2 Reyes 18 - Biblia Dc en Mixe de Quetzaltepec

Ma ja Ezequías yajkutukyën jam Judá

¹ Ma ënety mëtëkëëk jëmëjt yajkutukyën yë Oseas, yë myaank yë Elá, mëti'ipë jam ënä'ämpën Israel, jää ojts tyëkë yajkutujkpë yë Ezequías, yë myaank yë Acaz jam Judá.

² Jä'ä ënety yë jyëmëjt i'px mëkoxk ets i'pxtaxtujk jëmëjt ojts jam Jerusalén y'ëne'emy. Abí yë tyaak txëëwajtyp ets yë'ë nyëëx yë Zacarías.

³ Yë tyu'unën kyajpxën yë Ezequías oy ojts yë Wintsën t'ixy, jëtu'un tä ja y'ap y'okën David.

⁴ Ojts tjijta'ay ja tëjk ma ja awinax y'itën, tyukpu'ujëtyääy ja tsaa mëti'ipë ënety tyijtëpën kënu'kxy, jëtu'unyë tpu'utaktaay ja Aserá ja y'awinax ets ja tsa'any mëti'ipë aak pujxnën mëti'ipë ënety ja Moisés të tyajkojyën; wa'ats tyajma'taay, yë'ë ijty yë Israel ja'ayëty wyino'k wyinxaamtëp mëët yë poom, jä'ä tijtë Nehustán.

⁵ Yë Ezequías yë'ë tu'ukyë yë Wintsën tyimy tuk'ijxpät mëti'ipë ja Israel ja'ayëty Tyios'ajtëpën. Yi'iyë ojts tu'uk jëtu'un oytyuny, ka'ap ojts maa jëtu'unpë yajkutujkpë y'ëk'ijnë ma Judá kajpnën, jä'ä ko ja myëku'uktëjkëty aak ëxëëk ojts winë tuntë.

⁶ Mëk nyäyaj'ijtë ma Wintsënën ets ka'ap ninu'un t'ëxmajtsy; ojts tkuuytyuny ja ënä'ämën tëyajtën mëti'ipë ënety ja Wintsën të tni'ënä'ämën ma Moisésën.

⁷ Paaty ja Wintsën ojts mëj këjää pyutëkëty, oytyiijëty timtyuuny, aak'oy ojts wyimpëtsë'ëmxëty. Yë Ezequías ka'ap ojts tkupëky ets Asiria yajkutujkpë jam y'ënä'ämëty ma ja Israel ja'ayëtyën.

⁸ Ko mëët tsyiptuuny yë filistejë ja'ayëty ka'ap tyajmëtäky, ëxëëk jam tuuny Gaza ets jampaat ma ënety mëët nyämëtsëpa'an'atyën; yë'ëpaat ja myëtsiptëjk ka'ap tyajmëtäky ma ënety jam kyëwent'atën potsykyëjxm ets ma ja kyajpnëtyën mëti'ipë ta'tspëkyën ets natukyën.

Ma ja Samaria kajpn yajnitëkën

⁹ Ma ënety mëmajktaxk jëmëjt yajkutukyën yë Ezequías, ja mëwëxtujkpë ja yajkutujkpë, ma ja Oseas yajkutujktsoonyën, yë myaank yë Elá, mëti'ipë jam yajkutujkën Israel; jää ojts yë Salmanasar, ja Asiria yajkutujkpë tyajnatuky yë Samaria kajpn ets tnitëjkëy,

¹⁰ kom tëkëëk jëmëjt tääts ojts yë'ë timy jä'äpëjknë. Jää jëtu'un ojts jyäty kyëpety ma ënety tyëtujk jëmëjtpetyën ma ja Ezequías yajkutukyën ets ma tyaxtujk jëmëjtpetyën ma ja Oseas yajkutukyën jam Israel, ko ja Samaria ojts ja Asiria ja'ay nyiwanënë.

