2 Reyes 15 - Biblia Dc en Mixe de Quetzaltepec

Ma yajkutujkyën yë Azarías jam Judá

¹ Ma ënety y'i'px wëxtujk jëmëjtpetyën, ma ja Jeroboam yajkutukyën, jampë Israel y'ëne'emyën, jää jëmëjt ojts yë Azarías, yë myaank yë Amasías tyëkë yajkutujkpë jam Judá.

² Jä'ä ënety yë jyëmëjt majkmokx tu'uk ko tyëjkëy yajkutujkpë ets jam tyuuny Jerusalén wëxtyikxy mäjtsk jëmëjt. Yë tyaak jä'ä ijty xyëëwajtyp Jecolías, jam kyukajpnëty Jerusalén.

³ Yë tyu'unën kyajpxën yë Azarías oy yë Wintsën t'ijxy, jä'ä ko jëtu'un oy winë tuuny tä ënety ja tyeety Amasías oy winë të tunyën.

⁴ Je'eyëp ko ka'ap ojts tyajjëwa'kta'ay ja tëjk ma ja wiink tios tyaj'itën, ma ijty ja ja'ayëty ja wintsë'kën ets ja poom tyaktën ets tukwintsë'ëkëtë ja ka'apë Wyintsënëtyën.

⁵ Yë Wintsën ko jëtu'un t'ijxy, ojts ja yajkutujkpë tëytyuny mëët tu'uk yë pu'uts pa'am mëti'ipë ja'ay tyijtëpën lepra, yë'ë ënety pëjkëp ko ojts y'o'knë, jam jëkäm jyaak jyuuky'äjty, myëjëkäm'ajtyp ja kyutujkëntëjk, wiink ja'ay ojts ja tuunk tjaak yajtu'uye'ey mëti'ipë yë'ë ja patëpën; ja myaank Jotam jä'ä jaakkutëjkëyë ets ojts yë'ë yajkutuky ma ja naax kajpnën.

⁶ Ja nyikäjpxy nyimëtyä'äky ja Azarías ets tëkokyë mëti'ipë tyuunën kyajpxën jap myiinta'ay ma ja nokyën mëti'ipë nyoky'ajtëpën ja yajkutujkpëtëjk jampë ojts y'ënä'ämtën Judá.

⁷ Ko yë Azarías y'o'ky, jam tyajnaaxtëjkëtyë ma ja David ja kyajpnën, ma nyaaxtëjkëtyën mëti'ipë yajkutujktën. Yë'ë kutëjkëyë ja myaank Jotam.

Ma ja Zacarías yajkutukyën jam Israel

⁸ Ma ënety y'i'px majkmokx tëkëëk jëmëjtpetyën ja kyutujkën yë Azarías jam Judá, jää ojts yë Zacarías, yë Jeroboam yë myaank tyëkë yajkutujkpë jam Israel ets jä'ä ojts jam y'ëne'emy Samaria tëtujk po'o.

⁹ Je'eyëp ko ja tyu'unën kyajpxën ka'ap ja Wintsën oy t'ijxy, nän yë'ë poky ojts tuny mëti'ipë ja y'apteety Jeroboam, yë myaank yë Nabat, të tukyajpokytyunyën ja Israel ja'ayëty.

¹⁰ E yë Salum, yë myaank yë Jabés, ojts nyikäjpxytyunëty ets yaj'o'kë jam Ibleam ets Salum ojts yë'ë wyi'imy yajkutujkpë.

¹¹ Yë nyikäjpxy nyimëtyä'äky yë Zacarías, jap myiinta'ay ma ja nokyën mëti'ipë nyoky'ajtëpën ja yajkutujkpëtëjk, mëti'ipë ojts jam y'ënä'ämtën Israel.

¹² Jëtu'un'äämpy ojts y'atëy ja Wintsën ja y'aaw y'ayuk, ko t'ënëmaay ja Jehú, ko ja y'u'unk y'ëna'k ja Jehú je'eyë taxk najtskä'äxë yajkutuka'antë jam Israel.

Ma ja Salum yajkutukyën jam Israel

¹³ Yë Salum, yë myaank yë Jabés, jää ojts jyëmëjtëkë, ma ënety i'px majkmokx majktaxk jëmëjt yajkutujknën yë Uzías, jam Judá. Je'eyëp ko yë'ë je'eyë ojts tu'kpo'o jam Samaria yajkutuky,

¹⁴ jä'ä ko ojts jyä'ty jam yë Menahem, yë myaank yë Gadí, mëti'ipë tso'onën Tirsá ets jam Samaria jyä'äjty, yë'ëts ja Salum yaj'ookyë ets ojts yë'ë tyëkë yajkutujkpë.

