2 Crónicas 3 - Biblia Dc en Mixe de Quetzaltepec

Ma ja Salomón tkojyën ja tsajptëjk

¹ Ënet ja Salomón ojts ëka'any tkojtso'ontä'äky ja tsajptëjk, mëti'ipë ja Wintsën tyukmëyoxäämpyën jam Jerusalén, ma nikopkën mëti'ipë yajtijpën Moriah, ma Wintsën ojts tëkok tmëkäjpxyën yë David, Salomón yë tyeety; jam it ma David ojts tnikäjpxyën ko jam ja tsajptëjk nëjkx jëna'a yajkojy, ma ënety jam Ornán ja tsajpmok tyajpajk'atyën, mëti'ipë jepusejë ja'ayën.

² Mäjtsk xëëw ënety y'äny, ja mëmäjtskpo'opë, ma myëmajktaxk jëmëjtpetyën maju'unëm tyëkën yajkutujkpë ja Salomón.

³ Ja potsy'ëjx mëti'ipë ja Salomón pyëjktakën, jä'ä y'ayenyëty tëkë'px xajpk ets mëkoxk xajpk myëjwiinëty.

⁴ Ja nyitëjkwiin mëti'ipë wintuuytsyowën, mëkoxk xajpk y'ayenyëty, näjyëtu'un myëjwiinëty ets näjyëtu'un kyëjxmëty. Yë Salomón, ojts tkooytyä'äy ja tëjkwiin, mëët yë pu'ts pujxn, jënu'un ja tëkotën,

⁵ ets tukpa'atwojpëtyääy yë wa'atsiin kepy, ja mëjtëkot ojts tuknikooytyääy yë pu'ts pujxn, tääts jam tyajnikojtutë yë tëëxy'ääy ets pujxntä'äky,

⁶ ojts tukpiw tukma'kxë yë oyëtypë tsaa. Ja pu'ts pujxn mëti'ipë yajtuuntën aakjä'ä oyëtypë.

⁷ Ojts ja tëkot tukwinpëjkëtyä'äy yë pu'ts pujxn, näjyëtu'un ja witsë, ja tëjkkaa, ja potsy ets ja tëjk'aaw tëjk'akaj, jam potsykyëjxm ojts tyajkojy tu'uk ja awinax käkn mëëtpë.

⁸ Ojts ëpëky tkojy tu'uk yë tëkot, mëti'ipë ëmaay itëpën, taxtujk kë'ënux myëjwiinëty. Ënet ojts tuknikooytya'atë yë pu'ts pujxn, paatykyëjxm may tyajtuuntë yë pu'ts pujxn, ojts tyajtuntë oy na'i'px mil mëj tsimën.

⁹ Ja pujxn mëti'ipë tyukuwojptën jä'ä ënety tu'ukjaty jye'emtyëty, mëkoxk mëko'px nuuky. Ojts näjyëtu'un tkooytyä'äy mëët yë pu'ts pujxn ja tëkot mëti'ipë këjxm ijtpën.

¹⁰ Ma jap ja tëkotën mëti'ipë ëmaayën, ojts tni'ënä'ämë ets jap mäjtsk kyojëty yë awinax mëti'ipë jëtu'un këxë'kpën tä ja'ayën käkn mëëtpë, mëti'ipë ojts näjyëtu'un yajtuknikoytyën yë pu'ts pujxn.

¹¹ Ja kyäknëty ja nimäjtskpë tsajpjotmëtë kukäjpxyëty, jä'ä y'ayenyëty mëkoxk xajpk; jä'ä ko ja tu'ukpë ja kyäkn jä'ä y'ayenyëty tu'kxajpk ja tu'kkë'ënux, mëti'ipë ja'ajtpën jampaat ma ja tsajptëjk potsyën ets ja tu'kpa'apë ja kyäkn ja tsajpjotmëtë kukäjpxy mëti'ipë näjyëtu'un ayenyën tu'kxajpk ja tu'kkë'ënux, nän jampaat jyä'ty ma ja kyäknën ja mëmäjtskpë ja tsajpjotmëtë kukäjpxy.

¹² Näyjyëtu'un ja wiinkpë ja tsajpjotmëtë kukäjpxy ja kyäkn nän tu'kxajpk ja tu'kkë'ënux y'ayenyëty, mëti'ipë ja'ajtpën jampaat ma ja tsajptëjk potsyën ets ja tu'kpa'apë ja kyäkn ja tsajpjotmëtë kukäjpxy mëti'ipë näjyëtu'un ayenyën tu'kxajpk ja tu'kkë'ënux nän jampaat jyä'ty ma ja kyäknën ja mëmäjtskpë ja tsajpjotmëtë kukäjpxy.

¹³ Ya'atë tsajpjotmëtë kukäjpxyëty, mëti'ipë ja kyäknëty mëkoxk xajpk y'ayenyëty, tänë ojts yajpëjkta'aktë ets jamtsow nyajts'ixëtë tëkot'itkujky.

¹⁴ Ojts näjyëtu'un tni'ënä'ämë ets kyojëty ja wit'atëëytyuk, mëti'ipë ukyën, tsaptsën ets linë wit, ojts näjyëtu'un jam tkëxjo'oky ja tsajpjotmëtë kukäjpxy.

Ja mäjtskpë ja tëjkpa'txeny

¹⁵ Salomón ojts mäjtsk yë xeny tyajwakë'ëky mëjatyëtypë, jä'ä kyëjxmëty tuktujk xajpk ja tëkëëk kë'ënux mëti'ipë wiintuuytsyow yajmëwin'ijxpäjtpën. Ets ja y'ok jä'ä myëjwiinëty tu'kxajpk ja tu'kkë'ënux.

¹⁶ Ojts näjyëtu'un t'oytyuny yë pujxn'axaatsy, jëtu'unpë kyëxë'ëkyën tä yë yo'knantsëmën, ets jam tpëjktäky ma ja potsykyopkën ja mäjtskpë mëti'ipë mëjatyëtyën, jä'ä jëtu'un ja potsy'atënaayë'ëk; ojts ëpëky t'oytyuny mëko'px ja pikëtypë wit'axuuymyuky mëti'ipë jam kyëxtëëyën ma ja pujxntä'äkyën.

¹⁷ Ojts yë mëjpotsy atënaayë'ëk tyajkojy ma ja tsajptëjkwiin yajwin'ijxpetyën, tu'uk a'oytsyow ets tu'uk anajnytsyow. Ja a'oy'äämpyë jä'ä ojts txëëwmo'oy Jaquim, e ja anajny'äämpyë jä'ä ojts txëëwmo'oy Bóaz.