2 Pedro 3 - Biblia Dc en Mixe de Quetzaltepec

Ko ja Wintsën myinëty jatëkok

¹ Mëku'uktëjkëty, mëmäjtsk okpë ya'atë noky yam ntuknijayëtë. Jëtu'un miits tyam ntuknijayëtë ja kajpxwijën, ijxtëm ja mëjëwyiimpë ojts n'ëkjääpyënës ets yajxon xyjyä'äkyukëtëty.

² Ja'amyätstë mëti'ipë ja Dios ja kyäjpxynyajxpëtëjk jyääywyë'ëmtën tëëyëp, ets ënä'ämën tëyajtën mëti'ipë ja oy ayuk käjpxynyajxpëtëjk nyimëtyaktën.

³ Kopkpëky ko xynyijawëtëty, ma ënety ja naaxwiinyëtë kyëxanën, jää'atantëp ja ja'ayëty mëti'ipë ja Dios nyëxi'ikan tyukxi'ikantëpën, mëti'ipë ja y'ëxëëk winma'any yajtunantëpën,

⁴ ets tyajtëwa'antë: ¿Wi'ix ko jëtu'un ja Dios ja y'aaw y'ayuk y'ënä'äny ko ja Kristë myina'any jatëkok, ka'ap maa yaj'ixy? Tëëyëp ja n'ap'ajt n'ok'ajtëm y'o'ktaaynyëtë ets je'eyëm winë yaj'ixy ijxtëm ja naaxwiinyëtë tsyo'ontäkyën.

⁵ Tääpë ja'ayëty ka'ap tja'akyyukëtë ko tëëyëp yë tsajp kyojnë, näjyëtu'un yë naaxwiinyëtë, ko yë Dios mëët yë y'aaw y'ayuk të tyajpëtsëmy jap nëëjoty ets tyaj'ity nëë'itkujky.

⁶ Näy mëët ja komtuu ojts kyutëkoy ja naaxwiinyëtë.

⁷ E ja naax ets ja tsajp mëti'ipë tyam n'ijxëmën, tëë ja Dios tuknipëjktaakë ko tyajkutëkoyä'äny mëët ja jëën, ets ko tyajkutëkoyä'äny ja ëxëëkja'aytyëjk ko ënety ja tëytyu'unën ets ja paye'eyën tyunyë jyätyë.

⁸ Mëku'uktëjkëty, ja'amyätstë näjyëtu'un, ko ja Dios, tu'kxëëwpë, tu'uk mil jëmëjtën tyajnaxy; ets ja tu'uk mil jëmëjtpë tu'kxëëwën tyajnaxy.

⁹ Ka'ap n'ëna'anmëty ko Dios poxp ko tkuuytyuna'any ja tëëpë twaantä'äkyën, jëtu'un ijxtëm pënëty myäytyë tyajtën; jä'ä tëy mä'kxtujkp jëtu'un, yë'ë jyatuumpy ets jeexyë ni'ëmukë ja'ay jyotwinpijta'ay këtiipë pën y'ëyo'onpaatëty.

¹⁰ Ko ënety ja Wintsën myiny, jëtu'un nëjkx myiny ijxtëm ja mä'tspën tsuu koots tyëjktëkën. Ënet ja tsajp nëjkx mya'ta'ay, pëmiimpën nëjkx yajmëtoy, näjyëtu'un nëjkx tyooytyëkooytyä'äy mëët yë jëën ets ja naaxwiinyëtë mëët tu'kë'ëyë winë nëjkxëp ja Dios tpaye'eytyä'äy.

¹¹ Ko jëtu'un winë kyutëkooytya'aja'any, miitsëty ni'ikyë mëpaat wa'ats mjuuky'atë ets xywintsë'ëkëtëty ja Dios.

¹² Tsojk njëjp'ijxëm ja xëëw ma ja Dios myina'anyën ets tuntë wi'ix tsojk myinëtyën. Jä'ä xëëw nëjkx ja tsajp wyintëkoy mëët ja jëën; ets mëti'ipë ënety jää'ajtpën, tu'kë'ëyë jyiiywya'kxta'aja'any ko mëk tyoyëty.

¹³ E yë'ëts njëjp'ijxmëp jempyë tsajp, jempyë naax mëti'ipë Dios të twaantä'äkyën, ma tu'kë'ëyë winë oy ets mëtëy tyu'uye'eyën.

¹⁴ Paaty, mëku'uktëjkëty, tsojk njëjp'ijxëmë ko jëtu'un jyata'any; tuntë ja Dios ja tyuunk mapaat ja tiempo jyaak jää'atyën ets ja Dios mpaatëtëty akujk jotkujk; nitii poky nitii ëxëëkajtën xykyamëët'atëty ko ënety myiny.

¹⁵ Ja'aykyukëtë mëtoowkukëtë ja Dios ja myä'kxtujkën ko kyatsojkminy, yë'ë jëtu'un jyatuumpy ets ja nitsokën ni'ëmukë npatmëty, ijxtëm näjyëtu'un ja nmëku'uk'ajtëmën Pablo të mnijayëtën mëët ja wyijy'ajtën kyejyajtën mëti'ipë Dios të mye'eyën.

¹⁶ Ets aak jëtu'unpë ja ijxpëjkën kyäjpxyp myëtyäkpy ja Pablo jënu'un ja mëpëjkpëtëjk ja noky të tuknijayën. Tap mëti'ipë tsip yajwinmëtoopën, yë'ëts aak wiink jyä'äkyujkëtëp mëti'ipë ka'ap nëkoonëm ëmuumtu'ukjot ja Dios tmëpëktënëm; ka'ap jëtu'un tja'akyyukëtë ijxtëm ja Pablo tjatijyën, näjyëtu'un aak wiink tnikäjpxy tnimëtya'aktë ja Dios ja y'aaw y'ayuk ets kë'ëm nyäyaj'ëxëëktëkëtë.

¹⁷ Paaty mëku'uktëjkëty, tëë miits xy'ixtë xynyijawëtë wi'ix ya'atë y'ixëtyën, näkyëwent'atëtë këtiipë ja ëxëëk ja'ay mwin'ëën mwinxajëtëty ma ja mëpëjkën xymyëët'atën.

¹⁸ Yë'ë ni'ik nijawëtë ja Wintsën, ja yajnitsokpë Jesukristë, ets wäänëni'ik yääktë pätë ma ja tsojkën ja'awën. Nmëjja'aw nkënu'kxyjya'awëm tyam ets xëmëkyëjxm. Jëtu'un y'itëty.