2 Reyes 16 - Biblia Dc en Mixe de Quetzaltepec

Ma yajkutukyën yë Acaz jam Judá

¹ Ma ënety majkmokx mäjtsk jëmëjt yajkutukyën yë Peka, yë Remalías myaank, jää ojts tyëkë yajkutujkpë yë Acaz, yë myaank yë Jotam, jam Judá.

² Jä'ä ënety yë jyëmëjt i'px ko tyëjkëy yajkutujkpë jam Jerusalén ets ojts y'ëne'emy majkmokx tu'uk jëmëjt; yë tyu'unën kyäjxën ka'ap ojts oy ja Wintsën t'ixy, ka'ap tmëpaty ja y'apteety David,

³ jëtu'un ojts winë ëxëëkjaty tuny tä ja wiinkëtypë yajkutujkpëtëjk y'ëtëtstën, ni'ikyë ojts tu'uk ja myaank tkë'ëyajknë ets wyintsë'kën'atëty, ëxëëkjaty winë tuuny tä ja naax kajpnën mëti'ipë ja Wintsën yajkutëkooyën ko ja Israel ja'ayëty jam jyajtë.

⁴ Ojts tyajknë ja wintsë'kën ets ojts tyajtooy tyajjojknë ja poom ma ja awinaxyën japë y'itën ma ja tsajptëjkën ka'ap Dios tëjkëtyën, maajaty ja nitunën ets maajaty ja aay kepy mëjatyëtypë.

⁵ Jä'ä xëëw jä'ä jëmëjt, yë Rezin, mëti'ipë jam yajkutujkpën Sirië ets Peka, yë myaank yë Remalías, jampë yajkutukyën Israel, ojts jam nyëjkxtë Jerusalén ets tniwaka'antë. Jëtu'un tyajnatujktë ja Acaz, je'eyëp ko ka'ap ojts tjëkyepy tnitëkëtëty.

⁶ Ënet ja yajkutujkpë mëti'ipë jam Edom ënä'ämpën jatëkok tjä'äpëjky ja Elád ets Edom jatëkok tjä'ä'atëty; tä ja Edom ja'ayëty jam myiintë ets t'ëxwojptaaytyë ja Judá ja'ayëty jampë ënety tsyëënëtën ets ja Edom ja'ayëty jä'ä jam tsyënaaytyaknpëjktë Elád, tyampaat yë'ë jam tsënaaytyëp.

⁷ Ënet yë Acaz tkejxy yë kyukäjpxy jam ma Tiglat-piléser, jampë yajkujkyën Asiria ets t'ënëëmëty: Ya'atë mtuunpë jëtu'un yë'ë tä jeexyë xy'u'unk'atyën. E paaty yam npëjktsoyë ets minëty poj'am, minës nitsiptuunk maas yam yë yajkutujkpë Sirië ëxëëk xytyunyën.

⁸ Acaz ojts jap tju'ta'ay ja pu'ts pujxn ets ja poop pujxn mëti'ipë tsajptëkoty ijtpën ets mëti'ipë jap ma kutujkëntëjkën ets ojts tnamo'oy ja Asiria yajkutujkpë,

⁹ e yë'ë ënätyë ojts pyutëkëty ets poj'am tnipëjktakëy ja jyä'äy mëti'ipë tsip'ixëtyën, tä ojts tninëjkxtë ja Damaskë kajpn ets tjä'äniwany, jëtu'un jam tyajtso'ontaay ja ja'ayëty jampë tsyëënëtën ets ojts tyajnëjkta'ay jam Quir, ojts tyaj'o'ky ja Rezin.

¹⁰ Ko ja yajkutujkpë Acaz ojts jam nyijkxy Damaskë ets mëët nyäpyaata'anyë ja Tiglat-piléser, ja Asiria yajkutujkpën, ënät t'ijxy ja wintsë'këntyakn. Ënet tuknikejxy tu'uk ja noky ma jap myinyën këxkeetsy wi'ix ja wintsë'këntyakn y'ixëtyën e yë'ëts yajnikojtu'utëp ja teety Urías,

¹¹ ja teety Urías ojts tu'uk ja wintsë'këntyakn tyajkojy, jëtu'un tä ënety jam nokykyijxy myinyën, mëti'ipë ja yajkutujkpë Acaz të tkexyën jam Damaskë ets jëjp'ixy ojts tyaj'ity jëna'a ja yajkutujkpë Acaz wyimpity jatëkok ko jam tsyoonëty Damaskë.