¹⁵ Yë nyikäjpxy nyimëtyä'äky yë Salum ets wi'ix tnikäjpxytyu'unëyën yë Zacarías, jap myiinta'ay ma ja nokyën mëti'ipë nyoky'ajtëpën ja yajkutujkpëtëjk jampë ojts y'ënä'ämtën Israel.

¹⁶ Ënet ja Menahem tyajkutëkooy ja Tifsah ets jap winë tyajpëtsëëmtaay ma ja y'itjot nyaaxjotmën, timpyatso'ontäky jëtu'un jam Tirsá ets mëti'ipë ënety ja to'oxytyëjkëty ja u'unk maay pyaatantëpën wa'ats ojts tmoxmëku'umëtyä'äy. Paaty jëtu'un tuuny jä'ä ko ka'ap ënety ja kajpn ja tyëjk'aaw të tyaj'ëwatstë ets yë'ë tyëjkëy.

Ma ja Menahem yajkutukyën jam Israel

¹⁷ Ma ënety y'i'px majkmokx taxk jëmëjtpetyën, ma ja Azarías tyëkën yajkutujkpë jam Judá, jää ojts yë Menahem, yë myaank yë Gadí, tyëkë yajkutujkpë jam Israel ets majk jëmëjt ojts y'ëne'emy jam Samaria.

¹⁸ Je'eyëp ko ja tyu'unën kyajpxën ka'ap ojts ja Wintsën oy t'ixy, jä'ä ko ka'ap t'ëxmajtsy ja nëë poky mëti'ipë ojts ja Jeroboam, tuktuuntëkoyën ja Israel kajpn.

¹⁹ Jä'ä xëëw jä'ä jëmëjt, yë Pul, jampë yajkutukyën Sirië, tnija'ajty yë kajpn ets tyajnatujky, e yë Menahem jä'ä ojts tmo'oy yë poop pujxn i'px majktëkëëk kilë, yë'ë nätyukputëkëtëp ets ja kyutujkën tyajmëkta'akëty.

²⁰ Ja meeny mëti'ipë ënety yajmo'ojaanpën ja Asiria yajkutujkpë, yë'ë ojts yë Menahem t'amëtoy ja kumeenyjyä'äytyëjkëty ets këëk kujkmtsim tyaktëty ja poop pujxn. Jëtu'un'äämpy ja Asiria yajkutujkpë yajmëjuyëty, paaty ojts ka'ap nëkoo t'ëkmëma'ayënë ja kajpn.

²¹ Ja nyimëtyä'äky ja Menahem ets tëkokyë mëti'ipë tyuunën kyajpxën, jap myiinta'ay kuja'ay ma ja nokyën mëti'ipë nyoky'ajtëpën ja yajkutujkpëtëjk jampë ojts y'ënä'ämtën Israel.

²² Ko y'o'ky, yë'ë ojts kyutëkëty ja myaank mëti'ipë xyëëwajtypyën Pekaia.

Ma ja Pekaia yajkutukyën jam Israel

²³ Ma ënety myajkmokx jëmëjtpetyën, ma ja Azarías yajkutukyën jam Judá, jää ojts jyëmëjttëkë yë Pekaia, yë myaank yë Menahem jam Israel ets jam yajkutujky Samaria mäjtsk jëmëjt.

²⁴ Je'eyëp ko ja tyu'unën kyajpxën ka'ap ojts ja Wintsën oy t'ixy, jä'ä ko ka'ap t'ëxmajtsy ja nëë poky mëti'ipë ja Jeroboam, myaank yë Nabat, tyuktuuntëkooyën ja Israel ja'ayëty.

²⁵ E jamts ënety tu'uk ja tyuunpë mëti'ipë xyëëwajtypyën Peka, yë myaank yë Remalías, yë'ë ojts nyikäjpxytyunëty ets mëët nyäpyëjk nyämyajtsë yë Galaad ja'ayëty; ënät tukja'ajtë ma ja kutujkëntëjkën, jä'ä nyimay'atë niwëxtyikxymyajk. Ko tyaj'o'ky yë'ë ojts tkutëkë ma ja kutujktaknën.

