2 Reyes 21 - Biblia Dc en Mixe de Quetzaltepec

Ma ja Manasés yajkutukyën jam Judá

¹ Yë Manasés ko tyëjkëy yajkutujkpë jä'ä ënety yë jyëmëjt majkmäjtsk ets jä'ä ojts jam yajkutuky Jerusalén wëxtyikxy myajkmokx jëmëjt. Jä'ä ja tyaak ijty xyëëwajtyp Hepsiba.

² Je'eyëp ko ja tyu'unën kyajpxën ka'ap ja Wintsën ojts oy t'ixy, jä'ä ko näjyëtu'un winë tuuny ëxëëkjaty tä ja kajpnëtyën mëti'ipë ënety ja Wintsën të t'ëxwopyën ko ja Israel ja'ayëty jam jyajtë:

³ ojts jatëkok tkoj'o'oyëtyä'äy ja tëjk ma jap y'itën ja tsaatsetsy, mëti'ipë ënety ja tyeety Ezequías të tjijtë'ëkyën; ojts t'oytyuny wiinkpë wintsë'këntyakn ets ojts ja Aserá ja y'awinax tyajkojë; ëpëky näjyëtu'un t'ëwtajty winë jampë tsajpkëjxm yajpaatyën,

⁴ ojts jap tsajptëkoty, ma ja Wintsën ja tyëjkën tyaj'oyë kanaak ja wintsë'këntyakn, mëti'ipë ja Wintsën ojts tnikäjpxyën ko jämyë ja xyëëw yaj'ëwtatëty ma Jerusalén kajpnën.

⁵ Ojts näjyëtu'un ëpëky wiinkpë wintsë'këntyakn tyaj'oyë, jap ma ja tsajptëjkwiinën ma yaj'ëwtatëtyën ja xëëw po'o.

⁶ Ojts ja y'u'unk y'ëna'k tyajtooy tyajjäämnë, ma tukwintsë'këyën ja ka'apë tyiosëtyën, yajtuun ja najtsja'apë, yajkutujk ets ja ja'ay tuunk'atëty ja kajpxpojkën, paatoy panajxk. Tim tëkatsy ojts winë tuny, je'eyë ja Wintsën tyajjoot'anpëjk.

⁷ Pyëjktak jap ja Aserá ja y'awinax ma ja Wintsën ja jyëën tyëjkën, mëti'ipë ënety ja Wintsën të tnikäjpxyën ma ja David ets Salomón: Ya'atë tsajptëjk, mëti'ipë yaajën Jerusalén, mëti'ipës kë'ëm të nwin'ixyën ma ja Israel ja'ayëtyën, yaa xëmë yajmëjjaw yajaantyjyawëty yë nxëëwës.

⁸ Ëjts ka'apës o'ktëy ja Israel ja nyaax kyajpn n'ëktunanënë, pën kyuuytyuunpy ja n'ënä'ämënës ntëyajtënës ets tëkokyë ja ijxpëjkën mëti'ipë të nmo'oyën mëti'ipë ojts ja ntuunpës Moisés mtukni''ixëtën.

⁹ E yë'ëjëty ka'ap tkuuytyuuntë. Ni'ikyë ja Manasés ojts tyuktunëtë ka'apë jeexyë mëpaat tuntën; ni'ik o'ktëy y'ëtëtstë këtiinëm jyëtu'unëty ja naax kajpn mëti'ipë ënety ja Wintsën të twojpëtsëmyën ma ja Israel ja'ayëty ja naax yajmooytyën.

¹⁰ Paaty ja Wintsën ja aaw ayuk tnajtskäjxëy mëët ja tyuunpëtëjk ets y'ënäny:

¹¹ Mëët ko ja Manasés të tuny ja ka'apë tyuunëtyën ets ko të tuny winë wäänë o'ktëy këtiinëm jyëtu'unëty ja Amor ja'ayëty mëti'ipë jam tsënaaytyën ma tampë ja naax kamën, ko të tyajkutuky ets ja Judá t'ëwtajtnëty ja awinax ets ja tsaatsetsy,

¹² ëjts, mëti'ipë Wintsën'ajtpën, mëti'ipë yë Israel y'ëwtajtëpën, tyamës nikäjpxy ja n'aaw n'ayuk: Nyajminäämpyës ja ëyo'on jotmay ma ja Jerusalén kajpnën ets ma ja Judá kajpnën; ja ja'ay mëti'ipë nëjkx tmëtowtën wi'ix ënety ja naax kajpn jyäty kyëpetyën mëk nëjkx tjawëtë.

