2 Reyes 6 - Biblia Dc en Mixe de Quetzaltepec

Ma ja Wintsën tyaj'ixyën ja myëj'ajtën mëët ja ja'axykya'tsn

¹ Tu'kxëëw tu'kjëmëjt ojts yë ja'ayëty mëti'ipë myëtuuntëpën yë Wintsën t'ënëëmëtë yë Elisejë: Ëk'ix, yë tëjk ma ëëts n'itën mëët mijts mutsk oy etsës jap ntëjkëtya'atëty.

² Tii koos xykya'ëxmatstë wä'än n'ëknëjkxtës jam ma Jordán mëjnëë jyënäkyën ets këëktu'uk yë kepy mpuxtëtyës wä'änës yë ntëjk n'ëkyaj'oyëtë ma ëëts ntsëënëtëtyën. Oy mnëjkxtëty, jëtu'un y'ëtsooy ja Elisejë.

³ Tun mëyajtën pajaamtëkës, jëtu'un nitu'uk y'ënäny. Oy mpanëjkxtëty, jëtu'un yë'ë y'ëtsooy.

⁴ Ënet ja Elisejë ojts jyänty pyanëjkxëtë ets jam tyëjkëtyë kepypyujxpë winkon ma ja Jordán mëjnëëjën.

⁵ E jëtu'unts ënety jam tu'uk kyepy pyuxy, ko ojts ja jyätyë kyuka'atu'uty ets jap kyuka'ajëy nëëjoty, tääts mëk yujk'ënany: Aay wintsën, tääpë jatyë ënu'kxyës nyajtuny.

⁶ ¿Maa ja ënät të kyä'äy? jëtu'un ja Wintsën ja myëtuunpë yajtëëwë. Tääts ojts tu'uk tni''ixë. Ënet ja Elisejë tu'uk yë kepy tpujxy ets tnëëkujëpijpy, tääts kyiinpëtsëëmy ja jatyë.

⁷ Jam juut yë mjatyë, jëtu'un ja Elisejë y'ënäny. Tääts ja tu'uk ojts ja jyätyë tjuuty.

Ma ja Elisejë mëët ja Siria ja'ayëty yajpaatyën

⁸ Yë yajkutujkpë mëti'ipë sirië ja'ayën, tsip ënety yaj'ijtyp mëët yë Israel ja'ayëty, e jëtu'unts ojts tëkok tyajmuky yë tsyiptuunpëtëjk ets t'ënëmaay maa it nyäpyëjkta'akëtëty.

⁹ Ënet ja Elisejë tnikäjpxykyäjxëy ja yajkutujkpë mëti'ipë jam ënä'ämpën ma ja Israel kajpnën, ma t'ënëmaayën ko këtii jam nyaxëty ma tääpë itjotmën, jä'ä ko ja sirië ja'ayëty jamtsow ënety yajpaata'antë.

¹⁰ Jëtu'un'äämpy ja Israel yajkutujkpë, wiinktsow ijty xëmë tkexy ja tsyiptuunpëtëjk, jam ma ënety ja Elisejë tyuk'ënë'ëmxëtyën, kanaak'ok ojts jëtu'un ja yajkutujkpë tsyo'oky.

¹¹ Ja yajkutujkpë jampë y'ëne'emyën Sirië, ka'ap ënety ninu'un tja'akyukë wi'ixën ko jëtu'un jyäty kyëpety, paaty ojts tmëkajpxmujkta'ay ja tsyiptuunpëtëjk ets t'ënëmaay: Tyam yë'ëjës xytyuk'ëwaanëtëp pën y'apupejtyp yë yajkutujkpë jampë yajpaatyën Israel.

¹² Tu'uk ojts jam yujk'ëtsoy: Ka'ap pën, Wintsën. Je'eyëp ko jam ma Israel kajpnën, jam tu'uk yë ja'ay tsyëënë mëti'ipë xyëëwajtypyën Elisejë, yë'ë myëtuumpy yë Wintsën, yë'ëts tëkokyë winë tyuk'ëwa'anëtyääpy yë yajkutujkpë jampë yajkutukyën, oy yë'ëpaatëty tnija'awëtyä'äy mëti'ipë mijts nkäjpxypën mëtyäkpyën ma ma'ay mpo'kxyën.