¹¹ Ja Asiria yajkutujkpë ojts tyajnëjkxta'ay ja Israel ja'ayëty jam ma kyajpnën ets jam tpëjktaktaay ma ja it naaxjot txëëwatyën Halah; ma ja Habor y'itjotmën, jam ma Gozán mëjnëëjën, ma ja ja'ayëty tsyëënëtën mëti'ipë yajtijtëpën medos.

¹² E paatykyëjxm ojts jëtu'un jyatë kyëpätë jä'ä ko ka'ap tmëmëtoowtë ja Wintsën; ko ojts ka'ap t'ëkja'amyäjtsnëtë ja käjpxytyu'unën ets ka'ap ninu'un tja'akyujkëtyë ja ënä'ämën tëyajtën mëti'ipë ja Moisés, ja Wintsën ja tyuunpë ojts jyatuknipëkëtën tpatuntëty.

Ma ja Senaquerib tnitëkën ja Judá

¹³ Ma ënety majkmajkts jëmëjt yajkutukyën yë Ezequías, jää ojts yë Senaquerib, Asiria yajkutujkpë, tukja'ty yë Judá nyaax kyajpn mëti'ipë yaj'ijtëpën ta'tspëky ets këwent'aty ets tjä'äpëjktaay.

¹⁴ Ënet ja Ezequías, Judá yajkutujkpë, ojts tkäjpxynyikexy ja Asiria yajkutujkpë ets t'ënëmaay: Ëjts tyamës nkupëky ko ka'apës të nmëtä'äky. E yë'ëts yam mpëjktsoopy ets mjëwa'akëty maas yë nkajpnën tyamës nyakëty ja wit meeny jënu'un xytyim'amëtoyën. Ënet ja Asiria yajkutujkpë t'awijtsy ja meeny jënu'un tsokyën ets t'ënëmaay ja Ezequías, jä'ä xyakëty taxtujk mil ja taxtujk mëko'px kilë, aakyë'ë poop pujxn meeny ets taxtujk mëko'px ja majkta'px majk tsim yë pu'ts pujxn.

¹⁵ Tä ja Ezequías tyajktaay ja poop pujxn mëti'ipë ënety jap yajpatpën tsajptëkoty ets ma ja kutujkëntëjkën.

¹⁶ Jä'ä xëëw yë Ezequías ojts näjyëtu'un ja tëjk'aaw jam tyajjënajkta'ay ma ja tsajptëjkën, mëti'ipë yë'ë kë'ëm të t'oytyunyën ets ënety të tnikoy mëët yë pu'ts pujxn, yë'ëts tyukkë'ëtëjkëy ja Asiria yajkutujkpë.

¹⁷ Ok ojts yë Asiria yajkutujkpë tkexy yë tsyiptuunpë wintsën mëj'äämpyë ets myëkutuunk ets tu'uk mëj wintsën jam ma ja Ezequías yajpaatyën ets jam tsyo'ontë Laquis jyajtë Jerusalén ets tnitëkëja'antë. Ko tmëwinkoontë ja Jerusalén kajpn, jam jyajtaktë ma ja nëë nyipetyën kajpnëkëjxm, ma ja tu'ujën mëti'ipë nëjkxpën ma witpujtaknën.

¹⁸ Ënet ojts tmëkajpxtë ja Judá yajkutujkpë, tääts pyëtsëëmtë ja Eliaquim, yë myaank yë Hilquías, mëti'ipë ënety ja kutujkëntëjk kyëwent'ajtypyën ets ja Sebná, mëti'ipë jääpyën ets Joah, yë myaank yë Asaf, mëti'ipë mëët ja yajkutujkpë tyunyën mëti'ipë jyääpyë'ajtypyën ets mëët myëtyaktë ja Asiria ja'ayëty.

¹⁹ Tääts ja Asiria ja'ay y'ënëmaayëtë: Jëtu'un yë Ezequías xy'ënëëmëtëty, ko ya'atë aaw ayuk yë'ë kyejxyp yë Asiria yajkutujkpë: ¿Pën mijts mtyäty tyukjotkujk'ajtyp?

