2 Corintios 5 - Biblia Dc en Mixe de Quetzaltepec

¹ Jëtu'un ëëtsajtëm tä tu'uk ja tëjkën naaxwiinypë yajpaatyën, tä wit tëjkën mëti'ipë ka'ap jeky y'ityën; je'eyëp ko nnija'awëm pën ya'atë tëjk wintëkoopy, tap ja Dios xytyukjëjp'ijxëm tu'uk ja tëjk tsajpjotm mëti'ipë xëmëkyëjxm ijtpën, mëti'ipë ka'ap jyä'äyëty të tkojyën.

² Paaty nmëkxäj n'o'kxäjëmë ko yaa naaxwiiny njaakyajpatëmë, ëëtsajtëm njatsojkëm ets jeexyë nëjkxënë jam tsajpjotm,

³ jëtu'un'äämpy oy ëëtsajtëm jëna'a ja wit tujkxy n'ëxmajtsmëty naaxwiinypë, ka'ap niwa'ats ëxwa'ats nwë'ëma'anëmë.

⁴ Ko yaa naaxwiiny njaakjuuky'ajtëmë mon tuk nmëkxäj n'o'kxäjëmë, jä'ä ko ka'ap njatsojkëmë ets yaa ntso'onmëty, yë'ë jayajtsojkp ets jeexyë ni'ikyë n'ajemyëmë.

⁵ Dios ya'atë jëtu'unpë të xytyuknipëjktakëmë ets të xymyo'oyëm ja Kënu'kxymyëkajtën ets yajnijawëty ko xypyaat'ajtëmë ja oyajtën mëti'ipë minaanpën.

⁶ Paaty xëmë ntukjoot'amëj'ajtëmë. Nnija'awëm ko yaa njaakjuuky'ajtëmë mëët ja ni'kx'ajt nkopk'ajtëm, ka'anëm nja'ajtëm ma ja Wintsën y'ityën,

⁷ Mëpëjkënkyëjxm njuuky'ajtëmë; ka'ap tsyam yaj'ixy.

⁸ Jëtu'un ëëtsajtëm ntukjoot'amëj'ajtëmë ets njatsojkëm ets jeexyë ja ni'kx'ajt nkopk'ajtëm n'ëxmajtsënë ets nnëjkxmëty juuky'ajtpë ma ja Wintsënën.

⁹ Paaty tsojk njaakjuuky'ajtëm ijxtëm ja Wintsën tukjotkëtä'äkyën, oy yaa njaakjuuky'ajtmëty ëkë oy ënety nnëjkxënë.

¹⁰ Jä'ä ko ni'ëmukë nëjkx nwa'këxë'këmë ma ja Kristë ja kyutujktaknën, ets nitu'ukjaty n'ëxajëmëty mëti'ipë xypyaat'ajtëmën ijxtëm ënety tii oy ka'oy të ntu'un të nkajpxëmën ko të njuuky'ajtëm ma ja ni'kx'ajt nkopk'ajtëmën.

Ko ja jotkujk'ajtën yajnimëtyä'äky

¹¹ Paaty ko yajnijawë ko ja Dios mëpaat yajwinkutsë'ëkë, paatykyëjxm ja ja'ay jëtu'un jyayaj'ënëëmëtë. Ko ja Dios wa'ats ëëts xy'ixy'atë ets ntsojktëpës ets miits näjyëtu'un xy'ixy'attëtyës.

¹² Ka'ap yë'ëjëty ko ëëts nämyëjawëtë, yë'ëjës ntsojktëp ets miitsëty amëj akëjxm mnäjyawëtëty ko ëëts nyam'atë, jëtu'un xymyëët'attëty ja winma'any wi'ix xy'ëtsowtëtyën ja ja'ay wiinkë'ëy akë'ëypyë tii nimëtya'aktën ets tëkatsypë ja jyot wyinma'anyëty.

¹³ Pën tsuu ëëts ja ja'ay xytyijtë, Tioskyëjxm ëëts ntsuu'atë; e pën ka'ap, miits mtuk'oy'atantëp.

¹⁴ Ja Kristë ja tsyojkën jya'awën yë'ë yajpatp ma ëëtsëtyën maju'unëm yajnijawën ko tëë tku'o'këtyä'äy ja ja'ay, ets ja ja'ay jëtu'un ni'ëmukë të y'o'kta'atë.

¹⁵ Ets ja Kristë tëë xykyu'o'këmë ni'ëmukë ets ja ja'ay ka'ap y'ëkjuuky'ajnëtëty ijxtëm kë'ëm tsoktën, Kristëkyëjxm jyuuky'atëty, mëti'ipë juukpyëjkën jatëkok.

¹⁶ Paaty ëëtsëty ka'apës ja njëëky nmëku'uk jëtu'un n'ëk'ijxnëtë ijxtëm ja naaxwiinyëtë ja'ayëtyën, oy ijty tëëyëp ja Kristë n'ixtës ijxtëm yë naaxwiinyëtë ja'ayëtyën, tyam ka'apës jëtu'un ja winma'any n'ëkmëët'ajnëtë.

¹⁷ Paaty tyam, pën tu'ukyë mëët ja Kristë y'ityën, jemyjä'äy yajpatnë; ka'ap y'ëkjëtu'un'ajnë ijxtëm të y'ityën, aak jemy tu'kë'ëyë të y'awinpijtaaynyë.

¹⁸ Tu'kë'ëyë ya'atë, aak Dios jëtu'un të tuknipëjktakëtyä'äy, mëti'ipë mëët ja Kristë të xyajnämyë'oypyëjkëmën ets të xymyo'oyëm ja tuunk ets ja ja'ay ntuk'ëwa'anëmëty wi'ix yë tsyip y'äkë tyaj'oyëtëtyën.

¹⁹ Jëtu'un yajja'akyukë ko ja Dios të tyajnämyë'oypyikyë ja naaxwiinyëtë ja'ay, ka'ap ja tuuntëko'oy kajpxtëko'oyën të tmëjpëjktä'äky, ëëts të xytyuknipëktë etsës ntuk'ëwaanëtëty ja ja'ay ya'atë aaw ayuk.

²⁰ Yë'ë të xytyuknipëjkëm ets ja Kristë nkutënä'ämyëty, ets jëtu'un tpaaty ijxtëm jeexyë miits mmënu'kxta'akëtën ja Dios, je'eyëp ko ëëts xyajkajpxtëp. Jëtu'un miits nmënu'kxta'aktë mëët ja Kristë ja xyëëw ets mnämyë'oypyëkëtëty mëët ja Dios.

²¹ Kristë nitii poky ojts tkatuny, je'eyë ko ëëtskyëjxm ja Dios pyëjktakë ijxtëm jeexyë ja poky tmëët'atyën, jëtu'unts ja Dios xyaj'ëwaatsëpëtsë'emëty mëët ja Kristë.