¹³ Ënet ojts ja Siria yajkutujkpë, t'ënëëmë ja tyuunpëtëjk: Nëjkx yajxon ixtë tuntë maa yajpaaty ets nkäxëtyës yë nja'ay tääts yajmatsëty. Ko yajtuk'ëwa'anëy ko jam ënety yajpaaty Dotán,

¹⁴ ënät tkejxy ja maytsyiptuunpë jam Dotán, nimay ojts nyëjkxtë pyujxnwintëkäämpëjoty, nimay kwaaykyijxy ets nimay tekyye'epy, tääts tyajnatujktë ja naax kajpn.

¹⁵ Komjëpom, ko myä'äypyëti'ky ja Elisejë ja tyuunpë ets pyëtsiimy jap tëja'p, ënät t'ijxy ko tëë ja kajpn nyatuky, mëët ja maytsyiptuunpë, may mëti'ipë pujxn wintëkäämpë këjxyën, may mëti'ipë këwaaykyijxyën ets may teky'am. Ënet ojts ninëjkxy ja Elisejë ets t'ënëmaay: ¿Tii ënät ntuuntakmëp tyam, wintsën?

¹⁶ Tä ja Elisejë y'ënëmaayë: Këtii mtsë'ëkë, jä'ä ko jaaknimay yë'ë mëti'ipë mëët ëëtsajtëmën këtiinëm yë'ëjëty.

¹⁷ Tä ja Elisejë tyëjkëy nu'kxtakpë, y'ënäny: tyam nmëpëjktsoy Wintsën ets xyaj'ëwatsëty yë wyiin wä'än kë'ëm t'ixy. Ënet ja Wintsën ojts tjanty yaj'ëwatsë ja wyiin mëti'ipë ja Elisejë tyuunpë'ajtypyën ets t'ijxy ko yajxontëm jam janty may yë tsiptuunpë kopkkëjxm, tam mëti'ipë pujxn wintëkäämpë këjxyën, tam mëti'ipë këwaaykyijxyën ets tam mëti'ipë teky'amën ets aak jëënmëët, jä'ä kyëwent'ajtëp ja Elisejë.

¹⁸ Tam ënety ja sirië ja'ayëty tim nyipëtë'ëkanëtë ja Elisejë, ko ja Elisejë tyëjkëy kajpxtakpë ma Wyintsënën: Wintsën tyam n'amëtoy ets wyiintsëtya'atëty ya'atë tsiptuunpëtëjkëty. Ets ja Wintsën tjanty yajwiintsëtyääy, jëtu'un tä ënety ja Elisejë të t'amëtoyën.

¹⁹ Tä ja Elisejë y'ënëmaayëtë: Ka'ap yë'ëjëty ya'atë tu'u mëti'ipë miits m'ixtaaytyëpën. Pamiintëkës ets ntukni''ixëtëty ma ja ja'ay mëti'ipë m'ixtaaytyëpën. Ets ojts jam tyajnëjkxy Samaria.

²⁰ Ko jam jyä'äjty yë Elisejë, tä tyëjkëy kajpxtakpë, t'ënëmaay ja Wintsën: Wintsën, tyam ënät n'amëtoy ets xyaj'ëwatsëty yë wyiinëty. Ko ojts y'ijxwa'kxtë tä nyäjya'awëpyatëtë ko kajpn itkujkytyëm yajpaatë, jap Samaria.

²¹ Ko ja yajkutujkpë t'ijx, mëti'ipë jam ënä'ämpën Israel, tä t'ënëmaay ja Elisejë: ¿Wi'ix tatë, oyës nyaj'ooktëtyë?

²² E ja Elisejë tyaa y'ëtsooy: Ka'ap, këtii nitu'uk xyaj'ookëty. Mijts ka'ap yë ja'ay xyaj'ooky mëti'ipë të xymyätsyën muum mëët ja mpujxn mku'um ets ja mti'pxn. Nikë ni'ikyë yajxon yajkay yaj'uuk ets jatëkok xyajwinpitëty ma ja wyintsënën.

²³ Ënet ojts tu'uk ja xyëëw yajnipëjktaakëtë ets kyääytyë y'uktë. Ja yajkutujkpë ojts y'ënë'ëmxëtë ets nyëjkxtëty, tääts nëjkx ja wyintsën jatëkok tpaatë, jëtu'un'äämpy ojts nyëjkxnëtë. Jä'ä xëëw ja sirië ja'ayëty, ka'ap ojts nëkoo t'ëkmëma'ayënëtë ja Israel ja'ayëty.