²⁰ ¿Ëkë jä'äjën m'ëna'any ko ja aaw ayuk oypyë yajmëtoyën näjyëtu'un yë tsyowpaaty tä ja jot winma'anyën mëti'ipë yajmëët'ajtpën ko ja jëën tsip yajniwinmayë? ¿Pën mtuk'ijxpejtyp ets ënät ka'ap mëj xy'ëk'ijxnëtyës?

²¹ Ëjts jëtu'unës n'ixy ko mijts yë'ë yowë mtuk'ijxpejtyp yë Egiptë. Oy, ka'ap tääpë wyi'ixëty, je'eyëp ko yi'iyë mnijawëp, ko yë Egiptë yajkutujkpë jëtu'un yë'ë tä tu'uk yë waxk kepyën, ko nmajtsmëty ets njatajk'ata'anmëty poj'am y'u'kxy xykyë'ëtëjkëmëty. Yë faraón jëtu'un yë naax kajpn tuny mëti'ipë tuk'ijxpäjtëpën.

²² E pën m'ënantëp miitsëty: yë Wintsën mëti'ipë ëëts nTios'ajtëpën yë'ëjës ntuk'ijxpäjtëp, ¿këtii yë'ëjëty yë Ezequías ja Wintsën ja tsyajptëjk ets ja wyintsë'këntyakn ojts tjijtë'ktaayë ets t'ënëmaay ja naax kajpn ko jämyë mëpaat yë Wintsën yaj'ëwtaty ma ja wintsë'këntyaknën jam Jerusalénkë?

²³ Ti ko tu'uk käjpxytyu'unën xykyatuny mëët yë nwintsënës, yë Asiria yajkutujkpë: tyam mijts nmo'ojëty mäjtsk mil yë kwaay, pën xymyoopyës yë ja'ay mëti'ipë jëyujktuk'u'unyäätyëpën.

²⁴ Mijts ka'ap mayëtëty tu'uk yë tsiptuunpë ja'ay xyajkä'äkëty mëti'ipë jam tso'onpën Asiria; oy jeexyë tyim yë'ë'ajtpë ja mëti'ipë ka'ap kyäkmayën, ¿e mijts jä'ä m'ënaanpë ko mpaatëp ënät ja näypyutëkë jap Egiptë? ¿Jap xypyaata'any ja këwaayë ëkë ja ja'ay mëti'ipë kwaaykyijxy tsiptuuntëpën?

²⁵ Ëkë mijts jä'äjën may mtajyë, ¿ko ka'apës Wyintsënëty të xykyexyë ets tyaapë naax kajpn nyajkutëkoyëtyësë? Tyam yajxon ntuk'ëwaanëty ko yë'ëjës të xykyexy etsës ya'atë kajpn nitëkëty etsës nyajkutëkoyëty.

²⁶ Tääts ja Eliaquim, Sebná ets ja Joah t'ëtsoowtë ja Asiria tsiptuunpë: Tun yë mëyajtën harameo ayuk tukmëkajpxtëkës, ëëtsëty wa'ats nja'akyukëtëty, këtiis xymyëkajpxtë mëët yë hebreo ayuk jä'ä ko yë ja'ayëty mëti'ipë jam potsykyëjxm ku'ijxnajxtëpën wa'ats jam tmëtowtë.

²⁷ E ja Asiria tsiptuunpë ënät y'ënäny: Ka'ap yë'ëkyëjxmëty yë mwintsën ets ka'ap myiits'atë yë Asiria yajkutujkpë të xytyukmëkäxëtës ya'atë ënä'ämën; yë'ë jëtu'un të yajtuknikäxtë yë ja'ayëty tampë potsykyëjxm kyu'ijnaxtën ets tmëtowtëty ko pyätyp ja xëëw po'o jëna'a nëjkx yë kyë'ëmtë'ëny tjë'kxtë ets kyë'ëmta'atsy t'uuktë.

