2 Corintios 9 - Biblia Dc en Mixe de Quetzaltepec

Ko ja putëjkën myuky

¹ Ja näypyutëkë mëti'ipë jam myajmujktëpën mëti'ipë mmo'ojantëpën ja mëpëjkpëtëjk jampë Jerusalén yajpaatën, ka'ap y'ëkkopkpëky'ajnë ets miits ntuknijayëtëty jatëkok.

² Jä'ä ko nnija'apës ko mputëkëja'antë tsojkënkyëjxm, paaty akujk jotkujk të nëëmës ja Macedonia mëpëjkpëtëjkëty ko miits Acaya ja'ayëty junktë'ëy ja mwinma'any jëtu'un xypyaatë ko xyaka'antë ja putëjkën. Paaty näjyëtu'un të jyotmëkpëktë ja Macedonia ja'ayëty ko miits ja oyjyot oywyinma'any xymyëët'atë.

³ Jä'äkyëjxmës nkexy yë nmëku'uk'ajtëmë këtiipës ënëëmëët nwë'ëmëty ma ja ja'ayëtyën ko miits oy nimëtya'aktë. Ets miits jëjp'ixy mnäyaj'itëtëty.

⁴ Wä'änxyëpës nnëjkxëty mëët nitu'ukën ja Macedonia mëpëjkpë ets jam npaatëty ka'ap ënety xyjyëjp'ixtës; mëj nëjkx ntsëtyu'untëkëtës ko ënety miits të ntuk'ijxpätë; näjyëtu'un miitsëty nëjkxëp mtsëtyu'unpaatë.

⁵ Paatykyëjxmës të n'amëtoy yë mëyajtën yë nmëku'uk'ajtëmë ets nëjkx jëwyiin mni''ixëtë ets mputëkëtëty xyajka'pxtëty ja putëjkën mëti'ipë të xywyaanta'aktën. Jëtu'unts yajnijawëty ko miits xyaktë ja putëjkën tsojkënkyëjxm ko ka'ap pën m'akwanë'atëtë.

⁶ Ja'amyätstë ya'atë: Pën wäänë nip, wäänë ja pyëjktä'äky tyajpëtë'ëka'any; pën may nip, may ja pyëjktä'äky tyajpëtë'ëka'any.

⁷ Nitu'ukjaty xyaktëty mtsojkënkyëjxm ijxtëm të xytyukniwinmayëtën, ka'ap mäjtsk aaw mäjtsk jot ëkë ka'ap y'akwanëty, jä'ä ko Dios tsyojkpy yë ja'ay mëti'ipë jotkujk tii yäjkpyën.

⁸ Mmo'ojanëtëp miits ja Dios wäänëni'ik oymyëti'ipë kënu'kxënëty ets xymyëët'attëty xëmë mëti'ipë mtukjuuky'attëpën; näjyëtu'un nyatëkëty mëti'ipë mtukputëjkëtëpën ja ka'apë tii tmëëtëtyën.

⁹ Jëtu'un ja Dios ja y'aaw y'ayuk y'ënä'äny: Tëë mëjwiin këjää tmo'oy ja ëyoopëja'aytyëjk ets ja y'oyjä'äyajtën xëmëkyëjxm ja y'ita'any.

¹⁰ Dios, mëti'ipë yäjkpyën ja tëëmt mëti'ipë yajnip yajkojpën ets ja jë'kxy pëky mëti'ipë yajtukjuuky'ajtpën, yë'ë mmo'ojanëtëp tu'kë'ëyë winë mëti'ipë yajnipën ets tyajyona'any, jëtu'un oy wyintëwëty mpëjktä'äkyëty ko ënety mputëkëtë.

¹¹ Tääts ni'ëmukë xymyëët'attëty ja mjë'kxy mpëkyëty ets tjëkyäpëty xymyo'otëty winë mëti'ipë tii ka'ijtëtëp. Ja näypyutëkë mëti'ipë ënety miits mkäjxtëpën mëët ëëtsëty nëjkxëp ja nmëku'uk'ajtëmë tkukajpxëtë ja Dios.

¹² Ko yajtukninëjkxtëty ja näypyutëkë ja nmëku'uk'ajtëmë, ka'ap yi'iyë yajmo'oja'antë mëti'ipë ënety ka'ijtxëtëp, näjyëtu'un nnëmä'ämyëty wä'än ja Dios tkukajpxëtë.

¹³ Ko yë'ë tmëjjaw tjaantyjawëtëty ja Dios, jëtu'un ya'atë putëjkën tyajnikëxë'ëka'any ko miits xypyatuntë ja oy aaw oy ayuk mëti'ipë ja Kristë nyikäjpxypën. Näyjyëtu'un yë'ëjëty tmëjjawëja'antë ja Dios ko miits ja putëjkën xyaktë ma yë'ëjëtyën ets ma ja wiinkëtypën.

¹⁴ Ets ëpëky myajkënu'kxa'antë mëët ja tsojkën ja'awën, ko t'ixtëty ko ja Dios miits mkënu'kxëtë.

¹⁵ Yajkukajpxëp ja Dios ko tëë xymyo'oyëm ja mëj näynyamo'ojë ets ka'ap yajpaaty ja aaw ayuk wi'ix yajnimëtya'akëtyën.