2 Reyes 4 - Biblia Dc en Mixe de Quetzaltepec

Ma ja Wintsën ja myëj'ajtën tyaj'ixyën, ko ja on myäyë

¹ Jam ijty tu'uk yë to'oxytyëjk, yë'ë tyo'oxytyëjk tu'uk ja käjpxynyajxpë mëti'ipë ënety të y'o'knën; ënät ojts tninëjkx yë Elisejë ets tmë'ëëna'any, tä t'ënëmaay: Mijts wa'ats xynyijawë ko niye'etyëjkës tëë y'o'knë ets ko yë'ë myëtuumpy ijty yë Wintsën. E tyam, jamts ja ja'ay xëmë myiny ma ëëtsëtyën, nmënu'kxy'ajtëpës, je'eyëp ko yë'ë nimäjtskës ja nmaank xytyim pëjkëjanë ets nyätyukmëtuna'anyë.

² Tä ja Elisejë tyajtëëy: ¿E tiixën mtsojkpy ntunëtyës mëët mijts? Tuk'ëwa'anëkës tiijaty mëët'ajtyp ma mtëjkën. Tä ja to'oxytyëjk y'ëtsooy: Ëjts ka tiijës nkamëëtëty, yi'iyë tu'kpajk nmëët'ajtypës tu'ts u'unk maas jap yë on nyaj'ityën.

³ Ënet ja Elisejë y'ënëmaayë: Nëjkx yë mëtëjk jaak'amëtow yë tu'ts ets mtuk'ënu'kxëtëty, may xyajmukëty ets aak tukwa'atsëty.

⁴ Ënet mnäyajku'ëtukëtëty mtëkoty mëët yë m'u'unk m'ëna'k, yajxon xyaj'ëtukëty yë mtëjk'aaw ets tu'ukjaty ja tu'ts m'atääm'ujtsta'ajëp mëët ja on, ëpëky xypyëjktakta'ajëty ja ujtsëtypë.

⁵ Ja to'oxytyëjk ojts jam tsyo'onë ma ënety mëët të myëtyä'äkyën ja Elisejë ets ojts nyëjkxnë ma tyëjkën, tä nyäyajku'ëtujkë mëët ja y'u'unk y'ëna'k. Ënet tjanty yajtuktujktaay ja tu'ts jënu'un ja ja'ay tyukniminyën.

⁶ E ko ja tu'ts tyuktujktaay, tä t'ënëmaay jam tu'uk: Jaakyajmin yë tu'ts ja tu'uk. Tä ja myaank y'ëtsoowë: Ka'ap tii tu'tsnë. Jää ojts ja on xyä'kxtuky.

⁷ Ënet tsyo'ony ja to'oxytyëjk ets ojts ninëjkxy ja käjpxynyajxpë, tuk'ëwa'anëy mëti'ipë ënety të tyuny të jyätyën ets y'ënëmaayë: Tyam nëjkx ënät took tääpë on ets xymyëkëpätëty tääpë ja'ay mëti'ipë mënu'kxy'äjtypyën. E mëti'ipë natëjkëpën yë'ë miitsëty mni''itëp mëët ja m'u'unk m'ëna'k.

Ja Elisejë ets ja to'oxytyëjk mëti'ipë jam kukajpn'ajtpën Sunem

⁸ Tëkok ma ënety tyu'uye'eyën yë Elisejë, jam nyäjxy ma Sunem kajpnën, jam tu'uk yë to'oxytyëjk mëj'äämpyë wyoowë kääpyë, mëti'ipë ënety jam tsënääpyën. E ja Elisejë ko xëmë ijty jam nyäxy ets jam kyäy ma tääpë to'oxytyëjkën.

⁹ Ënet ja to'oxytyëjk t'ënëmaay ja nyiye'etyëjk: Më''ëtsow, mijts m'ijxyp ko tääpë ja'ay xëmë yaa xykyu'ijxëmë, wa'ats ja'ay yë'ë, Wintsën yë kyäjpxynyajxpë.

¹⁰ Ëjts tyaajës nja'ënaanpë ets jeexyë tu'uk yë tëkot njaakyaj'o'oyëm jap tëjkkëjxy, japts y'itëty. Mpëjktakëmëp jap tu'uk yë myatakn, jyääypyäjn, pyo'kxtakn ets kyutë'kxn. E ko xynyimi'inmëty jap pyo'kxëty.