²⁸ Ënet ja tsiptuunpë ojts janty mëk tpa'tkäjpxy ja ja'ay ets y'ënäny: Mëtoow'itë yajxon wi'ix ja Asiria yajkutujkpë y'ënä'änyën:

²⁹ Këtii nëkoo Ezequías mnätyukwin'ëënëtëty, yë'ë ka'ap myäyëtëty myajtso'okëtëty.

³⁰ Pën yë Ezequías mnëmaayëtëp ko miitsëty yi'iyë yë Wintsën atu'uk xytyuk'ijxpätëty ets m'ënë'ëmxëtëty: Mëtëy yë'ë ko yë Wintsën yë'ë xypyutëkëja'anëm ets xyajtso'oka'anëm; yë'ë ka'ap nëjkx t'a'ixë ets ëëtsajtëm o'ktëy njajtmëty ets ya'atë naax kajpn tjä'ä'atëty ja Asiria ja'ayëty,

³¹ këtii xymyëpëktëty. Yë Asiria yajkutujkpë paatyës të xykyexy ets miits n'ënëëmëtëty ets xytyuntëty tu'uk yë näykyajpx'oyë mëët yë'ë ets m'ëna'antëty ko ka'ap ntsiptuna'antë ets tu'k'ëtëyë je'eyë jam mtimnyäykyuwanëtëty ma Asiria ja'ayëtyën; jëtu'un ja mkam mtu'ujëty je'eyëm xymyëët'atëty ets xyjyë'kxtëty xypyëktëty ja mëti'ipë të xypyän të xykyojtën.

³² Yë'ë kë'ëm nëjkx tu'uk ja tsënaaytyakn mo'ojëtë jëtu'unpë y'ixëtyën tä ya'atë mnaaxëtyën, ma winë oy y'ity wyintëyën, ijxtëm ja tsatymyën, higo ets mëti'ipë mtukjuuky'ajtëpën, ka'ap y'ëmaaytya'akëty ja jë'kxy pëky. Jotkujk jam nëjkx mjuuky'atë, nii tii xykyayaj'ëmaaytya'aktëty. E yë Ezequías këtii xyjyä'äkyujkëtë yë y'ayuk, jä'ä ko mwin'ë'ënëtëp yë'ë ko y'ënä'äny ko yi'iyë yë Wintsën xytyuk'ijpätëty.

³³ ¿Yë'ëjëm jëtää yë tyiosëty yë naax kajpn të tyajtso'okyë ko muum yë Asiria ja'ayëty yë naax kajpn të tnitëkëtë?

³⁴ ¿Maajën ja wyintsënëty ënät ja Hamat ets ja Arfad? ¿Maajën ja wyintsënëty ja Sefarvaim, Hená ets Ivá? ¿Ojts jëtää tyajtso'oky ja Samaria kajpnë?

³⁵ ¿Jam jëtää tu'ukën ja tios mëti'ipë ja naax kajpn të t'ëkyajtso'oky ko ja Asiria ja'ayëty të tyukja'tëtë? ¿Wi'ixën ko miitsëty je'eyëm maytyë mtajtë ko yë Wintsën yajtso'okäämpy yë Jerusalén kajpn?

³⁶ Ja ja'ayëty amonyë wyë'ëmtaaytyë, jä'ä ko tëë ënety ja yajkutujkpë y'ënë'ëmxëtë ko këtii nitii ayuk tpaatëty.

³⁷ Ënet ja Eliaquim, mëti'ipë kyëwent'ajtypyën ja kutujkëntëjk; ja Sebná, mëti'ipë ja noky myëët'ajtypyën ma jap winë kuja'ay myinyën ets ja Joah mëti'ipë ja yajkutujkpë jyääpyë'ajtypyën ja wyit tkë'tstaaytyë mëët ja monyëtukyë ets ojts tninëjkxtë ja Ezequías, tääts tukmëmëtyaktaaytyë tä ënety ja Asiria ja'ay, tsiptuunpë wintsën të y'ënä'änyën.