2 Pedro 1 - Biblia Dc en Mixe de Quetzaltepec

¹ Simón Pedro, Wintsën Jesukristë tyuunpë ets y'ayuk kajpxnajxpë, mtuknijayëtë ya'atë noky miitsëty, mëti'ipë ja Yajnitsokpë Jesukristë nTios'ajtëmë të tmëpëktën.

² Ëxajëtë mëjwiin këjää ja kënu'kxën ets ja jotkujk'ajtën jä'äkyëjxm ko xynyijawëtë ja Dios ets ja nWintsën'ajtëm Jesús.

Mëpëjkpëtëjk jyuuky'ajtënëty

³ Mëët ja Dios ja myëk'ajtën, tëë xymyo'oyëmë tëkokyë mëti'ipë nyajmëyajtëmën ets ntukjuuky'ajtmëty ijxtëm tsokyën, ets n'ixy'ajtmëty ja mëti'ipë të xymyëkajpxëmën mëët ja myëj'ajtën kyutujkën ko winë të tyaj'ixyë.

⁴ Ets mëët ja jëtu'unpë tëë xytyukwinwa'anëmë ja këjääpë ets tsowpë, yë'ëkyëjxm xypyata'antë ja Dios ja y'oyajtën, myëj'ajtën ets xykyukä'äktëty ja mëti'ipë këjxp najxpën, yääyëpë naaxwiinyëtën.

⁵ E paaty ja mëpëjkënëty yë'ë mëët xyajka'pxtëty ko tii oy xytyuntëty; ko tii oy xytyuntëty yë'ë mëët xyajka'pxtëty ja ja'aykyujkën;

⁶ ja ja'aykyujkën, nämyajts'itë, mä'kxtujkën; ets ja mä'kxtujkën mëët ja wiinkutsë'ëkën,

⁷ ets ko m'itë ijxtëm ja Dios tsokyën, ënät xytsyoktëty ja mëku'uktëjkëty; ets ko ënety xytsyoktë ja mëku'uktëjkëty, ënät näjyëtu'un xytsyoktëty ni'ëmukë ja ja'ay.

⁸ Ko jëtu'un ya'atë tu'kë'ëyë xyajmëjtëkëtëty, ënät ja mjuukyajtën nëjkx wyinkëxë'ëktë ko ka'ap nyëkoopëty xynyijawëtë ja Wintsën Jesukristë.

⁹ Pën ka'ap tyajmëjtëkë ja jëtu'unpë oywyinma'any, jëtu'un ja jyatë ijxtëm tu'uk ja ja'ay wiintspën ëkë mëti'ipë ka'ap jëkämpaat y'ixyën, jä'äkyëjxm ko të tja'atyëkoytyë ko ja Kristë të yajpokywya'atsëtë ma ijty pyokytyuntë.

¹⁰ Mëku'uktëjkëty, yë'ëkyëjxm ko ja Dios të mtsokëtë ets të mwin'ixëtë, yajkopkpëktë ja oypyë winma'any këtiipë ja poky xy'ëktuunëtëty.

¹¹ Jëtu'un akujk jotkujk mtëkëtëty ma ja Wintsën Jesukristë Yajnitsokpë kyutujktaknën ets jam m'itëty xëmëkyëjxm.

¹² Paaty miitsëty xëmë ntukja'amyätstë oy të xyjyanijawëtë ja Dios ja tyiyajtën ets oy xyajtuntë mëti'ipë të ntuk'ijxpëktën.

¹³ Maas njaak juuky'ätynyëm, xypyatpës ets ntukja'amyätstëty ya'atë kajpxwijën.

¹⁴ Tëë ja Wintsën Jesukristë xytyuknijawës wäänë jyaak ijty ets ya'atë juukyajtën n'ëxmatsa'anyës;

¹⁵ je'eyëp ko mëjwiin jëjääjës yam winë njaaktuna'any ets yë'ë xyjyä'ämyätstëty ko ënety ëjts të n'o'knë.

Pënjaty y'ijxtën ja Kristë myëj'ajtën jyääntyajtën

¹⁶ Ja ijxpëjkën mëti'ipë tmooytyën ko ja Wintsën Jesukristë myina'any yaa naaxwiiny jatëkok mëët ja myëk'ajtën, ka'apës kë'ëmwinma'any ojts nma'kxtë etsës jëtu'un n'ëna'antëty, nwiinës mëët ntimy'ijxtë ja Wintsën ja myëj'ajtën jyääntyajtën.

¹⁷ Ojts n'ijxëm ko ja Dios Teety myooyë ja mëj'ajtën oyajtën, ko ja Dios Teety ja y'aaw y'ayuk y'ënäny: Ëjts ya'atë n'u'unk, mëti'ipës të nwin'ixyën.

¹⁸ Ojts kë'ëm nmëto'owëmë ja ayuk mëti'ipë tso'onpën tsajpjotm, tam ënety nyajpatëmë mëët ja Wintsën ma ja kënu'kxykyopkën.

¹⁹ Yë'ë ya'atë aaw ayuk yajtëytyëjkëy mëti'ipë tëëyëp ja Dios ja kyäjpxynyajxpëtëjk nyikajpxtën ets tyam miitsëty të xymyëpëktë. Ya'atë aaw ayuk jëtu'un yë'ë tä tu'uk yë kutë'kxnën akootstuuy, koonëm xyiinyëty ets ja jaayxyëëw pyëtsëmëty mëti'ipë kyutë'kxëpën ja jot winma'any.

²⁰ Yë'ë tim kopkpëky ko xyjyä'äkyukëtëty, ko nitu'uk ja Dios ja y'aaw y'ayuk kë'ëmwinma'any oy nkaja'akyujkëmëty.

²¹ Jä'ä ko ka'ap ja kyäjpxynyajxpëtëjk ojts yë'ë tnikajpxtë mëti'ipë kë'ëm myääytyëp tyajtëpën, kënu'kxymyëk'ajtën ojts winma'any myo'ojëtë.