¹³ Tin jëtu'unës ja Jerusalén kajpn ntuna'any o'ktëy tä ja Samaria kajpn të ntunyësën, maas të nyajkëjxta'ayën ja Ahab ja y'u'unk y'ëna'k ets ja jyä'äy; jëtu'unës nyajwë'ëma'any ja naax kajpn pe'ety jaaxy, tä ja'ay yë texy tukpo'otyën wa'ats ets tjupy.

¹⁴ E ja naax kajpn mëti'ipë ënety jaakwë'ëmtëpën, ka'apës n'ëkajpnniwa'ananë, ntimy'ëxmatsäämpyës wä'än t'ixy pën nimiinëp ja myëtsip ets pën nitëjkëyëp kyajpnjoty ets pën mä'tstaayëp.

¹⁵ Jä'ä ko yë'ëjëty aak tëkatsy winë tuntë, aakyë'ë tyuuntëp mëti'ipës ka'ap n'oy ixy n'oyjyawën, jëtu'un timyajtso'ontaktë ko jap tsyo'ontë Egiptë ets tyampaat.

¹⁶ Ëpëky ja nëë poky mëti'ipë ja Manasés tyuktuunën ja Judá ja'ay ets mëti'ipë yë'ë kë'ëm tyuunën Wintsën wyintum; këjää ojts ja ja'ay tyaj'ok tyajtëkooynyë ka'apë tii poky tmëëtëtyën jam Jerusalén.

¹⁷ Ja nyikäjpxy nyimëtyä'äky ja Manasés ets tëkokyë mëti'ipë tyuunën kyajpxën, jap myiinta'ay kuja'ay ma ja nokyën mëti'ipë ja yajkutujkpëtëjk jyä'ä'ajtëpën, mëti'ipë jam yajkutujktën Judá.

¹⁸ Ko y'o'ky, jam tyajnaaxtëjkëtyë ma ja pëjykyamën, jampë yajpaatyën ma ja akujktëjk tëja'awën, mëti'ipë tyijtëpën ja pëjykyam Uza. Ko y'o'ky yë'ë ojts kyutëkëty ja myaank Amón, ma ja kutujktaknën.

Ma ja Amón yajkutukyën jam Judá

¹⁹ Amón jä'ä ënety jyëmëjt majkmäjtsk ko tyëjkëy yajkutujkpë jam Jerusalén ets mäjtsk jëmëjt ojts y'ëne'emy. Ja tyaak jä'ä ijty xyëëwajtyp Mesulemet, yë'ë nyëëx yë Harús, jam kyukajpnëty Jotbá.

²⁰ Je'eyëp ko ja tyu'unën kyajpxën ka'ap ja Wintsën oy t'ijxy, jä'ä ko nän yë'ë poky tyuun mëti'ipë ënety ja tyeety Manasés të tunyën,

²¹ näjyëtu'un ojts winë ëxëëk tyajtu'uye'ey, ojts tyajnitukë ets ja ja'ay ja awinax t'ëwtatëty, ja awinax mëti'ipë ënety ja tyeety të t'ëwtatyën.

²² Jëtu'un ojts ja Wintsën ëpëky tpëjktaknë, mëti'ipë y'ëwtajtën ja y'aptëjk ets ka'ap tii oy tuuny jëtu'un tä ënety jyayajtuk'ëne'emyën.

²³ Ja Amón ja tyuunpëtëjk ojts nyikäjpxytyunëty ets jap yaj'o'kë jap tëkoty ma ja akujktëjkën.

²⁴ Je'eyëp ko ja kajpn ojts tmatstë ja yajja'ay'o'kpëty ets tyaj'o'ktë mëti'ipë ënety ja Amón të tyaj'ooktën, tääts nikajpxpäjtë ja Amón ja myaank, mëti'ipë xyëëwajtypyën Josías ets yë'ë yajkutukëty.

²⁵ Ja Amón ja nyikäjpxy nyimëtyä'äky ets tëkokyë mëti'ipë tyuunën, jap myiinta'ay kuja'ay ma ja nokyën, mëti'ipë nyoky'ajtëpën ja yajkutujkpëty, jampë ojts y'ënä'ämtën Judá.

²⁶ Ets jam tyajnaaxtëjkëtyë ma ja pëjykyamën mëti'ipë tyijtëpën Uzá, yë'ë ojts kyutëkëty ja myaank Josías ma ja kutujktaknën.