¹² Ko ja yajkutujkpë jam jyä'äjty Damaskë ets t'ijxy ja wintsë'këntyakn, ënät tmëwinkoony ets tyäky tu'uk ja wintsë'kën;

¹³ ojts no'oky xämy ja y'ääypyajk y'ujts pajk, tpiky t'e'kxy ja y'uuky ets näjyëtu'un tuknixijkxy ja ne'pny ja wintsë'këntyakn mëët ja mëti'ipë ënety të tyajpëtsëmyën ma ja jëyujk të tyaj'ookyën, tuny jëtu'un ja nay'ëëw'oy näykyajpx'oyë.

¹⁴ E ja wintsë'këntyakn mëti'ipë tsuxkpujxnën, jampë ënety wintuuytsyow yajpaatyën ma ja tsajptëjkën, ojts yë Acaz tyajjëwä'äky ets tpëjktäky anëkëjxytsyow ma ja wintsë'këntyaknën; jä'ä ko itkujky ënety të wyë'ëmnë maa ja wintsë'këntyaknën mëët ja Dios ja tsyajptëjk.

¹⁵ Tääts tuknipëjky ja teety Urías ets ja wintsë'kën jam tno'ok txamëty ma ja wintsë'këntyaknën jopyëp, ets ja wintsë'kën mëti'ipë aaypyajk ujts pajkën jënäkxyëëw tyakëty, ëpëky tyajkpëty ja yajkutujkpë ja wyintsë'kën ets ja aaypyajk ujtspajk ets ja uuky; ëpëky näjyëtu'un ja wiinkpë mëti'ipë ja naax kajpn jyä'ä'ajtëpën. Näyjyëtu'un tuknipëjky ets tëkokyë ja ne'pny mëti'ipë ënety pyijkpyën ma ja wintsë'kën të y'ookyën yë'ë tyuknixijkxëp ja wintsë'këntyakn, e ja wintsë'këntyakn mëti'ipë aak tsuxkpujxnën jääyë tyunëty ko ënety tii yajnijawëja'any.

¹⁶ Ja teety Urías jëtu'un ojts winë tuunta'ay tä ënety ja yajkutujkpë Acaz të tyuk'ëne'emyën.

¹⁷ Tä ja yajkutujkpë Acaz jam tjëpëjky ja mëti'ipë myajts'ijtypyën ja nëë apëjkën ma jam ja tsajpkaatënaaytyaknën, aak pujxnëpë mëët y'oytyunyëtyën ets jam tsaakëjxm tpëjktäky ets jam y'itëty.

¹⁸ Ets jä'ä ko ja Asiria yajkutujkpë mëët oy nyäjyawëja'anyë, ojts jam tyajpëtsëmy ma ja Wintsën ja tsyajptëjkën ja tënaaytyakn mëti'ipë ojts yajkoyën ets jää tyunëty ko ja po'kxënxëëw tpaatëty; jëtu'un wyë'ëmëty ja tëjk'aaw ëwaatsë ko ja yajkutujkpë ënety myiny.

¹⁹ Ja nyikäjpxy nyimëtyä'äky ja Acaz ets tëkokyë mëti'ipë tyuunën kyajpxën, jap myiinta'ay ma ja nokyën mëti'ipë nyoky'ajtëpën ja yajkutujkpë jampë ojts y'ënä'ämtën Judá.

²⁰ Ko ojts y'o'knë jam tyajnaaxtëjkëtyë ma ja David ja kyajpnën, ma jam yajpaatën ja y'aptëjk. Yë'ë kutëjkëyë ma ja kutujktaknën ja myaank Ezequías.