2 Reyes 24 - Biblia Dc en Mixe de Quetzaltepec

¹ Ma ënety ja Joaquim yajkutukyën, yë Nabucodonosor jampë yajkutukyën Babilonyë, ojts tnitëkë yë naax kajpn jam Judá; yë Joaquim tëkëëk jëmëjt kyëpejty ma Nabucodonosor yajkutukyën. Ok ja wyinma'any tyajtëkajtsy ets tnipëtë'ky ja Nabucodonosor.

² E ja Wintsën yë'ë tyuknikäjx ja Joaquim ja mä'tspëty mëti'ipë Caldeo ja'ayëtyën, sirië ja'ayëty, Moab ja'ayëty ets Amón ja'ayëty jam Judá ets ja naax kajpn tyajkutëkoytyëty jëtu'un tä ënety ja Wintsën të t'akäjpxyën mëët ja tyuunpëtëjk.

³ Paatykyëjxm jëtu'un ja Judá kajpn jyäjty kyëpejty, jä'ä ko ja Wintsën ënety jëtu'un të tuknipëjktaakë ets timjyëpëky yë'ë wyintuuy mëët ko ja Wintsën ka'ap t'ëkkupëjknë ja nëë poky mëti'ipë ja Judá ja'ayëty tyuuntëpën, ja poky mëti'ipë ënety ja Manasés të tyuktunëtën,

⁴ ets ko ja ne'pny ënety nëkoo të tam të tjä'ätstë jam Jerusalén. Paatykyëjxm ja Wintsën ka'ap ojts y'ëkpokymyä'kxënëtë.

⁵ Ja nyikäjpxy nyimëtyä'äky ja Joaquim ets tëkokyë mëti'ipë tyuunën, jap myiinta'ay kuja'ay ma ja nokyën, mëti'ipë jyä'ä'ajtëpën ja yajkutujkpëty jampë tyuuntën Judá.

⁶ Ko ojts y'o'knë yë'ë kutëjkëyë ma ja kutujktaknën ja myaank Joaquín.

⁷ Ja yajkutujkpë mëti'ipë jap tuunpën Egiptë ka'ap ojts maa y'ëknëjkxnë, jä'ä ko ja yajkutujkpë mëti'ipë jam ënä'ämpën Babilonyë tëë ënety ja naax kajpn tniwaanta'ay mëti'ipë të tnitsiptunyën; jampaat ënety të tjä'äpëky ma ja wokën mëti'ipë Egiptë ja'ay jyä'ä'ajtëpën ets tyimja'ty ja ma ja mëjnëëjën mëti'ipë yajtijpën Éufrates.

Ma ja Joaquín ets ja jyä'äy yajmënëjkxnëtën jam Babilonyë

⁸ Joaquín jä'ä ënety jyëmëjt majkmokx tëkëëk ko tyëjkëy yajkutujkpë ets tëkëëk jëmëjt jam yajkutujky Jerusalén. Jä'ä ja tyaak ijty xyëëwajtyp Nehustá, yë'ë nyëëx yë Elnatán, jam kyukajpnëty Jerusalén.

⁹ E ja tyu'unën kyajpxën ka'ap ja Wintsën ojts oy t'ixy, nän timjëtu'un winë tuuny ëxëëkjaty tä ja tyeetyën.

¹⁰ Jä'ä xëëw jä'ä jëmëjt, ja Nabucodonosor mëti'ipë jam Babilonyë yajkutujkpën, ojts myäymyintë ja tsyiptuunpëtëjk ets ja Jurusalén kajpn tyajnatujktë.

¹¹ Yajxon ënety jam tsyiptuntë ko ja Nabucodonosor jyä'äjty.

¹² Tä ja Joaquín, Judá yajkutujkpën mëët ja tyaak, ja tsyiptuunpëtëjk ets ja wyintsëntëjk y'ënantë ko ka'ap myëta'aka'antë; ojts yajtsuumnëtë ets ja yajkutujkpë Babilonyë yajkutujkpë myëtaknë. Ya'atë jëtu'unpë jää ojts tyunyë jyätyë ma ënety tyuktujk jëmëjtpetyën ma ja Nabucodonosor yajkutukyën jam Babilonyë.

¹³ Ok ja Nabucodonosor tju'taay tëkokyë ja pu'ts pujxn, poop pujxn ets ja wit meeny mëti'ipë jap tsajptëkoty yajpatpën ets ma ja akujktëjkën ets jëtu'un tä ënety ja Wintsën të t'akäjpxyën. Ojts tjanty tyukë'tsëtyä'äy tëkokyë winë pu'ts pujxnmëëtpë, mëti'ipë ënety ja Salomón të tyaj'oyën, mëti'ipë jam yajkutujkën Jerusalén ets tuknikojëy ja Wintsën.

¹⁴ Tsumy tyajnëjkxtaay ja ja'ayëty jampë tsyëënëtën Jerusalén, ja kopktëjkëty ets ja tsiptuunpë wintsënëty; ojts tyajnëjkxta'ay ja ja'ayëty mëti'ipë ijty kojtëpën taktëpën ets mëti'ipë pujxnyaj'o'oyëtëpën; majk mil ojts tyajkä'pxy ja tsumjyä'äy. Jam ma ja kajpnën nitu'uk ja ja'ay ojts kyawë'ëmy, yi'iyë mëti'ipë mëk timy'ëyoowtëpën.

¹⁵ Nabucodonosor ojts tsum tyajnëjkxy ja Joaquín, mëët ja y'u'unk y'ëna'k, y'u'unk tyo'oxytyëjk; ja tyaak ets ja tyuunpëtëjk mëët ja y'u'unk tyo'oxytyëjkëty, y'u'unk y'ëna'këty; wyintsëntëjkëty ets ja tsyiptuunpëtëjkëty ets ja ja'ayëty mëj'äämpyë jam të yajpaatën ma ja naax kajpnën. Tsumy nyëjkxtaaytyë jam Babilonyë, jam tsyo'ontë Jerusalén.

¹⁶ Ja tsumjyä'äy mëti'ipë ojts ja Babilonyë ja'ay tmënëjkxtën, jä'ä nyiwinë'atë, wëxtujk mil; nitu'kmil ja kojpëty takpëty ets mëti'ipë ja pujxn oyëtypë y'oytyuuntëpën; ëpëky ja ja'ayëty jotmëkëtypë ets mëti'ipë tsip'ixyëtyën.

¹⁷ Tä ja yajkutujkpë mëti'ipë jam tuunpën Babilonyë ojts ja Matanías jä'ä tpëjktä'äky ets yë'ë yajkutukëty, tkutëkëty ja Joaquín, je'eyë txëëwinkuwijtsy ets ojts tijy Sedequías.

Ma ja Sedequías yajkutukyën

¹⁸ Sedequías jä'ä ënety jyëmëjt I'px tu'uk ko tyëjkëy yajkutujkpë ets majktu'uk jëmëjt ojts yajkutuky jam Jerusalén. Jä'ä ja tyaak ijty xyëëwajtyp Hamutal, yë'ë nyëëx yë Jeremías, jam kyukajpnëty Libná.

¹⁹ Ja tyu'unën ja Sedequías ka'ap yë Wintsën ojts oy t'ijxy, jëtu'un ojts winë ëxëëk tuny tä ja tyeetyën Joaquim.

²⁰ Paatykyëjxm ojts yë Wintsën tukjoot'anpëky yë Jerusalén kajpn ets Judá kajpn ets t'ixkäjxtaay ja ja'ay. Ok ja Sedequías ojts tnipëtë'ëky ja yajkutujkpë jampë y'ëne'emyën Babilonyë.