2 Crónicas 4 - Biblia Dc en Mixe de Quetzaltepec

Ja mëti'ipë jap tsajptëkoty tuunpën

¹ Salomón ojts tyajkojy tu'uk wintsë'këntyakn aak tsuxkpujxnpë, mëkoxk xajpk y'ayenyëty ets mëkoxk xajpk myëjwiinëty ets jä'ä kyëjxmëty mëkoxk xajpk ja kujkm.

² Ojts näjyëtu'un tyajkojy tu'uk yë nëë apëjkën mëjpë, yë'ë mëët y'oytyunyëty yë tsuxkpujxn. Pik t'oytyuuny, mäjtsk xajpk ja kujkm myëjwiinëty. Jä'ä kyëjxmëty tu'kxajpk ja tu'kkë'ënux ets pyikëty wëxtujk xajpk ja kujkm.

³ Jap pa'tkë'p ets na'ëwtity ma ya'atë nëë apëjkënën, mäjtskwitsy ojts tyajkëxkojy jëtu'unpë kyëxë'ëkyën tsajpkaajën, je'eyëp ko yi'inëm jatyëty; majkjaty tpëjktäky ma ja tu'kkë'ënuxpë y'ëwtityën ets tu'ukyë mëët tyajnämyätsyë ja nëë apëjkën.

⁴ Ya'atë jam tyajkëxmëta'aktë ma tnipojtsëtyën, ojts jap ix'ajp tyajkojtë yë potsy, tsajpkaajën kyëxë'ëky, aakyë'ë yajtuuntë pujxn tsuxkëtypë; aakjam nyajts'ixëtë anëkëjxmtsow, tëkëëk yajpaatë ëpa'tkë'ëytsyow, tëkëëk maatsow xëëw pyëtsimyën ets tëkëëk maatsow xëëw kyëtä'äkyën. Yë tyekyëty aak jootjoty kyuwa'akë, jëtu'unts jam kyëxmëtä'äky ya'atë nëë apëjkën.

⁵ Ja potsy, mëti'ipë ja nëë yajtuknipojtsëyën, jä'ä myäjpxyëty tu'ktsa'atyën; e ja y'aaw jëtu'un kyëxë'ëky tä tu'uk pëjyën ets jä'ä ja nëë jap tyëkë tëkë'px tëtujk mëj tsimën.

⁶ Ojts näjyëtu'un majk tyajkojy kë'ë apujën, aakyë'ë yajtuun tsuxkpujxn, mëkoxk tpëjktäky a'oytsyow ets mëkoxk tpëjktäky anajnytsyow. Tu'kë'ëyë apëjk atu'unën mëti'ipë ënety yajtuuntëpën ko ja wintsë'kën tyaktë mëti'ipë nino'okyën, jap tpujta'atë; e ja mëjpë nëë apëjkën jä'ä ojts yajtuknipëjktaakë ets jap ja teetytyëjkëty nyäpyuj nyäjyä'ätsëtëty.

⁷ Ojts näjyëtu'un tyajkojy majk jëëntooytyakn jëtu'un tä ënety ni'ënä'ämë myinyën ets jap tsajptëkoty tpëjktäky, mëkoxk a'oytsyow ets mëkoxk anajnytsyow.

⁸ Ojts tyajkojy majk yë kaaypyäjn ets jap tsajptëkoty tpëjktäky; mëkoxk a'oytsyow ets mëkoxk anajnytsyow. Yaj'o'oyëy majk mëj'a'ukën mëti'ipë aak pu'ts pujxn mëët y'oytyunyëtyën.

⁹ Ojts tyajkojy ëpëky tu'uk yë tëkot mëti'ipë ja teetyëjk jyä'ä'atëpën, ëpëky ja mëjtëkot, mëët yë nyitëjk'aaw ets tuknikooytyääy yë tsuxkpujxn.

¹⁰ Ja nëë apëjkën ja mëjpë jam tpëjktäky a'oytsyow, ma ja mëjtëkotën, jäätsow ma yajninëjkxy xëëwpëtsëtsyow.

