2 Crónicas 5 - Biblia Dc en Mixe de Quetzaltepec

¹ Ko kyojtaay tëkokyë winë mëti'ipë ënety ja Salomón të tni'ënä'ämën kyojëty ets ja Wintsën jä'ä yajtukmëyoxëty, Salomón ojts jap tsajptëkoty tmënëjkxta'ay winë; ja apëjk atu'unën mëti'ipë aak pu'ts pujxn mëët y'oytyunyëtyën, mëti'ipë ënety ja tyeety David të tukmëyoxyën ja Wintsën ets jap tpëjktaktaay ma ja Wintsën ja jyëën tyëjkën ma jap winë nyipetyën.

Ma ja Wintsën ja kyaaxë jap tsajptëkoty yajmënëjkxën

² Ënet ja Salomón tyajmujktaay jam Jerusalén ja mëjja'aytyëjk ja kopktëjkëty ets ja yujkyä'kpëtëjkëty mëti'ipë ijtëpën jam ma Israel ja'ayëtyën ets tyajtsoona'antë ja Wintsën ja kyaaxë jam Sión, tmënëjkxa'antë ma ja David ja kyajpnën.

³ Ma ja mëj xëëw ënety y'apaatën, ma wyëxtujk po'opetyën jajëmëjt, tä tyu'ukmujktaaytyë tëkokyë ja Israel ja'ayëty mëët ja yajkutujkpë Salomón.

⁴ Ojts myiinta'atë ja mëjja'aytyëjk, ja Leví ja'ayëty yë'ë kyiiyë'ktë ja kaaxë

⁵ tu'ukyë mëët tyajnëjkxtaaytyë ja nyiwittëjk ma ja näpyaatë y'ityën mëët yë Wintsën ets tëkokyë jënu'un ënety jap winë të tyunyën, tä ja apëjk atu'unën, tsim texy ets tëkokyë mëti'ipë ja Wintsën të yajtukmëyoxyën; yë'ë myënëkxtaaytyë ja teetytyëjkëty ets ja Leví ja'ayëty.

⁶ Ja yajkutujkpë Salomón ets ja Israel ja'ayëty mëti'ipë ënety të myuktën, aakjam yajpata'atë ma ja kaaxën, yë'ë jam yajktëp ja wintsë'kën may'äämpy; tä ja kupixynyën ets ja tsajpkaa yä'äyën.

⁷ Oknëm, ja teetyëjk tkëëyë'ktë ja Wintsën ja kyaaxë mëti'ipë myë'ijtypyën ja käjpxytyu'unën ets jap tmëtëjkëtyë tsajptëkoty, jap ma ja ëmaaypyën ja tëkot ma këxkojy y'itën ja awinax jëtu'unpë kyëxë'ëkyën ja'ayën käkn mëëtpë,

⁸ ya'atë awinax mëti'ipë jëtu'un këxë'kpën ja'ayën käkn mëëtpë, yenyëty ja kyäkn ënety të yaj'oytyuntë, paaty ja yajxon tnixajtë ja Wintsën ja kyaaxë ets nyixajtaaytyëp mëët ja mëti'ipë yajtukpakëëpyën.

⁹ Je'eyëp ko ja nyikepy ya'atë ja kaaxë yenyëty ijty oy, këxë'kp jappaat ma ja tëkotën mëti'ipë ëmaayën ets kënu'kxyën, jäpyë tëja'p ka'ap yaj'ixy; jëtu'un ojts wyi'imy, tyampaat je'eyëm jam jëtu'un.

¹⁰ Ma ja kaaxën yi'iyë ënety jap ijtp mäjtsk ja tsaatsetsy ma ja tëyajtën ojts ja Moisés tkëxja'ayën jap Horeb, ja tsaatsetsy mëti'ipë ojts ja Wintsën tni'ënä'ämën y'oyëty mëët ko ënety ja käjpxytyu'unën të tuny mëët ja Israel ja'ayëty.

¹¹ Ënet ja teetytyëjkëty jap pyëtsëëmtaaytyë ma ja tëkotën wa'atspë. Tëkokyë ja teetytyëjkëty tëë ënety tpata'atë ja näypyuj näjyä'ätsë, ka'ap ënety ninu'un të tjëjpye'eytyu'utë ja tyuunkëty mëti'ipë të yajtuknipëktën.

¹² Tëkokyë ja Leví ja'ayëty mëti'ipë ëëwtëpën, tä ja Asaf, Hemán ets ja Jedutún, mëët ja y'u'unk y'ëna'k ets ja jyiikytyëjk myëku'uktëjk, aakjam wya'ak o'oyëtyääytyë ma ja wintsë'këntyaknën aak xoxyëty mëët ja oywyit. Aaktam tmëët'atë ja xyuxnëty, kyä'tsnëty, y'akëty ets pyujxnëty mëti'ipë yaj'ënantëpën. Nimëko'px ja i'px ënety jam näjyëtu'un ëpëky ja teetytyëjkëty mëti'ipë ja pujxnxuxn yaj'ënantëpën.

¹³ Ënet tyëjkëtyë tu'knax xuxpë wojpë, ëëpë yaxpë; tukxoonta'aktë ja Wintsën ja xyëëw ets tyajnaxtë ja kukkajpxën ja'awëkyëtakkën; ja xuxn, ja ak ets ja pujxn awojpmujk jä'ä ja ëy tyukpa'ënantëp, jëtu'un y'ëna'antë: Win'ëw winya'axtë yë Wintsën, jä'ä ko oy yë'ë ets tsojkp ja'ap xëmëkyëjxm. Jää ma ënety jam jëtu'un y'ëwtën ënät ja Wintsën ja myëj'ajtën tkejxy jap tsajptëkoty, jëtu'un tyajnaaxkëtäky tä tu'uk yoots nëma'ajën,

¹⁴ e mëët ko jap wyintujktëkooy tsajptëkoty mëët ja yoots nëma'a, tääts ja teetytyëjkëty ka'ap ojts t'ëkjëkyäjpnëtë wi'ix ja wintsë'kën tkë'ëyaktëty jä'ä ko ja Wintsën ja myëj'ajtën y'oyajtën tëë ënety ja tsajptëjk tyajwintuky.