2 Reyes 3 - Biblia Dc en Mixe de Quetzaltepec

Ma ja Joram yajkutukyën jam Israel

¹ Ma myajkmokx tëkëëk anyën jajëmëjt, ma ënety yajkutukyën yë Josafat, jam Judá, jää ojts yë Joram, yë Ahab yë myaank tyëkë yajkutujkpë jam Israel, majkmäjtsk jëmëjt ojts y'ëne'emy jam Samaria.

² Yë'ë ëxëëk ojts winë tuny Wintsën wyintuuy, je'eyëp ko ka'ap tyimjëtu'unëty tä ja tyeety tyaakën, jä'ä ko yë'ë ojts tjijtë'ëky ja tsaapotsy ma ja Baal ënety t'ëwtatën mëti'ipë tyeety kyojën.

³ E jëtu'un tjatuuny, yë'ë poky ojts tuuntëkoy mëti'ipë tyuunën yë Jeroboam, yë myaank yë Nabat, mëti'ipë mëët tyajpokytyuunyën ja Israel ja'ayëty.

Ma ja Elisejë t'akäjpxyën ko ja Moab ja'ay yajmëmëta'aka'antë

⁴ Mesá, mëti'ipë jam yajkutujkpën Moab, yë'ë ijty tyuunk'ajtyp ma ja ja'ay tyajmayën ja tsajppax, kupixyny, e yë'ë xëmë ënety pyäätyë tkukëpätëty ja mëti'ipë jam myëët'ajtypyën, jä'ä ijty tyäky mëko'px mil ja tsajpkaa ets mëko'px mil ja kupixyny mëët ja nyipixyny, yajmo'oy ja yajkutujkpë jampë Israel y'ëne'emyën.

⁵ E jää ko ojts y'o'knë Ahab, ënät ja yajkutujkpë jampë Moab y'ëne'emyën, tuknipëjktakëy ko tmëtsiptsoona'any ja yajkutujkpë jampë yajpaatyën Israel.

⁶ Ënet ja Joram, Samaria yajkutujkpë t'ijxka'pxtaay ja tsyiptuunpëtëjk mëti'ipë Israel ja'ayëtyën.

⁷ Tääts tuknikejxy tu'uk ja ayuk ja Judá yajkutujkpë ets t'ënëmaay: Yë Moab yajkutujkpë, yë'ëjës xynyipëtë'ëkaanp. ¿Wi'ix minëpë etsës xypyutëkëtyë? Oy nputëkëty, tyam ëëtsëty mëët tëkokyë yë ntsiptuunpëtëjkës ets mëti'ipë jëyujk këjxy tsiptuuntëpën ets teky'ampë, tu'ukyë ja'ay ëëts'ajtëmë.

⁸ Je'eyëp tëy, ¿maatsow yaj'ëtukëty? Ets ja Joram y'ëtsooy: Jäätsow ma tu'ujën mëti'ipë nëjkxpën të'ëts'itjotm ma Edom y'itjotmën.

⁹ Jëtu'un'äämpy ojts ja yajkutujkpë tsyoontë, mëti'ipë jam ënä'ämtëpën Israel, Judá ets Edom. E jä'ä ko wëxtujk xëëw ojts ja it timnya'ëwtijnëtë, ojts ja nyëë kyëjxta'atë, mëti'ipë yë'ëjëty y'uktëpën ets mëti'ipë ja jëyujk y'uktëpën.

¹⁰ Ënet ja Israel yajkutujkpë y'ënäny: Aa tëëtëm ënät ja Wintsën xytyuknimi'inëm kanaak yajkutujkpë ets tëkëëk të tim yajminy, tä ënät ja Moab ja'ayëty yë'ë ëxëëk xytyu'unmëty ets xymyëmëtakmëty.

¹¹ Tä Josafat tyajtëëy: ¿Yaa ka'ap maa ja'ay mëti'ipë Wintsën myëtuunpyënë, tääts jeexyë yë'ë nyajtë'ëwëm tii tunan jatanëp? Tääts ojts tu'uk ja ja'ay y'ëtsoy, yë'ë yajkutujkpë ja tsyiptuunpë wintsën: Tyaa yë Elisejë, yë myaank yë Safat, mëti'ipë ijty mëët jyëtityën yë Elías.

¹² Yë'ë jyëkyejpy xytyuk'ëwa'anëmëty wi'ix ja Wintsën y'ënä'änyën, jëtu'un y'ëtsooy ja Josafat. Ënet ja Israel yajkutujkpë mëët yë Josafat ets Edom tsyo'ontë ënätyë ets ojts tninëjkxtë ja Elisejë;

¹³ e ja Elisejë tyaa t'ëtsooy ja Israel yajkutujkpë: ¿Ëjts tii winma'anyës yam n'ëkmëët'ajtyp mëët mijts? ma nëjkx yë'ë xykya'ixy ja ja'ayëty mëti'ipë ijty ja mteety xëmë winë yajtëëpyën. E ja yajkutujkpë ni'ikyë tjanty y'ënëëmë ja käjpxynyajxpë: Ka'ap, jä'ä ko Wintsënës të xyajmintë ets ëëtsëty nitëkëëk yë Moab ja'ayëty xyaj'ooktëty.

