2 Reyes 10 - Biblia Dc en Mixe de Quetzaltepec

Ma ja Jehú tyaj'o'ktaayën ja Ahab ja jyiiky myëku'uk

¹ Jä'ä ënety yë Ahab yë y'u'unk jam Samaria yajpaaty nitëkë'px majk, ënät yë Jehú ojts yë noky kanaak tkäjxwä'kxy jam kajpntum, ma ja kutuunktëjkëtyën, mëj ja'atyëkëtyën ets ma ja ja'ayëtyën mëti'ipë ja Ahab ja y'ëna'k jam myëët'ajtëtëpën, jëtu'un t'ënëmaay:

² Miitsëty mmëët'ajtëp ja yajkutujkpë ja y'u'unk y'ëna'k, kyëwaayët, pyujxnwintëkäämpë, kyajpn mëti'ipë ta'tspëkyën, ja tyiypyujxn ets ja kyu'umën.

³ Win'ixtë tu'uk ja Ahab ja myaank mëti'ipë wijyën ets ixpëkyën, yë'ë mpëjkta'aktëp ma ja kutujktaknën ëts nitsiptunëty ja tyeety ja jyëën tyëjk ets ja y'u'unk y'ëna'k.

⁴ Ko jëtu'un ja nija'awën nyija'ajtëtë, mëk ojts tsyë'ëkëtë, tääts y'ënantë: Pën nimäjtskpë ja yajkutujkpë ka'ap të myäyë wyinkuwa'akëtëty, ¿ëtsajtëm wi'ix ënät njaaktimy'ëtëtsmëty?

⁵ Ënet ja kutuunk, ja mutsk yajkutujkpë, ja mëjja'aytyëjkëty ets ja u'unk'ijxpëty, tuknikäjxtë ja Jehú ets t'ënëmaaytyë: Ëëtsëty tyam ëëts nyajpaatë, ntunantëpës tii mni'ënä'ämëpën, je'eyëp ko tëëjës näkyajpxëtë ko ka'ap nikajpxpäta'antës tu'uk yë yajkutujkpë. Ti tëy, tyam jëtu'un ëëts n'ëna'antë ko mijts mnija'ap tii mtunäämpy.

⁶ Tä jatëkok tkejxy ja noky, jä'ä mëmäjtsk'okpë: Pën miitsëty m'ënantëp koos xypyukajpxëja'antë ets ko xytyuna'antë mëti'ipës nni'ënä'ämëpën, tyam npëjktsowtë ets xyajjënajktaayëtëty yë kyëpajk yë Ahab yë y'u'unk y'ëna'k mëti'ipë ojts m'ënä'ämëtën, jëpom xynyimintëtyës ya'atpë xëëw yam Jezreel. Ja nitëkë'px majkpë ja Ahab ja y'u'unk y'ëna'k, jam ënety y'itë ma ja ja'ay ja tyëjkëtyën mëti'ipë mëj'äämpy ijtëpën ma ja naax kajpnën, ma ënety të yääktën,

⁷ paaty ko ojts ja noky nyija'tëtë, ënätyë tyaj'o'ktë ja nitëkë'px majkpë ja yä'äy ëna'k; tääts tkupëjkëtyääytyë ja kyëpajkëty katsyjoty ets tkäjxtë jam Jezreel.

⁸ Ko jam jyä'äjty ja kukäjpxy, ënät t'ënëmaay ja Jehú: Tëë yajmëja'ty ja kyëpajkëty ja yajkutujkpë ja yu'unk y'ëna'k. Tä ja Jehú ni'ënä'ämëy: Jam nëjkx mäjtsk nikupupy pëjkta'aktë ma kajpn yajnitëkën, wä'än jam t'ity jopypyaat.

⁹ Komjëpom tääts tsyo'ony yë Jehú, jam nyijkxy ma ja naax kajpn të ye'eymyukyën ets y'ënäny yë Jehú: Miitsëty ka'ap nitii poky xymyëët'atë. Ëjts ojts nikäjpxytyunë yë yajkutujkpë ets nän ëjts kë'ëm të nyaj'ooky; e yë'ëjës nkanija'ap ¿pën jëtääjën tyaapë ja'ayëty të tyim yaj'o'kënëtë?

¹⁰ E tyam yajxon xynyijawëtëty ko tëkokyë mëti'ipë yë Wintsën nyikajpxën wi'ix ënety jyata'any kyëpäta'anyën ja Ahab ja y'u'unk y'ëna'k ets ja jyiiky myëku'uk, nitu'uk kyaninaxa'any. Tëkokyë mëti'ipë tyam yaj'ijxp yajtuunpën tëë yë Wintsën tnikajpxta'ay mëët yë tyuunpë Elías.

¹¹ E yë Jehú yë'ë ojts tjaakyaj'o'kta'ay ja Ahab ja jyiiky myëku'uk, ja tyuunpëtëjk mëti'ipë mëët oy ojts nyämyäyën ets ja mëti'ipë yajteety'ajtën jam Jezreel. Ni pën ojts tkayajwë'ëmy juuky.