¹¹ Hiram yë'ë ojts tyajkojy ja tu'ts, ja jä'pn ets ja a'ukën mëjjatyëtypë; jëtu'un tyaj'apatëy ja tyuunk jap ma ja Wintsën ja tsyajptëjk kyojyën, mëti'ipë ënety mëët ja Salomón të tkäjpxy'ätyën.

¹² Ja tuunk mëti'ipë ojts tuunk'atyën yë Hiram, yë'ë ja: Mäjtskpë ja tëjk xeny mëjjatyëtypë, ja pëkixëtypë ja tëjk kukëyë mëti'ipë jam najxpën ma ja mëjatyëtypë ja tëjk xenyën ets ja mäjtsk ja tëjk kuwitsë mëti'ipë yajtukuwitsëpën ja kyukëyë ja pëkixykyepy.

¹³ Taxk mëko'px ojts tyajkojy ja granadas pujxnpotsy pu'tsëtypë jëtu'unpë kyëxë'ëkyën ujts tëëmën ets jam yajkëxtëyëty ma ja kukapën ja pëkixypyë;

¹⁴ tääts ma ja majkpë ja potsy xyenyën ets ma ja majkpë ja nëë apëjkënën,

¹⁵ ma ja mëjpë ja nëë apëjkën, mëët majkmäjtsk ja tsajpkaa potsy ma pya'tkën,

¹⁶ ëpëky ja tu'ts, ja jä'pn ets ja jëënpajk wo'kn. Tu'kë'ëyë mëti'ipë yë Hiram ojts tyajkojyën, mëti'ipë ja Salomón mëët tkäjpxy'äjtyën, aakyë'ë tyukyaj'o'oyëy yë tsuxkpujxn, mëti'ipë me'eyëtyën.

¹⁷ Aak jinjoty tyaj'ë'tsy, jam ma ja mëjnëë jyënäkyën mëti'ipë yajtijpën Jordán, mëti'ipë itkujky wë'ëmpën ma ja Sucot mëët ja Saretán nyäpyäätyë.

¹⁸ May ojts Salomón winë tyajkojy mëti'ipë tsuxkpujxn mëët y'oytyunyëtyën, paatykyëjxm ka'ap ojts t'ëkmëmaay t'ëkmëtajnë yajkijpxëty.

¹⁹ Yë Salomón ojts tni'ënä'ämë kyojëty tëkokyë ja apëjk atu'unën, mëti'ipë ënety jap tunaanpën ma ja Wintsën ja tsyajptëjkën: Tä ja pu'ts pujxn wintsë'këntyaknën ets ja kaaypyäjn ma ja tsajpkääky yajkëxma'kxëtyën mëti'ipë ja Wintsën yajtukmëyojxpën,

²⁰ ets ja jëëntooytyakn mëët ja nyikutë'kxn, mëti'ipë näjyëtu'un aak pu'ts pujxn mëët y'oytyunyëtyën, jampë yajpaatyën jëjp'am ma ja tëkotën mëti'ipë ëmaayën ets jap xëmë kutë'kxy ja tëkot y'itëty, jëtu'un tä ënety myinyën ni'ënä'ämë;

²¹ ja jëtu'unpë kyëxë'ëkyën tä pëjyën, mëti'ipë pu'ts pujxn mëët y'oytyunyëtyën, ja kutë'kxn ets ja mä'ätë'kn, mëti'ipë aak pu'ts pujxn mëët y'oytyunyëtyën;

²² tääts ja mëti'ipë ja jëën yajtukpäänpi'tspën, ja mëj'a'ukën, ja jä'pn ets ja jëëntsijtk, aak pu'ts pujxnëpë mëët y'oytyunyëtyën. Näy pu'ts pujxn ënety mëët y'oytyunyëty ja tëjk'aaw ja nyi'akaj, mëti'ipë tëkotytsyowën, mëti'ipë y'akaj'ajtypyën ja tëkot mëti'ipë ëmaayën ets ja tyëjk'akaj ja mëjtsajptëjk.