2 Reyes 5 - Biblia Dc en Mixe de Quetzaltepec

Ma ja Naamán nyiwa'atsyën ja pyu'uts pa'am

¹ Jam ijty tëëyëp tu'uk yë ja'ay txëëwaty Naamán, yë'ë nyiwintsën'ajtyp ja tsiptuunpëtëjkëty mëti'ipë myëtuuntëpën ja yajkutujkpë jampë y'ëne'emyën Sirië, mëk ijty ja yajkutujkpë tsyokyë jä'ä ko mëët yë'ëkyëjxm ënety may ja tsip të tuknaxtë ets të myëta'aktë ma ja Wintsën të yajmëta'akëtën Wintsën xyëëwkyëjxm. Je'eyëp ko ya'atë ja'ay pëjkëp ijty, yë'ë pya'am'ajtyp yë pu'uts pa'am mëti'ipë tyijtëpën amëxan lepra.

² Tëkok ojts yë sirië ja'ayëty, tu'uk tmatstë to'oxy'ëna'k, ma ënety mëët tsyiptuntën yë Israel ja'ayëty, e ja to'oxy'ëna'k jam ojts wyi'imy ma Naamán ja tyëjkën tääts tputëkëty ja Naamán ja tyo'oxytyëjk.

³ Ënet ya'atë to'oxy'ëna'k tëkok t'ënëmaay yë tyaak: Kooxyëp jeexyë yë nwintsënës t'ëkninëjkxy yë Wintsën yë tyuunpë jampë Samaria y'ityën, tsokp akëtakp jeexyë.

⁴ Tä ja Naamán ojts tninëjkxy ja yajkutujkpë jampë Sirië yajpaatyën ets tukmëmëtyäky wi'ix ënety ja to'oxy'ëna'k të y'ënä'änyën.

⁵ Ënet ja yajkutujkpë y'ëtsoowë: Oy'atëp, oy mnëjkxëp, tyamës tu'uk yë noky ntuknikäxëty yë yajkutujkpë jampë y'ëne'emyën Israel. Ënet ja Naamán tsyo'ony. I'px majk mil ojts tmënëjkxy yë poop pujxn meeny, tëtujk mil yë pu'ts pujxn ets majk ni'kx yë wit,

⁶ ets ojts näjyëtu'un tkony ja noky, mëti'ipë ja yajkutujkpë yajtuknikäjxpën jampë yajkutukyën Israel, tyaa ja noky jap y'ënä'äny: Ko ya'atë noky mkë'ëtëkëtëty tääts xynyijawëty ko tyamës nkexy yë Naamán, mëti'ipës ntsiptuunpë wintsën'ajtypyën ets xyajtsokëty yë pyu'uts pa'am.

⁷ Ko ja yajkutujkpë jampë Israel tyaj'ëwatsy ja noky, ënät nyänyikë'tsë mëët ja joot'an ets ko ja amay jotmay tyuktëjkëyë: ¿Ti Tiosës jëtää ëjtsë, etsës tu'uk yë ja'ay nyajtuknikäxëtyë mëti'ipë pu'uts pa'am pëjkëpën etsës nyajtso'ok nyaj'akëtä'äkyëtyë? Ixtë yajxon, ko ya'atë ja'ay winma'any ixtääpy je'eyë paatyës nëkoo xymyëmayë.

⁸ Ko ja Wintsën ja myëtuunpë Elisejë, tnija'awëy, ko tëë ja yajkutujkpë nyänyikëëtsyë, mëët ko tmëkjawë ja noky mëti'ipë të yajtuknikexyën, ënät tkäjpxynyikejxy ets t'ënëmaay: ¿Tii ko nëkoo mnänyikëëtsyë? Wä'än tääpë ja'ay tminy, ëjtsës xynyiminëp ets tnijawëty ko ma Israel yë nyaax kyajpnën tää yajpaaty yë ja'ay mëti'ipë myëtuumpyën yë Wintsën.

⁹ Ënet ja Naamán ojts tsyoony mëët ja pyujxnwintëkäämpë ets ja këwaay ets ojts jam wya'kpo'kxy ma ja Elisejë ja tyëjkën.