¹² Jam tsyo'ony ets ojts nyijkxy Samaria, jam tu'ujotm Bet-equed, ma ja jëyujk këwent'ajtpë tjä'ä'atën,

¹³ jam mëët nyäpyatë ja Ocozías ja myëkä'äxtëjk, mëti'ipë ojts y'ëne'emyën jam Judá. Tä ja Jehú yajtëëwëtë: ¿Pën miitsëty? Tääts y'ëtsoowtë: Ëëts xymyëku'ukajtëp yë yajkutujkpë Ocozías, paatyës yaa nmintë yë'ëjës nku'ixëjantëp ja y'u'unk y'ëna'k.

¹⁴ Ënätyë ja Jehú t'ënëmaay ja tyuunpëtëjk: Matstë juuky tääpë ja'ayëty. Tä ja Jehú ja tyuunpëtëjk tmajtstë tääpë ja'ayëty ets jam tyo'kpujxtaaytyë ma Bet-equed itjotmën, mëti'ipë jëyujkëwent'ajtpë jyä'ä'ajtëpën. Jä'ä ënety nyiwinë'atë niwëxtyikxy myäjtsk, nitu'uk ojts tkayajwë'ëmtë juuky.

¹⁵ Ko ja Jehú ojts jam tsyo'onë ets nyëjkxnë, jam mëët tu'u'am nyäpyatë yë Jonadab, myaank yë Recab, yë'ë ënety nimiinëp ets kyajpxpo'kxa'anyë. Tä ja Jehú ojts tkajpxpo'kxy ets t'ënëmaay: ¿Wi'ix oy xynyiminyësë, jëtu'un tääjës ëjtsën ma mijtsënë? Jëtu'un, oypyës nyajmiinpy, jëtu'un y'ëtsooy ja Jonadab. Pën jëtu'un mooykyës yë mkë'ë, jëtu'un y'ënäny yë Jehú. Tä ja Jonadab myooyë ja kyë'ë ets ja Jehú jam mëët pyejty ma ja pyujxn wintëkäämpën.

¹⁶ Jam t'ënëmaay: Pajamyëët'ajtkës ets xy'ixëty wi'ixës mëk ni'ekyën yë Wintsën. Jëtu'un ojts nyëjkxtë jap pujxnwintëkäämpëjoty.

¹⁷ Ko jam tyëjkëtyë kajpnjotm, jam Samaria, wa'ats ja Jehú tyaj'o'ktaay ja Ahab ja y'u'unk y'ok mëti'ipë ënety juuky të jyaakwë'ëmtën. Ojts tyajkëjxta'ay jëtu'un tä ënety ja Wintsën të t'akäjpxyën mëët ja Elías.

Ma ja Jehú tyajkutëkoyën ja Baal ja y'awinax

¹⁸ Ok ja Jehú ja naax kajpn tyajmujky ets t'ënëmaay: Yë Ahab, ojts wäänë t'ëwtaty yë Baal, e ëjts wäänë ni'ikës yam n'ëwtatanë.

¹⁹ Paaty yam npëjktsoyës ets tëkokyë xymyëkajpxta'atëty ja ja'ayëty mëti'ipë yë'ë myëtuuntëpën ets y'ëwtajtëpën, näjyëtu'un mëti'ipë teety'ajtëpën ma Baal yë tsyajptëjkën, nitu'uk mëpaat kyatëkoy'äty, jä'ä ko tëëjës tu'uk ntuknipëjktaakë wintsë'kën mëti'ipës yë Baal ntukwintsë'ëkëjäämpyën. Pën tëkoy'ajtp nëjkxëp y'ooky. Je'eyëp ko yë Jehú paaty jëtu'un ja winma'any tpaty, mëët ko ënety të tuknipëjktaakë tyaj'o'kta'aja'any tëkokyë ja ja'ayëty mëti'ipë ja Baal y'ëwtajtëpën;

²⁰ ënät tnipëjktakëy tu'uk ja mëj xëëw ets ja Baal yajnixëëwtunëty.

²¹ Tä tkäjxwa'kxtaay ja kukäjpxy mëti'ipë ojts tuk'ëwa'anëtya'atën ja ja'ayëty ko ja Baal yajnixëëwtuna'any, e jëtu'un ye'eymyujktaaytyë tëkokyë ja ja'ayëty jam ma ja tsajptëjkën mëti'ipë ja Baal y'ëwtajtëpën. Nitu'uk kyatëkoy'äjty, yaj'ujtstë ja tsajptëjk.

²² Tä ja Jehú t'ënëmaay ja ja'ay mëti'ipë jap tsajptëkoty kyëwent'ajtypyën ja wit tujkx ets tjuutëty ets jä'ä tuktëkëtëty ja teetytyëjkëty ets tëkokyë pënjaty ja Baal y'ëwtajtëpën, tä ja ja'ay tjanty jyu'taay ja wit tujkxy.

