2 Corintios 8 - Biblia Dc en Mixe de Quetzaltepec

Oy ja'ayajtën

¹ Mëku'uktëjkëty, yë'ë yam miits tyam ntuk'ëwaanëjantëp wi'ix ja Dios ja y'oyajtën të tyaj'ixyë ma ja mëpëjkpëtëjkëtyën jam Macedonia.

² Oy wi'ix të jyat të kyëpätë, akujk jotkujk yajpaatë; oy ja wit meeny mëj këjää të tkamëët'atë, jëtu'un ja putëjkën tyaktë ijxtëm jeexyë kyumeeny'atën.

³ Ëjts n'ijxyp nija'apës ko tëë ja wyit myeeny tyoxtë winë aaw winëjot wäänëni'ik këtiinëm ijxtëm të tuknipëjktaakëtën.

⁴ Mëk'äämpyës të xymyënu'kxta'aktë etsës nkupëktëty ja putëjkën mëti'ipë ja Dios ja jyä'äy yajtukputëkëtëpën.

⁵ Wäänëni'ik ja näypyutëkë tyajktë këtiinëm ijxtëm ënety njëjp'ixtënës. Je'eyë ojts nyäpyëjkta'akëtë Wintsën kyë'ëjotm ets tpatuuntë ja Dios ja tsyojkën.

⁶ Paatyës ja Tito të npëjktsowtë ets yë'ë tyajmukëty ja näypyutëkë ma miitsëtyën ets tjaakyajmukëty mëti'ipë miits kë'ëmtsojkën mjaakyakantëpën.

⁷ Jä'ä ko miitsëty këjxm ni'ik mnëjkxtë ma ja mëpëjkënën, ma aaw ayukën, ma winma'anyën, ma tuunkën, ma tsojkën ja'awënën mëti'ipë të xyjyatën ma ëëtsëtyën. Näyjyëtu'un mëpaat miits mwinpätë ets xyaktëty ja ayajk ako'onën.

⁸ Ka'ap miits n'akwanë'atë, yë'ëjës ntsojktëp ets xynyijawëtëty wi'ix ja wiinkëtypë tmëët'atën ja oyjyot oywyinma'any ets miits näjyëtu'un xyaj'ixëtëty ko tëy jaanty xytsyoktë ja mëpëjkpëtëjk.

⁹ Jä'ä ko miitsëty tëë xynyijawëtë wi'ix ja Wintsën Jesukristë mëyajtën të tunyën. Jesús jam y'ity tsajpjotm, myëët'ajtääpy tu'kë'ëyë winë, je'eyëp ko ojts myiny yaa naaxwiiny; jëtu'un ojts nyäpyëjktä'äkyë ijxtëm tu'uk ja ëyoopëja'ayën mëët jä'äkyëjxm ko të xytsyojkëm ets npatmëty ja jotkujk'ajtën.

¹⁰ Miits mtuk'oy'atantëp mëti'ipës yam nikäjpxypën ets xyajwintu'upëktëty mëti'ipë junktë'ëy myajtso'ontaktën; ojts miits jëyëjp xyajmujktsoontë ja putëjkën ets tsojkënkyëjxm ojts jëtu'un mmaytyë mtajtë.

¹¹ Näyjyëtu'un tyam tuntë ijxtëm të xyajtso'onta'aktën, winë aaw winëjot tuntë koonëm xyaj'apaatëtëty nitu'ukjaty ijxtëm mmëta'aktën.

¹² E pën winë aaw winëjot yoxäämpy ja myeeny, kyëwentëpëkäämpy ja Dios wi'ix pën myëtä'äkyën, Dios ka'ap pën t'amëtoy mëti'ipë ka'ap tii tmëëtëtyën.

¹³ Ka'ap yë'ëjëty ntijyës ets miits winë mtëkoy'ajtxëtëty ko ënety pën xypyutëkëtë, yë'ëkyëjxm jëtu'un n'ëna'anyës ets nixim niyam tu'knax winë nmëët'ajtmëty.

¹⁴ Tyam mmëët'ajtëp miits mëti'ipë yë'ëjëty ka'ap tmëët'atën, e ko ënety miits tii xykyamëët'atë yë'ëjëty myëët'atantëp winë, jëtu'un jyää'atëty ja tu'knax'at.

¹⁵ Ijxtëm ja Dios ja y'aaw y'ayuk kyëxja'ayëtyën: Ka'ap ojts nyatëkë mëti'ipë ja pyëjktä'äky may yajpëtë'kën ets ka'ap ojts tyëkoy'ajtxëty mëti'ipë ja pyëjktä'äky wäänë yajpëtë'kën.

Tito ets ja myëku'uktëjk

¹⁶ Nkukajpxëpës ja Dios ko Tito näjyëtu'un Dios të tyuktëkëty ets miits mmëmay mmëtajëtë ijxtëm ëjts miits të nmëmay të nmëtajtën.

¹⁷ Kyupëjk mëti'ipës ntuk'ënä'ämën, jä'ä ko kë'ëm ojts näjyëtu'un mmëmay mmëtajëtë. Tyam kyë'ëm tsojkën nëjkx mni''ixa'anëtë.

¹⁸ Mëët yë Tito nkexyës tu'uk ja nmëku'uk'ajtëmë mëti'ipë oy tsuj yanimëtyakpën ma ja mëpëjkpëtëjkëtyën, jä'ä ko oy tuny tkäjpxy ja oy aaw oy ayuk.

¹⁹ Näy kë'ëm ja mëpëjkpëtëjk të wyin'ixyë etsës mëët nnaxëty ntëkëty etsës xytyukputëkëty ma ja näypyutëkë myaj'amëtowtën ets ja Wintsën yajmëjjaw yajjaantyjyawëty ets jëtu'un nyajnikëxë'kmëty ko mputëkëja'anëm ja nmëku'uk'ajtëmë.

²⁰ Yë'ës nkatsojktëp ets pën nëkoo y'ëwëty kyajpxëty ma ya'atë näpyutëkë myukyën.

²¹ Paatyës oy winë ntuntë, ka'ap jyämyëty Wintsën wyintum, näjyëtu'un ma ja ja'ayëtyën.

²² Tyamës wiinkpë nkexy ja nmëku'uk'ajtëmë, mëti'ipë ëëts nnija'awëmën ko oy winë tuny ets ni'ik tyam ko miits mtukjotkujk'atëtë.

²³ Pën jam pën tyajtëy ja Tito, nëëmëtë ko tyamës ja mëët ets ko mëkës yam ntuntë ko miits mputëkëtë; e pën jam pën tyajnitëwë näjyëtu'un ja wiinkëtypë ja mmëku'uk'ajtëmë, nëëmëtë ko ja mëpëjkpëtëjk yë'ë të kyäxëtë ets ko tmëjjaw tjaantyjawëtë ja Kristë.

²⁴ Yajnikëxë'ëktë miitsëty ko mëk xytsyoktë ets ja mëpëjkpëtëjk nijawëtëty ko miits ntukjotkëta'aktë.