2 Corintios 7 - Biblia Dc en Mixe de Quetzaltepec

¹ Jëtu'un, mëku'uktëjkëty, yë'ë jëtu'un ya'atë waantä'äky nmëët'ajtëmë. Paaty nyaj'ijtmëty wa'ats ja ni'kx'ajt nkopk'ajtëm ets ja njoot'ajt nja'awën'ajtëmë näjyëtu'un ets ntsë'këmëty ja Dios, tsojk ntu'unëm ja oypyë ets ja wa'atspë Dios wyintuuy.

Wi'ix ja Corinto ja'ayëty jyotwinpitën ets tmëpëktë ja Tios

² Ja'amyäjtstëkës, ka'apës pën tii të ntukmëtuuntëkoy, ka'ap pën wi'ix të ntuntës, ka'apës pën të nyajtuuni'ikëtë.

³ Ka'apës yë'ëkyëjxm jëtu'un n'ëna'any ko miits ni'ojëtë, miits të nëëmëtë ko tyam n'aaw'at njot'atë ets tu'ukyë njuuky'ajtmëty ets tu'ukyë n'o'kmëty.

⁴ Ntukjoot'ëmëj'ajtëp ets ntukjotkëtaktëp miitsëty. Oyës ja ëyo'on npaaty, jotmëk ets jotkujkës näjyawëty mëët miitskyëjxmëty.

⁵ Je'eyës nja'ajtë jam Macedonia, ka'apës npo'kxtë, xii yaas ja jotmay npaatë. Aak tsip, wintuuy jëxkë'ëy ets xëmës n'aawjoty njootjoty ntsë'ëkëtë.

⁶ E ja Dios mëti'ipë yajjotkujk'ajtypyën ja mon tukpë yajpaatyën, tëëjës xyajjotkujkta'aktë ko të jyä'ty ja Tito.

⁷ Ka'ap yi'iyëty ko jyä'äjty, näjyëtu'un ko miits të xyjyotmëkmo'otë. Yë'ës të xytyukmëmëtyakta'ay koos miits xy'ixa'antë ets tëëjës xytyukmëmëtyä'äky ja mma'ayën mtajënëty ets ko miits xytyukjotmay'ooktës. Wäänë ni'ikës jotkujk të näjyawëty mëët ya'atë.

⁸ Oy miits wäänë të nyajmon të nyajtuktë mëët ko të ntuknikäxtë ja noky, tyam ka'apës nëkooyë n'ëkja'amyäjtskojnë. Ëjts tëëjës nmëmay nmëtajy ko miits tu'ktsojk të xymyëmay të xymyëtajtë ja noky.

⁹ Xëmë jotkujkës nyajpaaty. E ka'ap yë'ëjëty ntukjotkujk'atyës ko miits të mmontë mtuktë, yë'ëjës ntukxoontäkpy ko miits ja mma'ayën mtajën të myajjootwinpitëtë ma Tiosën. Miitsëty tëë ja ma'ayën tajën xymyëtänëtë ijxtëm ja Dios tukjotkëtä'äkyën, jëtu'un ka'ap miitsëty maa të nmëtëkoytyë.

¹⁰ Ja mo'onën tujkën mëti'ipë yajmënajxp yajjëjpnajxpën ijxtëm ja Dios tsokyën, yë'ë jëtu'un yajjootwinpijtp ets ja nitsokën npatmëty ets ka'ap tii nmëma'ay nmëtajmëty. E ko nmëma'ay nmëtajmëty jëtu'un ijxtëm ja mëti'ipë myëmaay myëtajtëpën ja naaxwiinyëtë winma'any, o'kën yë'ë tukpatp.

¹¹ Jëtu'un miits ja ma'ayën tajën të xymyëtänëtë ijxtëm ja Dios tukjotkëtä'äkyën. Ets ixtë ënät tyam wi'ix të wyimpëtsëmyën. Tëë xytyukpëtsëmtë ja aaw ayuk mëti'ipës të nnikäjpxyën, ojts mjoot'anpëktë ets tëë mtsë'ëkëtë. Ok ojts xyjya'ixa'antës ets xytyukkumëtoowtë ja pokyjyä'äy ja nyëë pyoky. Yë'ë miits myajnikëxë'ëktëp ko ka'ap myiitsëty të mtuuntëkoytyë.

¹² Jëtu'unts, ko ojts miits ntuknikäjxtë ja noky, ka'ap yë'ëkyëjxmëty ntuknikäjxtë ko jam ja tuuntëkoopyë ets mëti'ipë yajmëtuuntëkoopyën. Yë'ëkyëjxm ojts ntuknikäxtë ja noky ets yaj'ixëty Dios wyintum ko miits ëëtsëty xymyëmay xymyëtajtës.

¹³ Jä'äkyëjxmës njotkujk'atë. Ets ni'ik njotkujkta'aktës, jä'ä ko ja Tito jotkujk yajpaaty, ko miits të xyjyotmëkmo'otë.

¹⁴ Tëëyëm ënety ja Tito nëëmës ko miitsëty oy winë xytyuntë, ets ka'apës ja n'ayuk nëkoo të nyatëkë'aty. Jëtu'un ijxtëm tyiyëty jyääntyëty miits të ntukmëmëtya'aktën, näjyëtu'un tëy jaanty ja Tito të nëëmëtës: Ko ntukjotkëtaktëpës miits ja mtuunkëty.

¹⁵ Ets Tito mtsojkëtëp tyam wäänëni'ik ko tja'amyetsy ko miits xymyëmëtowtë ets ko mëët ja wintsë'kën ojts xykyupëktë.

¹⁶ Xëmës nxoontä'äky ko miits ni'ëmukë oy winë xytyuntë.