¹⁰ E ja Elisejë ojts tu'uk tkexy ja kyukäjpxy ets ja ayuk tyajnaxëty, ma y'ënä'änyën: Nëjkx jam mtsi'iy wëxtujk'ok ma mëjnëëjën mëti'ipë yajtijpën Jordán, jëtu'unts ja mnini'kx wa'ats wyë'ëmëty ets ja pu'uts pa'am jyëwa'akëty ma mjot mnini'kxën.

¹¹ Naamán ko jëtu'un tmëtooy, tä tyimwinpijty, yajxon jyoot'anpëjky, tä y'ënäny: Ëjts tyaajës të n'ënaanpë ko ntijën xynyiminëtyës kë'ëm tääts ja Wintsën tmëkajpxëty ets tonëty ja npu'utsës täätsës jeexyë jëtu'un ntso'oky.

¹² ¿Ti nëëjën jëtää jam kaka'atpë Damaskë, ëkë Farfar ets yë'ë ënät xy'ëktimtyuknikäjxpëtyës yë mëjnëë yaapë Israel yajpaatyënë? ¿Koos jeexyë jam të nëjkxy tsiipë tii këtiis jëtää jeexyë näjyëtu'un të ntso'okyë? A'äkë ojts jam tsyo'onë.

¹³ Ko jëtu'un ja tyuunpë y'ijxëtë, ënät nyimiinëtë ets y'ënëmaayëtë: Wintsën, kooxyëp jeexyë tääpë ja'ay mëti'ipë Wintsën myëtuumpyën të mtuk'ëne'emyë mëti'ipë jaakwäänë tsip xytyunëtyën, ¿këtii jëtäätën jeexyë xytyunyë? E tääpë mtuk'ëne'emyën ka'ap yowë ijty ninu'un jyatsipëty, tim je'eyë jeexyë mtsi'iy ets mtso'okëty.

¹⁴ Ënet ja Naamán ojts jyänty nyijkxy tsiipë ets wëxtujk'ok tsyiiy jam ma ja Jordán mëjnëëjën, jëtu'un tä ënety të y'ënë'ëmxëtyën ja Wintsën ja myëtuunpë, ënätyë ojts jyänty tsyo'oky, jëtu'un ja nyini'kx y'awinpijty janty u'unk tä tu'uk pi'k ëna'k yë nyini'kxën.

¹⁵ Ënet ja Naamán ets ja jyä'äy ojts ninëjkxtë ja Elisejë. Ko jam jyä'äjty ma ja Elisejë yajpaatyën, ënät ja Naamán t'ënëmaay: Ëjts tëëjës ënät yajxon nijawë ko ka'ap maa wiinkpë Wintsën jaakmëjpë jëtu'unpë tä mëti'ipë yajpatpën ma Israel nyaax kyajpnën. E tyam mijts npëjktsoy ets xytyunëty yë mëyajtën xykyupëkëty ya'atë näynyamo'ojë mëti'ipë të ntukniminyën.

¹⁶ Ets ja Elisejë y'ëtsooy: Tyamës yajxon nikäjpxy mëët yë Wintsën yë xyëëw mëti'ipës xy'ijxpën, ko nitiijës nka'ëxajëja'any. E ja Naamán mëktä'äky jya'ënëmaayë ets tkupëkëty, Elisejë ka'ap ojts t'ëxajë.

¹⁷ Ënet ja Naamán y'ënäny: Pën ka'ap xykyupëky, ëjts yë'ëjës yam n'amëtowäämpy ets xy'a'ixëty wä'änës yë naax mäjtsk jëyujk n'ëkpatsëmy mëti'ipë yaajën ma Israel nyaaxjotmën; jä'ä ko tëëjës ntuknipëjktaakë ko ka'apës n'ëk'ëwtatanë oynatii awinax ka'apë wyintsënëtyën ets ka'apës oynatii wintsë'kën n'ëkmo'ojanë, yi'iyë tëy mëti'ipë Wintsën'ajtpën.

¹⁸ Tu'kjëjpës je'eyë Wintsën tyam n'amëtoy etsës xypyokymyä'kxëty: Yë'ë ko ënety yë nwintsënës jam nyijkxy ma Rimón yë tsyajptëjkën ets nëjkx jam yë Rimón t'ëwtata'any, jä'ä ko yë'ë jam nyäkyutijyë maas nkejkyën ets kopkpëky koos ëjts näjyëtu'un näkyuxtënaaytya'akëtëty jap ma tääpë tsajptëjkën, yë'ëjës mpëjktsoopy etsës yë Wintsën xypyokymyä'kxëty.

