2 Crónicas 2 - Biblia Dc en Mixe de Quetzaltepec

Ma ja Salomón ja käjpxytyu'unën tunyën mëët yë Hiram, Tirë yajkutukyën

¹ Salomón ojts tuknipëjktaakë ets tkoja'any tu'uk ja tsajptëjk mëti'ipë ja Wintsën tyëjk'atëpën ets ojts tuknipëjktaakë tkoja'any ja kyutujkëntëjk.

² Ënet tuknipëjky nitëkë'px majk mil ja ja'ay mëti'ipë ja kepy yajja'tëpën, nimajkta'px mil mëti'ipë jam tunkëjxm tsaawoptëpën, ets nitëkëëk mil tuknipëjky mëti'ipë ja tuunk nyi'ënä'ämëtëpën.

³ Ënet tnija'ayëy ja yajkutujkpë mëti'ipë txëëwajtpën Hiram, jampë kyukajpnëtyën Tirë, t'ënëmaay: Tun mëyajtën, ntsojkpyës ets näjyëtu'unës xy'oyjawëty tä ojts xy'oyjyawën ja nteetyës David, mijts ojts may xymyo'oy kepy ets t'oytyunëty ja kyutujkëntëjk ma jyuuky'atëtyën.

⁴ E ëjts, yë'ëtsës njaniwinma'ayëp nkoja'anyës tu'uk ja tsajptëjk, ma ëëts yë nWintsën y'itëtyën mëti'ipës nTios'ajtëpën ets yë'ë yajtuknikënu'kxëty, japts yajmo'ojëty ja aay ujts mëti'ipë pa'akxu'kpën mëti'ipë yajyajkpën no'oky xämy, ja tsajpkääky mëti'ipë yajkëxma'kxpën kaaypyäjnkëjxy, ets yajtukwintsë'ëkëty yë jëyujk ooky nino'oky nixämpyë jopy tsuu, ma po'kxënxëëwën ets ma po'o y'aanë'ëkyën ets maajaty ja xëëw tpaatyën mëti'ipë yë Israel ja'ayëty nyixëëwtuuntëpën.

⁵ Je'eyëp tëy ko ja tsajptëjk mëti'ipës nkojäämpyën, mëjjës nkoja'any, jä'ä ko yë Wintsën mëj këjää yë ni'ik këtiinëm jyëtu'unëty yë wintsëntëjk jääpë naaxwiinyëtë y'itën.

⁶ Je'eyëp ko tyaajës jatëkok nmay ntajy, ¿pën jëtääjën ëkmayëtëp tnikojëty yë Wintsën, tyam ni yë'ë tsajp kyamëtä'äky ets jam y'itëty? ¿Ets ëjts ënät tiijës jëtää xy'ëkmayëp, koos ënät nëkoo njamay njatajy jeexyë ja tyëjk nkojë ets yi'iyë jap ja poom jok yajyakëty ets yë'ë yajtukwino'ok yajtukwinxamëty?

⁷ E tyamts mijts npëjktsoy ets xytyunëty mëyajtën xykyäxëty yë ja'ay mëti'ipë tyukjajtypyën tuunk'atëty wi'ix yë pu'ts pujxn y'oyën, wi'ix yë poop pujxn y'oyën, tsuxkpujxnëty ets juunpujxnëty ets mëti'ipë tyukjajtëpën wi'ix yaj'oytyunyën yë wit oyëtypë mëti'ipë wyooxën tsapts, uky, ets tsu'unk; mëti'ipë näjyëtu'un nyija'awëtyëpën wi'ix jyo'oktëtyën ets mëët nyäpyutëkëtëty yë nja'ayëtyës mëti'ipë kukajpnajtëpën jam Judá ets jam Jerusalén ets mëti'ipë ojts yë nteetyës t'ënu'kxyën.

⁸ Jam näjyëtu'un xykyäxëty yë ajë kepy mëti'ipë tso'onpën Líbano ets mäjtskpëky yë oy kepy xykyäxëty: tu'uk mëti'ipë yajtijpën amëxan Ciprés ets tu'uk mëti'ipë yajtijpën amëxan Sándalo, ëjts nija'apës ko mja'ay janty oyëty yë kepy tpuxtë tka'atstë jam Líbano. E ëjts yë nja'ayës oyts näjyëtu'un nëjkx tputëkëtë yë mja'ay

⁹ ets tuknipuxëtëty wi'ix ja kepy tyuna'anyën ets may'äämpy tnipujxpätëty; jä'ä ko ja tsajptëjk mëti'ipës nkojäämpyën mëjës nkoja'any ets oy tsuj.