²⁶ Ja nyikäjpxy nyimëtyä'äky ja Pekaia ets tëkokyë mëti'ipë tyuunën kyajpxën, jap ja kuja'ay myiny ma ja nokyën mëti'ipë nyoky'ajtëpën ja yajkutujkpëtëjk, jampë ojts y'ënä'ämtën Israel.

Ma ja Peka yajkutukyën jam Israel

²⁷ Ma wëxtyikxy myajkmäjtsk jëmëjt y'apetyën, ma yajkutukyën ja Azarías, jam Judá; jää ojts tyëkë yajkutujkpë yë Peka, yë Remalías yë myaank, jam Israel ets i'px jëmëjt ojts y'ëne'emy jam Samaria.

²⁸ E ja tyu'unën kyajpxën ka'ap ojts ja Wintsën oy t'ixy, jä'ä ko ka'ap ja nëë poky t'ëxmajtsy mëti'ipë ënety ja Jeroboam ja myaank ja Nabat, të tukyajpokytyunyën ja Israel ja'ayëty.

²⁹ Ma ënety ja Peka yajkutukyën jam Israel, ënety jyä'äjty jam yë Tiglat-piléser, jampë yajkutukyën Asiria ets ojts tjä'äpëky Iión, Abel-bet-maacá, Janoa, Cedes, Hazor, Galaad, Galilea ets tëkokyë jënu'un ja Neftalí ja y'itjotmën ets ja ja'ayëty mëti'ipë ënety jam tsënaaytyëpën aakjam ojts tsumy matsy nyëjkxta'atë Asiria.

³⁰ Ënet ja Oseas, yë myaank yë Elá, tnikäjpxytyu'unëy yë Peka, yë myaank yë Remalías, ojts tnipëtë'ëky ets tyaj'o'ky. Ko y'o'ky tääts ojts yë'ë tkutëkë, ma ënety më'i'px jëmëjt tyunyën ja Jotam, yë myaank yë Uzías.

³¹ Ja nyikäjpxy nyimëtyä'äky ja Peka ets tëkokyë mëti'ipë tyuunën kyajpxën, jap ja myiinta'ay ma nokyën mëti'ipë nyoky'ajtëpën yë kutujkëntëjkëty jampë ojts y'ënä'ämtën Israel.

Ma ja Jotam yajkutukyën jam Judá

³² Ma ënety myëmäjtsk jëmëjtpetyën, ma yajkutukyën yë Peka, myaank yë Remalías, jää ojts tyëkë yajkutujkpë jam Judá yë Jotam, myaank yë Uzías.

³³ Jä'ä ënety yë jyëmëjt i'px mëkoxk ko tyëjkëy jam Jerusalén yajkutujkpë ets jä'ä ojts jam y'ëne'emy majkmokx tu'uk jëmëjt. Yë tyaak jä'ä ijty txëëwaty Jerusá, yë'ë nyëëx yë Sadoc.

³⁴ Yë tyu'unën kyajpxën yë Jotam oy ojts yë Wintsën t'ixy, jëtu'un tä ënety winë oy të tunyën yë tyeety Uzías,

³⁵ ojts tyajkojy ja tsajptëjk'aaw jamtsow jëjp'am. Je'eyëp ko ka'ap tjëpëjktaay ja jëën tëjk ma ënety y'itën ja ka'apë tyiosëtyën ma ja ja'ay ja wyintsë'kën tyajktën ets ja pyoom tyajtoytyën.

³⁶ Ja nyimëtyä'äky ja Jotam ets tëkokyë mëti'ipë tyuunën, jap myiinta'ay këxja'ay ma ja nokyën, mëti'ipë nyoky'ajtëpën ja yajkutujkpëtëjk jampë ojts y'ënä'ämtën Judá.

³⁷ Jä'ä xëëw jä'ä jëmëjt ojts yë Wintsën kë'ëm tkexy yë Rezin mëti'ipë ënä'ämpën ma Siria ja'ayëtyën ets ja Peka Remalías yë myaank ets tsyiptuna'antë mëët yë Judá.

³⁸ Paaty ko ja Jotam ojts y'o'knë, jam tyajnaaxtëjkëtyë ma ja David ja kyajpnën, mëti'ipë y'ap'ajt y'ok'ajtën. Ko y'o'ky yë'ë ojts kyutëkëty yë myaank Acaz.