¹⁴ Ënet ja Elisejë t'ëtsooy: Tyam mijts yajxon n'ënëëmëty mëët yë Wintsën yë xyëëw mëti'ipë maaytyääyëpën, mëti'ipës wa'ats xy'ijxpën, ko mëët yi'iyë koos n'oyjyawë yë Josafat, Judá yajkutujkpën, paaty nputëkëja'any; ko jeexyë ka'ap ni nkani''ijxë'ëky jeexyë yam.

¹⁵ Nëjkx tu'uk yë koowpë yajtsoontë. E ko ja ja'ay tyëjkëy koowpë, tääts ja Elisejë ojts tyukëtä'äkyë ja Wintsën ja myëk'ajtën;

¹⁶ tääts ja Elisejë y'ënäny: Jëtu'un yë Wintsën y'ënä'äny oytyuntë kanaak yë nëëtu'u,

¹⁷ jä'ä ko ijxtëm miits tyam xy'ixtën oy kyatu'uy kyapojy, yë Wintsën yë'ë ënät yajtu'u yajpojëp ets ya'atë joyjyot y'utsëty mëët yë nëë ets jëtu'un tëkokyë miitsëty mnëë uuktëty ets ja mjëyujk ntsajpkaajëty.

¹⁸ Tyaapë tyäty wäänë yë'ë mëti'ipë yë Wintsën tyunäämpyën, jä'ä ko yë'ë ëpëky tkë'ëyaka'any ma miitsëtyën yë Moab ja'ayëty,

¹⁹ ets miits nëjkx xyjyijta'atë ja potsy mëti'ipë ja nyaaxëty kyajpnëty tyuknapots'ajtëpën; nëjkxëp xypyujkxë'kta'atë ja aay kepy mëti'ipë tëëmpäjtpën; nëjkxëp xyaj'ëtujkta'atë ja nëëwooky ets nëjkxëp ja nyaaxëty kyamëty xytsyaawinpi'iwëtya'atë.

²⁰ E jëtu'unën ojts jyänty tyuny jyänty jyätyë, ma ënety ja wintsë'kën yajyäkyën, jamtsow Edom ja nëë tuu nyämyëtso'onë ets tyajxo'ktaay ja naax kam.

²¹ E ja Moab ja'ayëty tëë ënety tnanija'awënëtë, ko tää nyiminëtë ja yajkutujkpëtëjk ets mëët tsyiptuna'antë; paaty tmëkajpxtaaytyë tëkokyë ja ëna'ktëjkëty ets mëjatyëjkëty mëti'ipë maayëtëpën tsyiptuntëty, tääts jam nyäpyëjktakëtë ma mëët ja tsëpa'an tmëët'atën.

²² Komjëpom, ko myä'äypyëtë'ktë, ënät ja xëëw tukjajëtyääy ja nëëjot, e ko ja Moab ja'ayëty t'ijxtë jëtu'un t'ijxtë tä jeexyë nye'pnyëtyën.

²³ Tääts y'ënantë: Xiipë ne'pny yë'ë. Mëti'ipë të tyuny të jyätyën, yë'ë ko ja yajkutujkpëtëkëty aakyë'ë të nyänyimatsëtë ets të nyäyaj'ookëtë. Moab ja'ayëty ja'amtë timtyämyë mpëjkmujkta'ayëm mëti'ipë të ni'o'ktu'utën.

²⁴ E ko ja Moab ja'ayëty tyëjkëtyë ma ja Israel ja'ayëty ja jya'ajtaknëtyën, ënätyë nyipëtë'këtë ja Israel ja'ayëty. Yajxon yajkäk yajpujtëtë ets may yaj'o'këtë.

²⁵ Ojts ja naax kajpn tyaj'atëkoytyë, ojts ja naax kamtëjk tsaawinko'owëtya'atë; ja nëëjut ojts naaxtukko'owëtë ets ja nëëwooky ets ja aay kepy ujts mëti'ipë ja tyëëm yajë'kxpën wa'ats tpujxkëtaawtaaytyë. Yi'iyë ojts ka'ap tyajkutëkoytyë ja kajpn mëti'ipë xyëëwajtypyën Quir-haréset. Je'eyëp ko ja ja'ayëty myiintë mëti'ipë myëtsiptuuntëpën ja tsaawëtu'un tä tyajnatujktë ets ja kajpn tmëmëtaktë.

²⁶ Ko ja yajkutujkpë t'ijxy mëti'ipë Moab ja'ayën ko ja Israel wäänë mëk ënety ni'ik tsyiptuntë, ënät niwëxtujk mëko'px t'ënëmaay ja tsyiptuunpëtëjk mëti'ipë tekyye'epy tsiptuuntëpën ets tyaj'ëwa'atstëty ja äämjyot, tyaj'oyëtëty tu'uk ja tu'u mëti'ipë jam ja'tëpën ma yajpaatyën Edom yajkutujkpë. Je'eyëp ko ka'ap myääyëtë.

²⁷ Ënet ojts tmajtsë'ëky tu'uk ja myaank mëti'ipë ënety kutëkëjanëpën ma ja kyutujktaknën ko y'ookëty ets tuktsujk tukjë'tëy ets tnino'ky jam potsykyëjxm, jëtu'un tyäjky tä tu'uk ja wintsë'kënën. Yë Israel ja'ayëty wiink ojts t'ixtë ets jyoot'anpëjktë, paatykyëjxm tsyo'ontaaytyë jam ma ja jya'ajtaknëtyën ets wyimpijtaaynyëtë ma ja nyaax kyajpnëtyën.