, jëtu'unyë tkutä'äntë ja mëti'ipë jam këwent'ajtpën ma tëjk'aawën, tääts y'atëëy mëti'ipë ënety ja Wintsën ja myëtuunpë të tnikäjpxyën ko jam y'ojtsy ma ja yajkutujkpën.

¹⁸ Jëtu'un tyuunë jyajtë tä ënety ja Wintsën ja kyäjpxynyajxpë të t'ënëëmën ja yajkutujkpë, wi'ix jä'ä xëëw tyuna'any jyata'anyë jam Samaria ets ma ja tëjkëtyaknën, ko ënety yajjuyä'äny ja tsajpmokway, ja wëxtujk tsimpë tu'kpajk je'eyë ja nyipoop pujxn meeny ets ja cebadë majkmokx tsimpë nän tu'kpajk je'eyë ja nyipoop pujxn meeny.

¹⁹ Ja yajkutujkpë ja tyuunpë tyaa ënety të y'ëtsoowpë, ko oyëk jeexyë ja tsajp jyatim ëwatspë, mëti'ipë ja Wintsën ja myëtuunpë nyikäjpxypën ka'ap ja tyunëtëty jyatëtëty nijëna'a. E ja Elisejë tëë ënety y'ëtsoyë ko jya'ixëp mëët ja wyiin je'eyëp ko ka'ap nëjkx nitii tyuka'ayë.

²⁰ Jëtu'un ojts jyänty jyäty, ojts ja ja'ay kyuteenyë, jam tëjk'ëkë'ëm ma ja kajpn yajnitëkën.