¹¹ Tëkok, ma ënety jam jëtu'un të jya'ajtä'äkyën, ma tääpë ja tyëkot ënety të yaj'oytyunyën,

¹² ënet t'ënëmaay ja Guehazí, mëti'ipë tyuunpë'ajtypyën: Nëjkx mëkajpx tääpë to'oxytyëjk mëti'ipë Sunem ja'ayën wä'än t'ëkminy. Ënet myiiny ja to'oxytyëjk, tääts ja Elisejë ojts t'ënë'ëmxëty ja tyuunpë:

¹³ Ënëëmë tääpë to'oxytyëjk ko Tioskujuuyëp ko ja y'oyjyot y'oywyinma'any tyajnikëxë'ëky mëët ëëtsajtëm, ko xyajja'ajtakëmë, yajtëw pën mëpaat ëëtsajtëm tii ntukmëtu'unëmë; pën ënaanp ets nëjkx mëët nmëtyakëm yë yajkutujkpë ëkë tsiptuunpë wintsën. Tä y'ëtsooy ja to'oxytyëjk. Ëjts jotkujkës nyajpaaty maas yaa nkajpnën.

¹⁴ ¿E tii jeexyë mëpaat tääpë to'oxytyëjk n'ëktukmëtu'unëmë? Ka'apës nijawë, jëtu'un y'ëtsooy ja Guehazí. Ka'ap tii y'u'unkëty ets nyiye'etyëjk tëë myëjja'ayënë.

¹⁵ Nëjkx mëkajpx, jëtu'un y'ënäny yë Elisejë. Ënet ja Elisejë ja tyuunpë ojts tninëjkxy ja to'oxytyëjk ets myinëty, tääts ja to'oxytyëjk myiiny ets jam wya'ak'o'oyëy ma tëjk'apu'uyën.

¹⁶ Tä ja Elisejë y'ënëmaayë: Jajëmëjt, ya'atpë, tëë ënety yë m'u'unk maay xypyääty. Tä y'ëtsooy ja to'oxytyëjk: Ëk'ix Wintsën, këtii nëkoo jëtu'unpë ayuk xykyajpxpëtsëmy, jä'ä ko ka'ap tjëkyepy mijts xywyin'ëënëtyës, jä'ä ko mijts Wintsën myajtuunëp.

¹⁷ E timjëtu'un tä ënety ja Elisejë të y'ënë'ëmxëtyën, jëtu'un ojts jyänty tyuny jyänty jyätyë, ojts u'unk mëët wyi'imy, kom jëmëjt tä tyajmiiny naaxwiiny ja u'unk maay.

¹⁸ Ja pi'k ëna'k ojts ja yeeky pyety. E tëkokts ojts nyijkxy jam kamjotm, ma ënety ja tyeety mëët ja tyuunpëtëjk jam yajpaatën, pëjktä'äky yajpëtë'ktëp,

¹⁹ ënät mëk y'ënaantäky: Nëkoos yë nkëpajk y'ëkpëjknë. Wiinkëmës yë nkëpajk pyëjknë. Ënet ja tyeety ënätyë t'ënëmaay tu'uk ja tyuunpë: Tun mëyajtën nëjkx ya'atë tyaak mo'o.

²⁰ Ënet ja tyuunpë tsä'änë'ky ja mëxy u'unk ets ojts tmënëjkxy ma ja tyaakën, ja tyaak tu'k'akujky xyëëw jam myë''ënyääyë, tä y'o'ky.

²¹ E ja to'oxytyëjk japts ojts tmëpa'tëkë ja myaank ma ja käjpxynyajxpë jap ja jya'ajtaknën, jap tyajku'ëtujky ets pyëtsiimy, yajxon je'eyë ja tëjk tyaj'ëtujky.

²² Tä tyaxtsooy ja nyiye'etyëjk ets t'ënëmaay: Jam tu'uk yë tuunpë xytyukmëkäxëty yë krukts, wä'änës nëjkx ja käjpxynyajxpë n'ëk'ixy. Tääjës jatëkok nmiinkojnëpë.

²³ ¿Ti ko nëjkx xy'ixa'any tyam? Jëtu'un yajtëëwë ja nyiye'etyëjk. Kajts po'o tyam pyi'k'aty ets ka'ap pyo'kxënxëëwëty. Këtii nëkoo may mtajy, jëtu'un y'ëtsooy ja to'oxytyëjk.