Ma ja Elisejë mëët ja mëjja'aytyëjkëty yajpaatyën

²⁴ Ko jëtu'un y'ëkkëjxy y'ëknajxy, ja Ben-adad, jampë yajkutukyën Sirië, ënät tyajmujktaay nitëkokyë ja tsyiptuunpëtëjk ets tyajnatujktë ja Samaria kajpn.

²⁵ Jä'ä jëmëjt ojts jam y'ity tu'uk mëk yuu Samaria, jä'ä ko ja ja'ayëty ojts ja naax kajpn tyajnatujkta'atë, ojts jap tu'uk ja krukts tsyoowpatnë tëkë'px aakyë'ë poop pujxn meeny ets ojts näjyëtu'un jap tjuuynyëtë yë pak të'ëny mëti'ipë ojts tsyoowpatnën mëkoxk aak poop pujxn meeny.

²⁶ Tëkok yë yajkutujkpë jam ënety nyäxy tyëkë ma potsykyopkën, ko tu'uk yë to'oxytyëjk jap ëpa'tkë'p tyëjkëy yaxpë jojkpë: Yajkutujkpë, tun mëyajtën putëjkëkës.

²⁷ Tä ja yajkutujkpë y'ëtsooy: ¿Pën yë Wintsën ka'ap mputëkëty, wi'ixën xytsyoky ëjts mijts mputëkëty? ¿Jä'ämë yam mijts ni'ik nmo'ojëty yë tsajpmokë, ëkë kääky uukyë?

²⁸ ¿Ëkë tiitën mjajtëp mkëpäjtëp? Tä ja to'oxytyëjk y'ëtsooy: Ya'atës to'oxytyëjk të xy'ënëëmë etsës yë nmaank nkë'ëyakëty ets ntsu'utstëtyës, e komjëpom yë'ëjëk ëëts ja myaank ntsu'tsëtëp.

²⁹ Ënet ja nmaankës të nyajkë'ëwtës ets të ntsu'utstës. E komjëpom, ojtsës ya'atë to'oxytyëjk nja'ënëmaaynyë etsës jeexyë ja myaank ntsu'tsëtë, e yë'ë je'eyë wi'ix kawi'ix y'ëtsoownë.

³⁰ Ko ja yajkutujkpë tmëtoowpaty y'ënä'äny jëtu'un ja to'oxytyëjk, mëk ojts tjawë, kyë'tstaay ënätyë ja wyit mëti'ipë ënety jam nyijän'ajtypyën mëët ja mëkjotmay ets ja äkë. E jä'ä ko jam ënety potsykyëjxm, may ja ja'ay t'ijxtë ko ja wyit këëts tmëët'aty.

³¹ Ënet ja yajkutujkpë mëk yujk'ënany: Yë Wintsën yë'ëjës mëk xytyiytyunëp pën ëjts ka'apës tyam yë Elisejë yë kyëpajk nyajjënajkë, yë myaank yë Safat.

³² Yë Elisejë tam ënety pyo'kxy pyiky ma jyëën tyëjkën mëët ja mëjja'aytyëjkëty. E ja yajkutujkpë tëë ënety tkexy tu'uk ja tyuunpë. E ka'anëm ënety ja yajktutujkpë ja kyukäjpxy jam jyä'ty, ko ja Elisejë t'ënëmaay ja mëjja'aytyëjk: Yajxon ixtë, ix tääpë yaja'ay o'kpë tu'uk të tkexy yë tyuunpë etsës yë nkëpajk xyajjënakanë. E tyam ja'akyukëtë yajxon, ko ënät ja tyuunpë jya'tëty, tääts yë tëjk'aaw xyaj'ëtuktëty wä'än jap tëja'p twë'ëmy, wa'ats yajmëtoy ko tää ja wyintsën pyaminyë.

³³ Tam ënety jëtu'un myëtyä'äkynyëm mëët ja mëjja'aytyëjk, ko ja kukäjpxy jyä'äjty ma ja Elisejë ets y'ënäny: Tyamën ja mëk ëyo'on tyunyë jyätyë, ¿ëjts tiijës njaaktimy'ëwxitëp ma yë'ëjën?