²³ Ko xëëw tpaty tä ja Jehú mëët ja Jonadab jap tyëjkëtyë tsajptëkoty ma ja Baal ja tsyajptëjkën ets ja Jehú t'ënëmaay ja mëti'ipë ja Baal y'ëwtajtëpën: Yajxon xytyim ixtëty pën ka'ap jam pën ma miitsëtyën tyam yaa mëti'ipë yë Wintsën y'ëwtajtëpën, yi'iyë yaa yajtsojktëp mëti'ipë Baal y'ëwtajtëpën.

²⁴ Tääts tyëjkëtyë jap tsajptëkoty ja mëti'ipë mëtëy y'ëwtajtëpën ja Baal ets tmo'oja'antë ja wyintsë'kën, tukwinooka'an tukwinxama'antë ja jëyujk'ooky. E ja Jehú ojts tpëjktä'äky yë jyä'äy, tsiptuunpëtëjkëty ets t'ënëmaay: Pën yë ja'ay yajkekpy mëti'ipë miits tyam nkë'ëmooytyëpën ets xyaj'ooktëty, miits kë'ëm mkumëtowtëp.

²⁵ Ko ja Jehú tmooytyääy ja Baal ja wyintsë'kën, tä t'ënëmaay ja tsyiptuunpëtëjk: Tëkëtë ënät ets yaj'o'kta'atë tyaapë ja'ayëty jënu'un yaa tyam yajpaatën. Ni pën xykyayajkä'äktëty. Ënet ja Jehú ja tyuunpë tjanty yaj'o'ktaaytyë ja ja'ay ets jap tjëpijpëtsëëmtaaytyë. Ënet ok tyëjkëtyë ma ja Baal jap y'ityën,

²⁶ ets tukpu'ujëtyääytyë winë, tuktëjëtyääytyë ja kepyëty ets nino'ktaaytyë mëti'ipë ëmaay tyijtëpën.

²⁷ Ojts tjitë ja wintsë'këntyakn ma ja Baal y'ityën ets tukpu'ujëtyääytyë ja Baal ja y'awinax, näjyëtu'un ja nyitëjk ojts tjijtë'ëktë ets jëtu'unyë oywyi'ix tnipëjkpäjtë, jëtijtakn je'eyë jyaaktuuny; tyampaat jëtu'un jam oywyi'ix y'ity.

²⁸ Jëtu'un ja Jehú ojts tyajkutëkoy ja Baal jam Israel.

²⁹ Mëti'ipë tëy, ja Jehú ka'ap ojts winë aak'oy tuny, jä'ä ko yë'ë ojts ja poky tmëtëkë, mëti'ipë näjyëtu'un tyuuntëkooyën ja Jeroboam, yë myaank yë Nabat; mëti'ipë yajpokytyuunën ja Israel ja'ayëty, jä'ä ko ojts näjyëtu'un t'ëwtajnë ja awinax jëtu'unpë kyëxë'ëkyën tä tsajpkaajën, aak pu'ts pujxnëpë mëët y'oytyunyëtyën, mëti'ipë jam yajpatpën Dan ets Betel.

³⁰ Ënet ja Wintsën t'ënëmaay ja Jehú: Mëët ko mijts oy winë të xytyuny ets tëë jëtu'un xytyuny tä ënety ntsokyënës ja Ahab jyatëty kyëpätëty, tyamës nikäjpxy ko yë m'u'unk m'ok nëjkxëp yajkutuktë jeky, jäpaat ma ënety ja y'ok'u'unk y'ok'ëna'k jyuuk'atën.

³¹ E oy ojts jëtu'un ja Wintsën jya'ënë'ëmxëty, yë Jehú ka'ap ojts yajxon winë oy tuunta'ay tä ja Wintsën tjatsojkyën, jä'ä ko ka'ap ojts t'ëxmatsy ja ëxëëktu'un ëxëëk kajpxën mëti'ipë tyuunën ja Jeroboam ko tyajpokytyuuny ja Israel ja'ayëty.

³² Jä'ä xëëw yë Wintsën ojts tjëpëjkë ja Israel ja'ayëty ja nyaaxjot. Yë Hazael ojts tnipëtë'ëky ja Israel ja'ayëty jampaat ma ja tsyëpa'an nyaxtën ets maajaty ja tsëpa'an tmëët'atën:

³³ Tsyo'ontä'äky jam ëpa'tkë'ëmtsow ma ja Jordán mëjnëë jyënäkyën, nyäxy ma ja Galaad y'itjotmën ets y'ëwtity ma ja nyaaxjotëtyën ja Gad, Rubén ets Manasés; jam jatëkok tsyo'ontä'äky wiinkpë Aroer, winkon ma ja woknëë mëti'ipë yajtijpën Arnón ets Galaad ets Basán.

³⁴ Ja nyimëtyä'äky ja Jehú ets tëkokyë mëti'ipë tyuunën kyajpxën, jap ja yajpaaty ma ja nokyën mëti'ipë jyä'ä'ajtëpën ja yajkutujkpëtëjk jampë yajkutujktën Israel.

³⁵ Ko ojts y'o'knë, jam nyaaxtëjkëy Samaria ets yë'ë ojts kyutëkëty ja Joacaz.

³⁶ Jä'ä ojts yë Jehú yajkutuky jam Israel, i'px mëkoxk jëmëjt ets jam tsyënaay Samaria.