²⁴ Ets ja tyuunpë ojts tuk'ëne'emy ets niwëënëty ja jëyujk, tä t'ënëmaay: Ja'amtë, jamë'ëk, ëjtsnëm kë'ëm nikajpxëp, pën maas muum nwa'ak'oyëjyä'äny, këtii nëkoo muum nanëkoo xyajwa'ak'oyëtyës.

²⁵ Jëtu'un ojts nyijkxy ets jam jyä'äjty ma tu'uk ja Carmel kopkën, jam ja Wintsën ja myëtuunpë ënety yajpaaty. Ko yë Elisejë jëtu'un y'ijxë jam jëkäm myiny, ënät t'ënëmaay ja tyuunpë Guehazí: Ëk'ix, ximpë ja'ay myinyën jä'ä yowë ja Sunemëtë ja'ay.

²⁶ Nëjkx pëyi'ikyë jëjpye'eytsyow ets xyajtëwëty, wi'ix yajpaaty ja nyiye'etyëjk ets ja y'u'unk. Tääts ja tyuunpë ojts tjëjpye'eytsyoy ja to'oxytyëjk ets y'ëtsoowë, ko oy yajpaatë.

²⁷ Tääts jam jyä'äjty ma ja kopkën ma ënety jam yajpaatyën ja Elisejë, tääts nyäjyijtakë ets mëk tmajtsta'tsy ja Elisejë ja tyeky. Ënätyë yë Guehazí myiiny ets tjajëwowany ja to'oxytyëjk, je'eyëp ko yë Elisejë ënätyë ojts y'ënë'ëmxëty: Këtii xyjyëwoy, ëxmats, mon tuk yowë mëk yajpaaty, tyam ka'apës yë Wintsën xytyuk'ëwaanënëm oy, tiijën myëët'ajtyp.

²⁸ Ënet ja to'oxytyëjk y'ëtsooy: ¿Wintsën, tii tëë mijts n'amëtoy yë u'unk maayë? ¿Ti këtii ojts n'ënëëmë ets këtiis nëkoo xywyin'ëënëtyë?

²⁹ Tä ja Elisejë t'ënëmaay ja Guehazí: Nänyipëjktaakët, pakap yë ntajkës ets mnëjkxëty jam xim. Ko pën xypyaatëty këtii xykyajpxpo'kxëty; ëkë ko pën mkajpxpo'kxëp këtii xy'ëtsowëty. Tääts jam yë ntajkës xykyëxkapëty ma ja pi'k ëna'k ja wyiin jyëjpën.

³⁰ E ja pi'k ëna'k ja tyaak mëktä'äky t'ënëmaay ja Elisejë: Tyamës yajxon ntimnyikäjpxy, ko ka'apës yaa ntsoona'any koonëm mijts kë'ëm mjamëty. Tä ja Elisejë tpatso'ony ja to'oxytyëjk.

³¹ Ja Guehazí, tëë ënety jëyëjp nyijkxy ets tëë ënety ja Elisejë ja tyajk tjapëjktä'äky ma ja pi'k ëna'k ja wyiin jyëjpën, e ka'ap jyuukpyiky; paaty ja Elisejë ja tyuunpë poj'am ojts tninëjkx ja wyintsën Elisejë ma ënety jam myinyën ets t'ënëmaay: Ja pi'k ëna'k ka'ap jyuukpyëka'any.

³² Ko ja Elisejë jap tyëjkëy tëkoty, ja pi'k ëna'k tëë ënety nya'o'knë, jam ma ja myaapäjnën.

³³ Tä tyëjkëy jap tëkoty, je'eyë ja tëjk yajxon tyaj'ëtujky ets tyëjkëy jëëytyak nu'kxtakpë ma ja Wyintsënën, je'eyë ojts nimäjtsk jap wyë'ëmtë tëkoty, yë'ë ets ja pi'k ëna'k.

³⁴ Ënet jam pyejty ma ja pi'k ëna'k jam kyo'knën ets ja y'aaw, ja wyiin, ja kyë'ë ets ja jyëjp jam tkëxpëjky ma ja pi'k ëna'k ja jyä'äjën, ëpëky yajxon tmu'uxy mëët ja nyini'kx. Ënet ja pi'k ëna'k ja nyini'kx y'aanpëjky.

