2 Juan 1 - Biblia Dc en Mixe de Quetzaltepec

Ja tsojkën ja nyi'ënä'ämën nyitëyajtën

¹ Ja mëjja'ay Juan, tyajnaxy ja kajpxpo'kxën ma ja mëpëjkpëtëjkëtyën mëti'ipë ja Dios të wyin'ixëtën. Mëjwiin këjää miits ntsoktë njawëtë ets näjyëtu'un ni'ëmukë mëti'ipë të tnijawëtën ja tëyajtën,

² Paaty ntsoktë njawëtë ko tu'ukyë nmëpëjkëm ja tëyajtën ma njoot'ajt nwinma'an'ajtëmën ets mëti'ipë xëmëkyëjxm nmëët'ata'anëmën.

³ Wä'än ja Dios Teety ets ja y'u'unk Jesukristë mmo'ojëtë ja kënu'kxën, pa'ëyo'ow najts'ëyo'owën, jotkujk'ajtën, tëyajtën ets tsojkën ja'awën.

⁴ Akujk jotkujkës näjyawëty koos të npaaty ma miitsëtyën mëti'ipë kyuuytyuuntëpën ja ënä'ämën tëyajtën, mëti'ipë ja Dios të tnajts'ënä'ämën.

⁵ Mëyajtën mijts yam n'amëtoow npëjktsoowtëp ets nätsyojkëmëty nixim niyam. Ya'atë mëti'ipë yam ntuknija'ayëtëpën, ka'ap yë'ëjëty jemypyë ënä'ämën, yë'ë mëti'ipë tääyëmën.

⁶ Tsojkën ja'awën ënety yajmëët'ajtp ko yajpatuny ja ënä'ämën tëyajtën, yë'ë jëtu'un ënä'ämën'ajtp ko nätsyojk näjya'awëmëty ijxtëm të xynyijawëtën.

Ja mëtëypyë ja mëpëjkën ma Jesukristën

⁷ May ja win'ë'ëmpë yaa naaxwiiny mëti'ipë ënantëpën ko ja Jesukristë ka'ap myiiny tä ja'ayën. Pën jëtu'un ënantëpën, win'ë'ëmpë jä'äjëty ets myëtsip'ajtëp ja Kristë.

⁸ Näkyëwent'atëtë, këtiipë y'atëkoyëty ja ijxpëjkën mëti'ipë miits të myajtuk'ijxpëktën ets kä'pxy myajkumaytyëty.

⁹ Pën yajni'ikëp ja Kristë ja y'ijxpëjkën, ka'ap ënety mëët y'ity. Pën pyatuumpy ja Kristë ja y'ijxpëjkën, yë'ë ja Dios Teety ets ja Dios U'unk mëët yajpaaty.

¹⁰ Pën jam pën mtukninëjkxëtë ja ijxpëjkën mëti'ipë ja Kristë ka'ap tjä'äjëtyën, këtii xyajtëkëtëty mtëkoty ets ni xykyakajpxpo'kxtëty.

¹¹ Pën kyajpxpo'kxyp yë'ë ënety mëët yajpaaty.

Ko ja aaw ayuk jyëjpkëjxnë

¹² Mayës ja winma'any nmëëtëty mëti'ipë miits ntukmëmëtya'akantëpën, je'eyëp ko ka'apës noky'am n'ëkkëxja'ajanë, kë'ëm ntimnyinëjkxa'antë ets jam nkajpxmëty nmëtyakmëty wiinxë jëjpxë ets wäänë jotkujk nnäyjya'awëmëty.

¹³ Ja mmëkä'äxës ja y'u'unk y'ëna'k, mëti'ipë Dios të wyinwitsëtën, yë'ë mtuknikäjxëtëp ja kajpxpo'kxën. Jëtu'un y'itëty.