¹⁹ Tä ja Elisejë y'ëtsoowë: Nëjkx akujk jotkujk. Jëtu'un ojts ja Naamán jam tsyo'onë. E tam ënety këjäätëkë nyëjkxnë,

²⁰ ko yë Guehazí, mëti'ipë ja Elisejë tyuunpë'ajtypyën, ojts myäy tyäjy: Yë nwintsënës jëtu'unyë yë Naamán, yë sirië ja'ay, të timyajwinpijnë, ka'ap wäänë nitii të t'ëxajë, mëti'ipë të jyatukniminyën. Tyamës yajxon ntimy'ënä'äny mëët yë Wintsën yë xyëëw koos mpapo'ojäämpyës yë yam, jamës n'ixëty tiijës n'ëkpatyp ma yë'ëjën.

²¹ Jëtu'un'äämpy yë Guehazí tpatso'ony ja Naamán; ko yë Naamán y'ijxwinpijty ko tam yë Guehazí pyaminyë, ënät tukjënäjky yë pyujxnwintëkäämpë ets yajtëëwë: ¿Ti wä'än jam amay jotmay të kyëxë'ëkyë?

²² Ka'ap, ka'ap jyotmayëty, jëtu'un y'ëtsooy ja Guehazí. Ëjts paatyës nminy, yë nwintsënës të xykyexy, jam nimäjtsk të jya'të yë Wintsën yë tyuunpëtëjk jam tsyoontë ma kopkjotmën mëti'ipë yë Efraín nyitënääpyën, e yë'ëts yam mijts mpëjktsowäämpy ets xyakëty tëkëëk mil yë poop pujxn meeny ets majts ni'kx yë wit.

²³ Tä ja Naamán y'ëtsooy: Tun yë mëyajtën, ëxajë tëtujk mil aak poop pujxn meeny. Mëktä'äky ja Naamán jëtu'un y'ënäny, tääts tu'ukyë mëët mäjtsk ni'kx ja wit t'apëjkmujky jap xa'kjoty, tääts tukë'ëtëjkëy ja tyuunpë nimäjtsk ets tukninëjkxtëty ja Guehazí.

²⁴ Ko jam jyajtë jam kopkëjxm ma ënety jam yajpaatyën ja Guehazí, tääts t'ëxajëy ja mëti'ipë ënety myëmiintëpën ja Naamán ja tyuunpë ets tpëjkë'ky jap tyëkoty ets nyäjyëkäjpxyë mëët ja ja'ayëty.

²⁵ Ënet tsyo'ony ets ojts tninëjkxy ja wyintsën, tä yajtëëwë ja Elisejë: ¿Maajën të m'otsy Guehazí? Ka'ap maa, jëtu'un y'ëtsooy ja Guehazí.

²⁶ Tä ja Elisejë nyëmaay'ëtëtsë: Ko tu'uk yë ja'ay të tukjënäky yë pyujxnwintëkäämpë ets të mjëjpye'eyi'ikyë, ëjts tamës ënety mëët mijts nyajpaaty winma'anyjoty. Je'eyëp ko tyam ka'ap tnixëëwëty ets ja wit meeny yë'ë y'ëktimyaj'ëxajëty ëkë ja wit tujkxy, ëkë ets ënät nju'uymyëty nkëpäjtmëty ja naax kam tsatymkyam, ëkë kupixyny ëkë jëyujk tsajpkaa, ëkë tuunpë ëyoopë ye'etyëjkpë to'oxytyëjkpë.

²⁷ Paaty, mëët ko jëtu'un ja winma'any të xypyääty, ja pu'uts pa'am mëti'ipë ja Naamán të tmëët'atyën jam ënät pyäjta'ajëty ma mnini'kxën ets ma m'u'unk m'ëna'kën winë xëëw. E paaty ko ja Guehazí, tim je'eyë jam tsyo'ony, tëë ënety ja pu'uts pa'am nyäpyataayënë, je'eyë yaj'ijxkojnë poop këëynyë jä'ä yowë pixyny.