¹⁰ E mijts yë'ëts mnijawëp, koos ntukniyakëjäämpyës mtuunpëtëjk mëti'ipë ja'axy pyujxtëp ets kepypyujxtëp, ëjts yë'ëjës nyakäämpy taxk millon ja taxk mëko'px mil mëjtsim yë tsajpmok, näjyëtu'un mutsk mok ets taxk mëko'px ja wëxtyikxy myëjtsim yë uuky ets näjyëtu'un yë on.

¹¹ Ënet ja Hiram, ojts tu'uk ja noky tkäjxwinpity, ma t'ënëmaayën ja Salomón: Yë Wintsën, yë'ë të mpëjktä'äkyë ets m'ënä'äm myajkutukëty ma ja Israel kajpnën, mëët jä'äkyëjxm ko mëk tsoky tjawë ja nyaax kyajpn.

¹² Ets ëpëky, ja aaw ayuk tjaaknikajpxëy ets y'ënäny: Kënu'kxy mëjjawë y'ity yë Wintsën, mëti'ipë y'ëwtajtëpën yë Israel ja'ayëty, mëti'ipë yajkoj pyëjktakën ja tsajp ets naaxwiinyëtë, jä'ä ko tëë tmo'oy yë yajkutujkpë David, tu'uk myaank mëti'ipë wijyën kujkën ets nyija'ap winë, mëti'ipë tyam tyuknipëjktakëpën tkoja'any tu'uk yë tsajptëjk, mëti'ipë tyukmëyoxäämpyën yë Wintsën ets näjyëtu'un tkojja'any tu'uk yë kutujkëntëjk ma y'ënä'äm yajkutukëtyën yë'ë kë'ëm.

¹³ E tyamts ntuknikexy tu'uk yë ja'ay, mëti'ipë jëtu'unpë tuunk nyija'apën, wijypyë kujkpë ets ixpëkpyë: Hiram xyëëwajtyp.

¹⁴ Yë'ë yë myaank tu'uk yë to'oxytyëjk, mëti'ipë Dan jyä'äy'äjtypyën ets tyeety yaa yë Tirë kyukajpnëty. Yë'ë nyija'ap wi'ix tuunk'atëtyën yë pu'ts pujxn, poop pujxn, tsuxkpujxn, juunpujxn, tsaa oyjyätypë ets kepy; wit, mëti'ipë wyooxën tsapts, uky ets tsu'unk; yë'ë tyukjajtyp näjyëtu'un wi'ix winë oy tyaj'ijxëntëkëtyën, wi'ix jyo'okëtyën ets oy tyajkëxë'ëkëty ma tiijaty yaj'oytyuna'anyën ets tyuunmuka'any mëët yë mja'ay ets ja'ayëty mëti'ipë ojts yë mteety David tyajtunyën, ëjts yë nwintsënës.

¹⁵ E paaty ënät yam mijts n'amëtoy Wintsën ets xykyäxëty ja tsajpmok, ja mutsk mok ets ja uuky mëti'ipë të xywyinwanën.

¹⁶ Ëëtsëty tyam ja kepy mpuxtëtyës jam Líbano jënu'un xytyimyajmëyätyën ets nëëjoty ëëts nyajnëjkxa'antë kepykyijxy, jya'tëty jam Jope. Jamts xy'ëxajëty ets mijts mnija'ap wi'ix jam xyjyaak yajja'ty Jerusalén.

¹⁷ Ok ojts ja Salomón tuknipëjktaakë tjaaymyujkta'aja'any ja'ay mëti'ipë atsënaaytyëpën, jampë ënety tsyëënëtën ma Israel ja'ayëtyën; ëpëky mëti'ipë ja tyeety David ojts t'ëkjaaymyujkpën ets tyajmujktaaytyë ja ja'ayxyëëw, jä'ä nyiwinë'ajtë wëxtyikxy majktëkëëk mil ja tëtujk mëko'px.

¹⁸ Jamts ojts ja näypyutëkë t'amëtoy mëti'ipë yajja'tëpën ja kepy, jä'ä nyiwinë'ajtë tëkë'px majk mil ets majkta'px mil ja tsaatsëëmpë jampë kopkëjxmën ets tëkëëk mil ja tëtujk mëko'px ja ja'ayëty mëti'ipë ja tuunk nyi'ënä'ämëtëpën.