2 Crónicas 1 - Biblia Dc en Mixe de Quetzaltepec

Ma ja Salomón t'amëtoy tpëjktsoyën ja Wintsën ja wyijy'ajtën

¹ Ja Salomón, mëti'ipë ja David myaank'ajtypyën, ojts tyajmëj tyajkëjääjë ja y'ënä'ämën kyutujkën, mëëtkyëjxm ko ja Wintsën pyutëjkëyë mëjwiin këjää ets ojts kyëjääjë ja myëk'ajtën.

² Ënet tëkok tmëkajpxmujkta'ay ja Israel ja'ayëty: Mëti'ipë nyiwintsën'ajtën ja tsiptuunpëtëjkëty, kutuunktëjkëty, wintsëntëjkëty ets u'unkteety u'unktaak mëti'ipë ënety ijtëpën mëj'äämpy ma ja naax kajpnën.

³ Ko jëtu'un nyiye'eypyäjtaaytyë ënät tsyo'ontë tu'ukmukyë ets nyëjkxtë jam Gabaón, ma yajpaatyën ja wit tëjk ma ja näpyaatë y'ityën mëët ja Wintsën, mëti'ipë ënety ja Wintsën ja myëtuunpë Moisés të t'oytyunyën jam të'ëts'itjotm.

⁴ Yë David tëë ënety tmëtsoony yë Wintsën yë kyaaxë jam Quiriat-jearim ets ënety të tmënëjkxy jam Jerusalén ma tu'uk ja wit tëjkën mëti'ipë të tukni'oytyunën.

⁵ Ja tsuxkpujxn wintsë'këntyakn mëti'ipë ënety ja Besalel të t'oytyunyën, yë Urí myaank ets Hur y'ok'u'unk, jam ënety näjyëtu'un yajpaaty ja Gabaón, yë'ë mëët nyäwyinku'ixëty ja wit tëjk ma ja Wintsën ja kyaaxë y'ityën. Ja Salomón ets mëët ja may Israel ja'ayëty, ojts jam nyëjkxta'atë ets tpëka'antë ja nija'awën.

⁶ Ënet ja Salomón pyejty ma ja tsuxkpujxn wintsë'këntyaknën mëti'ipë jamën Wintsën wyintum, wintuuytsyowpë yajpaatyën ma ja wit tëjkën ma ja näpyaatë y'ityën ets jam tukwintsë'këy tu'uk mil ja jëyujk ooky nino'okpyë.

⁷ Jä'ä tsu'um ja Wintsën nyänyikëxë'kë ma yë'ëjën kuma'ayjoty ets y'ënëmaayë: Amëtoowkës tii mtimtsyojkpy, tyam nmo'ojëty.

⁸ Ënet ja Salomón t'ëtsooy ja Wintsën: Mijts janty'oy ojts xymyëët'aty ja nteetyës David ets tyampaat je'eyëm, ix mijts të xypyëjktä'äkyës yajkutujkpë ma ijty yë'ë yajkutukyën.

⁹ E mijts Wintsën, yë'ë yam ntuk'ënëëmëjäämpy ko ntsojkpyës ets y'atëwëty ja m'aaw m'ayuk mëti'ipë mtukmëtoowën ja nteetyës David, ix tëëjës xytyuknipëky n'ënä'ämëty ntu'uwinwowëtyës ja mnaax mkajpn, ma ja ja'ay jëtu'un nyimayëtyën tä naaxway naaxjokën.

¹⁰ E tyam, mijts yam n'amëtoopy npëjktsoopy xymyo'ojëtyës ja wijyajtën kujk'ajtën ets ja nija'awën wi'ix ntu'uwinye'eyëtyës ya'atë naax kajpn; ¿jä'ä ko, pën jëtää kë'ëmwinma'any ëkmayëtëp wi'ix ya'atë mëj kajpn tu'uwinye'eyëty?

¹¹ Ënet ja Wintsën t'ëtsooy ja Salomón: Mëët ko mijts yë'ë të xy'amëtoy ja wijyajtën kujk'ajtën ets ja nija'awën wi'ix ja naax kajpn xytyu'uwinwowëtyën, ma të mpëjktä'äkyën m'ënä'ämëty myajkutukëty, ets ka'ap yë'ë të xy'amëtoy ja kuwit'at, kumeeny'at ets ma ja mëtsip xynyi'ënä'ämën ets y'ooktëty tyëkoytyëty ets ka'ap të xy'amëtoy mjuukyajtën yonëty jyiitsëty, tyam nmo'ojëty mëti'ipë yam të xy'amëtoyën,

¹² tyam nmo'ojëty ja wijyajtën kujk'ajtën ets nija'awën ets nmo'ojäämpy ëpëky ja kuwit'ajtk, kumeeny'ajtk ets ja mëj'ajtën; ni'ik yam mijts winë nmo'oja'any këtiinëm jyëtu'unëty ja yajkutujkpëtëjk mëti'ipë të tyuntën ets mëti'ipë tunantëpnëm, ko mijts mpëtsëmëty.

¹³ Ënet jatëkok ojts ja Salomón wyimpijnë jam Jerusalén, tsyo'onë jam Gabaón ma ënety jam y'ityën ja wit tëjk ma mëët ja Wintsën ja näpyaatë y'ityën, ko ojts wyimpijnë Gabaón, jäänëm ojts tyuuntëjkënë jam ma ja Israel ja'ayëtyën.

Ma ja Salomón mëj këjää ja ajuuy ato'k tuunk'atyën

¹⁴ Yë Salomón, may tyajtu'ukmujky yë pyujxnwintëkäämpë ets kwaay. Tu'k mil ja taxk mëko'px ijty yë pujxnwintëkäämpë tmëëtëty ets majkmäjtsk mil yë kwaay. Tëkokyë ya'atë aakjam tkë'ëyajktaay ma ja kajpnën ma ja maypyujxn wintëkäämpë nyipetyën mëti'ipë myëtsiptuuntëpën ets ojts näjyëtu'un tukniwë'ëmy ma ja kyutujktaknën jam Jerusalén.

¹⁵ Ya'atë yajkutujkpë jëtu'un ojts winma'any tpaaty ets jam Jerusalén may yajpaatëty yë puts pujxn, poop pujxn tä may tsyaajën; ka'ap y'ëmaaytya'akëty oyëtypë kepy mëti'ipë ajë kepyën, jëtu'un tä ka'ap y'ëmaaytyä'äkyën oynatii kepy mëti'ipë jamën tunkëjxm kopkëjxm.

¹⁶ Ja maykyëwaay mëti'ipë ja Salomón jyä'ä'ajtypyën aakjam tyajtso'ontë Musri ets Cilicia, jä'ä ko ja y'ajuuy y'ato'kpë yë'ë ijty jam kë'ëm nëjkx timy jyuy timy kyëpätë.

¹⁷ Tu'uk yë pujxnwintëkäämpë mëti'ipë jap tso'onpën Egiptë jä'ä ijty tsyowpaaty naxy tëtujk kilë ja kujkm ja poop pujxn, e tu'uk yë kwaay jä'ä tsyowpaaty naxy tu'kkilë ja kujkm ja poop pujxn. Tëkokyë ja yajkutujkpëtëjk jampë y'ënä'ämtën ma Hit ja'ayëtyën ets ma sirië ja'ayëtyën aakyë'ë ijty mëët tyimjuy tyimtooktë yë Salomón yë jyä'äy.