³⁵ Tä ja Elisejë pyëti'ky, nyäxy tyëkë jap tëkoty; tä jatëkok pyejty jam maapäjnkëjxm, näjyëtu'un, tmu'uxy jatëkok mëët ja nyini'kx. Ajotkumonë ojts ja pi'k ëna'k jyä'äntyixy ets ojts y'ijxwä'kxy.

³⁶ Tä ja Elisejë ojts tmëkäjpxy ja Guehazí ets t'ënëmaay: Nëjkx mëkajpx ja to'oxytyëjk mëti'ipë Sunem ja'ayën. Tä ja Guehazí, ojts tmëkäjpxy ja to'oxytyëjk ets myinëty, ko myiiny ja to'oxytyëjk tä ja Elisejë t'ënëmaay: Tyaa ja m'u'unk.

³⁷ Ënet ja to'oxytyëjk wyinkoony ets nyäjyijtakë ma ja Elisejë ja tyekypya'tkën; tä tmëpëtsëëmnë ja y'u'unk jap tëkoty tëë ënety jyuukpyiky.

Ma ja mëj'ajtën yaj'ixyën ma ja jë'kxy pëkyën

³⁸ Ko ya'atë jëtu'unpë ja mëj'ajtën tyuuntaay jyajtaayë, tä ja Elisejë ojts nyëjkxnë jam Guilgal. Tu'kxëëw tu'kjëmëjt, ma jampë ja itjotmën yuu ënety jam mëk jëtijtp, e jamts ënety yajpaatë aakyë'ë yë Wintsën yë tyuunpëtëjkëty, ko t'ënëmaay yë Elisejë ja tyuunpë Guehazí: Tun mëyajtën jam wäänë yë tu'ts xykyëxwitsëty jëënkëjxm ets tojkx xyaj'oyëty wä'än ya'atë Wintsën yë tyuunpëtëjk tkaytyë.

³⁹ Tu'uk ojts nyijkxy jam kamjotm ets jamt tpaty yë ujtstëëm, jëtu'un kyëxë'ëky tsi'i u'unkën, tääts may tpëjkmujk jap nyijänjoty t'apëjkëy. Ko tmëja'ajty tääts yajxon t'atsujkëy tsayjäty ets tyajkëëy, ninu'un tkanijawëtë ko y'ëxëëk'ujtsëty.

⁴⁰ Tääts yaj'apëjkëy ja tyojkxëty ja käjpxynyajxpëtëjkëty, tam ënety tjë'kxtsoontë ko myäy'ënaantaktë: Käjpxynyajxpë, ya'atë tojkx tëë yowë yajtukupëky yë ëxëëkpë. Jëtu'un ojts ka'ap ni pën tjë'kxy.

⁴¹ E ja Elisejë ko jëtu'un t'ijxy, tääts ni'ënä'ämëy: Yajmintë wäänë yë tsajpmokway. Ets ja tsajpmokway jap tkupëjkëy tojkxjoty ets y'ënäny: Tyam apëkëtë ënät yë mtojkxëty. Tääts ja ja'ayëty tyëjkëtyë kääpyë ukpë, ka'ap ojts jap tii y'ëkkëxë'knë tu'tsjoty.

⁴² Ok tu'uk yë ja'ay jam jyä'äjty, jam tsyoony Baal-salisá, yë'ë tyuknimiin ja Elisejë yë tsajpkääky, i'px tyajmiiny ets tsajpmoktë'ëts jam ma ja xyuumyën. Tä ja Elisejë ojts tuk'ëne'emy ja tyuunpë: Yajkaaytya'a ja'ay.

⁴³ E ja tyuunpë tyaa y'ëtsooy: ¿Wi'ixës ënät ya'atë nimëko'pxpë ja'ay nyajkaaytya'ajëty? Tääts ja Elisejë y'ëtsooy: Mo'otë ja'ay kyääky y'uukyëty, jä'ä ko tëë yë Wintsën y'ënä'äny ko kaaytya'ajantëp yë ja'ay ets jaaknatëkëjaanp yë jë'kxy pëky.

⁴⁴ Jëtu'un ojts ja tuunpë tmooytyä'äy ja ja'ay ja tyojkx ets kyääytyë pyëjktë, ëpëky jyaak natëjkëy ja jë'kxy, jëtu'un tä ënety ja Wintsën të tnikäjpxyën.